Ezekiel

45 “‘Inton bingaybingayenyo ti daga kas tawid,+ itedyo kas kontribusion ken Jehova ti maysa a nasantuan a bingay manipud iti daga.+ Ti kaatiddogna ket 25,000 a kasiko,* ken 10,000 a kasiko ti kaakabana.+ Agbalinto a nasantuan a bingay ti intero a disso.* 2 Iti uneg daytoy, addanto kuadrado a lote para iti nasantuan a disso a 500 a kasiko ti kaatiddogna ken 500 a kasiko ti kaakabana,*+ ken addaanto iti 50 a kasiko a pagpastoran iti tunggal sikiganna.+ 3 Iti daytoy a narukod a daga, mangrukodka iti 25,000 a kasiko ti kaatiddogna ken 10,000 a kasiko ti kaakabana, ket addanto iti unegna ti santuario, ti kasasantuan. 4 Daytanto ti nasantuan a bingay ti daga para kadagiti padi,+ dagiti agserserbi iti santuario, nga umasideg tapno agserbi ken Jehova.+ Daytanto ti pagibangonanda iti balayda ken sagrado a disso para iti santuario.

5 “‘Addanto bingay dagiti Levita, dagiti agserserbi iti templo, 25,000 a kasiko ti kaatiddogna ken 10,000 a kasiko ti kaakabana,+ ken addanto 20 a siled a panganan*+ a kukuada.

6 “‘Itedmo kas kukua ti siudad ti maysa a disso a 25,000 a kasiko ti kaatiddogna (kapada ti nasantuan a kontribusion) ken 5,000 a kasiko ti kaakabana.+ Kukuanto dayta ti intero a sangakabbalayan ti Israel.

7 “‘Addanto daga para iti panguluen, iti agsumbangir a sikigan ti nasantuan a kontribusion ken ti disso a naited iti siudad. Kaabay dayta ti nasantuan a kontribusion ken ti sanikua ti siudad. Addanto dayta iti laud ken daya a sikigan. Ti kaatiddogna manipud iti pagpatinggaan iti laud agingga iti pagpatinggaan iti daya ket kapada ti maysa kadagiti bingay ti tribu.+ 8 Daytoy a daga ti agbalinto a sanikuana iti Israel. Saanton a maltratuen dagiti panguluek ti ilik,+ ket iteddanto ti daga iti sangakabbalayan ti Israel sigun kadagiti tribuda.’+

9 “Daytoy ti kinuna ti Kangatuan* nga Apo Jehova: ‘Nakaron ti ar-aramidenyo, dakayo a panguluen ti Israel!’

“‘Isardengyo ti kinaranggas ken panangirurumenyo, ket aramidenyo ti umiso ken nalinteg.+ Isardengyo nga agawen ti sanikua ti ilik,’+ kuna ti Kangatuan nga Apo Jehova. 10 ‘Masapul nga agusarkayo kadagiti umiso a timbangan, umiso nga efa a sukat* ken umiso a bat a sukat.*+ 11 Agpapada koma ti sukat para iti efa ken iti bat. Ti malaon ti maysa a sukat a bat ket apagkapullo ti homer,* ken ti malaon ti maysa a sukat nga efa ket apagkapullo ti homer. Ti homer ti agbalin a pagibasaran iti panagsukat. 12 Ti maysa a siklo*+ ket 20 a gera.* Ken ti katupag ti 60 a siklo ket maysa a mane.’*

13 “‘Daytoy ti kontribusion a rumbeng nga idatonyo: ti apagkanem ti efa iti tunggal homer ti trigo ken ti apagkanem ti efa iti tunggal homer ti sebada. 14 Ti rukod ti lana ket maibatay iti sukat a bat. Ti maysa a bat ket apagkapullo ti maysa a cor,* ken ti 10 a bat ket maysa a homer, ta 10 a bat ti katupag ti maysa a homer. 15 Ken manipud kadagiti taraken ti Israel, maysa a karnero ti maited iti tunggal 200 a karnero. Dagitoyto ti para iti daton a bukbukel,+ iti sibubukel a daton a mapuoran,+ ken iti daton a pakikappia,+ tapno maabbongan ti basol dagiti tattao,’+ kuna ti Kangatuan nga Apo Jehova.

16 “‘Amin nga umili iti daga iteddanto dayta a kontribusion+ iti panguluen ti Israel. 17 Ngem ti panguluen ti pakaitalkanto dagiti sibubukel a daton a mapuoran,+ daton a bukbukel,+ ken daton nga inumen bayat dagiti piesta,+ baro a bulan, Sabbath,+ ken amin a naikeddeng a piesta ti sangakabbalayan ti Israel.+ Isunto ti mangisagana iti daton gapu iti basol, daton a bukbukel, sibubukel a daton a mapuoran, ken daton a pakikappia, tapno maabbongan ti basol ti sangakabbalayan ti Israel.’

18 “Daytoy ti kinuna ti Kangatuan nga Apo Jehova: ‘Iti umuna nga aldaw ti umuna a bulan, mangalaka iti nasalun-at nga urbon a kalakian a baka iti arban, ket dalusam ti santuario manipud iti basol.+ 19 Mangala ti padi iti dara ti daton gapu iti basol sa ikabilna iti hamba ti ridaw ti templo,+ iti uppat a suli ti aglikmut a pannakasarapa iti altar, ken iti hamba ti ridaw ti makin-uneg a paraangan. 20 Aramidemto dayta iti maikapito nga aldaw ti bulan para iti asinoman a makabasol a di inggagara wenno saanna nga ammo;+ ken dalusanyo ti templo manipud iti basol.+

21 “‘Iti maika-14 nga aldaw ti umuna a bulan, selebraranyo ti piesta ti Paskua.+ Masapul a makan ti tinapay nga awan lebadurana iti pito nga aldaw.+ 22 Iti dayta nga aldaw, mangisagana ti panguluen iti urbon a kalakian a baka kas daton gapu iti basol para kenkuana ken iti amin nga umili iti daga.+ 23 Iti pito nga aldaw ti piesta, inaldaw a mangipaay iti pito a nasalun-at nga urbon a kalakian a baka ken pito a kalakian a karnero kas sibubukel a daton a mapuoran para ken Jehova,+ kasta met iti kalakian a kalding kas daton gapu iti basol. 24 Masapul met a mangisagana iti daton a bukbukel, maysa nga efa para iti tunggal urbon a baka ken maysa nga efa para iti tunggal kalakian a karnero, ken maysa a hin* a lana para iti tunggal efa.

25 “‘Iti maika-15 nga aldaw ti maikapito a bulan, iti pito nga aldaw bayat ti piesta,+ masapul nga isaganana ti isu met laeng a daton gapu iti basol, sibubukel a daton a mapuoran, daton a bukbukel, ken lana.’”