Agimtuod Dagiti Agtutubo

Kasano a Mapagbalinko a Makaparagsak ti Panagdayaw iti Dios?

Ni Josh, nga agtawen iti 16, ket nakailad iti katrena. Napan ni nanangna iti kuartona sa sisiserioso a kinunana: “Joshua, bumangonkan! Ammom met a gimongtayo ita!” Napadakkel ni Josh kas maysa a Saksi ni Jehova, ket regular a paseten ti panagdayaw ti pamiliada ti itatabuno kadagiti Nakristianuan a gimong. Ngem ita, kasla awan gaganaygayan ni Josh a makigimong.

Inreklamona, “Nanang, talaga kadi a masapul nga umayak?”

“Dikan agreklamo, agsukatka ketdin. Diak kayat ti maladaw manen!” kinuna ni nanangna sa timmallikuden tapno pumanaw.

“Ngem Nanang,” impakamakam ni Josh, “relihionyo dayta, ngem dina kayat a sawen a relihionko metten dayta.” Ammona a nangngeg la ketdi dayta ni nanangna gapu ta nadlawna a nagsardeng dagiti arimpadekna sa pimmanaw a di nagun-uni.

Medio nakonsiensia ni Josh iti naisawangna. Siempre, dina kayat a sairen ni nanangna. Ngem dina met kayat ti agpadispensar. Kaskasdi, kapilitan nga agtungpal ken nanangna.

Nupay masuron, bimmangon latta ni Josh sa nagrubbuat a makigimong. Kalpasanna, indayamudomna: “Uray ta addanto aldaw a siakton ti agdesision para iti bagik. Saanak a kas iti dadduma idiay Kingdom Hall. Kasla diak pay ketdi kayat ti agbalin a Saksi!”

NARIKNAM met kadin ti kasta? Pasaray mapilpilitanka kadi a makipaset kadagiti Nakristianuan nga aktibidad nupay pakaragsakan dayta ti dadduma? Kas pagarigan:

◼ Ibilangmo kadi a ti panagadal iti Biblia ket kas iti homework?

◼ Maamakka kadi a mangasaba iti binalaybalay?

◼ Maum-umaka kadin kadagiti Nakristianuan a gimong?

No wen ti sungbatmo kadagiti saludsod a kas kadagita, dika maupay. Babaen ti sumagmamano laeng a panagbalbaliw, agbalin a makaparagsak ti panagserbim iti Dios. Kitaentayo no kasano.

Umuna a Karit: Panagadal iti Biblia

No apay a saan a nalaka dayta. Nalabit ipapanmo a talaga a dimo mayulo ti agadal. Ngamin, kasla marigatanka nga agtugaw ken agimdeng iti mabayag. Maysa pay, saan kadi a nagadu ti leksionmo iti eskuelaan a nasken nga asikasuem?

No apay a rumbeng nga aramidem dayta. Ti Biblia ket saan laeng nga impaltiing ti Dios no di ket “naserbi a pangisuro iti kinapudno, pangbabalaw, pangatur iti biddut ken pakasursuruan iti nalinteg a panagbiag.” (2 Timoteo 3:16, Ti Baro a Naimbag a Damag Biblia) No adalem ti Biblia ken utobem dagiti nabasam, umuneg ti pannakaawatmo kadagiti bambanag. Nasken a bigbigem a saanmo a magun-odan ti maysa a napateg a banag no dimo pagreggetan a gun-oden dayta. No kayatmo ti agbalin a nalaing iti maysa nga isport, masapul a sursuruem dagiti pagannurotan ken agensayoka. No kayatmo a nasalun-atka, masapul nga agehersisioka. No kayatmo a maammuan ti maipapan iti Namarsua, masapul nga adalem ti Sao ti Dios.

