‘Sapulem ni Jehova’ Babaen ti Panagdayaw nga Anamonganna

 1. Ania dagiti bendision a tagtagiragsakem iti sidong ti ili ti Dios?

ANIAN a pribilehio ti pannakaam-ammom iti Dios a mangtungtungpal kadagiti padto! Matagiragsakmo ti kasasaad nga insurat ni propeta Oseas: “Itulagkanto kaniak iti kinamatalek; ket sigurado a maammuamto ni Jehova.” Inladawan ni Oseas ti natalged, kasla paraiso a kasasaad a tagiragsaken dagiti tattao ti Dios iti panagsublida manipud idiay Babilonia a nakaidestieruanda. Umasping iti dayta, dagiti tattao ti Dios iti moderno a panawen tagtagiragsakenda ti naespirituan a kinarang-ay ken kinatalged; mayarig iti paraiso ti kasasaadda. (Oseas 2:18-20) Nagaladanka iti nagan ti Dios kas maysa kadagiti dedikado nga adipenna​—maysa kadagiti Saksi ni Jehova​—ket kayatmo nga agtalinaedka a kasta.​—Isaias 43:10, 12; Aramid 15:14.

2, 3. (a) Apay a saan a naay-ayo ni Jehova iti wagas ti panagdayaw dagiti nagkauna nga adipenna? (b) Apay a rumbeng nga usigentayo ti mensahe nga impakaammo dagiti mammadto?

² Ti nagkauna nga Israel ket maysa a nasion a dedikado ken ni Jehova. Awan ti sabali a nasion nga addaan kadagiti alagaden a kas kadagiti inted ni Jehova iti Israel. (Deuteronomio 4:33-35) Ngem idi arinunos ti maikasiam a siglo K.K.P., dakkel ti nagbalbaliwan ti kasasaad dagiti Israelita, isut’ gapuna a kinuna ti Dios kadakuada babaen ken ni propeta Amos: “Ginurak, linaksidko dagiti piestayo . . . No mangidatonkayo kaniak kadagiti sibubukel a daton a mapuoran, uray kadagiti datonyo a sagut saanakto a makasarak iti ragsak.” (Amos 5:21, 22) Nupay awan ti kasta nga ibagbaga ti Dios iti sangalubongan a kongregasionna ita, ania ngata ti riknam no kasta ti makunana maipapan iti panagdayawmo? Adda kadi maadal iti daytoy ti tunggal maysa kadatayo?

³ Kadagidi a tiempo, ibagbaga dagiti tattao ti Dios nga agdaydayawda ken ni Jehova iti wagas nga anamonganna. Nupay kasta, adu kadakuada ti nagdaydayaw kadagiti didiosen dagiti pagano, kas iti Baal dagiti Canaanita ken dagiti ladawan ti sinan-urbon a baka. Adda met dagidiay agdatdaton kadagiti nangato a disso. Agsapsapatada ken ni Jehova ngem agrukrukbabda met kadagiti bituen. Gapuna, nangibaon ti pudno a Dios kadagiti mammadto a mangidagadag kadagiti umili nga agsublida kenkuana ket agdayawda iti nadalus a wagas. (2 Ar-ari 17:7-17; 21:3; Amos 5:26) Nalawag ngarud nga uray kadagiti dedikado nga adipen ti Dios, mabalin nga adda dagiti banag nga agkasapulan iti atension​—dagiti aramid wenno kababalin a rumbeng nga usigen tapno masigurado nga agdaydayawtayo iti wagas nga anamongan ni Jehova.

