Panagtataripnong a ‘Mangtignay Kadatayo a Mangipakita iti Ayat ken Nasayaat nga Ar-aramid’

KADAGITI naglabas a siglo, agtataripnong ti ili ni Jehova iti organisado a pamay-an. Iti nagkauna nga Israel, amin a lallaki idi ket mapan idiay Jerusalem para iti tallo a dadakkel a piesta. (Deut. 16:16) Idi umuna a siglo, regular nga agtataripnong dagiti Kristiano iti maysa a pagtaengan. (Flm. 1, 2) Maragragsakantayo ita a tumabuno kadagiti gimong, asamblea, ken kombension. Apay nga agtataripnong dagiti adipen ti Dios? Kangrunaanna, gapu ta napateg dayta a paset ti panagdayawtayo.​—Sal. 95:6; Col. 3:16.

² Magunggonaan met dagiti tumabuno kadagiti gimong. Iti tunggal maikapito a Piesta ti Abong-abong, naibilin kadagiti Israelita: “Ummongem dagiti tattao​—lallaki, babbai, ubbing, ken dagiti ganggannaet a residente kadagiti siudadyo​—tapno mangngeg ken masursuroda ti maipapan ken Jehova a Diosyo ken agbutengda kenkuana, ken tapno matungpalda a naimbag ti amin a sasao daytoy a Linteg.” (Deut. 31:12) Nalawag, ti kangrunaan a rason nga agtataripnongtayo ket tapno ‘agpaisuro ken Jehova.’ (Isa. 54:13) Mangipaay met dagiti gimong iti gundaway tapno maam-ammo ti maysa ken maysa, maparegta, ken mapabileg babaen ti pannakilangentayo.

³ Dagiti adalan a naguummong kalpasan ti Pentecostes 33 C.E. impapusoda ti sursuro dagiti apostol, ken “inaldaw nga addada iti templo a maymaysa ti panggepda.” (Ara. 2:42, 46) Idi agangay, no agtataripnong dagiti Kristiano tapno agdayaw, basaenda dagiti naipaltiing a sursurat, agraman dagiti surat dagiti apostol ken ti dadduma pay a Kristiano nga adalan. (1 Cor. 1:1, 2; Col. 4:16; 1 Tes. 1:1; Sant. 1:1) Adda met dagiti panagkararag iti kongregasion. (Ara. 4:24-29; 20:36) No dadduma, maisalaysay dagiti kapadasan dagiti misionero. (Ara. 11:5-18; 14:27, 28) Nausig dagiti pannursuro iti Biblia ken ti kaitungpalan dagiti naipaltiing a padto. Naisuro dagiti bambanag maipapan iti umiso a kababalin dagiti Kristiano ken nadiosan a debosion. Napabileg ti amin nga agbalin a naregta a mangipakaammo iti naimbag a damag.​—Roma 10:9, 10; 1 Cor. 11:23-26; 15:58; Efe. 5:1-33.

⁴ Dagiti Nakristianuan a gimong ita ket kas met laeng iti panaggigimong a naaramid idi kaaldawan dagiti apostol. Sursurotentayo ti pammaregta a masarakan iti Hebreo 10:24, 25: “Agpipinnanunottayo . . . , a ditay baybay-an ti panaggigimongtayo, kas iti nakayugalian ti dadduma, no di ket agpipinnaregtatayo, ken ad-adda pay nga aramidentayo amin dagita bayat a makitkitayo nga umas-asidegen ti aldaw.” Kadagitoy napeggad a maudi nga al-aldaw, kasapulantayo ti kanayonan a pammaregta babaen ti regular a panaggigimong tapno kanayon a nabilegtayo iti naespirituan ken agbalin a matalek a Kristiano. (Roma 1:11, 12) Kas Kristiano, agbibiagtayo iti tengnga ti dakes ken nakillo a kaputotan. Tinallikudantayon ti dakes ken nailubongan a tarigagay. (Fil. 2:15, 16; Tito 2:12-14) Sadino pay koma ti pakitimpuyogantayo no saan nga iti ili ni Jehova? (Sal. 84:10) Ania pay koma ti ad-adda a makagunggona no di ti panagadal ken pannakisarita maipapan iti Sao ti Dios? Usigem ti nagduduma a gimong a nayurnos tapno magunggonaantayo.

