Ti Maikadua a Cronicas

32 Kalpasan a simamatalek nga inaramid dagitoy ni Ezekias,+ rimmaut iti Juda ni Ari Senakerib ti Asiria. Pinalawlawanna dagiti napaderan a siudad ta kayatna a serken ken sakupen dagita.+

2 Idi nakita ni Ezekias nga immay ni Senakerib ken kayatna a gubaten ti Jerusalem, 3 nagkonsulta kadagiti prinsipe ken soldadona. Kalpasanna, inkeddengna a sullatan ti danum dagiti ubbog iti ruar ti siudad,+ ket sinuportaranda. 4 Adu nga umili ti naguummong, ket sinullatanda ti amin nga ubbog ken danum nga agay-ayus iti Jerusalem. Kinunada: “Apay koma a dagiti ari ti Asiria ti magunggonaan iti adu a danum?”

5 Determinado pay a nangbangon manen iti interamente a narba a pader ket nangipatakder kadagiti torre iti rabaw dayta, sa nangaramid iti sabali pay a pader iti ruar. Tinarimaanna met ti Bunton*+ ti Siudad ni David, ken nangaramid iti nakaad-adu nga armas ken kalasag. 6 Nangdutok kadagiti panguluen dagiti soldado a mangidaulo kadagiti umili ket inummongna ida iti plasa iti ruangan ti siudad ket pinaregtana ida.* Kinunana: 7 “Papigsaenyo ti pakinakemyo ken bumilegkayo. Dikay agbuteng wenno agamak iti ari ti Asiria+ ken iti adu a kakaduana, ta ad-adu ti kakaduatayo ngem ti kakaduana.+ 8 Agpampannuray iti bileg ti tao, ngem adda kadatayo ni Jehova a Diostayo ket tulongannatayo a makigubat.”+ Napabileg dagiti umili iti imbaga ni Ari Ezekias ti Juda.+

9 Kalpasanna, bayat nga adda idiay Lakis+ ni Ari Senakerib ti Asiria a kaduana ti intero a bileg ti imperiona,* imbaonna dagiti adipenna a mapan idiay Jerusalem ken ni Ari Ezekias ti Juda ken iti amin nga umili ti Juda nga adda idiay Jerusalem,+ ket kinunada:

10 “Daytoy ti kinuna ni Ari Senakerib ti Asiria, ‘Ania ti pagtaltalkanyo ta aggigiankayo pay laeng iti Jerusalem uray no napalawlawanen?+ 11 Saan aya nga al-allilawennakayo ni Ezekias tapno mataykayo gapu iti nakaro a bisin ken waw, nga ibagbagana: “Isalakannatayo ni Jehova a Diostayo iti ima ti ari ti Asiria”?+ 12 Saan aya a ni met laeng Ezekias ti nangikkat kadagiti nangato a disso+ ti Diosyo* ken dagiti altarna+ ken nagkuna iti Juda ken Jerusalem: “Rumbeng nga agruknoykayo iti sanguanan ti maymaysa nga altar ket mangipaaykayo kadagiti daton a mangpataud iti asuk”?+ 13 Diyo aya ammo ti inaramidko ken ti inaramid dagidi ammak iti amin nga umili ti dadduma a nasion?+ Nabaelan kadi dagiti dios ti dadduma a nasion nga isalakan ti nasionda iti imak?+ 14 Asino iti amin a dios dagitoy a nasion a dinadael dagidi ammak ti nakaisalakan kadagiti umilina iti imak, tapno maisalakannakayo ti Diosyo iti imak?+ 15 Ita, dikay agpaallilaw ken Ezekias wenno agpayaw-awan!+ Dikay mamati kenkuana, ta awan ti dios ti aniaman a nasion wenno pagarian a nakaisalakan kadagiti umilina iti imak ken iti ima dagidi ammak. Pulos a saannakayo a maisalakan ti Diosyo iti imak!’”+