 4. Ania dagiti kasasaad bayat ti panagturay ni Ari Jeroboam II?

⁴ Panunotem ti panawen idi nagserbi kas pannakangiwat ti Dios dagiti kaunaan kadagiti 12 a mammadto. Ipadpadtoda idi ti idadateng ti aldaw a panangdusa ni Jehova iti pagarian ti Israel a buklen ti sangapulo a tribu. Ngem agparang a narang-ay ti nasion. Kas impadto ni Jonas, ni Ari Jeroboam II sinakupna manen dagiti amin a daga a kukua idi ti Israel, manipud amianan nga agpa-Damasco agingga iti Natay a Baybay. (2 Ar-ari 14:24-27) Nupay dakes ti inar-aramid ni Jeroboam, nagan-anus ni Jehova ta dina kayat nga ikisap ti Israel. Ti Dios inikkanna dagiti Israelita iti gundaway nga agbabawi, a ‘birokenda ni Jehova, ket agtultuloyda nga agbiag.’​—Amos 5:6.

 5. Ania ti awan kadagiti Israelita a nakaigapuan ti panangilaksid ni Jehova kadakuada?

⁵ Dagiti narang-ay nga Israelita mabalinda koma a ginundawayan ti nagsubli ken ni Jehova babaen ti ad-adda a panangam-ammoda kenkuana ken panangaramidda iti pagayatanna. Ngem saan ta impagarupda a natalgedda ket ‘ti didigra saanto nga umasideg wenno dumanon agingga kadakuada.’ (Amos 9:10) Nalipatanda ni Jehova ta “napnekda ket ti pusoda nangrugi a tuman-ok.” (Oseas 13:6) Ditay koma panunoten a maysa laeng daytoy a nagkauna a pakasaritaan nga awan ti pakainaiganna kadatayo. Imutektekam ti makagapu no apay a binabalaw ni Jehova dagiti Israelita: “Agsipud ta sika linaksidmo ti pannakaammo, laksidenkanto met manipud panagserbi a kas padi kaniak.” Dedikadoda ken Jehova a kas met kadagiti kameng ti pamiliada. Ngem kas indibidual, awananda iti pudno a “pannakaammo iti Dios.”​—Oseas 4:1, 6.

 6. Apay a maikuna a dagiti Israelita ket awanan iti pannakaammo iti Dios?

⁶ Dina kayat a sawen a kas man la awan a pulos ti ammoda maipapan iti sasao ti Dios. Naibilin kadagiti nagannak nga Israelita nga isuroda dagitoy kadagiti annakda. Mabalin nga insarsarita kadakuada dagiti dadakkelda dagiti pasamak a nailanad iti Biblia, ken nalabit nangnangngegda dagita iti pannakipatpatangda kadagiti sabsabali wenno kadagiti publiko a panagtataripnongda. (Exodo 20:4, 5; Deuteronomio 6:6-9; 31:11-13) Kas pagarigan, nangngegda no ania ti napasamak idi nangaramid ni Aaron iti sinan-urbon a baka bayat nga adda ni Moises idiay Bantay Sinai tapno awatenna ti Sangapulo a Bilin. (Exodo 31:18–32:9) No kasta, dagiti Israelita idi kaaldawan dagiti mammadto adda ammoda iti Linteg ken nangnangngegda ti maipapan kadagiti napalabas a pasamak. Nupay kasta, awan serserbi ti pannakaammoda agsipud ta saanda a nagdaydayaw iti Dios iti wagas a kayatna.

 7. (a) Apay a nagbiit a simmukir dagiti Israelita? (b) Kasano a ti maysa a Kristiano ‘mangrugi a malipatanna ti Nangaramid kenkuana’?

