Dagiti Ministerial nga Ad-adipen—Taginayonenda ti Naimbag a Kasasaad!
“Ta dagiti nagserbi iti naimbag a pamay-an a ministro makagun-odda iti maysa a naimbag a kasasaad a maipaay kadakuada ken ti dakkel a wayawaya iti panagsao iti pammati ken Kristo Jesus.”—1 TIMOTEO 3:13.
1. Kalpasan ti pannakadutokna kas ministerial nga adipen, ania koma ti kalat ti maysa a lalaki, ket aniat’ rebbeng a tarigagayan nga aramiden dagiti dadduma iti kongregasion?
DAGITI lallaki a ministerial nga ad-adipen ita ‘nasuotdan nga immuna.’ (1 Timoteo 3:10) Ngem ti pannakadutokda ket saan nga isut’ pagpatinggaan a mismo. Ti kalatda ket isut’ panagtultuloyda koma a “makagun-od iti maysa a naimbag a kasasaad a maipaay kadakuada” babaen ti panangitungpalda kadagiti annongenda iti “naimbag a pamay-an.” (1 Timoteo 3:13) Tunggal kameng ti nagkaykaysa a kongregasion Kristiano tarigagayanna a suportaran ida iti pannakaragpatda itoy a kalat.
2. Kasano a maapektaran dagiti kamkameng ti kongregasion babaen ti ar-aramiden dagiti ministerial nga ad-adipen?
2 Impamatmat ni apostol Pablo amin a kamkameng ti naespirituan a bagi ni Kristo ti magunggonaan babaen iti panagtrabahoda a sangsangkamaysa ken ti panangaywan iti maysa ken maysa. (1 Corinto 12:12-31) Umasping met iti dayta, no dagiti ministerial nga ad-adipen aramidenda ti inted-Dios a trabahoda iti “naimbag a pamay-an,” tunggal kameng ti agdama a kongregasion Kristiano ti magunggonaan. Ngem no maipasango dagiti ministerial nga ad-adipen kadagiti parikut a manglapped iti panangitungpalda a siuumiso kadagiti annongenda, mabalin a daytoy ti mangted pakarigatan met amin a kameng ti kongregasion.
3. (a) Ania a parparikut ti gagangay kadagiti amin a tattao ni Jehova? (b) Ti nabiit pay a panangsurbey makatulong a mangiyilustrar iti ania?
3 Amin nga adda iti ili ni Jehova addaanda ti maymaysa a pannakidangadang, “ti pannakidangadang, saan a maibusor iti lasag ken dara, no di ket . . . kadagiti espiritu ti kinadakes idiay ngato.” (Efeso 6:12) Mainayon pay, amin nga ad-adipen ni Jehova ti addaan pannakidangadang a maibusor kadagiti bukodda a kinaimperpekto ken panagbasol. Kas maysa a grupo, nupay kasta, naipasango dagiti ministerial nga ad-adipen kadagiti dadduma a parparikut iti nalatlatak a pamay-an ngem kadagiti dadduma a grupo dagiti Saksi ni Jehova. Makatulong a mangiyilustrar iti daytoy isu ti nabiit pay a surbey ti nasurok a 320 a kongregasion nga addaan 1,360 a ministerial nga ad-adipen iti maysa a pagilian iti makinlaud nga Europa.
Ti Panagwaywayas ken Panagasawa
4. Kasano ti rebbeng a panangmatmat koma dagiti di kasado a ministerial nga ad-adipen iti panagwaywayasda, ket ania a pammaregta ti mabalin a maipaay dagiti dadduma kadakuada?
