NOTA PENUTUP

Nama Petara nya Jehovah, lalu reti nya “Iya ke Ngasuh Nyadi.” Jehovah nya Petara ti pemadu bekuasa, lalu Iya nempa semua utai. Iya bisi kuasa ngereja semua utai ti deka dikereja Iya.

Dalam jaku Hebrew, nama Petara disepil ngena empat iti urup YHWH tauka JHVH. Lebuh Sempekat Lama ditulis ngena jaku Hebrew, nama Petara ayan nyauka 7,000 kali. Orang di serata dunya nyepil sereta nyebut nama Jehovah nitihka jaku bansa sida.

▸ Pel. 1, gent. 15, nota kaki

Pengarang Bup Kudus nya Petara, tang Iya ngena mensia nulis Bup Kudus. Tu sama baka seiku tuke ke ngasuh kerani iya nulis siti surat ke ngundan runding iya. Petara ngena roh kudus Iya ngiring bala penulis Bup Kudus ngambika nulis runding Iya. Roh kudus Petara ngiring sida ngena mayuh macham chara, kekadang ngasuh sida meda genera tauka bisi mimpi, lalu udah nya sida nuliska utai nya.

▸ Pel. 2, gent. 5

Tu ajar ke nerangka batang pemendar dalam Bup Kudus. Ngambika chunto, prinsip “orang ke jai ngerusak moral ti menyana” ngajar kitai pasal orang ke enggau begulai ulih ngasuh kitai nyadi manah tauka jai. (1 Korint 15:33) Lalu prinsip “kita deka ngetau utai ti ditanam kita empu” ngajar kitai pasal utai ke deka nyadi ba kitai ketegal pengawa ke udah dikereja kitai.—Galatia 6:7.

▸ Pel. 2, gent. 12

Tu pesan ari Petara. Pesan nya engka nerang pasal peneka Petara, ajar ke bekaul enggau ulah, pesan tauka pengawa ngakim. Iya mega engka pesan pasal utai ke deka nyadi jemah ila. Bisi mayuh pesan dalam Bup Kudus ke udah dikeamatka.

▸ Pel. 2, gent. 13

Jesus nya orang ke ngamatka mayuh utai ti dipadah dalam Bup Kudus pasal Messiah. Peda kutak “Utai ti Dipadah Pasal Messiah.”

▸ Pel. 2, gent. 17, nota kaki

Jehovah nempa dunya ngambika nyadi paradais, alai mensia ke rinduka Iya diau. Tuju Iya enda berubah. Enda lama agi, Petara deka muai penyai lalu meri nembiak Iya pengidup ti meruan belama iya.

▸ Pel. 3, gent. 1

Sitan nya melikat ke dulu mungkal pengawa angkat ngelaban Petara. Iya dikumbai Sitan, reti nya “Penyakal,” ketegal iya ngelaban Jehovah. Iya mega dikumbai Antu, reti nya “orang ti madah bula pasal orang bukai.” Nama tu diberi ngagai iya laban iya bebula pasal Petara sereta nipu orang.

▸ Pel. 3, gent. 4

Jehovah nempa bala melikat dulu agi ari Iya nempa dunya. Sida patut diau di serega. Bisi lebih ari seratus juta iku melikat. (Daniel 7:10) Sida ngembuan nama, personaliti ke enda sebaka, sereta peluang bibas milih. Bala melikat ke taluk sereta baruh ati enggai disembah mensia. Sida bisi penuduk sereta pengawa ti enda sebaka. Sekeda ari pengawa tu nyengkaum bekereja di mua kerusi diraja Jehovah, ngenataika pesan Jehovah, nyaga sereta ngiring nembiak Jehovah ba dunya, bejalaika pengawa ngakim ari Jehovah, sereta nyukung pengawa nginjil. (Masmur 34:7; Pemandang 14:6; 22:8, 9) Jemah ila, sida deka sama enggau Jesus ba perang Armagedon.—Pemandang 16:14, 16; 19:14, 15.

▸ Pel. 3, gent. 5; Pel. 10, gent. 1

Dosa nya sebarang utai ti diasai, dirunding, tauka dikereja kitai ke ngelaban Jehovah tauka peneka Iya. Ketegal dosa ngerusak kaul kitai enggau Petara, Iya meri kitai adat enggau prinsip ke ulih nulung kitai nyeliahka diri ari ngereja dosa enggau sengaja. Ba pun iya kelia, semua utai ti ditempa Jehovah sempurna, tang lebuh Adam seduai Hawa milih enggai ngasika Jehovah, seduai iya bedosa, lalu enda agi sempurna. Seduai iya mansang tuai sereta mati. Lalu ketegal bulih dosa ari Adam, kitai mega masang tuai sereta mati.

