Dagiti Ministerial nga Adipen Mangipapaayda iti Napateg a Panagserbi

KASTOY ti insurat ni apostol Pablo iti kongregasion ti Filipos: “Siak ni Pablo, ket kaduak ni Timoteo a padak nga adipen ni Kristo Jesus. Nagsuratak iti amin a nasantuan dita Filipos a naikaykaysa ken Kristo Jesus, agraman kadagiti manangaywan ken ministerial nga adipen.” (Fil. 1:1) Paliiwem ta kinablaawanna dagiti ministerial nga adipen. Nalawag a napateg ti akem dagitoy a lallaki iti panangtulongda idi kadagiti panglakayen kadagiti kongregasion. Kasta met laeng ita. Ti panagserbi nga ar-aramiden dagiti ministerial nga adipen ket makatulong kadagiti manangaywan ken mamagbalin a naurnos ti kongregasion.

² Am-ammom kadi dagiti ministerial nga adipen iti kongregasionyo? Ammom kadi ti adu a trabaho nga ar-aramidenda a pagsayaatam ken pagsayaatan ti intero a kongregasion? Sigurado nga apresiaren ni Jehova ti panagserbi dagita a lallaki. Kinuna ni Pablo: “Dagiti lallaki a nasayaat ti panagserbida ket nasayaat ti takderda ken nawayada nga agsao maipapan iti pammati mainaig ken Kristo Jesus.”​—1 Tim. 3:13.

³ Dagiti ministerial nga adipen ket manamnama a nasayaat ti panagbiagda kas Kristiano, mapagtalkanda, ken umiso ti panangitungpalda iti annongenda. Nalawag daytoy no usigentayo ti kinuna ni Pablo iti suratna ken ni Timoteo maipapan kadagiti kualipikasionda: “Dagiti ministerial nga adipen masapul met a seriosoda, saanda a manangallilaw, saanda a nalaing nga uminum iti arak, saanda a naagum iti material a gunggona, a salsalimetmetanda ti sagrado a palimed ti pammati babaen ti nadalus a konsiensia. Kasta met, masubok koma nga umuna dagitoy no maikarida; kalpasanna, mabalindan ti agserbi kas ministro, ta awan ti pakaakusaranda. Dagiti ministerial nga adipen ket asawa koma ti maymaysa a babai, nasayaat ti panangidauloda kadagiti annakda ken iti sangakabbalayanda.” (1 Tim. 3:8-10, 12) An-annurotenda ti nangato a pagalagadan a para kadagiti ministerial nga adipen tapno masalakniban ti kongregasion kadagiti pammabalaw maipapan kadagiti lallaki a nakaitalkan kadagiti napateg nga annongen.

⁴ Ub-ubing man wenno natataengan, dagiti ministerial nga adipen ket aktibo iti ministerio kada bulan. Naregtada iti ministerio kas panangtuladda ken Jesus. Gapu iti kinaregtada, ipakpakitada ti pannakaseknan ni Jehova a mangispal kadagiti tattao.​—Isa. 9:7.

⁵ Mapagulidanan met dagiti ministerial nga adipen no maipapan iti panagkawkawes, panaglanglanga, panagsasao, kababalin, ken kondukta. Nasimbeng ti panagpampanunotda, isu nga adda panagraem kadakuada ti sabsabali. Kasta met, ti relasionda ken ni Jehova ken dagiti pribilehioda iti kongregasion ti kapatgan kadakuada.​—Tito 2:2, 6-8.

⁶ Dagitoy a lallaki ket ‘nasuboken no maikarida.’ Sakbay pay a nadutokanda, napaneknekandan a talaga a dedikadoda a lallaki. Impakitada nga inyun-unada ti interes ti Pagarian ken ragragpatenda ti aniaman a pribilehio a silulukat kadakuada. Talaga a nagsayaatda nga ulidan iti kongregasion.​—1 Tim. 3:10.

⁷ Agserserbi dagiti ministerial nga adipen iti nadumaduma a pamay-an para kadagiti kakabsatda. Kas resultana, ad-adu ti panawen dagiti panglakayen a mangitungpal iti trabahoda a mangisuro ken mangipastor. No maikkan dagiti ministerial nga adipen iti annongen, ikabilangan dagiti panglakayen ti abilidad ti tunggal maysa ken ti kasapulan ti kongregasion.

⁸ Usigentayo dagiti panagserbi nga ar-aramidenda: Mabalin a madutokan ti maysa a ministerial nga adipen a mangasikaso iti literatura tapno makaalatayo iti kasapulantayo ken mausartayo iti ministerio. Madutokan met ti dadduma a mangurnos iti kuenta ti kongregasion ken rekord iti teritoria. Dadduma ti madutokan a mangasikaso kadagiti mikropono, sound system, agserbi nga attendant, ken tumulong kadagiti panglakayen iti dadduma pay nga annongen. Nagadu ti trabaho a masapul nga aramiden tapno mamantener ken kanayon a nadalus ti Kingdom Hall, isu a masansan a makiddaw kadagiti ministerial nga adipen a tumulongda a mangasikaso kadagitoy nga annongen.

