Panangmatmat iti Lubong
Kinaulimek
Kalpasan dagiti nakaad-adu a pangarigan a dagiti Saksi ni Jehova ti puntiria iti “relihiuso a panangidumduma nga idauluan ti gobierno” kadagiti adu a nasnasion, ti report idiay The Wall Street Journal intuloyna a kinuna: “Maysa a pamay-an ti panangipapan iti kababalin dagiti gobierno iti sangalubongan nga isyu maipapan iti wayawaya iti relihion isu ti panangkita no ania ti ar-aramiden ti N.U. iti daytoy a banag. Ti sungbat ket—maisupadi iti trabahona maipapan iti panangidumduma iti rasa—ti N.U. bassit laeng ti naaramidanna tapno lapdanna ti idauluan ti gobierno a relihiuso a panangidumduma.” Ngem ti NU saan nga agsolsolo iti panagulimekna maipapan iti dayta a banag. “Nupay no mabalin nga inanamaen ti maysa ti saan a panagtignay iti natignay iti politika a suppiat iti N.U.,” kuna ti artikulo, “ti kinakurang ti komento dagiti mamasirib maipapan iti relihiuso a wayawaya ti ad-adda a makariro. Ti maysa masapul nga agbasa kadagiti adu a liblibro ken artikulo maipapan iti Africa ket pulos a saanna a basaen ti maipapan kadagiti Saksi ni Jehova; ti maysa mabalin a makabasa kadagiti adu a tomo maipapan iti Union Soviet ket bassit laeng ti maammuanna maipapan iti panangtratona kadagiti manamati iti relihion.”
Nakanselar a Linteg ti Sekso
Maysa a hues ti Canada ti nangipaulog a ti maysa a paset iti kriminal a linteg ket di maitunos iti konstitusion gapu ta dayta addaan panangiduma kadagiti lallaki nga agtarigagay a makidenna kadagiti babbai a nababbaba ngem 14 ti edadna. Ti The Toronto Star kunaenna a ti hues iti korte ti distrito inabsueltona dagiti pammabasol iti 21-años iti Londres, Ontario, maysa a lalaki a nakidenna iti 13-años nga ubing a babai. Iti panagkomentona maibatay iti pangngeddengna, ni Judge Killeen kinunana a ti linteg saanen a “nainkalintegan idi 1985.”
‘Danum Naorasan a Bomba’
Ti patas ti danum iti sirok dagiti kangrunaan a siudad iti Britania ket napartak ti panagpangatona agingga iti punto a “mamagpeggad kadagiti usok, pamuon ken uray pay dagiti kukuarto iti uneg ti daga,” kuna ti Daily Telegraph iti Londres. Bayat ti dua gasuten a tawtawen, dagiti paktoria mangibombada iti minilion a galon a danum a mangpennek iti kasapulan ti industria. Itan ti pannakaiyalis ti lugar dagiti paktoria iti ruar dagiti dadakkel a siudad ken ti pangkaaduan a panagbaba ti industria ti namataud iti panagamak iti awagan dagiti eksperto iti inhenieria sibil a “naorasan a bomba.” Ti panangaywan iti patas ti danum idiay Londres ipalgakna ti panagpangato dayta iti agarup tallo a pie (1 m) iti tinawen nanipud idi nasapa a 1970’s. Dagiti serioso a parikut ti naipadamag manipud iti Liverpool ken Birmingham, a sadiay nausaren dagiti alikamen a pangbomba tapno mapagandar dagiti usok iti riles ti tren ken dagiti tubo ti kable.
“Kalintegan iti Di Naipasngay”
Ti tallo-tawenen a legal a suppiat maipapan iti no ania ti aramiden kadagiti 16,433 a nairegreg a maladaga ti di pay nabayag a narisot. Dagitoy ti nasarakan idi 1982 idiay Los Angeles, a naipreserbar iti maysa a pagikkan nga steel. Dagiti manangiregreg tarigagayanda nga ikkan dagitoy iti maysa a relihiuso a pannakaitabon, ngem daytoy ti busoren dagiti mangayon kadagiti babbai ken dagiti grupo a mangitantandudo iti wayawaya. Ti Korte Suprema ti Estados Unidos impaulogna a maysa a panangpompon ti maysa a relihion kadagiti maladaga ti manglabsing iti panagsina ti Iglesia ken ti Estado. Ti nagnumuanda a solusion isu ti panangipaayda iti saan a relihiuso a pannakaitabon. Dagitoy ti naikabil kadagiti innem a kasla lungon a kahon ket naikalida kadagiti tallo a di nasenialan a tanem. Ni Presidente Reagan nangipatulod itoy a mensahe kadagidiay naurnong a maitabon: “Kadagitoy nga awan basolna a natnatay, masapul a maaddaantayo iti ad-adda pay a debosion iti panangisubli iti kalintegan dagiti di pay naipasngay.”