⁵ Ti umuna a paset ti gimong iti ngudo ti lawas ket ti naibatay iti Biblia a palawag a nairanta para iti publiko, a dadduma kadakuada ket damoda ti makigimong. Napateg ti palawag publiko tapno maipaay dagiti naespirituan a kasapulan dagiti kabbaro a naitimpuyog ken dagiti agibumbunannag iti kongregasion.​—Ara. 18:4; 19:9, 10.

⁶ Ni Kristo Jesus, dagiti apostolna, ken dagiti kakaduada ket nangipaay kadagiti miting publiko a kas kadagiti maar-aramid ita kadagiti kongregasion dagiti Saksi ni Jehova. Sigurado a ni Jesus ti kalaingan nga agpalawag a nagbiag ditoy daga. Kastoy ti naibagada maipapan kenkuana: “Awan pay ti tao a kastoy ti panagsaona.” (Juan 7:46) Nagsao ni Jesus nga addaan autoridad a nagsiddaawan dagiti dumdumngeg kenkuana. (Mat. 7:28, 29) Adu ti nagunggona dagidiay nangipapuso iti mensahena. (Mat. 13:16, 17) Tinulad dagiti apostol ti ulidanna. Iti Aramid 2:14-36, mabasatayo ti makaguyugoy a palawag ni Pedro iti aldaw ti Pentecostes 33 C.E. Rinibu ti natignay kadagiti nangngegda. Idi agangay, nagbalin a manamati dagiti dimngeg iti palawag ni Pablo idiay Atenas.​—Ara. 17:22-34.

⁷ Minilion met ita ti mabembenepisiaran iti linawas kadagiti palawag publiko a maang-angay kadagiti kongregasion kasta met kadagiti palawag publiko a maiparang kadagiti asamblea ken kombension. Tulongannatayo dagita tapno maannurottayo dagiti pannursuro ti Biblia ken simamatalek nga agserbi para iti Pagarian. No awisentayo dagiti interesado ken ti dadduma pay, matulongantayo ida a mangammo kadagiti napateg a pannursuro ti Biblia.

⁸ Nadumaduma dagiti tema a mailawlawag kadagiti palawag publiko. Maitampok dagiti doktrina ken padto iti Biblia, kasta met dagiti prinsipio iti Biblia ken balakad mainaig iti biag ti pamilia ken agassawa, dagiti kasasaad a pakaipaspasanguan dagiti agtutubo, ken pagalagadan iti moral dagiti Kristiano. Naisentro ti dadduma a palawag kadagiti nakaskasdaaw a parsua ni Jehova. Dadduma a palawag itampokda met ti pammati, tured, ken kinamatalek dagiti karakter iti Biblia a nasayaat a tuladen, ken no ania dagiti masursurotayo ita.

⁹ Tapno naan-anay a magunggonaantayo kadagiti palawag publiko, masapul a dumngegtayo a naimbag, kitaentayo dagiti teksto nga ibaga ti ispiker, ken surotentayo bayat nga ibasbasa ken ilawlawagna dagita. (Luc. 8:18) Gapu ta siguradotayo nga umiso dagiti bambanag a maipalpalawag, determinadotayo a mangsalimetmet iti masursurotayo ken mangyaplikar kadagita.​—1 Tes. 5:21.

¹⁰ No adda dagiti ispiker, sigurado a linawas nga adda palawag publiko ti kongregasion. Masansan a posible daytoy no adda maawis nga ispiker iti asideg a kongregasion. No manmano ti ispiker, adda latta koma agpalawag agingga a posible.

¹¹ Ti maikadua a paset ti gimong iti ngudo ti lawas ket ti Panagadal iti Pagwanawanan. Daytoy a panagadal ket saludsod ken sungbat iti artikulo a masarakan iti pagadalan nga edision Ti Pagwanawanan. Babaen Ti Pagwanawanan, ipapaayannatayo ni Jehova iti naespirituan a taraon iti umiso a tiempo.

