Moale Ia Noho, Hereva Momokani Idia Davaria Taudia Edia
ENA ruma ena atai daiutuna ta lalonai, Finland tauna ta ese buka ta ladana The Divine Plan of the Ages ia davaria. Maoromaoro ia duahia matamaia, bena nega daudau lasi inai bamona ia laloa: ‘Inai be hereva momokani; inai be hereva momokani.’ Atai daiutuna amo ia diho neganai, ena adavana ia hamaoroa, ia gwau: “Tomadiho momokanina lau davaria vadaeni.”
Unai tau ese hereva momokani ia davaria dalana be idau, to Iehova ena Witness taudia momo edia mamina be iena hegeregerena. Idia iboudiai ese hereva momokani idia davaria neganai idia abia moalena be idia gwauraia diba. Sivarai gabedia ese unai idia hahedinaraia.
Baibel Ena Hahediba Herevadia Momokanidia ese Moale Idia Havaraia
Margarita Königer be Munich, Germany ai, ia tubu daekau, Tanobada Ibounai Tuarina Iharuana ena nega lalonai. Nega momo ia itaia bomu ese ruma idia hadikadia bona lahi ese ia gabudia. Ena taihuna badana be tuari lalonai ia mase. Katolik dubu ena guriguri dekenai ia lao negadiai, Germany ena tuari taudia bona ena gunalaia tauna, Hitler, dainai idia gwauraia guriguridia ia kamonai. Tuari murinai, skolasip ta ia abia, United States lalonai koledi ta dekenai do ia sikuli totona. Unuseniai ia davaria taunimanima ese idia gado namo henia. Unai dainai ena lalona ai ia henanadai, taunimanima, idia edia ura korikorina be maino ai do idia noho taudia, be dahaka ese ia doridia, bena tuari negana lalonai idia abidadama heheni lasi bona idia inai heheni? Munich ia lou henia murinai, Iehova ena Witness taudia ia hedavari henidia, bena idia ida Baibel stadilaia karana amo, ena henanadai edia haere ia davaria. Ia gwau: “Baibel amo lau idia hadibaia, lauma dikadia ese taunimanima idia doridia . . . Baibel ese ia gwauraidia ‘tanobada gunalaia laumadia,’ ma ia gwau Satani ese ‘tanobada taudia ibounai ia koia noho.’ . . . Bese bona taunimanima ta ta edia kara, Diabolo ese ia ura henia karadia dika rohorohodia, lau laloa neganai, lau laloa unai haere be maoro bona lau abia dae diba!”—Efeso 6:12; Apokalupo 12:9.
Margarita be ma ia gwau: “Dirava ese tanobada ena hekwakwanai do ia kokidia dalana lau dibaia neganai, lau moale bada. Tanobada ena aonega taudia ese idia lalohadailaia dalana ta amo eiava gavamani ta amo do ia karaia lasi. Baibel ese ia hahedinaraia gavamani matamatana ta guba ai ese tanobada do ia biagua. . . . Iesu Keriso ese ia murinai idia raka taudia ia hamaoroa, inai bamona do idia guriguri be namo: ‘Oiemu Basileia do ia mai.’ . . . Egu lalona ia parara, unai basileia be gavamani korikorina ta, bona ia sibona amo maino korikorina be tanobada hegegemadai do ia vara diba.” Lagani 30 bamona lalonai, Margarita be misinari gaukarana ia karaia Africa tanodia ima lalonai—idia hanai laganidia 19 lalonai hereva momokani be manau taudia dekenai ia harorolaia, Ouagadougou, Burkina Faso ai.
Taunimanima momo edia sivarai be Margarita ena hegeregerena. Tuari neganai Kerisendom ena haroro taudia kahana kahana dekenai ese Dirava idia noia do ia hakwalimudia karana sivaraina idia kamonai neganai, idia kara, Margarita ia kara hegeregerena. Lalo-momokani taudia idia laloa Baibel ena hereva be maoro; ia gwau Dirava ese taunimanima edia tuari ia durudia lasi, to idia vara badina be “Satani ese tanobada taudia ibounai ia gunalaia noho.” Hereva momokani tahua taudia be gabeai idia diba, Keristani taudia momokanidia be “tanobada ena lasi” dainai, ena kara amo idia gini siri be namo. Unai kamonai matamata taudia idia itaia Iehova ena Witness taudia be unai bamona idia karaia, unai dainai idia diba momokani hereva momokani idia davaria vadaeni. Dirava ese kara dika ia koua lasi ena badina, bona nega daudau lasi iena Basileia amo maino bona noho namona tanobada ai do ia havaraia dalana, be idia dibaia namonamo neganai, unai bamona taudia edia helaro bona edia moale idia bada idia lao.—1 Ioane 5:19; Ioane 17:16; Mataio 6:9, 10.