⁷ Nalabit maisaludsodmo, ‘Apay a kasta la ketdin kabiit a simmukir dagiti Israelita?’ Kastoy ti panangilawlawag ni Oseas: “Rinugian a linipat ti Israel ti Nangaramid kenkuana.” (Oseas 8:14) Ti sasao a “rinugian a linipat” ket umiso a patarus ti porma ti orihinal a Hebreo a berbo. Saan a bigla lattan a nalipatan dagiti Israelita ni Jehova. Imbes ketdi, in-inut a nalipatanda ti kinapateg ti panagdayaw kenkuana iti wagas nga anamonganna. Panagkunam posible ngata a matnag ti maysa a Kristiano iti kasta a palab-og? Alaem a pagarigan ti maysa a tao a sipapasnek a mangipapaay iti kasapulan ti pamiliana. (1 Timoteo 5:8) Tapno maaramidna dayta, maitutop laeng nga ilalaenna ti panggedanna. Nalabit tumaud ti kasasaad nga iti panagriknana ket masapul a lumangan sagpaminsan kadagiti gimong ti kongregasion gapu iti trabahona. Inton agangay, maruam ket masansan a lumanganton kadagiti gimong. In-inut a kumapuy ti relasionna iti Dios​—ket ‘nangrugin a malipatanna ti Nangaramid kenkuana.’ Mabalin a kasta met laeng ti mapasamak iti maysa a Kristiano a saanna a kapammatian dagiti dadakkelna wenno dagiti dadduma a kabagianna. Kasano ngata kaadu ti panawen nga ipaayna kadakuada, ken kaano? (Exodo 20:12; Mateo 10:37) Komusta met ngay ti kaadu ti panawen ken atension nga ipaayna iti panagpasiar, pagesman, wenno paglinglingayan?

 8. Idi kaaldawan ni Amos, ania ti kayat a sawen ti “kinadalus dagiti ngipen”?

⁸ Ad-adalentayo ti Sao ti Dios ken iyap-aplikartayo dagiti masursurotayo. Nupay kasta, adda sasao a naaramat iti libro nga Amos a nasayaat nga usigen ti tunggal maysa kadatayo: “kinadalus dagiti ngipen.” Babaen ken ni Amos, pinakdaaran ti Dios dagiti tattaona: “Siak met, iti biangko, inikkankayo iti kinadalus dagiti ngipen kadagiti amin a siudadyo ken kinakirang iti tinapay kadagiti amin a dissoyo.” (Amos 4:6) Saan a literal a kinadalus dagiti ngipen ti kayat a sawen dayta, no di ket kaawan ti makan wenno panagbisin. Maysa pay, maysa dayta a pakdaar maipapan iti “nakaro a bisin, saan nga iti tinapay, ken waw, saan nga iti danum, no di ket iti panagdengngeg iti sasao ni Jehova.”​—Amos 8:11.

9, 10. (a) Kasano a mabalin nga agbisin iti naespirituan ti maysa a Kristiano? (b) Apay a nasken a laglagipentayo a no ditay agsalukag, mabalin nga agbisintayo iti naespirituan?

⁹ Iti naespirituan a pamay-an, matungtungpalen ti sasao ni Amos iti nakalkaldaang a kasasaad ti Kakristianuan. Maigiddiat iti dayta, silulukat kadagiti adipen ti Dios iti intero a lubong “dagiti aribengbeng ti langlangit.” Naparaburanda iti nawadwad a naespirituan a taraon. (Malakias 3:10; Isaias 65:13, 14) Ngem mabalin nga isaludsod ti maysa a Kristiano, ‘Kasano kaadu ti ipapaunegko a naespirituan a taraon?’ Makapainteres ta natakuatan dagiti dadduma nga agsuksukisok a no dagiti animal a maus-usar iti laboratorio ket madangran ti makimbaba a paset ti utekda, madadael ti ganasda a mangan agingga a matayda gapu iti bisin nupay adu ti mabalinda a kanen! Posible ngata a ti maysa a Kristiano ket madadael ti ganasna a mangan iti naespirituan a taraon nga uray la mangrugi nga agbisin nupay nalikmut iti nawadwad a naespirituan a taraon?