4 Kadagiti napagsaludsodan a ministerial nga ad-adipen nasurok la bassit a 10 porsiento ti agwaywayas pay laeng. Ngarud tagtagiragsakenda ti wayawaya manipud kadagiti dadduma a rebbengen a gagangay kadagiti ngangngani 90 porsiento a naasawaanen. Ngem dagiti agwaywayas pay a kakabsat a lallaki masapul nga agannadda a dida us-usaren daytoy a wayawaya gapu laeng iti panagsapul kadagiti personal a bambanag kas ti aglablabes a panaglinglingay wenno pannakitimtimpuyog. Ket saanda met koma a palubosan ti natural a tarigagay a mangasawa a maipangpangruna ngem kadagiti dadduma pay iti biag. (Mateo 6:33) Dida met koma a palubosan ti panangpilpilit manipud kadagiti naasawaanen a gagayyemda a mangpilit kadakuada iti naganat wenno di nainsiriban a panagasawa. Ken, siempre, dagiti Kristiano nga addaan panagayat iti maysa ken maysa pagraemanda koma ti agwaywayas a kasasaad dagiti di kasado a kapammatianda ken paregtaenda ida a gundawayan ti dakdakkel a wayawayada a mangipaay iti ad-adu a tiempo kadagiti nateokratikuan nga ar-aramid, a no mabalbalin babaen ti panangala iti amin-tiempo a ministerio.
5. Ania a dakdakkel a peggad ti adda kadagiti naasawaan a ministerial nga ad-adipen ngem kadagidiay nga agwaywayas?
5 Sigun iti naibagan nga immuna a surbey, agarup 62 porsiento kadagiti ministerial nga ad-adipen ti nagannak. Para kadakuada, ti peggad a dagiti puspusoda ket “mapadagsenanda” kadagiti “tarigagay itoy a biag” ti dakdakkel ngem kadagiti agwaywayas pay a kakabsat a lallaki. (Lucas 21:34-36) Gapuna, iti panangirekomendarna ti panagwaywayas, kuna ni Pablo: “Ngem kayatko koma nga awan dagiti pakaringgoranyo. Ti lalaki a saan a nangasawa agawaanna dagiti banag ti Apo, no kasano ti panangay-ayona iti Apo. Ngem ti lalaki a nangasawa agawaanna dagiti bambanag toy lubong, no kasano ti panangay-ayona iti asawana. . . . Kasta met ti mangipaay ti kinabalasang (wenno kinabarona) iti panagasawa nasayaat ti aramidenna, ket ti saan a mangipaay iti dayta iti panagasawa nasaysayaat pay ti aramidenna.”—1 Corinto 7:32-38.
6. Dagiti kasado a ministerial nga ad-adipen kasapulan ti panangaramidda iti ania, ket asino dagiti mabalin a makaitukon ti makatulong a suhestion?
6 Nupay di patien ti ili ni Jehova a ‘dagiti panagasawa maar-aramidda idiay langit,’ ammoda a kasapulan ti nangilangitan a sirib tapno marisot dagiti parparikut iti panagasawa. (Salmo 19:7; Proverbio 3:5, 6) Gapuna, kasapulan a suroten dagiti naasawaan a ministerial nga ad-adipen ti balakad ti Sao ti Dios iti inggat’ kabaelanda. Masapul a pagreggetanda ti agbalin a natimbeng iti panangtungpal kadagiti rebbengenda iti pamiliada, ket kaskasdi dida usaren daytoy kas pambar iti panangliway kadagiti nateokratikuan nga annongenda iti kongregasion. Maysa pay, nasken unay ti nasayaat pannakapanunotna nga eskediol. Dagiti natataengan ken ad-adut’ kapadasanda a pagassawaanen ti mabalin a makaipaay kadagiti ub-ubbing pay ngem isuda kadagiti makatulong a suhestion iti daytoy a banag no maikalikagum dayta kadakuada.
7. (a) Kasano a ti pamilia ti maysa a kasado a ministerial nga adipen ti mangapekto iti panagreggetna ken ti naespirituan nga irarang-ayna? (b) Dagiti ministerial nga ad-adipen nga agpalplano a mangasawa naimbag no aniat’ laglagipenda koma?
7 Ti panangsuportar manipud iti pamiliana ket dakkel a tulong kadagiti naasawaanen a ministerial nga ad-adipen. Siempre, dagiti kameng ti pamilia a mangikabil iti aglablabes a kalikagum iti panawen ken atensionna wenno nalabes ti panagdawatda kadagiti material a bambanag ti makalapped iti naespirituan a panagrang-ayna. Ngem maysa a bendision no ti intero a pamilia suportaranda ti panagreggetna nga ‘agserbi iti naimbag a pamay-an.’ (1 Timoteo 3:13) Gapuna anian a nagpateg a sakbay a mairaman ti di kasado a ministerial nga adipen dagiti rikriknana iti mainanama a kaduananto iti panagbiag padasenna koma nga ikeddeng no daytoy a babai ket makatulongto iti naespirituan nga irarang-ayna!
