Ti Maikadua nga Ar-ari

15 Iti maika-27 a tawen ti panagturay ni Ari Jeroboam* ti Israel, nagbalin nga ari ni Azarias*+ nga anak ni Ari Amazias+ ti Juda.+ 2 Nagbalin nga ari idi agtawen iti 16, ket nagturay idiay Jerusalem iti 52 a tawen. Ti nanangna ket ni Jecolias a taga-Jerusalem. 3 Inar-aramidna ti umiso iti imatang ni Jehova, kas iti inaramid ni Amazias nga amana.+ 4 Ngem saan a naikkat dagiti nangato a disso+ ken nangipapaay latta sadiay dagiti umili kadagiti daton a mangpataud iti asuk.+ 5 Pinagkukutel+ ni Jehova ti ari, ket nagtalinaed a kasta agingga iti aldaw ti ipapatayna. Nagnaed iti sabali a balay,+ bayat nga inaywanan ni Jotam+ nga anakna ti balay,* ket nagserbi kas ukom dagiti umili.+ 6 Ti dadduma pay a pasamak iti pakasaritaan ni Azarias,+ ti amin nga inaramidna, ket naisurat iti libro dagiti pasamak idi tiempo dagiti ari ti Juda. 7 Naginana ni Azarias a kas kadagidi ammana+ ket naitabon a kas kadakuada iti Siudad ni David. Ni Jotam nga anakna ti simmaruno nga ari.

8 Iti maika-38 a tawen ti panagturay ni Ari Azarias+ ti Juda, ni Zacarias+ nga anak ni Jeroboam ti nagbalin nga ari iti Israel idiay Samaria, ket nagturay iti innem a bulan. 9 Inaramidna ti dakes iti imatang ni Jehova, kas iti inaramid dagidi ammana. Tinuladna dagiti basol ni Jeroboam nga anak ni Nebat a nakaigapuan ti panagbasol ti Israel.+ 10 Idi agangay, nakikumplot ni Salum nga anak ni Jabes ket pinatayna+ ni Zacarias idiay Ibleam.+ Idi natayen, ni Salum ti simmukat nga ari. 11 Ti dadduma pay a pasamak iti pakasaritaan ni Zacarias ket naisurat iti libro dagiti pasamak idi tiempo dagiti ari ti Israel. 12 Dayta ti kaitungpalan ti sao ni Jehova babaen ken Jehu: “Uppat a henerasion dagiti annakmo+ ti agtugawto iti trono ti Israel.”+ Kasta ti napasamak.

13 Iti maika-39 a tawen ti panagturay ni Ari Uzias+ ti Juda, nagbalin nga ari ni Salum nga anak ni Jabes, ket nagturay idiay Samaria iti makabulan. 14 Manipud Tirza,+ napan ni Menahem nga anak ni Gadi idiay Samaria ket pinatayna sadiay ni Salum+ nga anak ni Jabes. Kalpasanna, ni Menahem ti simmukat nga ari. 15 Ti dadduma pay a pasamak iti pakasaritaan ni Salum ken ti ibubusorna ket naisurat iti libro dagiti pasamak idi tiempo dagiti ari ti Israel. 16 Iti daydi a tiempo, nagrubbuat ni Menahem manipud Tirza ket dinadaelna ti Tifsa ken ti amin nga adda sadiay ken ti teritoriana, ta saan nga inlukat dagiti umili ti ruanganna. Dinadaelna dayta ken binuttiakanna dagiti masikog sadiay.

17 Iti maika-39 a tawen ti panagturay ni Ari Azarias ti Juda, ni Menahem nga anak ni Gadi ti nagbalin nga ari iti Israel, ket nagturay iti 10 a tawen idiay Samaria. 18 Inar-aramidna ti dakes iti imatang ni Jehova. Tinuladna ti amin a basol ni Jeroboam nga anak ni Nebat a nakaigapuan ti panagbasol ti Israel,+ iti intero a panagbiagna. 19 Napan ni Ari Pul+ ti Asiria iti daga ti Israel, ket inikkan ni Menahem iti 1,000 a talento* a pirak ta timmulong a nangpabileg iti panangiturayna iti pagarian.+ 20 Kinolekta ni Menahem ti pirak iti Israel babaen ti panangpilitna a mangted ti amin a nalatak ken nabaknang a tattao.+ Inikkanna ti ari ti Asiria iti 50 a siklo* a pirak para iti tunggal lalaki. Iti kasta, nagsanud ti ari ti Asiria ket saannan nga intuloy ti dumarup. 21 Ti dadduma pay a pasamak iti pakasaritaan ni Menahem,+ ti amin nga inaramidna, ket naisurat iti libro dagiti pasamak idi tiempo dagiti ari ti Israel. 22 Naginana ni Menahem a kas kadagidi ammana, ket ni Pekaias nga anakna ti simmaruno nga ari.