▸ Pel. 3, gent. 7; Pel. 5, gent. 3

Tu perang ti dikena Petara ngerusak dunya Sitan sereta semua penyai.

▸ Pel. 3, gent. 13; Pel. 8, gent. 18

Perintah Petara nya siti perintah ti ditumbuhka Jehovah di serega. Jesus Kristus nyadi Raja ba Perintah nya. Jemah ila, Jehovah deka ngena Perintah nya muai semua penyai. Perintah Petara deka merintah atas dunya.

▸ Pel. 3, gent. 14

Petara nempa Jesus dulu agi ari semua utai bukai. Jehovah ngirumka Jesus ke dunya ngambika mati ke semua mensia. Pengudah Jesus dibunuh, Jehovah ngangkatka iya idup baru. Diatu Jesus merintah nyadi Raja ba Perintah Petara ti di serega.

▸ Pel. 4, gent. 2

Bup Kudus madahka kemaya Messiah deka datai. Iya deka datai ba ujung timpuh ke dikumbai 7 kali 69 taun, ke berengkah ba taun 455 S.M. sereta abis ba taun 29 M.a

Baka ni kitai nemu timpuh nya abis ba taun 29 M.? 7 kali 69 taun berengkah ba taun 455 S.M. lebuh Nehemiah datai ba Jerusalem, lalu berengkah nirika baru nengeri nya. (Daniel 9:25; Nehemiah 2:1, 5-8) 7 kali 69 taun semua iya 483 taun (7 x 69). Enti kitai ngitung 483 taun berengkah ari taun 455 S.M., kitai datai ba taun 29 M. (nadai taun kusung). Tu meh taun Jesus dibaptisa, lalu nyadi Messiah!—Luke 3:1, 2, 21, 22.

Ayat ti sama mega madah pasal siti agi minggu, iya nya nambah tujuh taun da agi. Dalam timpuh tu, ba taun 33 M., Messiah deka dibunuh, lalu berengkah ba taun 36 M., berita manah pasal Perintah Petara deka ditusui ngagai semua bansa, ukai semina ngagai bansa Judah aja.—Daniel 9:24-27.

▸ Pel. 4, gent. 7

Bup Kudus madahka, Petara Jehovah nya Penempa, lalu Iya nempa Jesus dulu agi ari semua utai bukai. (Kolosi 1:15, 16) Jesus ukai Petara ti Pemadu Bekuasa. Iya enda kala ngumbai diri sebaka enggau Petara. Indah iya madahka: ‘Apai besai agi ari aku.’ (John 14:28; 1 Korint 15:28) Tang sekeda pengarap ngajar pasal Triniti, iya nya tiga iku orang dalam Petara seiku: Apai, Anak, enggau roh kudus. Leka jaku “Triniti” nadai dalam Bup Kudus. Tu ajar ti bula.

Roh kudus nya kuasa aktif Petara, kuasa Iya ti enda ulih dipeda ke dikena Iya ngereja peneka Iya. Roh kudus ukai orang. Ngambika chunto, orang Kristian ba abad keterubah ‘dipenuhka enggau roh kudus,’ lalu ku Jehovah: ‘Aku deka nuang roh Aku ngagai semua mensia.’—Kereja Rasul 2:1-4, 17.

▸ Pel. 4, gent. 12; Pel. 15, gent. 17

Lebuh orang Kristian ti bendar nyembah Petara, sida enda ngena regang. Nama kebuah enda?

1. Regang udah lama dikena dalam pengarap pelesu. Kelia menya, regang dikena nyembah utai ke bisi ba alam sereta dikena ngintu pengawa peridi orang ke enda arapka Petara. Maya 300 taun keterubah pengudah Jesus mati, orang Kristian enda ngena regang dalam sembah sida. Taja pia, Raja Besai Constantine ke megai Perintah Rome nyadika regang tanda orang Kristian. Tanda tu dikena ngambika pengarap Kristian tebilang agi. Tang regang nadai kaul enggau Jesus Kristus. New Catholic Encyclopedia madahka: “Regang dikena ba adat orang sebedau jeman Kristian enggau orang ke ukai Kristian.”