Ti makuna dagiti padam nga agtutubo. “Idi haiskulak, adda dagiti napateg a desision a masapul nga aramidek. Adu a kalokuan ti ar-aramiden dagiti estudiante, isu a kasapulan nga agdesisionak: ‘Kasta met kadi ti kayatko nga aramiden? Talaga kadi a kinapudno ti isursuro kaniak dagiti dadakkelko?’ Nasken a siak a mismo ti mangammo iti kinapudno.”​—Tshedza.

“Sipud pay idi damo, patiek a ti naadalko ket isu ti kinapudno, ngem masapul a siak a mismo ti mangpaneknek iti dayta. Masapul nga agdayawak iti Dios gapu ta dayta ti kayatko nga aramiden, saan ket a gapu ta dayta ti kayat dagiti dadakkelko.”​—Nelisa.

No ania ti mabalinmo nga aramiden. Mangaramidka iti bukodmo a plano iti panagadal sigun kadagiti paginteresam ken kasapulam. Sika ti agpili iti topiko nga adalem. Kasano a rugiam? Apay a dimo adalen a naimbag ti Bibliam ken usigen dagiti patpatiem, nalabit babaen ti panangusarmo iti libro a kas iti Ania a Talaga ti Isursuro ti Biblia?a

No kasanom nga ibanag dayta. Tapno marugiam, mangpilika iti dua wenno tallo kadagiti topiko ti Biblia ditoy baba a kayatmo nga ad-adda a maadal. No kayatmo met, mangisuratka iti dadduma malaksid kadagita.

□ Adda kadi Dios?

□ Kasano a masiguradok a dagiti nangisurat iti Biblia ket pinaltiingan ti Dios?

□ Apay a rumbeng a patiek ti panamarsua imbes a ti ebolusion?

□ Ania ti Pagarian ti Dios, ken kasano a mapaneknekak ti kaaddana?

□ Kasano a mailawlawagko ti pammatik maipapan iti kasasaad dagiti natay?

□ Apay a rumbeng a kombinsidoak nga addanto panagungar?

□ Kasano a masiguradok no ania ti pudno a relihion?

□ ․․․․․

Maikadua a Karit: Pannakiraman iti Ministerio

No apay a saan a nalaka dayta. Mabalin a makapadanag ti pannakisarita iti sabsabali maipapan iti Biblia wenno no ti maiparna a makasabaam ket kaeskuelaam.

No apay a rumbeng nga aramidem dayta. Imbilin ni Jesus kadagiti pasurotna: “Mangaramidkayo iti ad-adalan. . . , nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Ngem adda dadduma pay a rason a nasken nga aramidem dayta. Ipakita dagiti panagadal nga iti dadduma a lugar, kaaduan nga agtutubo ket mamatida iti Dios ken iti Biblia. Ngem dagita nga agtutubo ket awananda iti napaypayso a namnama agpaay iti masanguanan. Gapu ta ad-adalem ti Biblia, adda kenka ti pannakaammo a birbiroken ken kasapulan dagiti padam nga agtutubo!

Ti makuna dagiti padam nga agtutubo. “Nangisaganakami iti gayyemko kadagiti epektibo nga introduksion ket nasursuromi no kasano ti isusungbat kadagiti sumupiat ken no kasano ti agsarungkar. Idi ad-adda a rimmegtaak iti ministerio, ad-addan a makaparagsak dayta kaniak.”​—Nelisa.

“Dakkel ti naitulong kaniak ti maysa a Kristiano a kabsat a babai nga in-inauna ngem siak iti innem a tawen. Ikuykuyognak iti pangasabaan ken pasaray awisennak a mammigat iti ruar. Impabasana dagiti makaparegta a teksto iti Biblia a nakatulong tapno mapasayaatko ti panagpampanunotko. Gapu iti nagsayaat nga ulidanna, ad-adda itan nga interesadoak a tumulong kadagiti tattao. Talaga a nagdakkel ti naitulongna kaniak!”​—Shontay.