23 Iti maika-50 a tawen ti panagturay ni Ari Azarias ti Juda, ni Pekaias nga anak ni Menahem ti nagbalin nga ari iti Israel idiay Samaria, ket nagturay iti dua a tawen. 24 Inar-aramidna ti dakes iti imatang ni Jehova. Tinuladna dagiti basol ni Jeroboam nga anak ni Nebat a nakaigapuan ti panagbasol ti Israel.+ 25 Nakikumplot ti opisialna a ni Peka+ nga anak ni Remalias ket pinatayna ni Pekaias idiay Samaria iti dakkel a torre iti balay* ti ari agraman da Argob ken Arieh. Nangikuyog ni Peka iti 50 a lallaki a taga-Gilead. Idi napataynan ti ari, isu ti simmukat a nagturay. 26 Ti dadduma pay a pasamak iti pakasaritaan ni Pekaias, ti amin nga inaramidna, ket naisurat iti libro dagiti pasamak idi tiempo dagiti ari ti Israel.

27 Iti maika-52 a tawen ti panagturay ni Ari Azarias ti Juda, ni Peka+ nga anak ni Remalias ti nagbalin nga ari iti Israel idiay Samaria, ket nagturay iti 20 a tawen. 28 Inar-aramidna ti dakes iti imatang ni Jehova. Tinuladna dagiti basol ni Jeroboam nga anak ni Nebat a nakaigapuan ti panagbasol ti Israel.+ 29 Idi kaaldawan ni Ari Peka ti Israel, rimmaut ni Ari Tiglat-pileser+ ti Asiria ket sinakupna ti Ijon, Abel-bet-maaca,+ Janoa, Kedes,+ Hazor, Gilead,+ ken Galilea, ti intero a daga ti Neftali,+ ket impanna dagiti umili idiay Asiria.+ 30 Idi agangay, nakikumplot ni Hosea+ nga anak ni Elah maibusor ken Peka nga anak ni Remalias ket kinabil ken pinatayna. Isu ti simmukat nga ari iti maika-20 a tawen ti panagturay ni Jotam+ nga anak ni Uzias. 31 Ti dadduma pay a pasamak iti pakasaritaan ni Peka, ti amin nga inaramidna, ket naisurat iti libro dagiti pasamak idi tiempo dagiti ari ti Israel.

32 Iti maikadua a tawen ti panagturay ni Peka nga anak ni Remalias nga ari ti Israel, nagbalin nga ari ni Jotam+ nga anak ni Ari Uzias+ ti Juda. 33 Agtawen iti 25 idi nagbalin nga ari, ket nagturay iti 16 a tawen idiay Jerusalem. Ti nanangna ket ni Jerusa nga anak ni Zadok.+ 34 Inar-aramidna ti umiso iti imatang ni Jehova, kas iti inaramid ni Uzias nga amana.+ 35 Ngem saan a naikkat dagiti nangato a disso ken nangipapaay latta sadiay dagiti umili kadagiti daton a mangpataud iti asuk.+ Isu ti nangibangon iti makinngato a ruangan ti balay ni Jehova.+ 36 Ti dadduma pay a pasamak iti pakasaritaan ni Jotam, ti inaramidna, ket naisurat iti libro dagiti pasamak idi tiempo dagiti ari ti Juda. 37 Kadagidi nga aldaw, rinugian ni Jehova nga ibaon ni Rezin nga ari ti Siria ken ni Peka+ nga anak ni Remalias tapno bumusorda iti Juda.+ 38 Naginana ni Jotam a kas kadagidi ammana ket naitabon a kas kadakuada iti Siudad ni David nga apongna. Ni Ahaz nga anakna ti simmaruno nga ari.