16 Adu pay ti imbaga dagiti adipenna maibusor ken Jehova a pudno a Dios ken ni Ezekias nga adipenna. 17 Nangaramid met kadagiti surat+ a manginsulto ken Jehova a Dios ti Israel+ ken nagsao maibusor kenkuana, a kinunana: “Kas kadagiti dios ti dadduma a nasion a saan a nakaisalakan kadagiti umilida iti imak,+ saanto met a maisalakan ti Dios ni Ezekias dagiti umilina iti imak.” 18 Agsasaoda idi iti lengguahe dagiti Judio nga agpukpukkawda kadagiti umili ti Jerusalem nga adda iti rabaw ti pader, tapno butbutngen ken riribukenda ida, ket masakupda ti siudad.+ 19 Nagsaoda maibusor iti Dios ti Jerusalem a kas met laeng iti panagsaoda kadagiti dios dagiti umili ti dadduma a nasion nga aramid dagiti ima ti tao. 20 Ngem inkarkararag daytoy da Ari Ezekias ken propeta Isaias+ nga anak ni Amoz, ket nagsangsangitda a nagpatulong iti Dios idiay langit.+

21 Iti kasta, nangibaon ni Jehova iti anghel ket pinatayna ti amin a nabileg a mannakigubat,+ lider, ken panguluen iti kampo ti ari ti Asiria, isu a nagsubli iti dagana ta naibabain. Idi agangay, simrek iti balay* ti diosna ket sadiay a pinatay ti dadduma nga annakna babaen ti espada.+ 22 Insalakan ni Jehova ni Ezekias ken dagiti agnanaed iti Jerusalem iti ima ni Ari Senakerib ti Asiria ken iti ima ti dadduma pay a nasion ket impaayanna ida iti talna kadagiti kabusorda. 23 Adu ti nangted kadagiti sagut ken Jehova idiay Jerusalem ken nasayaat a bambanag ken Ari Ezekias ti Juda,+ ket napalalo ti panagraem kenkuana ti amin a nasion kalpasan dayta.

24 Kadagidi nga aldaw, nagsakit ni Ezekias ket gistay natay. Nagkararag ken Jehova+ ket sinungbatanna ken nangted iti maysa a pagilasinan.*+ 25 Ngem saan nga inapresiar ni Ezekias ti naimbag a naaramid kenkuana, ta timmangsit ti pusona a nakaigapuan ti panagpungtot ti Dios kenkuana ken iti Juda ken Jerusalem. 26 Nupay kasta, impakumbaba ni Ezekias ti natangsit a pusona,+ ken nagpakumbaba met dagiti agnanaed iti Jerusalem, isu a saan a dimteng kadakuada ti pungtot ni Jehova idi kaaldawan ni Ezekias.+

27 Naaddaan ni Ezekias iti adu a kinabaknang ken dakkel a dayag.+ Nagaramid kadagiti kamarinna+ a pakaikabilan ti pirak, balitok, napateg a batbato, lana ti balsamo, kalasag, ken amin a napateg nga alikamen. 28 Nagaramid met kadagiti pagidulinan iti maapit a bukbukel ken baro nga arak ken lana, kasta met kadagiti kuadra ti amin a nagduduma a kita ti taraken ken kadagiti kulongan dagiti karnero ken kalding. 29 Nangibangon pay kadagiti siudadna, ken naaddaan iti nagadu a taraken, karnero, kalding, ken baka ta inikkan ti Dios iti nakaad-adu a sanikua. 30 Ni Ezekias ti nangsullat iti makinngato a pagtataudan ti danum+ ti Gihon+ sa inturongna dayta nga agpababa iti laud ti Siudad ni David,+ ket nagballigi iti amin nga inaramidna. 31 Ngem idi naibaon kenkuana dagiti pannakabagi dagiti prinsipe ti Babilonia tapno agsaludsodda maipapan iti pagilasinan*+ a napasamak iti daga,+ saan nga inwanwan ti pudno a Dios tapno subokenna+ ken maammuanna ti amin a linaon ti puso+ ni Ezekias.

32 Ti dadduma pay a pasamak iti pakasaritaan ni Ezekias ken dagiti inaramidna a mangipakita iti napudno nga ayatna,+ ket naisurat iti sirmata ni propeta Isaias,+ nga anak ni Amoz, iti Libro ti Ar-ari ti Juda ken ti Israel.+ 33 Naginana ni Ezekias a kas kadagidi ammana, ket intabonda iti sang-atan nga agturong iti nakaitaneman dagiti annak ni David;+ pinadayawan ti intero a Juda ken dagiti agnanaed iti Jerusalem idi natay. Ni Manases nga anakna ti simmaruno nga ari.