Fason nou ka fè kè Bondye kontan

KI SA nou ka fè pou nou fè kè Bondye kontan? Èske nou ka ba l yon bagay? — Jewova di: ‘Tout bèt sovaj ki nan forè a, se pou mwen yo ye.’ Epitou li di: “Ajan an se pou mwen, e lò a se pou mwen.” ​(Sòm 24:1; 50:10; Agayi 2:8). Epoutan, gen yon bagay nou ka bay Bondye. Ki sa l ye? —

Jewova ban nou posiblite pou nou chwazi si n ap sèvi l oswa si nou pap sèvi l. Li pa fòse nou fè volonte l. Ann eseye konprann poukisa Bondye fè nou yon fason pou nou ka chwazi si n ap sèvi l oswa si nou pap sèvi l.

Petèt ou konnen ki sa yon wobo ye. Se yon aparèy ki fèt yon fason pou l egzekite tout sa moun ki fè l la vle l fè. Donk, wobo a pa ka deside fè anyen poukont li. Jewova te ka fè nou tankou wobo. Li te ka fè nou yon fason pou se sa l vle nou fè sèlman nou fè. Men, se pa sa l te fè. Èske w konn poukisa? — Ebyen, ann pran egzanp jwèt wobo. Lè w peze yon bouton, wobo a annik fè sa moun ki fè l la te pwograme l pou l fè. Èske w konn wè jwèt konsa? — Byen souvan, moun konn bouke jwe ak yon jwèt ki annik fè sa yo te pwograme l pou l fè a. Bondye pa vle pou nou obeyi l tankou wobo ki pwograme pou sèvi l. Jewova vle nou sèvi l paske nou renmen l e paske nou vle obeyi l.

Dapre ou menm, ki jan Papa nou ki nan syèl la santi l lè nou obeyi l paske nou vle fè sa? — Bon, di m, ki efè fason ou aji gen sou paran w? — Bib la di yon pitit gason ki saj ‘fè kè papa l kontan’, men yon pitit gason ki san konprann “fè manman l lapenn”. (Pwovèb 10:1.) Èske w remake lè w fè sa manman w oswa papa w mande w fè, sa fè kè yo kontan? — Men, ki jan yo santi yo lè w dezobeyi yo? —

Kounye a, annou reflechi sou Jewova, Papa nou ki nan syèl la. Li di nou ki jan nou ka fè kè l kontan. Tanpri, ouvri bib ou nan Pwovèb 27:11. Nan vèsè sa a, Bondye ap pale avèk nou. Men sa l di: “Montre w saj, pitit gason m, [nou ta kapab di pitit fi m tou], e fè kè m kontan dekwa pou m kapab reponn moun k ap pwovoke m nan.” Èske w konnen sa sa vle di pwovoke yon moun? — Se lè yon moun ap moke yon lòt moun lè l pretann moun sa a pa ka fè sa l di l ap fè. Ki jan Satan pwovoke Jewova? — Ann wè ki jan.

Pa bliye sa nou te aprann nan chapit 8 liv sa a: Satan vle domine tout moun, e li vle pou tout moun obeyi l. Satan fè konnen sa k fè gen moun k ap adore Jewova, se sèlman paske Jewova pral bay lavi etènèl. Apre Satan fin fè Adan ak Èv dezobeyi Jewova, li bay Bondye yon defi. Li di Bondye konsa: ‘Moun yo ap sèvi w sèlman pou sa yo ka jwenn nan men w. Depi w ban m opòtinite pou m aji, m ap fè nenpòt moun vire do ba ou.’

Se vre, nou pa jwenn pawòl sa yo egzakteman konsa nan Bib la. Men, lè nou li sa k te pase Jòb la, li klè se apeprè sa Satan te di Bondye. Èske Jòb t ap ret fidèl? Se yon kesyon ki te gen enpòtans ni pou Satan, ni pou Jewova. Annou ouvri bib nou nan Jòb chapit 1 ak chapit 2 pou nou wè sa k te pase.

