29 Ti mangpatangken iti teltelna kalpasan ti adu a pannubngar+
Ket biglanto a matukkol ken saanen nga umimbag.+
2 Agragsak dagiti umili no adu ti nalinteg,
Ngem agsennaay dagiti umili no agturay ti dakes.+
3 Naragsak ti ama ti tao a mangay-ayat iti kinasirib,+
Ngem ti makikadkadua kadagiti balangkantis saysayangenna ti kinabaknangna.+
4 Babaen ti hustisia, natalged ti pagarian ti ari,+
Ngem dadaelen dayta ti tao nga umawat iti pasuksok.
5 Ti tao a mangpaspasablog iti kaarrubana
Ket mangiwaywayat iti iket iti sakana.+
6 Masiluan ti dakes a tao iti biddutna,+
Ngem sirarag-o nga agpukkaw ken agragsak ti nalinteg a tao.+
7 Maseknan ti nalinteg a tao iti kalintegan dagiti napanglaw,+
Ngem saan a pakaseknan dayta ti dakes a tao.+
8 Dagiti napangas pagpungtotenda ti ili,+
Ngem dagiti masirib pabaawenda ti pungtot.+
9 No makiriri ti masirib a tao iti maag,
Agbinnugkaw ken aglinnaisda, ngem awan ti nasayaat a pagbanaganna.+
10 Dagiti mawaw iti dara kagurada ti asinoman nga inosente,+
Ken kayatda a patayen ti nalinteg.
11 Iyebkas ti maag ti amin a riknana,+
Ngem sikakalma a kontrolen ti masirib ti riknana.+
12 No dumngeg ti agturay iti kinaulbod,
Dakesto amin nga adipenna.+
13 Daytoy ti pagpadaan ti napanglaw ken ti manangirurumen:
Ikkan ni Jehova iti lawag ti matada.
14 No patas ti panangukom ti ari iti napanglaw,+
Kanayonto a natalged ti tronona.+
15 Mangted iti sirib ti pagbaut ken pannubngar,+
Ngem ti ubing a mabaybay-an ibabainna ni inana.
16 No umadu dagiti dakes, umadu ti biddut,
Ngem makitanto dagiti nalinteg ti pannakadadaelda.+
17 Disiplinaem ti anakmo ket paginanaennakanto;
Ken ipaayaannaka iti dakkel a ragsak.+
18 Nagulo dagiti umili no awan ti sirmata,+
Ngem naragsak dagiti mangtungpal iti linteg.+
19 Saan nga agpailinteg ti adipen iti sasao laeng,
Ta uray maawatanna, saan nga agtulnog.+
20 Nakakitaka kadin iti tao a nadarasudos nga agsao?+
Ad-adu ti namnama ti maag ngem isuna.+
21 No napanuynoyan ti adipen sipud kinaagtutubona,
Agbalinto a saan a managyaman.
22 Ti managpungpungtot a tao rubrobanna ti riri;+
Asinoman a nalaka nga agpungtot adu ti maaramidna a biddut.+
23 Ti kinatangsit ti maysa a tao ti mangipababanto kenkuana,+
Ngem mapadayawanto ti asinoman a napakumbaba ti espirituna.+
24 Ti kadua ti mannanakaw guraenna ti bagina.
Mangngegna ti panawagan a panagtestigo, ngem awan ti ipadamagna.+
25 Ti panagbuteng iti tao ket maysa a silo,+
Ngem masalaknibanto ti agtalek ken Jehova.+
26 Adu ti agtarigagay a mapan iti agturay,
Ngem ni Jehova ti mangipaay iti hustisia iti tao.+
27 Kagurgura dagiti nalinteg ti di nainkalintegan a tao,+
Ngem kagurgura dagiti dakes ti tao nga umiso ti ar-aramidenna.+