¹² Masansan a mapagsasaritaan kadagiti maadal nga artikulo no kasano nga iyaplikar dagiti prinsipio ti Biblia iti inaldaw a panagbiag. Pabilgenna met dagiti Kristiano tapno malabananda ti “espiritu ti lubong” ken ti dakes a kababalin. (1 Cor. 2:12) Salaysayen Ti Pagwanawanan ti nalawlawag a pannakaawat kadagiti doktrina ti Biblia ken kaitungpalan ti padto, iti kasta, matulongannatayo a makidanggay iti kinapudno ken agtalinaed iti dana dagiti nalinteg. (Sal. 97:11; Prov. 4:18) No tumabuno ken makipasettayo iti Panagadal iti Pagwanawanan, makatulong daytoy kadatayo nga agrag-o iti namnama a nalinteg a baro a lubong ni Jehova. (Roma 12:12; 2 Ped. 3:13) Ti pannakilangentayo kadagiti kakabsat tulongannatayo a mangipakita iti bunga ti espiritu ken naregregtatayo nga agserbi ken Jehova. (Gal. 5:22, 23) Mapabilegtayo nga agibtur kadagiti suot ken maaddaantayo iti “nasayaat a pundasion iti masanguanan” tapno ‘mapetpetantayo ti pudpudno a biag.’​—1 Tim. 6:19; 1 Ped. 1:6, 7.

¹³ Kasanotayo a magunggonaan a naimbag iti daytoy a probision ti naespirituan a panangpakan? Kas maysa a pamilia wenno indibidual, isaganatayo a nasaksakbay ti artikulo a maadal, usigentayo dagiti nadakamat a teksto, ken agkomento iti bukod a sasao. Kas resultana, maipapusotayo ti kinapudno ken magunggonaan ti sabsabali kadagiti ebkas ti pammatitayo. No denggentayo a naimbag dagiti komento ti dadduma, magunggonaantayo iti linawas a panagadal.

¹⁴ Kada lawas, aggigimong ti kongregasion iti Kingdom Hall para iti programa a natemaan iti Panagbiag ken Ministeriotayo kas Kristiano. Daytoy a gimong ket addaan iti tallo a paset a nadisenio a tumulong kadatayo nga agbalin a “naan-anay” a kualipikado kas ministro ti Dios. (2 Cor. 3:5, 6) Maipaay ti eskediul ken material iti binulan a ruar ti Panagbiag ken Ministeriotayo kas Kristiano—Workbook iti Gimong. Naglaon met ti Workbook iti Gimong a Panagbiag ken Ministerio kadagiti pagtuladan iti pannakisarita a mausar iti ministerio.

¹⁵ Ti umuna a paset daytoy a gimong, a Gameng Manipud iti Sao ti Dios, tulongannatayo nga agbalin a pamiliar kadagiti mainaig a detalye ken konteksto dagiti salaysay iti Biblia ken no kasanotayo nga iyaplikar dagiti masursurotayo kadagita. Addaan daytoy iti palawag, panagbasa, ken palawag nga adda pannakipartisipar ti tallaong a naibatay iti linawas a panagbasa iti Biblia. Tapno ad-adda a maawatantayo dagita a salaysay iti Biblia, adda dagiti visual aid ken worksheet iti Workbook iti Gimong a Panagbiag ken Ministerio. Daytoy a panangadal a naimbag iti Biblia ket dakkel ti maitulongna iti personal a biag ken iti panangisurotayo, tapno agbalintayo a “naan-anay a kualipikado . . . naan-anay a nakasagana para iti tunggal naimbag nga aramid.”​—2 Tim. 3:16, 17.

¹⁶ Ti maikadua a paset daytoy a gimong, nga Agbalin a Mas Epektibo iti Ministerio, ket nadisenio a mangsanay iti amin para iti ministerio ken mangpasayaat iti abilidadtayo a mangasaba ken mangisuro. Adda met dagiti mausig a video dagiti pagtuladan iti pannakisarita, malaksid pay kadagiti paset dagiti estudiante. Tulongannatayo daytoy a paset ti gimong a maaddaan iti “dila a nasursuruan,” tapno ‘ammotayo no ania ti umiso nga isungbattayo iti nabannog.’​—Isa. 50:4.