Nakalkaldaang a Panagsinnukat
Maysa a nakadkadlaw a panagsinnukat ti populasion ti napasamak idiay Union Soviet. Nupay no ti dua a kakatlo iti populasion ket adda iti aw-away 30 a tawenen ti napalabas, dayta met laeng a proporsion ti agnanaeden kadagiti siudad. “Iti maysa a pagilian a sadiay ti tradisional a pamay-an ti panagbiag kadagiti aw-away, nga addaan kadagiti natibker nga al-alagaden, ti ad-adda a napapaut ngem ti kaaduan a nasnasion iti Lumaud,” kuna ti The New York Times, “ti panagsinnukat ti agtultuloy a pamilia nga idauluan ti ama a nagturong iti agpannuray iti nuklear a pamilia iti siudad mangipapaayen kadagiti nakalkaldaang a nagbanagan.” Adda “panagsinnukat kadagiti sosial nga ipatpateg ken pamay-an ti panagbiag.” Ti kabbaro a wayawaya iti biag, nga adayo iti away ken ti pamilia, ti makuna a makagapu iti panagsisina ti pamilia, ti alkoholismo, ken iti krimen. “Ti agtutubo a pamilia ita napnapno iti panagsusuppiat, saan a natalged ken basbassit ti annak,” kuna ni Viktor I. Perevedentsev, senior a managsirarak iti Soviet Academy of Sciences.
Peggad ti Ouija Board
Ipadamag ti The Toronto Star a maysa a 12-años nga ubing a babai ti naaddaan iti nakaam-amak a tawen kalpasan ti di umiso nga imbaga ti Ouija board nga isu ti matay inton makagteng iti edad a 13. Iti baro a librona nga Ouija: The Most Dangerous Game, ni Stoker Hunt itudona a malaksid iti direkta a panangited kadagiti di umiso a mensahe, ti board naammuan met a mangtignay iti nakaro a sakit ti isip kadagiti managusar, ket dagiti dadduma mapukawda ti amin a pannakaammoda iti kinapudno gapu iti pannakaigamerda iti ay-ayam. Ti The Toronto Star napaliiwna a ti panangusar iti board isarangna ti maysa kadagiti dinidemonio nga impluensia, ket dayta saan a banag a masapul nga ay-ayamen.
Nalidem a Silaw Maipaay iti Maladaga
Ti New England Journal of Medicine ipadamagna a dagiti dodoktor irekomendarda ti nalidem a silaw iti kuarto ti kappasngay a maladaga. Dagiti panagadal kadagiti maladaga a maikabil kadagiti nakaranraniag a kukuarto ti pagtaraknan ipalgakda ti pannakadadael dagiti urat ti dara iti mata, nga agbanag iti depekto iti panagkita. Nupay no dida babbabalawen ti pateg ti nakalawlawag nga intensive-care nurseries ti medikal a grupo iyebkasda ti pannakaseknan para kadagiti ubbing a masapul a mangbusbos kadagiti adu a lawlawas kadagiti kakasta a kasasaad. Isingasingda a ti nalawag unay a silaw pakaruenna ti kinasensitibo ti mata iti oksihena, nga agbanag iti pannakadadael ti naganus pay nga urat ti dara.
Maganggangan Gaput’ Pannakaiyilado a Dinguen?
