Am-ammuenyo ti Nausioso a Coati
BABAEN ITI MANNURAT TI AGRIINGKAYO! IDIAY BRAZIL
AGPASPASIARKA iti kakaykayuan idi kellaat a nakitam ti maysa a pangen dagiti coati nga umas-asideg kenka. Napabutnganka ket pampanunotem no dangrandaka. Ngem dika agbuteng! Nupay pagaammo a kumagat dagiti coati, ti laeng bagmo ti talaga a paginteresan dagitoy a nausioso a babassit nga animal. Kanayon ngamin nga agbirbirokda iti makan. Kinapudnona, kanenda ti dandani aniaman a masarakanda, agraman dagiti igges, alutiit, lawwalawwa, utot, prutas, ken uray dagiti itlog ti tumatayab.
Ti coati ket kabagian ti raccoon, ngem at-atiddog ti bagi ken ipusda ken atiddog ken nalap-it ti sungoda. Agingga iti 66 a sentimetro ti kaatiddog ti bagida, ken kasta met laeng ti kaatiddog ti ipusda. Daytoy a mamalia iti tropiko ket gagangay a masarakan iti abagatan a laud nga Estados Unidos agingga iti amianan nga Argentina.
Agkukuyog dagiti kabaian kas maysa a pangen nga agingga iti 20 a bilang, idinto ta dagiti kalakian kaykayatda ti agsolsolo. Tunggal tawen, bayat ti panagpaaduda, makikadua ti maysa a kalakian iti maysa a pangen dagiti kabaian. Iti nagbaetan ti pito ken walo a lawas, dagiti masikog a kabaian panawanda ti pangen tapno agaramidda iti pannakaaponda iti kayo. Tallo wenno uppat ti iyanak ti tunggal kabaian. Agarup innem a lawas kalpasan ti panaganakda, dagiti kabbaro nga inna—agraman dagiti annakda—makikaduada manen iti pangen. Dagiti urbon a coati kaslada burburan a bola nga agargaraw.
Bayat nga agsawarda iti kakaykayuan, dagiti coati kanayon a lang-abenda ti angin ken agkalida babaen kadagiti kawwetda. Dagiti mannalon kasuronda dagiti coati, ta dadaelen dagitoy nga ayup ti kamaisan ken dagiti pagaponan ti manokda. Ammoda ti aglemmeng no adda manganup kadakuada. Dagitoy nasirib a babassit a parsua nalaingda nga aglemmeng kadagiti kayo. Adda sabali pay a pamay-an ti panaglibasda. No makangngegda iti kanalbuong wenno tipat, agtinnagda iti daga ket aginpapatayda! Inton makaasidegen ti mangnganup tapno tiliwenna ida, nakapanawdan!
Nalabit makakitakanto iti maysa a pangen dagiti coati iti sumaganad nga isasarungkarmo idiay Brazil. Ngarud, dika agbuteng. Saandaka a dangran. Ngem sigurado a maragsakanda no puruakam ida iti naimas a makan!