⁹ Iti dadduma a kongregasion, mabalin a nagduduma a ministerial nga adipen ti madutokan a mangasikaso kadagitoy nga annongen. Iti dadduma a lugar, mabalin nga adu nga annongen ti asikasuen ti maysa a ministerial nga adipen. Iti dadduma a kasasaad, saan laeng a maymaysa a ministerial nga adipen ti madutokan a mangaramid iti maysa a trabaho. No awan ti ministerial nga adipen a mangasikaso iti dadduma kadagitoy nga annongen, mabalin a mangdutok ti bagi dagiti panglakayen kadagiti mapagwadan a kakabsat a lallaki a mangasikaso iti daytoy napateg a trabaho. Iti kasta, maaddaanda iti kapadasan a mausardanto inton kualipikadodan a madutokan kas ministerial nga adipen. Ngem no awan dagiti kakabsat a lallaki, ti maysa a mapagwadan a kabsat a babai ti makiddaw a tumulong iti dadduma nga annongen, nupay saan a madutokan kas ministerial nga adipen. Mapagwadan ti maysa a kabsat no nasayaat ti kababalinna, regular a makigimong, ken makiraman iti ministerio. Mapagwadan met ti pannakilangenna iti pamiliana, panangpilina iti paglinglingayan, panagkawkawes ken panaglanglangana, ken dadduma pay.

¹⁰ Kadagiti kongregasion a bassit ti panglakayen, makiddaw kadagiti makabael a ministerial nga adipen a mangrepaso kadagiti indibidual kadagiti saludsod para iti bautismo a mainaig kadagiti pannursuro ti Biblia. Masarakan dagitoy iti Apendise “Paset 1: Patpatien Dagiti Kristiano.” Masapul a panglakayen ti mangrepaso iti “Paset 2: Panagbiag kas Kristiano” gapu ta nairaman ditoy dagiti sensitibo a banag.

¹¹ Nasayaat no sagpaminsan a pagsisinnukaten dagiti panglakayen ti annongen dagiti ministerial nga adipen. Ngem adda pagimbaganna no itultuloy pay laeng dagiti kakabsat nga asikasuen ti isu met laeng nga annongen tapno maaddaanda iti kapadasan ken makabesadoda dayta.

¹² Depende iti kasasaad, mabalin nga adda pay dagiti trabaho a maited kadagiti ministerial nga adipen a ti panagrang-ayda ket “makita ti amin a tattao.” (1 Tim. 4:15) No manmano ti panglakayen, mabalin a madutokan ti ministerial nga adipen nga agserbi kas katulongan ti manangaywan iti grupo wenno, iti dadduma a kasasaad, agserbi kas group servant, nga agtrabaho babaen ti panangiwanwan dagiti panglakayen. Mabalin a madutokan dagiti ministerial nga adipen nga agpaset iti Gimong a Panagbiag ken Ministerio, mangipaay iti palawag publiko, ken no kasapulan, mangidaulo iti Panagadal ti Kongregasion iti Biblia. Mabalin a maikkan met iti dadduma pay a pribilehio dagiti ministerial nga adipen no adda panagkasapulan ken no maragpatda dagiti kualipikasion iti dayta nga annongen. (1 Ped. 4:10) Situtulok koma dagiti ministerial nga adipen a tumulong kadagiti panglakayen.

¹³ Nupay naiduma ti trabahoda kadagiti panglakayen, napateg daytoy ken maibilang a paset ti sagrado a panagserbi iti Dios tapno naurnos ti panagandar ti kongregasion. Inton agangay, no nasayaat ti panangitungpal dagiti ministerial nga adipen kadagiti annongenda ken kualipikadodan nga agserbi kas pastor ken mannursuro, mabalin a mairekomendada nga agserbi kas panglakayen.

¹⁴ No maysaka a tin-edyer a kabsat a lalaki wenno nabiitka pay a nabautisaran, ragragpatem kadi dagiti kualipikasion para kadagiti ministerial nga adipen? (1 Tim. 3:1) Gapu ta tinawen a nakaad-adu ti mababautisaran, kasapulan dagiti kualipikado a naespirituan a lallaki a mangasikaso kadagiti annongen iti kongregasion. Kabaelam a ragpaten dayta no patanorem ti tarigagay a tumulong iti sabsabali. Maaramidam dayta no utobem ti nagsayaat nga ulidan ni Jesus. (Mat. 20:28; Juan 4:6, 7; 13:4, 5) Dumakkel ti tarigagaymo no mapadasam ti ragsak iti panangtulong iti sabsabali. (Ara. 20:35) Gapuna, agboluntarioka a tumulong iti sabsabali, tumulong a mangmantener iti Kingdom Hall, wenno mangisandi iti presentasion iti Gimong a Panagbiag ken Ministerio. Ti panangragpat iti pribilehio ramanenna met ti panangparang-ay kadagiti naespirituan a galad babaen ti kaadda ti nasayaat a personal a panagadal. (Sal. 1:1, 2; Gal. 5:22, 23) Kasta met, ti maysa a kabsat a rumagragpat iti pribilehio, ipakpakitana a mapagtalkan ken matalek no maikkan iti annongen iti kongregasion.​—1 Cor. 4:2.

¹⁵ Dagiti ministerial nga adipen ket dinutokan ti nasantuan nga espiritu nga agpaay a pagsayaatan ti kongregasion. Maipakita ti amin iti kongregasion nga ap-apresiarenda ti panagserbi dagiti ministerial nga adipen no makikooperarda bayat nga ar-aramiden dagitoy dagiti naited nga annongenda. No aramidenda dayta, ipakpakita met ti kongregasion nga ap-apresiarenda ti probision ni Jehova a mangtaginayon a naurnos ti sangakabbalayan.​—Gal. 6:10.