2. Jesus enda mati ba regang. Leka jaku Gerika ke dikena nyalin “regang” reti iya, “tiang ti lurus,” “ramu,” tauka “kayu.” The Companion Bible madahka: “Nadai disebut dalam jaku Gerika ba [Sempekat Baru] ke ngambarka dua batang ramu.” Jesus mati ba tiang ti lurus.

3. Jehovah enggai kitai ngena engkeramba tauka tanda lebuh nyembah Iya.—Pemansut 20:4, 5; 1 Korint 10:14.

▸ Pel. 5, gent. 12

Jesus ngasuh bala murid iya ngingatka pemati iya. Sida ngereja tu ninting taun kena 14 Nisan, haribulan ti sama alai orang Israel ngintu pengerami Paska. Roti enggau wain, ke ngambarka tubuh enggau darah Jesus, disadung ngagai semua orang maya Ngingatka Pemati Jesus. Orang ke deka merintah enggau Jesus di serega makai roti sereta ngirup wain. Orang ke bisi pengadang idup belama iya ba dunya mega enggau Ngingatka Pemati Jesus, tang sida enda makai roti tauka ngirup wain.

▸ Pel. 5, gent. 21

Leka jaku “nyawa” dikena nerangka (1) orang, (2) jelu, tauka (3) nyawa mensia tauka jelu. Peda sekeda chunto di baruh tu:

• Orang. Pemungkal 2:7 madahka, lebuh Petara nempa Adam, “mensia nya idup.”

• Jelu. Bekaul enggau Bah Besai, Bup Kudus madahka: “Semua utai ti idup di dunya tu mati magang, nyengkaum semua burung, semua jelu.”—Pemungkal 7:21.

• Nyawa orang tauka jelu. Jehovah madah ngagai Moses: “Semua orang ke deka munuh nuan suba, udah mati magang.”—Pemansut 4:19.

  Nambahka nya, lebuh orang ngereja utai enggau “pengabis semengat,” reti nya iya sanggup sereta deka enggau naka ulih.—Matthew 22:37; Ulang Adat 6:5.

▸ Pel. 6, gent. 5; Pel. 15, gent. 17

Leka jaku “roh” dalam jaku Hebrew enggau Gerika ke disalin dalam jaku English ba edisi New World Translation ngembuan reti ti enda sebaka. Tang leka jaku nya selalu nunjukka utai ti enda ulih dipeda mensia, baka angin tauka seput mensia enggau jelu. Leka jaku nya mega nunjukka orang roh sereta roh kudus, iya nya kuasa aktif Petara. Bup Kudus nadai madahka bisi utai dalam tubuh ke mengkang idup pengudah orang mati.—Pemansut 35:21; Masmur 104:29; Matthew 12:43; Luke 11:13.

▸ Pel. 6, gent. 5, nota kaki; Pel. 15, gent. 17

Leka jaku “Gehenna” ke disalin dalam Bup Kudus Baru dikumbai “neraka.” Gehenna nya nama siti lebak semak Jerusalem alai endur nunu sampah. Nadai bukti nunjukka jelu tauka mensia diperinsa tauka ditunu idup-idup ba lebak tu maya jeman Jesus. Nya alai Gehenna ukai ngelambangka endur ti enda ulih dipeda alai orang ke udah mati diperinsa sereta ditunu belama iya. Lebuh Jesus nyebut pasal orang ke dibuai ngagai Gehenna, iya bejaku pasal pengerusak ti belama iya.—Matthew 5:22; 10:28.

▸ Pel. 7, gent. 20

Tu sampi ke diberi Jesus lebuh ngajar bala murid iya chara besampi. Jesus ngajar kitai besampi:

• “Kudus meh nama Nuan”

  Kitai besampika nama Jehovah dikuduska ari semua pemula. Nya kebuah semua orang ti di serega enggau ba dunya deka masa nama Petara.

• “Datai meh Perintah Nuan”

  Kitai besampika perintah Petara ngerusak dunya Sitan ti jai, merintah atas dunya, sereta ngaga dunya nyadi paradais.

• “Nyadi meh peneka Nuan di dunya”

  Kitai besampika tuju Petara ba dunya dikeamatka ngambika mensia ti sempurna sereta ngasi ulih idup belama iya ba Paradais, baka ti dikedekaka Jehovah lebuh mensia ditempa.