No ania ti mabalinmo nga aramiden. No ipalubos dagiti dadakkelmo, mangpilika iti maysa a kakongregasionmo a natataengan ngem sika a mabalin a pakikaduaam iti ministerio. (Aramid 16:1-3) Kuna ti Biblia: “Babaen iti landok, ti met laeng landok mapatadem. Gapuna ti maysa a tao patademenna ti rupa ti sabali.” (Proverbio 27:17) Adu ti pagimbagan ti pannakikadua kadagiti natataengan nga aduanen iti kapadasan. “Talaga a makapabileg ti pannakikadua kadagiti natataengan,” kuna ti agtawen iti 19 a ni Alexis.

No kasanom nga ibanag dayta. Iti baba, isuratmo ti nagan ti kakongregasionmo a makatulong kenka iti ministerio malaksid kadagiti dadakkelmo.

․․․․․

Maikatlo a Karit: Pannakigimong

No apay a saan a nalaka dayta. Kalpasan ti nagmalmalem a panagtugawmo iti klasem idiay eskuelaan, kasla makatuok unayen ti panagimdeng iti naibatay-Biblia a diskurso iti maysa wenno dua pay nga oras.

No apay a rumbeng nga aramidem dayta. Ibalakad ti Biblia kadagiti Kristiano: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.”​—Hebreo 10:24, 25.

Ti makuna dagiti padam nga agtutubo. “Nasken ti panagsagana sakbay dagiti gimong. No dadduma, masapul laeng a gutugotem ti bagim nga agadal. No nakasaganaka, matagiragsakmo dagiti gimong gapu ta ammom dagiti mapagsasaritaan, ken mabalinmo pay ketdi ti makipartisipar.”​—Elda.

“Nadlawko nga ad-adda a makapainteres kaniak dagiti gimong no nakapagkomentoak.”​—Jessica.

No ania ti mabalinmo nga aramiden. Iwayaam ti agsagana a nasaksakbay ken agkomentoka no kabaelam. Dayta ti tumulong kenka tapno ad-adda a mariknam a karamanka iti gimong.

Kas panangyilustrar: Ania ti naragragsak, ti panagbuya iti ay-ayam iti TV wenno ti mismo a pannakiay-ayam? Siempre, ad-adda a makaparagsak ti agay-ayam ngem ti agbuybuya laeng. Gapuna, apay a dika makipaset kadagiti Nakristianuan a gimong imbes a tumabunoka laeng?

No kasanom nga ibanag dayta. Iti espasio iti baba, isuratmo no kaano a mabalinmo ti agsagana iti uray 30 a minuto laeng kada lawas para iti maysa a gimong ti kongregasion.

․․․․․

Adu nga agtutubo ti makapampaneknek a pudno ti ibagbaga ti Salmo 34:8: “Nanamenyo ken kitaenyo a ni Jehova naimbag.” Saan kadi a makaparagsak a denggen ti maipapan iti maysa a nagimas a putahe? Ngem saan kadi nga ad-adda a makaparagsak no maramanam a mismo dayta? Kasta met ti panagdayaw iti Dios. Nanamem ken kitaem a mismo no kasano a makagunggona ti pannakiraman kadagiti naespirituan nga aktibidad. Kuna ti Biblia a daydiay managaramid iti trabaho a saan a managdengngeg laeng ket “naragsakto iti panangaramidna iti dayta.”​—Santiago 1:25.

Ad-adu pay nga artikulo ti masarakan iti serye nga “Agimtuod Dagiti Agtutubo” iti Web site a www.watchtower.org/​ype

[Footnote]

UTOBEM DAGITOY

◼ Apay a kasla makauma dagiti naespirituan nga aktibidad para kadagiti tin-edyer?

◼ Ania kadagiti tallo nga aspeto ti panagdayaw a nadakamat iti daytoy nga artikulo ti kayatmo a parang-ayen, ken kasanom nga aramiden dayta?

[Ladawan iti panid 20, 21]

No kayatmo a nasalun-atka iti pisikal, masapul nga agehersisioka. No kayatmo a nasalun-atka iti naespirituan, masapul nga adalem ti Sao ti Dios