¹⁷ Iti maikatlo a paset, a Panagbiag kas Kristiano, mausig no kasano a mayaplikar dagiti prinsipio iti Biblia iti inaldaw a panagbiagtayo. (Sal. 119:105) Ti Panagadal ti Kongregasion iti Biblia ti kangrunaan a paset daytoy. Kas iti Panagadal iti Pagwanawanan, ti Panagadal ti Kongregasion iti Biblia ket saludsod ken sungbat.

¹⁸ No simmangpeten ti binulan a ruar ti Workbook iti Gimong a Panagbiag ken Ministerio, usigen a naimbag dayta ti koordineytor ti bagi dagiti panglakayen, wenno ti panglakayen a tumultulong kenkuana, ken mangaramid iti eskediul. Iti tunggal lawas, ti maysa a panglakayen a makabael a mangisuro ken inaprobaran ti bagi dagiti panglakayen ti agserbi kas tserman iti gimong. Karaman iti rebbengenna ti panangsigurado a mangrugi ken malpas ti gimong iti naikeddeng nga oras ken mangkomendar ken mangbalakad kadagiti estudiante a nagpaset.

¹⁹ No regular nga agsagana, agatender, ken makiramantayo iti Gimong a Panagbiag ken Ministerio, umuneg ti pannakaammotayo iti Kasuratan, ad-adda a maawatantayo dagiti prinsipio iti Biblia, tumuredtayo a mangikasaba iti naimbag a damag, ken ad-adda a lumaingtayo iti panagaramid kadagiti adalan. Mabenepisiaran met dagiti tumabtabuno a saan pay a bautisado a Saksi iti makaparagsak a panaglalangen ken makaparegta a panagsasarita. Tapno makapagsaganatayo iti daytoy a gimong ken iti dadduma pay, makatulong ti Watchtower Library, JW Library^®, Watchtower ONLINE A LIBRARIA^™ (no magun-odan iti lengguaheyo), ken ti libraria iti Kingdom Hall. Naglaon ti libraria iti Kingdom Hall kadagiti publikasion dagiti Saksi ni Jehova, Watch Tower Publications Index wenno Giya iti Panagsukimat Para Kadagiti Saksi ni Jehova, sumagmamano a patarus ti Biblia, konkordansia, diksionario, ken dadduma pay a makatulong a reperensia. Mabalin nga usaren ti amin ti libraria sakbay wenno kalpasan dagiti gimong.

²⁰ Iti nadumaduma nga oras iti intero a makalawas, agtataripnong iti apagbiit ti grupo dagiti agibumbunannag sakbay ti panangasaba. Dagitoy a taripnong ket maangay kadagiti pagtaengan wenno iti sabali a kombiniente a lugar. Mabalin met nga usaren ti Kingdom Hall a pagtataripnongan. No adda babassit a grupo nga agtataripnong iti nagduduma a lugar iti teritoria, nalaklaka a makapan dagiti agibumbunannag iti pagtataripnongan ken iti teritoria. Maorganisar ken makapan a dagus dagiti agibumbunannag iti teritoria. Maaywanan met a naimbag ti manangaywan iti grupo dagiti adda iti grupona. Nupay adda pagimbaganna a nagduduma ti pagtataripnongan ti grupo, adda dagiti kasasaad a mabalin nga agkakadua nga agtataripnong ti sumagmamano a grupo. Kas pagarigan, no bassit laeng ti rummuar iti ministerio iti tengnga ti lawas, nasayaat no agkakadua dagiti grupo wenno agtataripnong ti amin iti Kingdom Hall wenno iti sabali a maitutop a lugar. Iti kasta, adda kadua dagiti agibumbunannag iti ministerio. Mabalin met nga agtataripnong ti intero a kongregasion iti Kingdom Hall no piesta opisial. Mabalin met a kayatda ti agtataripnong sakbay ti panangasaba kalpasan ti Panagadal iti Pagwanawanan.