Ti Panggedan ken ti Materialismo
8. (a) Aniat’ posible a peggad a maipasango iti sumagmamano a ministerial nga ad-adipen maipapan iti sekular a panggedan? (b) Ti panagmennamenna ti ania a sursurat ti makatulong iti maysa a tao a mangparmek iti materialismo?
8 Ti walo iti tunggal sangapulo a ministerial nga ad-adipen a nasurbey ti adda iti edad a nababbaba ngem 60. Gapuna iti kaaduan a kaso mangmanggedda pay laeng a mangsupsuportar iti bagida ken ti pamiliada. Ngangngani lima iti tunggal sangapulo kadakuada ti adda iti nagbaetan ti 20 ken 40 años—no dagiti tattao iti lubong ti gagangay a mangipaspasdek pay laeng iti bagida iti trabaho wenno karera ken pagregreggetanda ti rumang-ay ken agbalin a natalged iti pinansial. No maysakay a ministerial nga adipen nga adda iti dayta nga edad, dikay koma pulos laglag-anen ti peggad a makapatanor ti nailubongan, materialistiko a kababalin a mangpakapsut kadakayo iti naespirituan. Imbes ketdi, laglagipenyo a kuna ni Pablo: “No adda ngarud pagtaraontayo ken pagkawestayo, mapnektayon koma iti daytoy.” (1 Timoteo 6:8) Uray met ni Jesus, nangted ti nagsayaat a balakad a makatulong kadatay amin a mangparmek iti materialismo. Basaenyo dayta nga agpaay kadakayo idiay Mateo 6:19-34.
9. Maitunos iti Mateo 16:26, ania a kurso ti kinasirib ti para kadagiti agkabannuag pay a ministerial nga ad-adipen?
9 Dakayo nga agtutubo pay a ministerial nga ad-adipen nangnangruna, kitaenyo dagiti “naballigi” a lallaki a mangsursurot kadagiti nailubongan a karera wenno agur-urnong ti adu a kinabaknang ngem dida iramraman ni Jehova kadagiti planoda. (Idiligyo ti Proverbio 16:3; 19:21.) Kasano kadi ti kinanainsiriban ti mangipadron iti bagbagiyo kadagiti aniaman a di naespirituan, materialistiko a tattao a ti biagda ket dandanin a makettel bayat ti “dakkel a rigat”? (Mateo 24:21) Asino nga adipen ni Jehova ti mayat a makisinnukat iti lugar kadakuada? “Ta,” kuna ni Jesus, “ania ti magunggona ti tao no maalananto ti amin a lubong ket mapukawnanto ti kararuana?” (Mateo 16:26) Pudno unay, ti kurso ti kinasirib isut’ panangibangon iti natalged a masanguanan a kadua ti organisasion ni Jehova imbes a ti awan kinatalged ken ababa unay a masanguanan a kadua daytoy matmatay a lubong nga adda iti sidong ti pannakabalin ni Satanas.—1 Juan 5:19.
Ti Kinasungdo iti Pagarian ti Dios
10. Maipapan kadagiti napolitikaan a bambanag, ania a takder ti innala dagiti umad-adu a “kadua dagiti agtutubo a lallaki,” agraman dagiti ministerial nga ad-adipen?