¹⁰ Bayat a sipapanunotka iti kasasaadmo, usigem daytoy: Impaayan ni Jehova dagiti Israelita iti aglaplapusanan a naespirituan a taraon. Adda kadakuada ti Linteg, a mangpalagda iti relasionda kenkuana; addaanda iti urnos a mangipasagepsep iti nadiosan a pannakaammo kadagiti annakda; ken addaanda kadagiti mammadto a mangipaawat kadakuada iti pagayatan ti Dios. Nupay kasta, rinugianda a linipat ni Jehova. Kuna ti Biblia nga idi kaaldawan ni Oseas, “napnekda [iti namaterialan a pamay-an] ket ti pusoda nangrugi a tuman-ok.” (Oseas 13:6; Deuteronomio 8:11; 31:20) No ditay kayat nga agbalin a napatpateg kadatayo dagiti material a banag ngem iti relasiontayo iti Dios, nasken nga inaldaw a laglagipentayo dayta a peggad.​—Sofonias 2:3.

11, 12. (a) Bayat ti panagturay ni Ari Ozias, apay a nasken nga idagadag dagiti mammadto kadagiti umili nga agsublida ken ni Jehova? (b) Ania a napateg a banag ti impaganetget ni Joel?

¹¹ Bayat ti panagturay ni Jeroboam II idiay Israel, agturturay met idiay Juda ni Ozias (a maawagan met iti Azarias). Pinalawa ni Ozias ti Jerusalem agraman ti sakupna. “Nangipakita iti pigsa a nalabes unay” agsipud ta “intuloy a tulongan ti pudno a Dios.” “Inar-aramidna no ania ti umiso kadagiti mata ni Jehova” ken “nagannayas a mangbirok iti Dios.” Nupay kasta, adu kadagiti umili ti Juda ti nagtultuloy a nagdaton kadagiti nangato a disso.​—2 Cronicas 26:4-9.

¹² Maawatam iti daytoy a nupay nagaladan dagiti umili ti Juda ken Israel iti nagan ti Dios, masansan a nairaman iti panagdayawda dagiti banag a saan nga anamongan ti Dios. Inkagumaan dagiti mammadto a tulongan ida a mangilasin iti pudno a panagdayaw ken ti palso. “Agsublikayo kaniak buyogen ti amin a puspusoyo, ken buyogen ti panagayunar ken buyogen ti panagsangit ken buyogen ti panagdung-aw,” impakpakaasi ti Dios babaen ken Joel. (Joel 2:12) Tandaanam: Kayat ti Dios nga umadani kenkuana dagiti tattao ‘buyogen ti amin a pusoda.’ Wen, parparawpaw ken saan a naimpusuan ti panagdayawda. (Deuteronomio 6:5) Maulit-ulit nga inyunay-unay ni Jehova babaen kadagiti mammadtona ti kinapateg ti naayat a kinamanangngaasi, kinahustisia, ken kinaemma​—a bin-ig a galad ti puso.​—Mateo 23:23.

13. Ania ti nasken nga utoben dagiti Judio a nagsubli manipud idiay Babilonia a nakaidestieruanda?

¹³ Sumaganad, usigem ti napasamak kalpasan ti panagsubli dagiti Judio iti dagada. Nupay naisubli ti pudno a panagdayaw a mayannurot iti Linteg, saanda a tinungpal a naan-anay dagiti bilin ti Dios. Nagayunar dagiti Judio kadagiti aldaw nga anibersario dagiti pasamak a nainaig iti pannakadadael ti Jerusalem. “Pudno kadi a nagayunarkayo kaniak, mismo a kaniak?” insaludsod ni Jehova. Nalangalang ti siudad gapu iti panangipakat ni Jehova iti hustisia, a di rumbeng a pagladingitan. Imbes a taliawenda ti napalabas ken agayunarda a silaladingit, rumbeng koma nga agragrag-o dagidi a Judio kadagiti piesta a marambakan kadagiti naituding a panawen gapu kadagiti bendision nga itden ti pudno a panagdayaw. (Zacarias 7:3-7; 8:16, 19) Nasken a laglagipenda met dagiti dadduma pay a banag. Ania kas pagarigan? “Buyogen ti pudno a kinahustisia mangukomkayo; ket aramidenyo iti maysa ken maysa ti naayat a kinamanangngaasi ken as-asi . . . ket dikay manggandat iti dakes maibusor iti maysa ken maysa iti puspusoyo.” (Zacarias 7:9, 10) Magunggonaantayo amin iti insuro dagidi a mammadto iti ili ti Dios maipapan iti naimpusuan a panagdayaw iti Dios.