▸ Pel. 8, gent. 2

Jehovah nyediaka tebus kena nyelamatka mensia ari dosa enggau pemati. Tebus nya rega ti diguna kena meli baru pengidup sempurna ke dilenyauka mensia ti keterubah, Adam, lalu ngaduka baru kaul ti rusak enggau Jehovah. Petara ngirumka Jesus ke dunya ngambika iya ulih mati ke semua mensia ti bedosa. Ketegal pemati Jesus, semua mensia bisi peluang idup belama iya sereta nyadi sempurna.

▸ Pel. 8, gent. 21; Pel. 9, gent. 13

Daniel bab 4 madahka, Petara deka numbuhka Perintah Iya kena taun 1914.

Utai ti dipadah: Jehovah ngasuh Raja Nebukadnesar bemimpi pasal sepun kayu ti besai sereta tinggi ke ditebang. Dalam mimpi nya, tuga kayu dibelit ngena belulang besi enggau temaga ngambika iya enda ulih tumbuh dalam kandang “tujuh taun.” Udah nya, kayu nya deka tumbuh baru.—Daniel 4:1, 10-16.

Nama reti utai ti dipadah nya ba kitai: Kayu nya ngambarka perintah ari Petara. Kira-kira pengelama 500 taun, Jehovah ngena bala raja ba Jerusalem merintah atas bansa Israel. (1 Bansa Israel 29:23) Tang bala raja nya nyau enda tetap ati, lalu sida enda agi ulih merintah. Jerusalem dirusak ba taun 607 S.M. Lalu timpuh “tujuh taun” pan berengkah. (2 Raja 25:1, 8-10; Esekiel 21:25-27) Lebuh Jesus madahka, “Jerusalem deka dilunjak orang bansa bukai, nyentuk ngagai maya timpuh orang bansa bukai udah abis,” iya benung bejaku pasal timpuh “tujuh taun.” (Luke 21:24) Nya alai, timpuh “tujuh taun” bedau abis lebuh Jesus ba dunya. Jehovah besemaya deka nyiri seiku Raja ba pengujung timpuh “tujuh taun.” Raja baru ke merintah, Jesus, deka ngenataika berekat ti besai ke nembiak Petara di serata dunya, belama iya.—Luke 1:30-33.

Pemanjai timpuh “tujuh taun”: Timpuh “tujuh taun” nya 2,520 taun.b Enti kitai ngitung 2,520 taun berengkah ari taun 607 S.M., kitai deka datai ba taun 1914 (nadai taun kusung). Nya meh maya Jehovah nyiri Jesus ke mega Messiah, nyadi Raja ba Perintah Petara ti di serega.

Baka ni kitai tau bulih lumur 2,520? Bup Kudus madahka, tiga taun setengah sama enggau 1,260 hari. (Pemandang 12:6, 14) Nya alai, “tujuh taun” nya dua kali lipat lumur nya, tauka 2,520 hari. 2,520 hari sama enggau 2,520 taun, lalu tu sejalai enggau chara hari suah diitung ba Bup Kudus, “sehari ke genap taun.”—Penyampau 14:34; Esekiel 4:6.

▸ Pel. 8, gent. 23

Bup Kudus semina nyebut seiku aja tuai melikat, lalu nama iya Mikael.—Daniel 12:1; Jude 9.

Mikael nya Tuai soldadu bala melikat Petara ke tetap ati. Pemandang 12:7 madahka: “Mikael enggau bala melikat iya beperang ngelaban naga nya . . . enggau bala melikat iya.” Bup Pemandang madahka, Tuai soldadu bala melikat Petara nya Jesus. Nya alai, Mikael nya nama bukai Jesus.—Pemandang 19:14-16.

▸ Pel. 9, gent. 4, nota kaki

Rambai jaku tu nunjukka timpuh maya lebuh pekara ti besai deka nyadi ba dunya sebedau Perintah Petara ngerusak dunya Sitan. Rambai jaku ti sama, baka “pengujung dunya” enggau “penatai Anak Mensia,” dikena dalam Bup Kudus kena nunjukka timpuh ti sama. (Matthew 24:3, 27, 37) “Hari ti penudi” berengkah lebuh Perintah Petara belabuh merintah di serega ba taun 1914, lalu deka abis lebuh dunya Sitan dirusak maya Armagedon.—2 Timoti 3:1; 2 Peter 3:3.

