Beterima Kasih Sereta Rinduka Reta Beroh ti Diberi Jehovah

1, 2. (a) Nama tiga bengkah reta ti berega ari Jehovah? (b) Nama deka dikerandauka kitai ba artikel tu?

JEHOVAH nya Orang ti pemadu kaya ba dunya raya. Semua utai enggi Iya magang. (1 Ban. 29:11, 12) Tang Jehovah gerah jari ngagai semua mensia. Kitai amat beterima kasih laban Iya bekunsi mayuh reta beroh enggau kitai! Nama sekeda reta nya? Nya nyengkaum (1) Perintah Petara, (2) pengawa nginjil kitai, sereta (3) pemendar ti berega dalam Bup Kudus. Tang enti kitai enda bejimat, nyau kelama kitai engka enda ngumbai reta nya berega. Kitai patut seruran ngingatka diri empu pasal pemesai rega reta nya sereta ngenalamka pengerindu kitai ke reta nya, laban Jesus madahka, “dia alai pengaya [reta] kita, dia meh ati kita.”—Luk. 12:34.

² Aram kitai berandauka chara kitai ulih ngetanka pengerindu sereta terima kasih ti dalam ke Perintah Petara, pengawa nginjil, sereta pemendar. Enggau ngereja nya, perundingka enggau dalam baka ni nuan empu ulih ngenalamka pengerindu nuan ke reta beroh nya.

 3. Nama utai ti sanggup digaga seiku lelaki dalam cherita Jesus ngambika iya ulih meli sigi mutiara? (Peda gambar ba pun artikel.)

³ Bacha Matthew 13:45, 46. Jesus nusui siti cherita pasal seiku lelaki ke meli sereta nyual mutiara. Bisi sekali, iya tetemuka sigi mutiara ti berega agi ari semua mutiara bukai ke kala dipeda iya. Iya keran amat ke mutiara nya nyentukka iya nyual semua utai ti dikemisi iya, ngambika ulih meli mutiara nya. Ulih nuan ngambarka pemesai rega mutiara nya ba iya?

 4. Nama utai ti sanggup digaga kitai ke Perintah Petara?

⁴ Nama ulih dipelajarka kitai ari cherita Jesus? Pemendar pasal Perintah Petara nya baka mutiara ti berega. Enti kitai rinduka Perintah Petara baka lelaki nya ke rinduka mutiara nya, kitai sanggup ngelengkaka semua utai ngambika ulih sereta mengkang nyadi rayat Perintah Petara. (Bacha Mark 10:28-30.) Aram kitai meda baka ni dua iku orang ngereja nya.

 5. Nama utai ti sanggup digaga Sakius ke Perintah Petara?

⁵ Sakius nya pengumpul chukai. Iya nyadi kaya enggau chara ngakal orang. (Luk. 19:1-9) Tang bisi sekali, Sakius ninga Jesus bejaku pasal Perintah Petara. Sakius balat rindu enggau utai ti didinga iya nyentukka iya keran deka berubah abis. Ku iya madahka: ‘Tuan, aku deka meri setengah ari semua reta tengkira aku ngagai orang ke seranta, lalu enti aku bisi udah ngakal orang, aku deka mulaika utai nya empat kali lipat.’ Sakius mulaika duit ke udah diambi iya ari orang, lalu badu agi amu.

 6. Nama ubah ke digaga seiku indu, lalu nama kebuah iya ngereja nya?

⁶ Beberapa taun suba, seiku indu ke nyadi lesbian ninga pasal Perintah Petara. Iya mega presiden ba siti gerempung ke ngetanka hak orang ke homoseksual. Tang lebuh iya belajarka Bup Kudus sereta nemu pasal Perintah Petara, iya nemu diri patut ngaga ubah ti besai ba pengidup. (1 Kor. 6:9, 10) Ketegal iya rinduka Jehovah, iya pansut ari gerempung nya sereta badu agi nyadi lesbian. Iya dibaptisa kena taun 2009, lalu ba taun siti iya nyadi pengerintis biasa. Iya ngaga ubah ti besai laban pengerindu iya ke Jehovah dalam agi ari sebarang pengingin ke enda patut ti dikembuan iya.—Mrk. 12:29, 30.