²¹ No nagduduma ti pagtataripnongan dagiti grupo, ti manangaywan iti grupo ti mangidaulo iti taripnong sakbay ti panangasaba. No dadduma, mabalin a tudingan ti manangaywan iti grupo ti katulonganna wenno sabali a kualipikado a kabsat a mangidaulo iti taripnong. Masapul a mangisagana ti mangidaulo iti mapagsasaritaan nga impormasion a makatulong iti ministerio. Mayurnos no asino ti agkakadua ken no sadino ti teritoria, ken adda maysa a mangidaulo iti kararag. Kalpasanna, mapan a dagus ti grupo iti teritoriada. Agpaut dagita a taripnong iti lima agingga iti pito a minuto ngem ab-ababa koma dayta no kalkalpas laeng ti gimong ti kongregasion. Mangipaay koma dagita a taripnong iti pammaregta, praktikal nga instruksion, ken panangiwanwan kadagidiay mapan mangasaba. Maikadua koma iti aduan kapadasan a kabsat dagiti kabbaro wenno ti dadduma nga agkasapulan iti tulong tapno masanayda.

²² Bayat nga umad-adu dagiti adalan, umad-adu met ti bilang dagiti kongregasion. Kadawyanna a ti manangaywan iti sirkito ti mangipatulod iti aplikasion para iti baro a kongregasion. Ngem no dadduma, mabalin a nasaysayaat no maitipon dagiti bassit a grupo iti kaasitgan a kongregasion.

²³ No dadduma, mabalin a kakabsat laeng a babbai ti mangbukel iti babassit a kongregasion. No kasta ti kasasaad, masapul nga agdalungdong ti kabsat a babai no mangikararag wenno mangidaulo kadagiti gimong ti kongregasion, maitunos dayta iti urnos a nadakamat iti Biblia. (1 Cor. 11:3-16) Kaaduanna, agtalinaedda a nakatugaw a nakasango iti grupo. Awan kadagiti kakabsat a babbai ti agpalawag kadagiti gimong. Imbes ketdi, basaen ken komentuanda ti material nga insagana ti organisasion, wenno tapno naiduma met, mabalin a mapagsasaritaan wenno maiparang kas demostrasion. Mabalin a kiddawen ti sanga nga opisina iti maysa a kabsat a babai a mangasikaso kadagiti surat a maipatulod iti opisina ken mangidaulo kadagiti gimong. Inton agangay, no addan dagiti kualipikado a kakabsat a lallaki a mangaramid iti dayta, isudan ti mangasikaso kadagitoy nga annongen.

²⁴ Kada tawen, mayurnos kadagiti kongregasion iti maysa a sirkito nga agtataripnongda para iti dua nga asamblea sirkito. Dagitoy nga asamblea ket saggaysa laeng nga aldaw. Dagitoy a naragsak nga okasion ket mangted iti gundaway iti amin a tumabuno a makilangen kadagiti padada a Kristiano. (2 Cor. 6:11-13) Gapu ta sipapanunotda iti espesial a kasapulan, mangisagsagana ti organisasion ni Jehova kadagiti tema a naibatay iti Biblia ken nadumaduma a paset dagitoy a programa. Maiparang ti impormasion iti nadumaduma a pamay-an, kas iti palawag, demostrasion, reenactment, monologo, ken interbiu. Mapabileg ti amin nga umatender gapu kadagita a naintiempuan nga instruksion. Mangipaay dagitoy nga asamblea iti gundaway kadagiti kabbaro nga adalan nga agpabautisar kas simbolo ti dedikasionda ken Jehova.

²⁵ Maminsan iti kada tawen, maangay dagiti dadakkel a taripnong. Dagitoy ket gagangay a tallo nga aldaw a rehional a kombension a mapagkakadua dagiti kongregasion manipud iti sumagmamano a sirkito. Ngem kadagiti babassit a sangay, mabalin a mas praktikal nga agtataripnong ti amin a kongregasion a sakup ti sangay iti maymaysa a lugar. Iti dadduma a pagilian, mabalin a nagduduma dagiti urnos kadagitoy a taripnong sigun kadagiti kasasaad wenno sigun iti panangiwanwan ti organisasion. No dadduma, maangay met dagiti internasional wenno espesial a kombension iti sumagmamano a pagilian ken mabalin a tabunuan ti rinibu a Saksi manipud iti nagduduma a pagilian. Iti adun a tawen, naammuan ti adu a tattao ti naimbag a damag gapu iti kampania a panangipakaammo kadagitoy dadakkel a taripnong dagiti Saksi ni Jehova.

