Մեսիական մարգարեությունները փաստո՞ւմ են, որ Հիսուսն էր Մեսիան

Այո՛։ Երբ Հիսուսը երկրի վրա էր, նրա վրա «Մեսիայի՝ Առաջնորդի»՝ «աշխարհի Փրկչի» մասին բազմաթիվ մարգարեություններ կատարվեցին (Դանիել 9։25; 1 Հովհաննես 4։14)։ Նույնիսկ Հիսուսի մահից հետո նրա վրա շարունակեցին կատարվել մեսիական մարգարեությունները (Սաղմոս 110։1; Գործեր 2։34–36)։

• Ի՞նչ է նշանակում «Մեսիա» բառը

• Մեսիական մարգարեությունները կարո՞ղ էին կատարվել մեկից ավելի մարդկանց վրա

• Հնարավո՞ր է, որ Մեսիան ապագայում հայտնվի

• Մեսիական քանի՞ մարգարեություններ կան Աստվածաշնչում

• Հիսուսի վրա իրագործված մեսիական մի քանի մարգարեություններ

Եբրայերեն մաշիախ (մեսիա) և դրան համարժեք հունարեն խրիստոս (քրիստոս) բառերը նշանակում են «օծյալ»։ Հետևաբար «Հիսուս Քրիստոս» նշանակում է «Հիսուս Օծյալ», կամ՝ «Հիսուս Մեսիա»։

Աստվածաշնչյան ժամանակներում, երբ մարդուն հատուկ իշխանություն էր տրվում, հաճախ նրան օծում էին՝ գլխին յուղ թափելով (Ղևտական 8:12; 1 Սամուել 16:13)։ Աստված Հիսուսին նշանակեց որպես Մեսիա, այսինքն՝ նրան մեծ իշխանություն տվեց (Գործեր 2։36)։ Սակայն յուղով օծելու փոխարեն՝ Աստված նրան սուրբ ոգով օծեց (Մատթեոս 3:16)։

Ո՛չ։ Ինչպես որ մատնահետքը պատկանում է միայն մեկ մարդու, այնպես էլ աստվածաշնչյան մարգարեությունների կատարումը մատնանշում է միայն մեկ Մեսիայի, կամ՝ Քրիստոսի։ Սակայն Աստվածաշունչը զգուշացնում է, որ «սուտ քրիստոսներ և սուտ մարգարեներ կհայտնվեն և մեծ նշաններ ու հրաշքներ կանեն, որպեսզի, եթե հնարավոր լինի, նույնիսկ ընտրյալներին մոլորեցնեն» (Մատթեոս 24։24)։

Ո՛չ։ Աստվածաշունչը կանխագուշակել էր, որ Մեսիան Իսրայելի Դավիթ թագավորի հետնորդն էր լինելու (Սաղմոս 89:3, 4)։ Սակայն երբ մ.թ. 70 թ.-ին հռոմեացիները գրավեցին Երուսաղեմը, հրեաների տոհմաբանական արձանագրությունները, որոնցում ներկայացված էր Դավթի շառավիղը, կորան՝ ակներևաբար ոչնչացվեցին։a Այդ ժամանակից ի վեր որևէ մեկը չի կարողացել փաստել, որ ինքը Դավթի թագավորական ընտանիքից է սերում։ Սակայն այդ տոհմաբանական արձանագրությունները գոյություն են ունեցել Հիսուսի ժամանակներում, և նույնիսկ նրա թշնամիներին չի հաջողվել հերքել Դավթի հետնորդը լինելու մասին նրա պնդումը (Մատթեոս 22։41–46)։

Մեսիական մարգարեությունների կոնկրետ թիվը հնարավոր չէ նշել։ Օրինակ՝ նույնիսկ ակնհայտ մեսիական մարգարեություն պարունակող հատվածների հաշվելու եղանակը կարող է տարբերվել։ Եսայիա 53:2–7-ում նշվում են Մեսիայի վերաբերյալ մի քանի մարգարեություններ։ Ոմանք այդ ամբողջ հատվածը գուցե հաշվեն որպես մեկ մարգարեություն, մինչդեռ ուրիշները թերևս այդ տեղեկությունները հաշվեն որպես առանձին մարգարեություններ։