14. (a) Idi nakasublin dagiti Israelita kalpasan ti pannakaidestieroda, ania ti nasken nga iramanda iti panagdayawda? (b) Kasano nga impaganetget dagiti mammadto dagiti napatpateg nga aspeto ti panagdayaw?

¹⁴ Ania ti ramanen ti naimpusuan a panagdayaw? Bueno, ania ti imparebbeng ti Dios kadagiti tattaona sakbay ken kalpasan ti pannakaidestieroda? Ammom a nasken a maitandudo dagiti moral a pagalagadan ti Dios. Adda met dagiti espesipiko nga aramid wenno aktibidad nga impaannurot ti Linteg, kas ti panagtataripnong a dumngeg ken agsursuro iti pagayatan ti Dios. Ngem malaksid iti dayta, babaen kadagiti mammadtona impaganetget ti Dios ti panangpatanor ken panangipakita iti naayat a kinamanangngaasi, hustisia, kinaemma, asi, ken kinanumo. Imutektekam no kasano nga impaganetget ni Jehova dagitoy: “Naragsakanak iti naayat a kinamanangngaasi, ket saan nga iti sakripisio; ken iti pannakaammo iti Dios imbes a kadagiti sibubukel a daton a mapuoran.” “Agimulakayo iti bin-i maipaay iti bagbagiyo buyogen ti kinalinteg; agapitkayo maitunos iti naayat a kinamanangngaasi.” (Oseas 6:6; 10:12; 12:6) Kinuna ni Mikias: “Ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?” (Mikias 6:6-8) Maysa pay, indagadag ni propeta Sofonias kadagiti adipen ti Dios: “Sapulenyo ni Jehova, dakayo amin a naemma iti daga . . . Sapulenyo ti kinalinteg, sapulenyo ti kinaemma.” (Sofonias 2:3) Nasken dagiti kasta a galad iti panagdayaw nga anamongan ti Dios.

15. Maitunos iti pammagbaga dagiti mammadto, ania ti nasken nga aramiden dagiti Kristiano kas paset ti panagdayawda?

¹⁵ Ania ti paset dagita a galad iti panagdayawtayo? Ammom a napateg ti panangikasaba iti naimbag a damag ti Pagarian. (Mateo 24:14; Aramid 1:8) Ngem mabalinmo nga isaludsod iti bagim: ‘Ibilangko kadi a narigat a trabaho wenno makapadagsen ti panangasaba? Wenno ibilangko kadi dayta kas gundaway a tumulong kadagiti tattao a nasken a makangngeg iti makaispal iti biag a mensahe ti Biblia? Maasianak kadi kadakuada?’ Wen, asi ken naayat a kinamanangngaasi ti mangtignay koma kadatayo a mangpakdaar kadagiti sabsabali maipapan iti aldaw ni Jehova. Adda met paset ti kinahustisia ken kinalinteg bayat nga ikagumaantayo nga idanon dayta a mensahe iti amin a kita ti tattao.​—1 Timoteo 2:4.

16, 17. Apay a nasken ti kinaemma ken kinanumo iti panagdayawmo?

¹⁶ Kas maysa pay a pagarigan, usigem ti obligasiontayo a tumabuno kadagiti Nakristianuan a gimong, nga ammom a napateg. (Hebreo 10:24, 25) Pinampanunotmo kadin no kasano a nainaig iti dayta ti kinaemma ken kinanumo? Dagiti naemma sipapakumbaba nga agsursuroda sada iyaplikar ti masursuroda, iti kasta ipakpakatda ti hustisia ni Jehova. Ti nanumo a tao bigbigenna dagiti pagkuranganna ken ti panagkasapulanna iti pammaregta ken pannakaammo a magun-odan kadagiti gimong.

