Edia Abidadama Tohotohoa

Iesu amo Dika Gwauatao Karana Ia Dibaia

PETERO ese Iesu ia raraia bona Iesu ese Petero ia raraia karana be Petero ese ia laloaboio diba lasi. Petero ia itaia Iesu be ia lalohisihisi, a? Unai ita diba lasi; to Baibel ia gwau “Lohiabada ese iena matana ia giroa Petero dekenai, ia itaia noho.” (Luka 22:61) Iesu ese Petero ia raraia neganai, Petero ia laloparara ia be kerere badana ta ia karaia. Petero ia diba Iesu ese ia perovetalaia gauna​—⁠ena Biaguna do ia gorea herevana​​—⁠be ia dekenai ia guguru. Petero be ia lalohisihisi bada, reana iena mauri lalonai unai dina ai ia vara gauna ia laloaboio diba lasi.

To, Petero ia lalomanoka lasi. Iena abidadama be goada dainai, dala ia noho iena kerere ia hamaoromaoroa bona Iesu amo mai anina bada gauna ta ia dibaia. Unai be dika gwauatao karana. Ita ta ta ese unai kara ita dibaia totona, namona be Petero ese dika gwauatao karana ia dibaia dalana ita itaia.

Petero be Iesu amo Gau Momo Ia Dibaia

Petero be hua siks gunanai ena gabu Kaperanauma ai, Iesu dekenai ia lao bona ia nanadaia: “Lohiabada e, lauegu tadikakana do ia hadikaia lau dekenai, bona iena dika do lau gwauatao ela bona nega hida? Nega 7, o?” Petero ia laloa unai bamona do ia karaia be kara namona, badina unai negai idia noho tomadiho gunalaia taudia be taunimanima idia hadibaia nega toi sibona dika idia gwauatao diba! Iesu ia gwau: “Nega 7 sibona lasi, to nega 70 x 7.”​—⁠Mataio 18:​21, 22.

Iesu ena hereva ena anina be Petero dekenai ia kara dika tauna ena kerere be buka ta ai ia torea, a? Lasi; Iesu ena hereva, nega 70 x 7 ena anina be, ta ena kara dika gwauatao karana be mai ena hetoana lasi. Iesu ese ia hahedinaraia Petero be iena negai idia noho taudia momo edia kara ia badinaia, idia be kara auka taudia bona ta ena kerere idia laloa momo, hegeregere buka ta dekenai idia torea. To, Dirava ia ura taunimanima be dika idia gwauatao be namo.

Petero be Iesu ida ia hepapahuahu lasi. To Iesu ena hereva ese iena kudouna ia hamarerea, a? Nega haida ita ura dikadika ma haida ese ita karaia kererena idia gwauatao be namo, unai ia vara neganai, ita laloparara dika gwauatao karana be mai anina bada. Unai dainai, Iesu ena mase dinana ia kahirakahira negana ai idia vara gaudia mani ita laloa. Unai nega aukadia lalonai, Petero be kerere momo ia karaia dainai, Iesu ese ia gwauatao be namo.

Iesu be Nega Momo Petero Ena Dika Ia Gwauatao

Unai hanuaboi be mai anina bada, badina unai be Iesu ena hanuaboi ginigabena. Iesu ia ura ena aposetolo taudia dekenai gau momo ia hadibaia​—⁠hegeregere, manau karana. Ia be haheitalai namona ia hahedinaraia, badina mai manau ida ena aposetolo taudia edia aena ia huria, unai gaukara be hesiai taudia ese idia karaia. Matamanai, Petero be Iesu ese ia karaia karana dainai ia daradara. Bena ia ura lasi Iesu ese iena aena ia huria. Unai murinai Iesu ia hamaoroa iena aena do ia huria sibona lasi, to ena imana bona kwarana danu! Iesu be ia haheauka bona mai manau ida ia karaia karana ena namo bona ena badina ia herevalaia.​—⁠Ioane 13:​1-​17.