²⁶ Para kadagiti dedikado nga adipen ni Jehova, dagiti kombension ket naragsak nga okasion ti nagkaykaysa a panagdayaw. Kadagita a kombension, maipakaammo dagiti nalawlawag a pannakaawat iti kinapudno. Iti dadduma a kombension, mairuar dagiti baro a publikasion a mausar iti personal a panagadal ken panagadal ti kongregasion wenno iti ministerio. Adda met dagiti maaramid a bautismo. Napateg dagiti kombension para iti naespirituan nga irarang-ay. Paneknekan dagita a kombension a ti ili ni Jehova ket talaga a paset ti internasional a panagkakabsat dagiti dedikado a Kristiano nga addaan iti pakabigbigan dagiti adalan ni Jesu-Kristo.​—Juan 13:35.

²⁷ No tabunuantayo dagiti gimong iti kongregasion ken dagiti asamblea ken kombension ti ili ni Jehova, mapabilegtayo a mangaramid iti pagayatanna. Masalaknibantayo met kadagiti impluensia ti lubong a mabalin a mangpakapuy iti pammatitayo. Dagita a taripnong ket agpaay a pakaidayawan ni Jehova. (Sal. 35:18; Prov. 14:28) Agyamantayo ta impaay ni Jehova dagitoy a taripnong tapno mabang-aran iti naespirituan dagiti dedikado nga adipenna iti daytoy panawen ti panungpalan.

²⁸ Ti anibersario ti ipapatay ni Jesu-Kristo ket maminsan iti makatawen. Selebraran ti amin a kongregasion dagiti Saksi ni Jehova iti intero a lubong ti Memorial ti ipapatay ni Kristo, wenno ti Pangrabii ti Apo. (1 Cor. 11:20, 23, 24) Daytoy ti kapatgan a gimong iti tawen para iti ili ni Jehova. Naibilin a selebrarantayo ti Memorial.​—Luc. 22:19.

²⁹ Ti petsa ti Memorial ket katupag ti petsa ti Paskua a nadakamat iti Biblia. (Ex. 12:2, 6; Mat. 26:17, 20, 26) Ti Paskua ket isu ti tinawen a pannakarambak ti ipapanaw dagiti Israelita idiay Egipto idi 1513 B.C.E. Iti dayta a tiempo, imbaga ni Jehova a ti maika-14 nga aldaw ti umuna a lunar a bulan dagiti Judio ti petsa a pannanganda iti kordero ti Paskua ken ti pannakawayawayada kas adipen idiay Egipto. (Ex. 12:1-51) Maammuan ti petsa babaen ti panangbilang iti 13 nga aldaw manipud iti panagparang ti pingir ti bulan kalpasan ti lenned (new moon) a kaasitgan iti spring equinox (agpada ti kapaut ti aldaw ken rabii) a makita iti Jerusalem. Kaaduanna, ti panangselebrar iti Memorial ket maibatog iti umuna a kabus a bulan a sarunuen ti spring equinox.

³⁰ Imbaga ni Jesus iti Mateo 26:26-28 no kasano a selebraran ti Memorial. Daytoy nga okasion ket saan a ritual nga addaan iti misterioso a kaipapanan, no di ket simboliko a pannangan a pakiramanan dagidiay naayaban a makipagtawid ken Jesu-Kristo iti nailangitan a Pagarianna. (Luc. 22:28-30) Nupay saanda a makiraman, maparegta ti amin a dadduma pay a dedikado a Kristiano ken interesado a tattao a tumabuno iti Pangrabii ti Apo. Ipakita ti itatabunoda nga agyamanda iti probision nga impaay ni Jehova a Dios a pakagunggonaan ti amin a tao babaen ti Anakna a ni Jesu-Kristo. Sakbay ti Memorial, adda maipaay nga espesial a palawag publiko a mangpagagar kadatayo para iti daytoy nga okasion ken mangtukay iti interes iti panagadal iti Biblia.