¹⁷ Makitam kadagitoy a pagarigan no kasano a makatulong kadatayo ti insuro dagiti mammadto. Ngem kasanon no mautobmo nga adda dagiti nasken a balbaliwam mainaig iti maysa wenno ad-adu pay kadagiti banag a nadakamat iti ngato? Wenno kasanon no nakaaramidka kadagiti nadagsen a basol iti napalabas, ket mariribukanka no malagipmo dagita? Maliwliwa ken matulongandaka dagiti 12 a mammadto.

18. (a) Nangnangruna nga agpaay kadagiti siasino ti makaliwliwa a mensahe dagiti 12 a mammadto? (b) Ania ti makunam maipapan ken ni Jehova iti panagpakaasina kadagiti tattao nga agsubli kenkuana?

¹⁸ Kas nakitatayon, saan laeng a nangbabalaw ken nangkondenar ti inaramid dagiti mammadto a salsalaysayentayo. Inusar ida ni Jehova a manggutugot kadagiti umili nga agsubli kenkuana. Utobem ti rikna ni Oseas idi indagadagna: “Umaykayo, ket agsublitayo ken Jehova, ta isu nangrangrangkay ngem paimbagennatayto. Nangkabkabil, ngem bedbedannatayto. . . . Ket maam-ammotayto, ikagumaantayto nga am-ammuen ni Jehova.” (Oseas 6:1-3) Pudno nga impakat ni Jehova a Dios ti hustisia idi dinusana ti Israel ket kalpasanna ti Juda. Nupay kasta, rumbeng nga imbilang koma dagiti tattaona dagidi a didigra kas addang tapno maisubli ti naespirituan a salun-atda. (Hebreo 12:7-13) No agsubli ken Jehova dagiti nasukir a tattaona, ‘paimbagen’ ken ‘bedbedanna ida.’ Iladawanmo iti panunotmo ti maysa a tao a nakaparintumeng a mangbedbedbed iti sugat ti sabali. Ita darepdepem a ni Jehova ti mangar-aramid iti dayta. Anian a kinamanangngaasi ni Jehova a Dios, a mangpaimbag kadagidiay situtulok nga agsubli kenkuana! Saan kadi a tignayennatayo dayta nga agsubli kenkuana no makabasoltayo kenkuana?​—Joel 2:13.

19. Ania ti ramanen ti panangam-ammo ken ni Jehova?

¹⁹ Ania ti ramanen ti panagsubli iti Dios? Ipalagip kadatayo ni Oseas a saantay laeng a basta ‘ammuen’ ti maipapan iti Dios no di ket “ikagumaantayo nga am-ammuen ni Jehova.” Maipapan iti Oseas 6:3, kastoy ti kuna ti maysa a moderno a reperensia: “Dakkel ti nagdumaan ti panangammo iti maipapan iti Dios ken ti panangam-ammo kenkuana. Mayarig dayta iti nagdumaan ti panangbasbasa laeng iti maipapan iti ayat ken ti mismo a riknam no agayatka.” Saan laeng a narabaw a pannakaammo maipapan ken ni Jehova ti kasapulantayo. Masapul nga agbalin ni Jehova a napaypayso kadatayo, kas maysa a mapagtalkan a Gayyem a mabalintay nga asitgan uray kaano. (Jeremias 3:4) No addaanka iti kasta a relasion, maawatam no ania ti riknana iti ar-aramidem, ket dakkel ti maitulong dayta iti panagdayaw kenkuana iti wagas nga anamonganna.

20, 21. Kasano nga impapuso ni Ari Josias ti pannakaammo iti Dios?