To, daudau lasi murinai aposetolo taudia be sibona edia huanai daika do ia bada idia hepapahuahulaia. Petero be unai kara lalonai ia vareai danu. Iesu be mai manau ida edia kerere ia hamaoromaoroa bona ia idia badinaia noho dainai ia hanamodia. To Iesu ia peroveta, idia ibounai ese ia do idia rakatania. Petero ia gwau herevana do ia mase, to ia ese Iesu do ia rakatania lasi. To danu Iesu ia peroveta, ia do idia hamasea hanuaboina ai kokoroku be nega rua ia do boiboi lasi neganai, Petero be nega toi ena Biaguna do ia gorea. Petero ia gwau herevana aposetolo taudia haida ese Iesu do idia rakatania, to ia be unai bamona do ia karaia lasi!​—⁠Mataio 26:​31-​35; Mareko 14:​27-​31; Luka 22:​24-​28.

Iesu be Petero ena kara dainai ia hesiku, a? Momokani, unai nega aukadia lalonai, Iesu be ena goevadae lasi aposetolo taudia edia kara namodia sibona ia laloa bada. Iesu ia diba Petero be ia do ia rakatania, to ia gwau: “Lau guriguri vadaeni oi dainai, oiemu abidadama do ia moru lasi totona. Vadaeni lau dekenai do oi giroa mai neganai, be oiemu tadikaka dekenai goada do oi henia.” (Luka 22:32) Iesu ia diba momokani Petero be ena kerere do ia hamaoromaoroa bona Dirava ena hesiai gaukara do ia karaia lou. Iesu ese kara dika gwauatao karana ia hahedinaraia namo herea!

Getesemane umana ai, Iesu be nega momo Petero ena kerere ia hamaoromaoroa. Iesu ese Petero, Iamesi bona Ioane ia hamaoroa, do ia guriguri negana ai idia gima noho be namo. Iesu ena lalona ia hisihisi bada bona ia ura heduru ia abia, to Petero bona ma haida be idia mahuta loulou. Iesu be inai hereva ia gwauraia amo ia hahedinaraia edia dika ia gwauatao bona edia hemami ia lalopararalaia, ia gwau: “Lalona be ia ura, to tauanina ia manoka.”​—⁠Mareko 14:​32-​38, NW.

Daudau lasi murinai, hutuma idia ginidae, mai edia diari gaudia, kaia bona au. Unai nega ai aposetolo taudia idia naria namonamo bona mai aonega ida idia kara be gau badana. To, Petero be kara ta ia karaia haraga, kaia ia abia bona hahelaga tauna badana ena hesiai tauna, Malako, ena taiana ia utua oho. Iesu be mai manau ida Petero ena kerere ia hamaoromaoroa, hesiai tauna ena taiana ia hanamoa, bona Baibel ena hakaua herevana, dagedage lasi karana ia herevalaia. Iesu murinai idia raka taudia dekenai unai hakaua herevana be mai anina bada. (Mataio 26:​47-​55; Luka 22:​47-​51; Ioane 18:​10, 11) Petero be kerere momo ia karaia vadaeni, bona Iesu ese ena dika ia gwauatao. Petero ena sivarai ese ita ia hadibaia “ita ibounai ese nega momo kerere ita karaia.” (Iamesi 3:⁠2) Dina ta ta ai Dirava ese ita ta ta eda dika ia gwauatao. To, Iesu idia dogoatao hanuaboina ai Petero dekenai gau momo do idia vara. Ia be kerere badana ta do ia karaia.

Petero Ena Kerere Badana

Iesu be hutuma ia hamaoroa bema idia be ia idia tahua, namona be ena aposetolo taudia idia siaia. Hutuma be Iesu idia guia neganai, Petero be idia ia raraia sibona. Bena ia bona aposetolo taudia ma haida be Iesu idia rakatania.

Petero bona Ioane be Hahelaga Tauna Badana Ana ena ruma kahirakahira ai idia gini, unuseniai Iesu idia abia lao idia nanadaia totona. Hutuma ese Iesu be gabu ma ta dekenai idia abia lao neganai, Petero bona Ioane be edia murinai idia raka, to ‘idia raka kahirakahira momokani lasi.’ (Mataio 26:58; Ioane 18:​12, 13) Petero be mai gari lasi ida hutuma edia murinai ia raka. Hutuma be tuari kaia bona au idia dogoatao, bona Petero be idia ta ia haberoa vadaeni. To, Petero be ia gwauraia herevana ia badinaia lasi​—⁠ia be mai ena ura ida ena Biaguna ida do ia mase, herevana dahaka ia vara.​​—⁠Mareko 14:⁠31.