10 Babaen iti padto, naikuna maipapan iti Mesianiko nga Ari ni Jehova: “Ti ilim itulnogna ti bagina a siaayat iti aldaw ti pannakabalinmo. Iti kinaranga ti kinasanto, manipud iti aanakan ti bigat, addaanka iti pannakikadua dagiti agtutubo a lallaki kas linnaaw.” (Salmo 110:3) Daytoy a padto ti matungtungpalen nanipud pay 1914, ket dagidiay umad-adu ti bilangda a “pannakikadua dagiti agtutubo a lallaki” nailasinda a ti umuna a kinasungdoda masapul nga iti Pagarian ti Dios a kadua ti naipadayagen a Jesu-Kristo kas Ari. Gapuna bayat a dagitoy dedikado a lallaki, agraman ministerial nga ad-adipen, ti adda iti relatibo a panagpasakop kadagiti “nangatngato a turturay” ti gobierno, iti aniaman a panagsuppiat dagiti intereses, “masapul nga agtulnogda nga umuna iti Dios kas agturay ngem iti tao.” (Roma 13:1; Aramid 5:29) Kas kinuna ni Jesus, dagiti paspasurotna ket “saanda a paset ti lubong.” (Juan 15:19; 18:36) Agtalinaedda a neutral no maipapan kadagiti napolitikaan nga ar-aramid dagiti nasnasion, a bigbigen a ti panangaramidda iti maisupadi iti dayta pagbalinenna ida a traidor iti Pagarian ti Dios.
11. Dagiti kakabsat nga agsagaba gaput’ panangsalimetmetda iti Nakristianuan a neutralidad ti makasiguro iti ania?
11 Kasanon no dagiti ministerial nga ad-adipen wenno dadduma pay mapukawda ti panggedanda wenno uray pay ti wayawayada gaput’ panangsalimetmetda iti Nakristianuan a neutralidadda? (Isaias 2:2-4; Juan 17:16) Iti kasta ammoda a dagiti naespirituan a kakabsatda a lallaki ken babbai ti mangted kadakuada amin a suporta a kasapulan iti naespirituan, ken no kasapulan uray pay ti namaterialan. Pudno daytoy agsipud ta ti bilin ili ni Jehova addaanda ti panagayat iti maysa ken maysa.—Idiligyo ti Juan 13:34, 35; 1 Corinto 12:24, 25.
Ti Pannakasapul ti Dakdakkel a Kapadasan
12. Ti ‘pananggun-od ti naimbag a kasasaad’ ramanenna ti ania?
12 Ngangngani kakatlo kadagiti nasurbey a ministerial nga ad-adipen ti Saksi ni Jehova iti nakurkurangen a sangapulo a tawen. Nalawag, dagitoy a lallaki ti nangawat iti tulong ken panangiwanwan dagiti ad-adut’ kapadasanna a kamkameng ti kongregasion. Ngem ‘ti pananggun-od ti maysa a naimbag a kasasaad’ ramanenna ti panagtultuloy a makaadal manipud kadagiti dadduma ken mangurnong kadagiti kapadasan. Kaipapananna met ti kanayon koma a panangikeddengda kadagiti personal a kalat ken sipapasnek a pagreggetanda a ragpaten dagita. Gapuna no sipapasnek a tarigagayanyo ti makapagserbi kadagiti makagunggona a panggep kas ministerial nga adipen wenno panangragpat iti dayta a pribilehio, inkeddengyo metten aya dagiti sumagmamano a personal a kalat? Kas pangarigan, apay a dikay ikeddeng a basaen ti intero a Biblia agingga iti maysa a petsa wenno agbalin nga auxiliary a payunir kadagiti sumagmamano a bulan?
13. Ania a balakad a naited ken Timoteo ti makagunggona iti maysa a kabsat a lalaki nga agtartarigagay nga agbalin a ministerial nga adipen wenno agserserbi itan iti dayta a kapasidad?
13 No agtutubokay pay iti tawen wenno kapadasan, magunggonaankayo iti adda a naibaga idiay 1 Timoteo 4:12-15. Numan pay dagitoy a sasao naiturongda ken agtutubo a manangaywan a ni Timoteo, kaaduan kadagiti nakuna ni Pablo sadiay maipapan iti panagsao ken ug-ugali ti makagunggona iti asinoman a kabsat a lalaki nga agtarigagay nga agbalin a ministerial nga adipen wenno agserserbin iti dayta a kapasidad. Insurat ti apostol: “Awan koma ti pakaumsian ti kinaubingmo. No di ket, sika koma ti ulidan kadagiti mamati iti sao, iti panagbiag, iti ayat, iti pammati, iti kinadalus. Agingga iti iyaayko, umagawaka iti panagbasbasa, iti pammagbaga, iti panangisursuro. Dika liwayan ti sagut nga adda kenka a naited kenka babaen ti padto, iti pannakaipatay dagiti im-ima dagiti panglakayen. Gagetam dagitoy a bambanag, isuda laeng ti sanguem, tapno ti irarang-aymo maiparangarang koma kadagiti isuamin.” Iti ania ti nangnangruna a parang-ayenyo tapno “ti irarang-aymo maiparangarang koma kadagiti isuamin”? Babaen iti panagkararag ikeddengyo no ania ti kasapulan nga aramidenyo, ket aramidenyo dayta babaen iti tulong ni Jehova!