Baibel Ena Hakaua Herevadia Momokanidia ese Moale Idia Havaraia
Ecuador tauna ta ladana Daniel Rosero ia laloa mauri be anina lasi, unai dainai kekero muramurana ia inua momo. Iena tomadiho oreana ese ia hamaoroa ena dokona ai mase bona hel lahina sibodia do ia davaria. Unai dainai ia laloa, “Lahi ese lau do ia gabua, unai dainai hari do lau inuinu!” Ena bese taudia 8 ia ubudia lasi, bona nega ibounai ena adavana, Delia, ia heatu henia. Vadaeni, Sunday daba ta, Iehova ena Witness taudia ese idia vadivadi henidia bona idia ida Baibel stadi idia hamatamaia neganai, ia senisi matamaia. Daniel ese Iehova ena Witness taudia edia sekit hebouhebouna ta dekenai ia lao negana ginigunana ai, ia diba hereva momokani ia davaria vadaeni. Ia gwau: “Gau iboudiai idia heau namonamo be lau hoalaia. Taunimanima be momo bona idia gado namo heheni. Idia bogaragidiai lalokau ena mamina lau abia. Ta lasi ese kuku ia ania. Hereva mirodia be lasi. . . . Lau laloatao, unai neganai lau laloa, ‘Inai be hereva momokani!’ Mase garina eiava tanobada dokona garina ese lau ia doria lasi. Orea ena goeva ese.”
Rosero besena ibounai be Iehova ena Witness taudia ai idia lao. Baibel ena hakaua herevadia idia badinaia lalonai, edia bese ena noho ia namo ia lao bona gau momo ai idia dabu lasi, guna idia dabu bamona. Delia Rosero ia gwau: “Baibel ena hereva momokani dainai egu noho ia namo ia lao. Bema Dirava ena Hereva ai abia lasi, egu natuna edia noho be dika herea. Idia 7 iboudiai idia bapatiso vadaeni bona idia noho namonamo. Hereva momokani dainai, noho matamatana bona moale matamatana lau davaria.”
Ma haida edia sivarai be Rosero besena ena hegeregerena. Hari inai negai hekwakwanai ese taunimanima momo idia hahekwarahia. Unai ena badina ta be, kara maoromaoro taravatudia Baibel lalonai be taunimanima momo ese idia matauraia lasi, taunimanima gunadia ese idia matauraia bamona. Tomadiho oreadia momo danu be unai bamona, badina be idia laloa edia orea taudia idia gwau henidia lasi be namo, eiava badina be idia laloa taravatu gunadia be anina lasi hari inai nega lalonai. Unai dainai, taunimanima momo bamona, guna Rosero besena be mai edia daradara ida idia noho, badina be Baibel ena heduru idia abia lasi. To, unai bamona manau taudia ese Dirava ena lalohadai kara maoromaoro bona ruma bese edia mauri dekenai be idia dibaia neganai, idia dibaia herevadia be karaharaga idia badinaia. Edia sivarai amo unai kara edia anina namona ita itaia diba.
Namona be Moale Ita Havaraia
To, unai dainai Keristani tauna be nega ibounai do ia moale sibona lasi. Taunimanima momo ese idia hekwarahilaia gaudia, hegeregere, gaukara lasi, gorere, bona mase, ese Keristani taudia danu edia lalona idia hametaua. Keristani taudia danu ese sibodia edia dika bona edia manoka idia tuari henidia hanaihanai. Baibel ia gwau Lota be Sodoma hanuana ena “lebulebu taudia edia kara dainai iena lalona be ia metau.” Keristani taudia mai edia kamonai ese kara dikadia idia itaia negadiai, edia mamina be iena hegeregerena.—2 Petero 2:7, 8.
To, hereva momokani idia davaria vadaeni taudia be mai edia namo. Hegeregere, Dirava ia abidadama henia tauna ese mase tauna ta dainai do ia lalohisihisi bada lasi, “Keristani lasi taudia bamona. . . . Idia ese mase amo toreisi lou mauri totona idia naria lasi.” Iena lalohisihisi be bada herea lasi. Hekwakwanai ma haida danu be unai bamona. Hereva momokani ia davaria tauna ia diba hari inai nega ena hekwarahi be do idia noho daudau lasi. Ia be mai ena helaro namona dainai, hekwarahi ia haheaukalaidia diba. Bema ia noho namonamo, unai danu ese ia durua.—1 Tesalonika 4:13.
Paulo ese Keristani taudia ia hamaoroa, ia gwau: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale.” (Filipi 4:4) Unai ese ia hahedinaraia, ena be moale ita abia diba, to ita reaia diba danu. Reana inai tanobada gunana ena lalo-hekwarahi ese iseda moale idia koua diba. Ma danu, Baibel ia gwau namona be moale ita havaraia, ia be Dirava ena lauma huahuadia ta. (Galatia 5:22) Bema hereva momokani oi dibaia noho bona ia dainai oi abia vadaeni bona oi abia noho lauma hahenamodia oi laloa, emu moale do ia maragi ia lao lasi. Dirava ese taunimanima edia mata ranudia be “edia matana dekena amo do ia dahua” oho bona “lalohisihisi, bona taitai, bona hisihisi be do idia ore momokani” negana ita lao henia lalonai, oiemu moale do ia bada ia lao.—Apokalupo 21:4.
[Picture on page 8]
Iehova ena Witness taudia edia hebouhebou lalodiai idia moale bona hebouhebou idia heau namonamo; taunimanima momo ese unai idia hoalaia