Dagiti nabiit pay a rinang-ayan ti pamay-an iti panagpamaga babaen iti panangiyilado ti naipakaammo iti lubong iti komersial a taxidermy wenno panangiyilado iti animal nga agparang a kasla sibibiag. Daytoy a baro a pamay-an ti makaawis kadagiti addaan dinguen nga, agladingit iti pannakapukaw ti tarakenda, ket makitada daytoy kas gundaway a mangitalimeng iti natay nga animal. Iti panangdeskribirna iti pamay-an, ti Los Angeles Times ipadamagna a ti animal ti magulgulan, maikkatan iti kinnan, naiyuper iti pangbugaw iti insekto, ken maindieksionan kadagiti pangitalimeng. Maikkan iti artipisial a mata ket maipatakder babaen kadagiti barot a naikabil iti unegna. Kalpasan ti sumagmamano nga aldaw iti komersial a pagiyiladuan, daytoy ti maiyakar iti lugar a pagpamagaan idiay pagiladuan tapno naan-anay a mamagaan. Daytoy a pamay-an mabalin nga alaenna ti sumagmamano a lawas agingga iti innem a bulan. Ti gatadna mabalin nga agbaliw manipud $400 agingga iti $1,000, agpannuray iti kadakkel ti aso wenno pusa.
Panangisuro nga Agbasa
Maysa a kabbaro a pamay-an ti panangisuro kadagiti ubbing nga agbasa, maysa a paglaingan iti maminsan, ti nakapataud kadagiti aglalaok a resulta iti panagbasa. Kas pangarigan, ti eskuela maisuro kadagiti konsonantes, masubok, maisuro ken masubok manen agingga a nalaing, sakbay ti panangsurona kadagiti bokales ken kadagiti pangkaaduan a termino (plural). Sigun iti The New York Times, nakapuy dagiti resulta no awan ti aktual a panagbasa a maaramid bayat ti panangisuro. Maysa a propesor iti unibersidad idiay E.U. a nangparnuay itoy kabbaro a pamay-an ti nangamin: “Nalaing a nagsuro dagiti ubbing kadagitoy a [paglaingan], ngem dida agbasbasa.” Iti maysa a distrito a sadiay daytoy a pamay-an ti naipamaysa a nausar, ti laeng kakatlo kadagiti graduado iti high school ti makabasa iti tukad a maika-12 a grado. Gapuna dagiti distrito ti eskuelaan paglalaokendan ti kabbaro a pamay-an iti gagangay a programa ti panagbasa.
Gatad ti Implasion
Naipadamag a ti Bolivia ti kapanglawan a nasion idiay Sud America. Ti implasion iti pagilian ti namagbalinen iti peso a ngangnganin awan pategna. Agpangpangato iti kasta unay ti presio iti tinawen iti kapartak a 10,000 porsiento! Maysa a bisita kunaenna a ti gatad ti maysa a hamburger ket maysa a milion a pesos, ket ti maysa a rabii iti nasayaaten nga otel ket mabalin nga aggatad iti 35 milion a pesos. Ipadamag ti Parade Magazine a ti Bolivia gimmatang iti $23 milion a pesos idi 1984, a namagbalin itoy a maikatlo a kadadakkelan a ginatang ti pagilian, a linab-awan laeng ti alikamen a pagminas ken taraon. Gagangay kadagiti taga Bolivia ti mangawit kadagiti sako wenno ules nga iyabadayda iti likudda no mapanda aggatang. Ti implasion ti nangpilit iti gobierno a mangrugin a mangiwaras kadagiti dadakkel ti denominasionna a lima milion a pesos.
Siasino dagiti Mangtakaw iti Banko?
Maysa nga imbestigador iti Munich, Alemania, ti nangaramid iti panagsaludsod iti motibo ken nalikudan dagiti tattao a nagtakaw kadagiti banko. Isut’ nakagteng iti konklusion a ti panangtakaw kadagiti banko ket maysa a krimen nga aramiden laeng dagiti tattao nga addaanen iti kriminal a historia. Imbes ketdi, dayta nagbalinen a ngangngani “krimen ti tunggal maysa.” “Ipalgak ti imbestigasion a dagiti mannanakaw ti banko ita naggapuda kadagiti amin a sosial a kasasaad, trabaho, ken dagiti mamasirib,” kuna ti Bremer Nachrichten. “Makasarakka kadagiti makinkua iti paktoria agraman ti opisial iti militaria, ti stockbroker ken dagiti artesano; ken kasta met ti empleado ti banko a mismo, wen, ti opisial ti polisia.” Ti kaaduan a motibo isu ti pannakautang, ti panaggartem iti sugal, ken ti panagtarigagay iti “siwayawaya nga estilo ti panagbiag.”