Panangsaranget kadagiti Pakaupayan
14, 15. (a) Ania ti adda a Nainkasuratan a pammaregta para kadagiti ministerial nga ad-adipen a masapul a pakidangadanganda iti panaglakay wenno nakapuy a salun-at? (b) Kasano a maparegta dagitoy a lallaki ti dadduma nga adda iti kongregasion?
14 Ti adu kadagiti ministerial nga ad-adipen saandan a pakidangadangan dagiti parparikut a naisalsalumina kadagiti agtutubo. Naipasangoda iti panaglakay wenno ti nakapuy a salun-at, a makaiturong iti pannakaupayda. Ngem dagidiay a salsalimetmetanda ti kinabilegda iti naespirituan ti makagun-od iti liwliwa manipud kadagitoy a sasao ni Pablo kadagiti padana a napulotan a Kristiano: “Saankam a maupay, ngem uray ti tao a makinruar kumapuy la a kumapuy, ti tao a makin-uneg mapabaro nga inaldaw. Ta ti nalag-an a sagabami, nga apagkanito laeng, agaramid kadakami ti saan a marukod a kangato ken agnanayon a kadakkel ti dayag; idinto a dikam kitaen dagiti bambanag a makita, no di ket kadagiti saan a makita. Ta dagiti bambanag a makita saanda a mataginayon, ngem dagiti saan a makita mataginayonda.” (2 Corinto 4:16-18) Dagiti ad-adipen ni Jehova nga addaan naindagaan a namnama addaanda met ti makaparegta unay a panginanamaan—ti biag nga awan inggana iti naindagaan a paraiso.—Lucas 23:43; Juan 17:3.
15 Gapuna dagidiay ministerial nga ad-adipen a saan a makapagaramid iti ad-adu kas kadagiti dadduma gapu iti nakapuy a salun-at wenno panaglakayda addaanda iti naimbag a rason a mangsalimetmet iti naragsak ken positibo a kababalin. Isarsarming daytoy ti panangipategda iti kinapudno ken ti nauneg a pammatida kadagiti bambanag nga agnanayon. Ti kasta a nasayaat nga espiritu, a mapakuyogan iti napakumbaba a serbisio, ti dakkel a gunggona ken pammaregta iti tunggal maysa iti kongregasion.
16. Apay di rebbeng a maupay ti ministerial nga adipen no di madutokan a panglakayen?
16 No maysakayo a ministerial nga adipen, itultuloyyo “a ragpaten ti saad ti maysa a manangaywan” babaen ti panangparang-ay ti abilidadyo a mangisuro ken kadagiti naespirituan a kualidad. (1 Timoteo 3:1) Ngem dikay koma maup-upay no dikay madutokan nga insigida kas panglakayen. Laglagipenyo a bayat ti panangay-aywanyo kadagiti annongenyo kas ministerial nga adipen “iti naimbag a pamay-an” agserserbikay iti makagunggona a panggep ken dakkel a katulongankayo ti kongregasion. Dakkel a pribilehio ti agserbi iti aniaman a pamay-an iti uneg ti organisasion ni Jehova ken ti panangtulong kadagiti kapammatianyo a mangitungpal iti bilin a mangikasaba iti Pagarian.—Mateo 24:14; 28:19, 20.