Petero bamona, hari inai negai momo be Keriso murinai ‘idia raka kahirakahira momokani lasi’​—⁠ta ese idia ia itaia diba lasi bamona. To gabeai Petero ia gwau, Keriso ena murinai ita raka dalana tamona be ia kahirakahira ita noho, gau ibounai dekenai iena kara ita tohotohoa, herevana dahaka ia vara.​—⁠1 Petero 2:​21.

Petero be mai aonega ida Iesu idia dogoatao taudia edia murinai ia raka lao ela bona Ierusalema ena ruma badana ta ena geiti badinai ia ginidae. Unai be Kaiapa ena ruma, ia be taga tauna bona siahu bada hahelaga tauna badana. Unai bamona rumadia be nega momo ariara ai idia haginia, bona vairana kahanai geiti ia noho. Petero be geiti badinai ia ginidae neganai, geiti naria taudia ese idia koua ia vareai lasi totona. Ioane be geiti lalonai ia vareai vadaeni, to ia giroa lou bona geiti naria kekenina ia hadibaia Petero ia vareai totona. Toana be Petero be Ioane kahirakahira ia noho lasi; bona ia ura lasi ruma lalonai ia vareai bona ena Biaguna ena badinai ia gini. Ia be ariara dekenai ia noho, unuseniai hesiai taudia haida be paraka dainai lahi badinai idia gini, bona ia itaia Iesu idia samania koikoi taudia idia raka vareai bona raka-lasi.​—⁠Mareko 14:​54-​57; Ioane 18:​15, 16, 18.

Lahi ena diari ai, geiti naria kekenina ese Petero ena toana ia itaia namonamo diba. Unai kekeni be Petero ia diba, ia gwau: “Oi danu be Iesu, Galilea tauna, ena durua tauna ta, ani?” Petero ia hoa bona ia gwau ia diba lasi Iesu o ia hahedinaraia ia be unai kekeni ena hereva ia lalopararalaia lasi. Petero ia raka lao geiti badinai ia gini, ia ura taunimanima ese ena toana do idia itaia lasi, to kekeni ma ta ese ia itaia bona ia gwau: “Inai tau danu be Iesu, Nasareta tauna, ena durua tauna ta.” Petero ia gwau: “Unai tau be lau diba lasi momokani!” (Mataio 26:​69-​72) Reana Petero be nega iharuana ai Iesu ia gorea murinai, kokoroku ena boiboi ia kamonai, to gau momo ia laloa dainai Iesu ese hora haida gunanai ia gwauraia peroveta herevana ia laloaboio.

Nega sisina murinai, Petero ia ura lasi taunimanima ese idia itaia. To ariara dekenai idia gini taudia haida be Petero dekenai idia raka lao. Idia ta be hesiai tauna Malako, Petero ese ena taiana ia utua tauna, ena varavara, ia be Petero dekenai ia gwau: “Iesu danu uma gabu dekenai oi lau itaia, a?” Petero ia ura ia hahedinaraia edia hereva be koikoi. Unai dainai idia ia hamaoroa bema iena hereva be koikoi, dika do ia davaria. Unai hereva ia gwauraia bena daudau lasi murinai kokoroku ia boiboi​—⁠unai be nega iharuana Petero be kokoroku ena boiboi ia kamonai.​—⁠Ioane 18:​26, 27; Mareko 14:​71, 72.

Iesu be ruma amo ia raka-lasi bona dehe ai ia gini ariara ia itaia totona. Unai nega ai, matamanai ita herevalaia bamona, ia ese Petero ia raraia. Petero ia laloparara ia be Iesu ia gorea vadaeni. Petero be ariara amo ia raka-lasi, bona ia karaia kerere dainai ia lalohisihisi bada. Ia be siti ena dala amo ia raka lao, bona hua ena diari ese ena dala ia hadiaria. Ia karaia kerere dainai ia tai dikadika.​—⁠Mareko 14:72; Luka 22:​61, 62.

Ta be unai bamona kerere badana ta ia karaia dainai, do ia laloa ena kerere be bada bona ta ese ia gwauatao diba lasi. Reana Petero be unai bamona ia laloa danu. To Iesu ese iena dika ia gwauatao, a?

Petero Ena Kerere be Bada Dainai Iesu ese Ia Gwauatao Diba Lasi, A?