 7. Baka ni kitai ulih ngetanka pengerindu ti dalam ke Perintah Petara?

⁷ Ngambika ulih nyadi rayat Perintah Petara, mayuh ari kitai patut ngubah abis pengidup kitai. (Rom. 12:2) Tang pengawa tu bedau tembu. Kitai enda tau ngelakka sebarang utai, baka pengerindu ke reta tauka sebarang pengingin seks ti kamah, ngelemika pengerindu kitai ke Perintah Petara. (J-lam. 4:23; Mat. 5:27-29) Kena nulung kitai ngetanka pengerindu ti dalam ke Perintah Petara, Jehovah udah meri kitai siti agi reta ti berega.

 8. (a) Nama kebuah rasul Paul ngumbai pengawa nginjil kitai baka reta “dalam periuk tanah”? (b) Baka ni Paul ngayanka pengerindu diri ke pengawa nginjil?

⁸ Jesus meri kitai pengawa nusui sereta ngajar pasal Perintah Petara. (Mat. 28:19, 20) Rasul Paul ngumbai pengawa nginjil baka reta ke dibai dalam periuk tanah. (2 Kor. 4:7; 1 Tim. 1:12) Ketegal kitai enda sempurna, kitai baka periuk tanah. Tang pesan ke ditusui kitai baka reta ti berega laban iya ulih meri pengidup ti meruan belama iya ngagai kitai sereta ngagai orang ke mendingka kitai. Nya kebuah Paul madahka: “Aku ngereja semua nya ke Berita Manah, ngambika aku ulih bekunsi berita nya ngagai orang bukai.” (1 Kor. 9:23, NW) Paul bebendar ngajar orang bukai pasal Perintah Petara. (Bacha Rome 1:14, 15; 2 Timoti 4:2.) Pengerindu ke berita manah nulung iya terus nginjil taja pan napi pemerinsa ti balat. (1 Tes. 2:2) Baka ni kitai ulih nunda pengerindu Paul ke pengawa nginjil?

 9. Nama sekeda chara kitai ulih ngayanka diri rinduka pengawa nginjil?

⁹ Siti chara Paul ngayanka pengerindu diri ke pengawa nginjil, iya nya ngena semua peluang ke dikemisi bejaku enggau orang bukai. Baka Paul enggau orang Kristian ba abad keterubah, kitai mega bekunsi berita manah enggau orang ari rumah ke rumah, ba endur mensia mayuh, sereta ba sebarang endur ke bisi orang. (SKR. 5:42; 20:20) Kitai ngiga chara ngambika ulih nginjil ngagai mayuh orang. Enti ulih, kitai tau nyadi pengerintis sukung tauka pengerintis biasa. Tauka kitai ulih belajarka bansa jaku bukai, pindah ngagai endur bukai ba menua diri, tauka pindah ngagai menua bukai.—SKR. 16:9, 10.

10. Nama penguntung ke diasaika Irene ketegal iya bebendar bekunsika berita manah?

¹⁰ Irene, seiku menyadi Kristian indu ke bedau belaki di Amerika Serikat, deka bekunsi berita manah enggau orang ke ngena jaku Rusia. Nya alai ba taun 1993, iya enggau raban ke ngena jaku Rusia di New York City. Maya nya, semina bisi kira-kira 20 iku penginjil ba raban nya. Pengudah 20 taun, ku Irene madahka, “Aku agi enda entu landik ngena jaku Rusia.” Tang, Jehovah udah nulung iya sereta bala penginjil ke bukai nginjil ngagai orang ke ngena jaku nya. Asil iya, diatu bisi enam buah eklisia ke ngena jaku Rusia di New York City. Irene belajarka Bup Kudus enggau mayuh orang, lalu 15 iku ari sida udah dibaptisa. Sekeda ari sida gawa ba Betel, nyadi pengerintis, sereta tuai gempuru. Irene madahka, “Lebuh aku berundingka sekeda juluk ati ke bukai ke ulih dijapai aku, aku ngambarka siti juluk ati ke ulih ngagaka agi ati aku.” Irene amat rinduka pengawa nginjil!

