Jozye

6 Yo te fèmen vil Jeriko byen fèmen, e pèsonn pa t ka ni antre ni soti ladan l+.

2 Apre sa, Jewova di Jozye: “Gade! Mwen lage vil Jeriko nan men w ansanm ak wa li a ak sòlda vanyan l yo+. 3 Nou menm gason ki konn al nan lagè yo, nou dwe mache toutotou vil la. Nou dwe fè wonn vil la yon sèl fwa. Nou dwe fè sa pandan sis jou. 4 W ap fè sèt prèt vin ak sèt kòn mouton devan Lach la. Men, setyèm jou a, nou dwe fè wonn vil la sèt fwa e prèt yo dwe sonnen kòn yo+. 5 Lè yo sonnen kòn mouton yo, sa vle di lè nou tande son kòn yo, tout moun dwe fè yon gwo rèl tankou bri moun ki nan lagè. Apre sa, miray vil la ap tonbe plat atè+, e chak sòlda dwe ale tou dwat nan vil la.”

6 Konsa, Jozye, pitit gason Noun nan, rele prèt yo e li di yo: “Pran lach alyans lan, e sèt prèt dwe vin devan Lach Jewova a ak sèt kòn mouton+.” 7 Apre sa, Jozye di moun yo: “Avanse pou nou mache toutotou vil la, e gwoup sòlda+ ki gen zam nan men yo dwe pase devan Lach Jewova a.” 8 Jan Jozye te di moun yo, sèt prèt ki t ap pote sèt kòn mouton yo devan Jewova te pase devan, yo sonnen kòn yo, e gen prèt ki t ap mache dèyè yo ak lach alyans Jewova a. 9 Gwoup sòlda ki gen zam yo te pase devan prèt ki t ap sonnen kòn yo, e gwoup sòlda ki te dèyè nèt yo t ap mache dèyè Lach la pandan prèt yo te kontinye sonnen kòn yo.

10 Lè sa a, Jozye bay moun yo lòd, li di yo: “Pinga nou fè okenn rèl e pinga pèsonn tande vwa nou. Nou pa dwe kite yon mo sot nan bouch nou, jiskaske jou a rive pou m di nou: ‘Rele!’ Lè sa a, nou dwe rele.” 11 Li te fè yo fè wonn vil la ak Lach Jewova a. Yo te fè wonn vil la yon fwa, apre sa, yo retounen nan kan an e yo pase nuit lan la.

12 Nan demen maten, Jozye leve byen bonè, prèt yo pran Lach+ Jewova a, 13 e sèt prèt ki te gen sèt kòn mouton nan men yo a te mache devan Lach Jewova a pandan yo te kontinye sonnen kòn yo. Gwoup sòlda ki te gen zam nan men yo a t ap mache devan yo pandan sòlda ki te dèyè nèt yo t ap mache dèyè Lach Jewova a e sèt prèt yo te kontinye sonnen kòn yo. 14 Nan dezyèm jou a, yo mache toutotou vil la yon fwa. Apre sa, yo retounen nan kan an. Yo fè sa pandan sis jou+.

15 Sou setyèm jou a, yo leve byen bonè, kou l jou, yo mache toutotou vil la menm jan an pandan sèt fwa. Se sèlman jou sa a yo te fè wonn vil la sèt fwa+. 16 Epi, sou setyèm fwa a, prèt yo sonnen kòn yo. Lè sa a, Jozye di moun yo: “Rele+! Paske Jewova ban nou vil la. 17 Nou dwe detwi vil la ak tout sa k ladan l+. Yo tout se pou Jewova. Se sèl Rahab+, pwostitye a, ki dwe ret vivan, li menm ak tout moun ki ansanm avè l lakay li, paske l te kache mesye nou te voye kòm espyon yo+. 18 Men, nou dwe rete lwen tout bagay ki la pou yo detwi+, pou nou pa vin anvi yo e pou n pa pran yon bagay ki la pou yo detwi+, sa ki t ap fè pèp Izrayèl la merite mouri paske nou rale malè sou kan an+. 19 Men, tout ajan, tout lò ak tout bagay ki an kuiv ak bagay ki an fè se bagay nou dwe mete apa pou Jewova+. Yo dwe ale nan trezò ki nan kay Jewova a+.”

20 Epi, moun yo te fè yon sèl rèl lè yo te sonnen kòn yo+. Kou moun yo tande son kòn yo, yo fè yon gwo rèl tankou bri moun ki nan lagè, epi miray vil la tonbe plat atè+. Apre sa, chak moun antre tou dwat nan vil la e yo pran vil la. 21 Yo touye tout moun nan vil la ak kout epe, gason kou fi, jèn kou granmoun, e yo touye tout bèf, tout mouton ak tout bourik+.

22 Jozye di de mesye ki t al kòm espyon nan peyi a: “Al lakay pwostitye a, epi fè l soti ak tout moun li yo, jan nou te fè sèman ba li a+.” 23 Se konsa, jèn espyon yo t al lakay Rahab e yo fè l soti ansanm ak papa l, manman l, frè l yo ak tout moun li yo. Wi, yo fè tout fanmi l+ soti e yo mennen yo ale sennesòf yon kote deyò kan Izrayèl la.

24 Apre sa, yo boule vil la ak tout sa k ladan l. Men, yo te pran ajan, lò ak tout bagay ki an kuiv ak bagay ki an fè yo, yo bay yo pou met nan trezò ki nan kay Jewova a+. 25 Se sèl Rahab, pwostitye a, ak moun lakay papa l ansanm ak tout moun pa l yo Jozye te pwoteje+. Li abite ann Izrayèl jis jodi a+, paske li te kache mesye Jozye te voye kòm espyon nan Jeriko yo+.

26 Nan moman sa a, Jozye fè sèman, li di*: “Si yon moun al eseye rebati vil Jeriko, se pou malediksyon tonbe sou moun sa a devan Jewova. Lè l ap fè fondasyon vil la, l ap pèdi premye pitit li e lè l ap monte pòt yo, l ap pèdi dènye pitit li+.”

27 Konsa, Jewova te avèk Jozye+, e moun sou tout tè a t ap pale de Jozye+.