N ap note nan Jòb chapit 1, Satan te la nan syèl la lè zanj yo parèt devan Jewova. Jewova mande Satan: “Kote w soti?” Satan reponn Jewova, li di li sot suiv sa k ap pase sou tè a. Epi, Jewova mande l: ‘Èske w remake Jòb, èske w wè jan l ap sèvi m e jan li pa fè anyen ki mal?’ — Jòb 1:6-8.

Menm kote a, Satan gentan jwenn yon esplikasyon: ‘Jòb ap adore w paske l pa jwenn okenn pwoblèm. Si w sispann pwoteje l e ou sispann beni l, l ap modi w nan figi w.’ Epi, Jewova reponn, li di: ‘Dakò Satan, ou mèt fè sa w vle ak Jòb, men kanta pou Jòb li menm, pa manyen l.’ — Jòb 1:9-12.

Ki sa Satan fè? — Li fè yon seri moun vòlè bèf ak bourik Jòb yo, e li fè touye moun ki t ap okipe bèt yo. Apre sa, li fè loray tonbe, e loray yo detwi mouton yo ak gadyen mouton yo. Apre sa, gen moun ki vini e yo vòlè chamo yo e yo touye moun k ap veye sou chamo yo. Finalman, Satan fè yon van tanpèt kraze kay kote dis pitit Jòb yo te ye a, e yo tout mouri. Malgre tout bagay sa yo, Jòb toujou kontinye sèvi Jewova. — Jòb 1:13-22.

Lè Jewova wè Satan ankò, li fè l remake Jòb toujou ret fidèl. Satan chèche yon esplikasyon. Li di: ‘Si w annik kite m fè l malad, l ap modi w nan figi w.’ Se konsa, Jewova kite Satan atake sante Jòb, men li entèdi l touye l.

Satan frape Jòb ak yon maladi ki fè tout kò l vin kouvri ak maleng. Maleng sa yo tèlman gen move sant, pèsonn pa vle ret pre Jòb. Menm madanm Jòb di l: “Modi Bondye epi mouri!” Gen swadizan zanmi Jòb ki vin wè l e ki dekouraje l plis toujou, yo di l siman se kèk bagay grav li fè ki fè tout malè sa yo rive l. Malgre tout pwoblèm ak tout soufrans sa yo Satan lage sou Jòb, Jòb kenbe la, li kontinye ap sèvi Jewova fidèlman. — Jòb 2:1-13; 7:5; 19:13-20.

Dapre ou menm, ki jan Jewova santi l lè l wè Jòb rete fidèl konsa? — Sa fè kè Jewova kontan paske li te anmezi pou l di Satan: ‘Gade Jòb! L ap sèvi m paske li vle.’ Èske w ap menm jan ak Jòb? Èske w ap yon moun Jewova ka pran kòm egzanp, pou l pwouve Satan se yon mantè? — Vrèman, se yon privilèj pou nou pwouve Satan pa t gen rezon pretann li ka detounen nenpòt moun nan sèvis y ap bay Jewova. Pa gen dout, Jezi te konsidere sa kòm yon privilèj.

Gran Anseyan an pa t janm pèmèt Satan fè l fè anyen ki mal. Reflechi sou jan egzanp li an te fè kè Papa l kontan! Jewova te ka pran egzanp Jezi pou l bay Satan yon repons, li te ka di: ‘Gade Pitit Gason m nan! Li kenbe fidelite l nèt devan m, paske li renmen mwen!’ Fè yon ti reflechi tou sou kokenn jwa Jezi jwenn dèske li fè kè Papa l kontan. Se grasa jwa sa a ki fè Jezi te andire lanmò sou yon poto soufrans. — Ebre 12:2.

Èske w vle sanble ak gran Anseyan nou an epi pou w fè kè Jewova kontan? — Si se sa, kontinye aprann konnen sa Jewova vle w fè, epi fè volonte l pou w fè kè l kontan!