▸ Pel. 9, gent. 5

Lebuh Petara ngidupka orang ke udah mati, nya dikumbai diangkatka idup baru. Semilan iti pengangkat ari mati bisi disebut dalam Bup Kudus. Elijah, Elisa, Jesus, Peter, enggau Paul bisi ngangkatka orang idup baru. Kereja ajih nya semina ulih dikereja ketegal kuasa ari Petara. Jehovah besemaya deka ngangkatka idup baru “semua orang ke lurus enggau ke enda lurus” ngambika idup ba dunya. (Kereja Rasul 24:15) Bup Kudus mega madah pasal pengangkat ari mati ke serega. Tu nyadi lebuh orang ke dipilih Petara diangkatka idup baru ngambika diau di serega enggau Jesus.—John 5:28, 29; 11:25; Pilipi 3:11; Pemandang 20:5, 6.

▸ Pel. 9, gent. 13

Mayuh orang pechaya pengudah orang mati, semengat orang nya pansut, lalu nyadi utai ti bekuasa. Laban orang deka bejaku enggau semengat nya, sida ngiga manang, tauka sida empu minta berekat ari semengat nya. Lebuh ngereja tu, sida bejaku enggau bala antu. Bala antu mega nguji nguingka mensia ari ngasika Petara. Pengawa belian, beburung, meda tapa jari enggau nujum nya sekeda ari pengawa ke bekaul enggau bala antu. Mayuh bup, majalah, horoskop, cherita wayang, poster, sereta lagu ngasuh bala antu enggau magik baka ke ngagitka ati tauka enda ngemediska. Mayuh adat nguburka orang ke udah mati baka gawai antu, meri pemakai ngagai orang ke udah mati, tauka nanam baya sama enggau orang ke udah mati, nya mega pengawa ti bekaul enggau bala antu. Orang suah ngena dadah lebuh nguji deka ngena kuasa ari bala antu.—Galatia 5:20, 21; Pemandang 21:8.

▸ Pel. 10, gent. 10; Pel. 16, gent. 4

Jehovah nya Petara ti Pemadu Bekuasa, lalu Iya nempa dunya raya. (Pemandang 15:3) Nya kebuah semua utai enggi Iya, lalu Iya bekuasa atas semua utai ti ditempa Iya. (Masmur 24:1; Isaiah 40:21-23; Pemandang 4:11) Iya ngaga atur ke tiap iti utai ti udah ditempa Iya. Jehovah mega bisi kuasa nyiri orang bukai nyadi pemerintah. Kitai nyukung hak Jehovah merintah, enti kitai rindu sereta ngasika Iya.—1 Bansa Israel 29:11.

▸ Pel. 11, gent. 10

Sengaja ngasuh anak ke agi dalam kandung mati, nya salah. Kenyau ari dalam kandung, anak nya ukai siti ari perengka tubuh indai iya. Iya seiku agi mensia. Nya alai, bebuai anak nya sama baka munuh.

▸ Pel. 13, gent. 5

Tu chara berubat ke alai empat bengkah darah tauka sebengkah ari empat bengkah darah ditama ngagai tubuh orang. Nya engka darah iya empu ke udah disimpan, tauka darah ari orang bukai. Empat bengkah darah nya plasma, sel darah mirah, sel darah burak, sereta platelet.

▸ Pel. 13, gent. 13

Dalam Bup Kudus, “disiplin” ukai semina bekaul enggau pengawa ngukum. Lebuh kitai didisiplin, kitai diiring, diajar, sereta dikemetulka. Jehovah enda kala kasar ngagai orang ke didisiplin Iya. (Jaku Dalam 4:1, 2) Jehovah netapka siti chunto ti manah ngagai apai indai. Disiplin ke diberi Iya endang pemadu badas nyentukka orang tau rinduka disiplin nya. (Jaku Dalam 12:1) Jehovah rinduka nembiak Iya, lalu Iya ngelatih sida. Iya meri sida iring ke ulih ngemetulka runding ti salah, ke nulung sida belajar berunding, sereta ngereja utai ti ngena. Ba apai indai, disiplin nyengkaum nulung bala anak sida meretika kebuah sida patut ngasi. Disiplin mega reti nya ngajar sida rinduka Jehovah enggau Bup Kudus, sereta meretika prinsip Bup Kudus.

▸ Pel. 14, gent. 13

Sida enda ulih dipeda, jai, lalu bisi kuasa ke lebih ari enggi mensia. Bala antu nya bala melikat ti jai. Sida nyadi jai pengudah sida nyadi munsuh Petara ketegal enda ngasika Iya. (Pemungkal 6:2; Jude 6) Sida sama enggau Sitan angkat ngelaban Jehovah.—Ulang Adat 32:17; Luke 8:30; Kereja Rasul 16:16-18; James 2:19.

▸ Pel. 16, gent. 4