Mak
2 Kèk jou apre, l al Kapènawòm ankò, e moun yo vin aprann li lakay li+. 2 Epi, anpil moun te vin rasanble. Te tèlman gen moun, pa t gen kote pou met moun ankò nan kay la, menm bò pòt la pa t gen plas ankò. E li kòmanse preche yo pawòl la+. 3 Twouve, gen kat mesye ki te gen moun akonpaye yo ki t ap pote yon mesye paralize mennen ba li+. 4 Men, yo pa t ka rive kot Jezi avè l akoz foul moun ki te la yo, se sa k fè yo retire yon pati nan tèt kay la, pati ki te anlè tèt Jezi a, yo fè yon twou, epi yo file branka a desann ak tout mesye ki paralize a sou li. 5 Lè Jezi wè jan yo gen lafwa+, li di mesye ki paralize a: “Pitit mwen, peche w yo padone+.” 6 Twouve, gen kèk espè nan Lalwa ki te chita la ki t ap di nan kè yo+: 7 “Poukisa mesye sa a ap pale konsa? L ap blasfeme. Èske se pa Bondye sèlman ki ka padone peche+?” 8 Men, menm moman an, Jezi te wè ki rezònman yo t ap fè nan kè yo. Se sa k fè li di yo: “Poukisa n ap fè rezònman sa yo nan kè nou+? 9 Ki sa ki pi fasil pou m di mesye ki paralize a: ‘Peche w yo padone’, oswa: ‘Leve, pran branka w la epi mache’? 10 Men, pou nou ka konnen Pitit lòm nan+ gen pouvwa pou l padone peche sou tè a+...”, li di mesye ki paralize a: 11 “Se mwen ki di w sa: Leve, pran branka w la, epi al lakay ou.” 12 Lè sa a, mesye a leve, menm kote a, li pran branka l la e li mache sot deyò devan tout moun yo. Sa te fè yo tout sezi, yo t ap bay Bondye glwa, yo t ap di: “Nou pa janm wè yon bagay konsa+.”
13 Yon lòt fwa ankò, li soti al bò lanmè a. Tout foul moun yo te kontinye al jwenn li, e li te kòmanse anseye yo. 14 Epi, pandan l ap pase, li wè Levi, pitit Alfe, ki chita nan biwo kontribisyon an, li di l: “Vin suiv mwen.” Menm kote a, li leve, li suiv Jezi+. 15 Nan pita, Jezi t ap manje* lakay Levi, e te gen anpil pèseptè ak anpil moun k ap pratike peche ki t ap manje* ansanm avè l ak disip li yo, paske, te gen anpil nan yo ki te vin ap suiv li+. 16 Men, lè espè nan Lalwa ki te Farizyen yo wè l ap manje ak moun k ap pratike peche yo ak pèseptè yo, yo te vin ap di disip li yo: “Apa l ap manje ak pèseptè ansanm ak moun k ap pratike peche!” 17 Lè Jezi tande sa, li di yo: “Se pa moun ki an sante ki bezwen doktè, men se moun ki malad ki bezwen doktè. Mwen pa vin rele moun ki jis, men mwen vin rele moun k ap pratike peche+.”
18 Twouve, disip Jan yo ak Farizyen yo te abitye fè jèn*. Se sa k fè disip Jan yo vin kot Jezi, yo di l: “Poukisa disip Jan yo ak disip Farizyen yo fè jèn, men disip pa w yo pa fè jèn+?” 19 Lè sa a, Jezi di yo: “Pandan lemarye a+ la avèk zanmi l yo, yo pa gen okenn rezon pou yo fè jèn, pa vre? Toutotan lemarye a avèk yo, yo pa ka ap fè jèn. 20 Men, gen yon jou k ap vini kote y ap pran lemarye a nan men yo+, e se jou sa a y ap fè jèn. 21 Pèsonn pap pyese yon vye rad ak yon moso twal nèf. Si l fè sa, moso twal nèf la ap pati ak moso nan vye rad la, e rad la ap vin chire plis toujou+. 22 Epitou, pèsonn pap mete diven ki fèk fèt nan vye bidon ki fèt ak po bèt. Si l fè sa, diven an ap pete bidon yo, e ni diven an ni bidon yo ap pèdi. Men, moun met diven ki fèk fèt nan bidon nèf ki fèt ak po bèt.”
23 Twouve, yon jou saba, pandan li t ap pase nan mitan kèk jaden ble ansanm ak disip li yo, disip yo kase kèk grap ble+. 24 Lè sa a, Farizyen yo di l: “Gade sa! Poukisa y ap fè yon bagay yo pa gen dwa fè nan jou saba a?” 25 Men, li di yo: “Nou pa janm li sa David te fè lè li menm ak mesye ki te ansanm avè l yo te vin nan nesesite e yo te grangou+? 26 Nou pa t li nan istwa sou Abyata+, prèt an chèf la, jan David te antre nan kay Bondye a, li te manje pen yo te konn prezante devan Bondye yo, epi li te bay mesye ki te avè l yo kèk ladan yo tou, alòske pèsonn pa t gen dwa manje yo, eksepte prèt yo+?” 27 Apre sa, li di yo: “Se saba ki te vin egziste pou lòm+, men se pa lòm ki te vin egziste pou saba. 28 Kidonk, Pitit lòm nan se Seyè ata saba+.”