Petero be Iesu ia gorea murinai, ia lalohisihisi ela bona daba ia rere. Bona unai dina ai do idia vara gaudia ese ena lalohisihisi idia habadaia. Iesu be hora momo lalonai idia hahisia bena ia mase murinai, reana Petero be ena kara ia laloa lou neganai ia lalohisihisi bada! Reana ia laloa ia karaia karana ese Iesu ena lalona ia hahisia bada. Ena be Petero ia lalohisihisi bada, to unai ese ena lalona ia hamanokaia lasi. Unai ita diba badina Baibel ia gwau daudau lasi murinai Petero be ena tadikaka ia bamodia lou. (Luka 24:33) Iesu idia dogoatao hanuaboina ai reana aposetolo taudia ibounai be idia karaia karadia dainai idia lalohisihisi bada, bona idia hagoadaia heheni.

Ita itaia Petero be abia hidi maorona ia karaia. Bema Dirava ena hesiai tauna ta ia moru, herevana ena dika be bada, unai be gau badana lasi. To mai anina bada gauna be inai: Ena lalona ia hadaia ena kerere ia hamaoromaoroa totona. (Aonega Herevadia 24:16) Ena be Petero ia lalohisihisi bada, to ena tadikaka ida ia hebou lou karana amo ia hahedinaraia ena abidadama be goada. Bema lalohisihisi dainai ta ia lalomanoka, reana ia laloa sibona do ia noho be namo, to unai ese dika do ia havaraia. (Aonega Herevadia 18:⁠1) Aonega dalana be tadikaka taihu kahirakahira ita noho, unai amo goada do ita abia Dirava ita hesiai henia noho totona.​—⁠Heberu 10:​24, 25.

Petero be ena tadikaka ida ia noho dainai, ia kamonai Iesu ena tauanina be guria gabuna dekenai ia noho lasi. Petero bona Ioane idia heau lao Iesu idia guria gabuna dekenai, to iduara be ia koua. Ioane be mero matamata dainai guria gabuna dekenai ia ginidae guna. Ia itaia iduara ia kehoa neganai, ia ura lasi ia raka vareai. To Petero be ia vareai. Ena be ia heau dainai ia laga tuna, to ia be maoromaoro Iesu idia guria gabuna dekenai ia raka vareai. Guria gabunai ta ia noho lasi!​—⁠Ioane 20:​3-9.

Petero ia abia dae momokani Iesu ia toreisi lou vadaeni, a? Matamanai unai ia abia dae lasi, ena be hahine haida idia gwau aneru be idia dekenai idia hedinarai bona idia hadibaia Iesu be mase amo ia toreisi lou vadaeni. (Luka 23:⁠55–24:11) To adorahi ai, Petero be ia lalohisihisi lasi bona ia daradara lasi. Iesu be ia mauri, to lauma tauanina ia abia! Ena aposetolo taudia ibounai dekenai ia hedinarai. To, gau ta ia karaia guna. Unai dina dekenai aposetolo taudia idia gwau: “Momokani, Lohiabada be ia toreisi vadaeni! Simona ese ia itaia vadaeni!” (Luka 24:34) Unai hegeregerena, aposetolo Paulo be gabeai unai dina ai ia vara gauna ia herevalaia neganai, ia gwau Iesu be “Petero ese ia itaia, unai murinai aposetolo taudia 12 ese idia itaia.” (1 Korinto 15:⁠5) Petero be sibona ia noho neganai, Iesu be ia dekenai ia hedinarai.

Iesu bona Petero idia hedavari neganai idia vara gaudia be Baibel ese ia herevalaia lasi. To ita diba gauna be Petero be Lohiabada, ena lalokau tauna ia mauri lou ia itaia neganai ia moale bada, bona dala ia noho ena lalohisihisi do ia herevalaia bona ia helalo-kerehai totona. Petero ia ura Iesu ese ena dika do ia gwauatao. Ita diba Iesu be Petero ena dika ia gwauatao momokani. Hari inai negai kerere badadia idia karaia Keristani taudia ese Petero ena sivarai idia laloa be gau badana. Ita gwau lasi Dirava ese iseda dika do ia gwauatao lasi. Iesu be ena Tamana, “dika do ia gwauatao momokani” Tauna, ena kara ia hahedinaraia.​—⁠Isaia 55:⁠7.