11. Nama nyadi enti kitai terus nginjil taja pan diperinsa?

¹¹ Enti kitai rinduka pengawa nginjil, kitai deka baka rasul Paul lalu terus nginjil taja pan kitai diperinsa. (SKR. 14:19-22) Ngambika chunto, entara taun 1930 enggau 1944, bala menyadi kitai di Amerika Serikat balat diperinsa. Tang sida agi terus nginjil. Lebuh piak ti bekuasa nguji nagang pengawa nginjil, bala menyadi Kristian mai kes nya ngagai kot lalu menang ba mayuh kes. Ba taun 1943, Menyadi Knorr nyebut pasal siti ari kes kitai ke udah menang ba Kot Besai U.S. Iya madahka, nadai kes deka dibai ngagai Kot enti bala menyadi Kristian enda terus nginjil. Ku iya agi, ketegal bala menyadi Kristian di serata dunya terus nginjil, sida nunjukka pengawa merinsaka sida enda mujur. Bala menyadi Kristian di menua bukai mega bisi menang kes ti sama. Amat, pengerindu kitai ke pengawa nginjil enda ngelakka pemerinsa nagang kitai nginjil.

12. Nama deka digaga nuan?

¹² Lebuh kitai rinduka pengawa nginjil, kitai ukai semina irau pasal penyampau jam ke ditulis kitai ba slip riput pengawa nginjil. Kitai deka enggau naka ulih “besaksika Berita Manah.” (SKR. 20:24; 2 Tim. 4:5) Tang nama deka diajar kitai ngagai orang bukai? Peratika siti da agi reta ari Petara.

13, 14. Nama “setor” reta ke disebut Jesus ba Matthew 13:52, lalu baka ni kitai ulih menuhka iya?

¹³ Reta ketiga ti udah diberi Jehovah ngagai kitai, iya nya semua pemendar ke udah dipelajarka kitai. Jehovah nya Pun pemendar. (2 Sam. 7:28; Mas. 31:5) Lalu ketegal nyadi Apai ti gerah jari, Iya deka bekunsika pemendar nya enggau kitai. Ke diatu, kitai udah belajarka mayuh pemendar nya ari macha Bup Kudus enggau litaricha kitai, sereta datai ngagai konvensyen, gempuru besai sehari, enggau gempuru ninting minggu. Seraya kitai ngulihka mayuh agi pemendar, kitai deka bisi utai ti dikumbai Jesus “setor” reta pemendar ti baru enggau ti lama. (Bacha Matthew 13:52.) Jehovah deka nulung kitai menuhka “setor” reta kitai enti kitai mansik pemendar baka kitai ke deka ngiga reta ti dilalaika. (Bacha Jaku Dalam 2:4-7.) Baka ni kitai ngereja nya?

¹⁴ Kitai patut belajarka Bup Kudus sereta litaricha kitai enggau tetap, lalu ngaga pansik enggau bejimat. Tu deka nulung kitai tetemuka pemendar “ti baru,” iya ke enda ditemu kitai sebedau tu. (Jos. 1:8, 9; Mas. 1:2, 3) Majalah Watch Tower ti keterubah ke dikeluarka kena Julai 1879, mandingka pemendar baka siti bungai ti dilindung madang lalang. Ngambika ulih tetemuka bungai nya, orang enda tau enda ngiga iya enggau bejimat. Lalu lebuh tetemuka bungai nya, orang enda patut puas ati enggau bungai nya aja. Iya patut terus ngiga ngambi tetemuka mayuh agi bungai. Pia mega, kitai enda patut puas ati enggau siti aja pemendar ke ditemu kitai. Kitai patut keran deka terus ngiga mayuh agi pemendar.

15. Nama kebuah kitai ngumbai sekeda pemendar nya “ti lama,” lalu ni bagi pemendar ti berega ba nuan?

¹⁵ Lebuh kitai berengkah belajarka Bup Kudus, kitai belajarka sekeda pemendar ti ngerinduka ati. Kitai ngumbai nya pemendar “ti lama” laban nya dulu dipelajarka kitai. Nama sekeda pemendar nya? Terubah iya, kitai belajar pasal Jehovah nya Penempa kitai lalu Iya bisi tuju ke mensia. Kitai mega belajar pasal Petara ke ngirumka Anak Iya ke dunya lalu mati nyadika genselan tebus ngambika kitai ulih dilepaska ari dosa enggau pemati. Kelimpah ari nya, kitai belajar pasal Perintah Petara ke deka muai semua pemerinsa, lalu kitai ulih idup belama iya ba dunya dalam pemaik enggau pengelantang.—Jhn. 3:16; Pem. 4:11; 21:3, 4.