²⁰ Maysa ni Ari Josias a nasayaat nga ulidan iti panangannurot iti pudno a panagdayaw. Usigem pay ti kapadasanna. Idi nagbalin nga ari ni Josias, datin a naigamer ti nasion ti Israel iti idolatria, kinaranggas, ken panangallilaw bayat ti panagturay da Manases ken Amon. (2 Ar-ari 21:1-6, 19-21) Awan duadua a ti pammagbaga ni Sofonias a “sapulenyo ni Jehova” ket nasayaat ti epektona ken ni Josias ta “rinugianna a biroken ti Dios ni David.” Rinugian ni Josias nga inikkat idiay Juda ti idolatria, ket inaramidna dayta agingga kadagiti lugar a sigud a sakup ti makin-amianan a pagarian.​—Sofonias 1:1, 14-18; 2:1-3; 3:1-4; 2 Cronicas 34:3-7.

²¹ Kalpasan daytoy a panangdalus, intultuloy ni Josias a binirok ni Jehova. Pinatarimaanna ti templo. Bayat a matartarimaan ti templo, nasarakanda “ti libro ti linteg ni Jehova babaen ti ima ni Moises,” nalabit ti orihinal a manuskrito a nakaisuratan ti Linteg. Ania ti inaramid ni Josias idi naibasa kenkuana ti linaon dayta a libro? “Apaman a nangngeg ti ari ti sasao ti linteg, dagus a rinay-abna dagiti kawesna.” ‘Rinay-abna met ti pusona’ ket tinungpalna a dagus ti nangngegna. Saanna nga impambar nga adun ti nagapuananna. Malagipmo kadi ti resulta ti repormana? ‘Iti amin nga al-aldawna saan a simiasi dagiti annak ti Israel iti isusurot ken Jehova a Dios dagidi ammada.’​—2 Cronicas 34:8, 14, 19, 21, 30-33; Joel 2:13.

22. Ania ti masursurotayo iti ulidan ni Josias?

²² ‘No siak ni Josias, ania koma ngata ti inaramidko?’ nalabit maisaludsodmo. Kas ken Josias, ipangagmo ngata ti sasao dagiti mammadto ken mangaramidka kadagiti nasken a panagbalbaliw iti tigtignay ken panagpampanunotmo? Nupay saantayo nga agbibiag iti panawen da Sofonias ken Josias, mabigbigtayo a nasken nga ipangagtayo dagiti mensahe ken balakad ti Dios iti kaaldawantayo. Isu a no mautob ti maysa a Kristiano nga adda nasken a balbaliwanna iti kabibiagna wenno iti panagdayawna, ti panangusigna iti insurat dagiti 12 a mammadto ti manggutugot kenkuana a mangaramid iti kasta.​—Hebreo 2:1.

23. No mautobmo nga adda nasken a balbaliwam, ania ti mabalinmo nga aramiden?

²³ No dadduma, mabalin a mariknam ti kas iti narikna ni Jonas idi adda iti tian ti dakkel nga ikan: “Napagtalawak iti sango dagiti matam! Kasano a mamatmatakto manen ti nasantuan a templom?” (Jonas 2:4) Ngem anian a makaliwliwa kadatayo dagiti sao ni Jehova, datayo nga imperpekto a tattao nga agannayas nga agbiddut! “Agsublikayo kaniak, ket agsubliakto kadakayo.” (Malakias 3:7) No mautobmo a masapul a patibkerem ti relasionmo ken ni Jehova, maragsakan dagiti panglakayen iti kongregasionyo a tumulong kenka. Kas iti panagmaneho iti lugan, iti panagrubbuatmo ikambiom nga umuna iti primera. No nakabuelon ti lugan, naan-annayasen ti agpataray. Masiguradom a madadaan ni Jehova a tumulong kenka, ta “managparabur ken naasi, nabannayat nga agunget ken naruay iti naayat a kinamanangngaasi.” (Joel 2:12-14) Wen, dagiti mensahe dagiti mammadto ket makaliwliwa kadagiti amin nga agdaydayaw iti Dios iti wagas nga anamonganna.