No Kasano a Makatulong dagiti Dadduma
17. Kasano a ti ministerial nga adipen matulongan ti asawana ken annakna?
17 Iti panangbigbigtay kadagiti makagunggona a panggep a pagserserbian dagiti ministerial nga ad-adipen, amin nga adda iti ili ni Jehova rebbeng a tarigagayanda a suportaran ti panagreggetda. Kas pangarigan, nalaklaka para iti kasta a tao a mangitultuloy nga ‘agserbi iti naimbag a pamay-an’ no ti asawana ken annakna kontentoda kadagiti kasapulan ti panagbiag ket saanda nga agdawdawat iti adu a kinaluho a makasapul iti panangbusbosna iti ad-adu a panagbannog iti panggedanna.—1 Timoteo 6:6-8.
18. (a) Kasano a dagiti panglakayen matulonganda dagiti ministerial nga ad-adipen? (b) Apay a ti nasayaat a komunikasion nasken iti nagbaetan dagiti panglakayen ken ministerial nga ad-adipen?
18 Dagiti panglakayen makatulongda kadagiti ministerial nga ad-adipen babaen ti panangtedda kadakuada iti aniaman a kasapulan a panangiwanwan ken balakad. Ket no naaramid ti panagrang-ay, ti napasnek a komendasion ti rebbeng a maipaay. Mainayon kadagiti adu a bambanag, dagiti panglakayen mabalinda a kuyogen dagiti ministerial nga ad-adipen iti tay-ak ti ministerio, tulongan ida nga agsagana kadagiti palawag, ken mangiraman kadakuada iti nabaknang a Nakristianuan a kapadasanda. Kaawatan ti kasta nga interes ken komunikasion no maminsan maliwliwayan. Kas pangarigan, idi mapagsaludsodan no apay a nababa ti reportna iti tay-ak ti serbisio, maysa a ministerial nga adipen ti nagkuna iti manangaywan ti sirkito: “Apay a saludsodenyo? Daytat’ nakababbaban iti adu a tawtawen, ngem dakay pay laeng ti immun-una nga adda nakunana maipapan iti dayta.” Dagiti panglakayen a mangipapaay kadagiti ministerial nga ad-adipen iti makapabileg, naayat a balakad ken siaanus a mangtultulong kadakuada iti parparikutda ti masansan addaandat’ rag-o a makakita kadagiti naisangsangayan a bunga.
19. Kasano a tunggal kameng ti kongregasion matulonganda dagiti ministerial nga ad-adipen a mangsalimetmet ti naimbag a kasasaadda?
19 Kinapudnona, tunggal kemeng ti kongregasion makatulong kadagiti ministerial nga ad-adipen a mangtaginayon ti naimbag a kasasaadda. Kasano? Babaen ti pannakitunos kadakuada ken ti panangipakita ti naimpusuan a panangapresiar iti trabahoda. No kasano nga amin a kamkameng ti natauan a bagi ti normal nga agtrabaho a sangsangkamaysa tapno mataginayon ti pisikal a salun-at, kasta met amin a kamkameng ti kongregasion masapul nga agtutunosda tapno maipasiguro ti naimbag a naespirituan a salun-atna. (Idiligyo ti 1 Corinto 12:24, 25.) Agpaay iti dayta a panggep, adu ti maar-aramidan dagiti nagaget a ministerial nga ad-adipen nga agserserbi kadagiti makagunggona a panggep ken mangsalimetmet iti naimbag a kasasaad. Sapay koma ta isuda, ken amin dagiti nasungdo a Saksi ni Jehova, kumitada iti masanguanan iti agnanayon a ragsak ken sangsangkamaysa nga itultuloyda a pagbalinen a naragsak ti puso “ti naragsak a Dios.”—1 Timoteo 1:11; Proverbio 27:11.
Pangngaasiyo ta Ilawlawagyo
◻ Ania a parparikut ti mabalin a maipasango kadagiti ministerial nga ad-adipen?
◻ Aniat’ maaramidan dagiti assawa ken annak dagiti ministerial nga adipen a makatulong kadakuada?
◻ Aniat’ maaramidan dagiti panglakayen a mangtulong kadagiti ministerial nga ad-adipen?
◻ Aniat’ maaramidan ti tunggal kameng ti kongregasion a makatulong kadagiti ministerial nga ad-adipen?