16. Nama patut digaga kitai lebuh pemendar Bup Kudus bisi diaduka baru?

¹⁶ Kekadang, penemu pasal utai ke deka nyadi ti dipadah dalam Bup Kudus tauka ayat Bup Kudus engka diaduka baru. Enti tu bisi nyadi, endang beguna ngena awak belajar sereta belematika penemu ke udah diaduka baru nya. (SKR. 17:11; 1 Tim. 4:15) Kitai ukai semina patut nemu bida ti nyata ke bisi entara penemu ti lama enggau ti baru, tang kitai mega patut beratika penerang ti silik pasal penemu ti baru. Belajar enggau silik deka ngasuh pemendar ti baru nya nyadi sebagi ari pemendar Bup Kudus ke dikembuan kitai. Nama kebuah nya manah ngereja tu?

17, 18. Baka ni roh kudus ulih nulung kitai?

¹⁷ Jesus madahka, roh kudus Petara ulih nulung kitai ngingatka utai ti udah dulu dipelajarka kitai. (Jhn. 14:25, 26) Baka ni tu ulih nulung kitai lebuh nusui berita manah? Peratika peneleba seiku menyadi Kristian lelaki ke benama Peter. Ba taun 1970, iya beumur 19 taun, lalu baru berengkah gawa ba Betel di Britain. Peter nginjil ari rumah ke rumah, lalu betemu enggau seiku lelaki tengan umur ke beragum. Peter nanya sekalika lelaki nya deka nemu pasal Bup Kudus. Lelaki nya rabbi tauka pengajar bansa Judah, lalu iya tekenyit laban Peter ngumbai diri ulih ngajar iya Bup Kudus. Kena nguji Peter, rabbi nya nanya: “Jang, nama jaku dikena nulis bup Daniel?” Peter nyaut: “Sebagi ari bup nya ditulis dalam jaku Aramaik.” Peter ngenang: “Rabbi nya tekenyit laban aku nemu saut iya, tang aku empu balat agi tekenyit! Baka ni aku ulih nemu saut iya? Lebuh aku pulai ke rumah, lalu meresa majalah Watchtower enggau Awake! ke dikeluarka beberapa bulan ti udah, aku tetemuka siti artikel ke madahka sebagi ari bup Daniel ditulis ngena jaku Aramaik.” (Dan. 2:4, nota kaki) Amat, roh kudus ulih nulung kitai ngingatka penerang ti udah dibacha kitai sereta disimpan ba setor reta.—Luk. 12:11, 12; 21:13-15.

¹⁸ Enti kitai rinduka pemendar ti dipelajarka kitai ari Jehovah lalu kitai beterima kasih ke pemendar nya, kitai deka majak nambahka pemendar nya ba setor reta kitai. Suah agi kitai nambahka pemendar nya, kitai deka besedia agi ngajar orang bukai.

19. Nama kebuah kitai enda tau enda nyaga reta beroh kitai?

¹⁹ Ba artikel tu, kitai udah belajarka kebuah kitai patut besukur ke reta beroh kitai. Tang kitai patut bejimat ngambika kitai enda ngelakka Sitan enggau dunya tu ngelemika pengerindu kitai ke reta beroh. Enti kitai enda bejimat, kitai ulih dilimpangka utai baka semaya deka diberi kereja ti begaji besai, tauka angan-angan deka idup enggau pengaya, tauka keran deka mandangka reta ke dikemisi kitai. Rasul John nangkan kitai pasal dunya tu enggau semua utai ba dunya tu deka nadai enda lama agi. (1 Jhn. 2:15-17) Nya kebuah kitai enda tau enda meruan beterima kasih ke reta beroh sereta nyaga reta nya.

20. Nama deka dikereja nuan kena nyaga reta beroh nuan?

²⁰ Patut sanggup ngelengkaka sebarang utai ke tau ngelemika pengerindu kitai ke Perintah Petara. Patut keran deka nginjil enggau ransing, lalu enda lenyau pengerindu ke pengawa nginjil. Terus ngiga pemendar Bup Kudus. Seraya nuan ngereja tu, nuan nyimpan “pengaya ke diri empu di serega, alai penchuri, enggau indu gegat enda ulih ngerusak. Laban dia alai pengaya [reta] kita, dia meh ati kita.”—Luk. 12:33, 34.