Gau Momo ese Idia Hamomokania Iesu be Petero Ena Dika Ia Gwauatao

Iesu be ena aposetolo taudia ia hamaoroa Galilea dekenai idia lao, bona unuseniai ia do idia hedavari henia. Idia ginidae neganai, Petero ia ura Galilea Gohuna dekenai ia lao gwarume ia abia totona. Aposetolo taudia ma haida be ia ida idia lao. Guna Petero be nega momo unai gohu dekenai ia lao gwarume ia abia totona. Petero be ia dogoatao reke bona hurehure ese bouti ia botaia ena regena ia diba vadaeni. Unai hanuaboi ai, Iesu ia noho lasi dainai Petero be ena mauri lalonai do ia karaia gaudia ia lalohadailaia, a? Ia ura haoda gaukara ia karaia lou, a? Unai hanuaboi ai gwarume ta idia abia lasi.​​—⁠Mataio 26:32; Ioane 21:​1-3.

To, daba ia rere neganai, tau ta be kone dekenai ia gini bona idia ia boiria reke be bouti ena kahana ma ta dekenai idia negea diho totona. Unai hereva idia badinaia bena edia reke idia negea diho bona gwarume 153 idia abia! Petero ia diba unai tauna be daika. Bouti amo ia diho bona kone dekenai ia nahu lao. Kone dekenai idia ginidae neganai, Iesu ese lahi ai ia gabua gwarume be idia dekenai ia henia idia ania totona. Ia be Petero ia hereva henia.

Iesu ese Petero ia nanadaia neganai, ia ura diba bema Petero be ena Lohiabada ia lalokau henia eiava aposetolo taudia ese idia abia gwarume ia ura henia bada. Petero ena haoda gaukarana ese Iesu lalokau henia karana do ia hereaia, a? Petero be nega toi Iesu ia gorea dainai, hari Iesu be dala ia kehoa Petero be nega toi ena turana edia vairanai do ia hamomokania ia be Iesu ia lalokau henia eiava. Petero be unai bamona ia karaia neganai, Iesu ese unai lalokau do ia hahedinaraia dalana ia herevalaia: Iena mauri ibounai lalonai hesiai gaukara helagana do ia atoa guna, Keriso ena mamoe​—⁠iena kamonai hesiai taudia unai​—⁠do ia naria bona ubua.​—⁠Ioane 21:​4-​17.

Unai dala amo Iesu ese ia hamomokania Petero be ia bona ena Tamana totona gaukara momo do ia karaia. Petero be Keriso ena hakaua henunai kongrigeisen lalonai gaukara badana do ia karaia. Unai ese ia hahedinaraia goevagoeva Iesu be Petero ena dika ia gwauatao momokani! Oibe, Petero be unai hebogahisi karana ia mamia momokani, bona unai ese ia hagoadaia bada.

Petero be mai abidadama ida lagani momo lalonai ena hesiai gaukara ia karaia. Ia ese ena tadikaka ia hagoadaia, Iesu ia do mase lasi hanuaboina ai ia hagania hegeregerena. Petero be mai manau bona haheauka ida Keriso idia badinaia taudia ia naria bona ubua. Simona be Iesu ese ia dekenai ia henia ladana​—⁠Petero o Nadi​—⁠hegeregerena ia kara, ia gini goada bona kongrigeisen ia durua namonamo. Idia vara gau namodia momo be Petero ese ena revareva rua lalonai ia torea bona idia be Baibel ai idia noho. Danu, unai revareva ese idia hahedinaraia Petero be Iesu ena dika gwauatao karana amo ia dibaia gaudia ia laloaboio diba lasi.​—⁠1 Petero 3:​8, 9; 4:⁠8.

Ita danu unai kara amo gau ta ita dibaia. Ita be dina ta ta ai Dirava ita noia ita karaia kereredia dainai eda dika ia gwauatao totona, a? Ita abia dae Dirava be eda dika ia gwauatao bona iena vairanai ita goeva lou, a? Bona ita ese ma haida edia dika ita gwauatao, a? Bema unai bamona ita karaia, ita be Petero ena abidadama karana bona Iesu ena hebogahisi karana ita tohotohoa.

[Blurb on page 22]

Petero be kerere momo ia karaia bona Iesu ese ena dika ia gwauatao, to ita be dina ta ta ai ta ena dika ita gwauatao, a?

[Picture on page 23]

“Lohiabada ese iena matana ia giroa Petero dekenai, ia itaia noho”

[Picture on page 24]

“Lohiabada be . . . Simona ese ia itaia vadaeni!”