9 SIFRA, PUA, AMRAM, JOCABED, KEN MIRIAM
‘Gapu iti Pammati, Nailemmeng ni Moises’
NASUROKEN nga 60 a tawen ti napalabas manipud idi natay ni Jose. Nalipatanen dagiti Egipcio ti matalek a lalaki nga inusar ni Jehova a nangispal iti nasionda manipud iti nakaro a bisin. Ita, addan baro a Faraon nga agturay iti daga, ket kagurgura ken kabutengna dagiti Israelita. Agtultuloy ngamin nga umad-adu ti bilangda ta bembendisionan ida ni Jehova. Gapu iti dayta, inadipen dagiti Egipcio dagiti Hebreo ken pinarparigatda ida. Ngem nagtultuloy latta nga immadu ti bilangda.
Gapu iti dayta, nagdakes ti simmaruno nga inaramid ni Faraon. Pinaayabanna ti dua a Hebreo a partera a da Sifra ken Pua. Panunotem ti riknada idi ibilbilin kadakuada ti nabileg nga agturay a no adda tulonganda nga agpasngay, patayenda ti mayanak no dayta ket lalaki! Ngem dagidiay dua a natured a babbai ket ‘nagbuteng iti pudno a Dios.’ Uray no nabileg ti agturay, ammoda nga awan ti kalinteganna a mangibilin kadakuada nga agsukir ken Jehova, ti Kangatuan iti uniberso. Ti panagbutengda iti Dios ti nakatulong kadakuada nga agbalin a pudpudno a natured. “Saanda a tinungpal ti bilin ti ari ti Egipto.” Imbes ketdi, inaramidda ti amin a kabaelanda a tumulong a mangsalaknib ken mangispal iti adu a kayyanak nga ubbing. Nakapungtot ni Faraon, ngem dida imbaga kenkuana ti inaramidda. Ngem ammo ni Jehova ti ar-aramidenda isu a “binendisionan ti Dios dagiti partera.” Idi agangay, impaayanna ida iti bukodda a pamilia.
Ania koma ti mabalin a napasamak iti maladaga a ni Moises no saan a natured dagiti partera, dagiti nagannakna, ken ti manangna?
Idi naammuan ni Faraon a saan a nagkurri ti planona, nangipaulog iti sabali a naulpit a bilin: Maibelleng iti Karayan Nilo ti amin a maladaga a lallaki! Bayat dayta a narigat a situasion, naipasango ti agassawa a Hebreo a da Amram ken Jocabed iti dakkel a problema. Dua ti annakdan, da Miriam ken Aaron. Ngem idi masikog manen ni Jocabed, ammoda ken Amram a no lalaki ti anakda, delikadonto ti biagna. Idi naipasngay ti ubing a lalaki, inkagumaanda nga ilemmeng agingga iti kabaelanda. Ngem saan a nalaka ti mangilemmeng iti maladaga. Idi tallo a bulanen ti maladaga, nangala ni Jocabed iti basket, kinalupkopanna iti alkitran, sa inkabilna ti maladaga iti uneg dayta. Napanna inlemmeng ti basket iti karunuan iti igid ti Karayan Nilo. Ti balasitangna a ni Miriam ket naglemmeng iti saan unay nga adayo tapno bantayanna ti adingna.
Di nagbayag, napan ti balasang ni Faraon iti Karayan Nilo tapno agdigus. Nakitana ti basket isu nga imbaonna ti adipenna a babai a mangala iti dayta. Idi linuktanda, nakita ti prinsesa ti naguapo a maladaga nga agsangsangit ket naasian kenkuana. Nagdesision nga amponenna ngem nakitana a kasapulan ti ubing ti maysa nga ina a mangtagibi kenkuana. Dagus nga adda napanunot ni Miriam. Isu a situtured nga immasideg iti prinsesa ken imbagana a mabalinna ti mangbirok iti mangtagibi iti ubing. Immanamong ti balasang ni Faraon. Idi kuan, nagsubli ni Miriam a kaduana ni nanangna. Naragsakan la ketdi ni Jocabed idi naammuanna a mabalinna a tagibien ken aywanan ti dungdungnguenna nga anak—ken matangdanan pay! Sigurado nga inaramidda ken Amram ti amin a kabaelanda a mangisuro iti ubing maipapan ken Jehova. Ngem dimtengen ti aldaw a masapul nga iteddan ti ubing iti balasang ni Faraon. Ket pinanaganan ti prinsesa iti Moises.
Binendisionan kadi ni Jehova da Amram, Jocabed, ken Miriam gapu iti pammati ken kinaturedda? Sigurado a wen! Insuro da Amram ken Jocabed da Miriam ken Aaron a mangayat ken agtulnog ken Jehova, ket nakitada ida a nagbalin a matalek nga adipenna. Nakitada pay a protprotektaran ni Jehova ni Moises. Saan nga ibaga ti Biblia no nakita pay da Amram ken Jocabed ti nagbalinan ni Moises ken no kasano nga inusar ni Jehova. (Ex. 6:20) Ngem sigurado a nakita da Miriam ken Aaron. Nakitada no kasano nga inusar ni Jehova ni Moises a mangaramid kadagiti milagro. Impakita dagitoy a tallo ti naisangsangayan a pammati ken kinatured. Iti sumaruno a kapitulo, maammuantayo ti situasion a dimmakkelan ni Moises ken no kasano a pinilina ti agserbi ken ni Jehova.
Basaem ti salaysay ti Biblia:
Pagsasaritaan:
Kasano nga impakita dagiti partera ken ti pamilia ni Moises ti kinatured?
Agkalika Pay
1. Ania ti ipakita ti arkeolohia a mangpaneknek nga umiso daytoy a salaysay? (g04 4/8 4 ¶4–5 ¶1)
2. Ania ti imbaga dagiti eskolar maipapan iti panangpapatay kadagiti maladaga ken iti panangusar dagiti Egipcio iti basket a papiro a mangipakita nga umiso daytoy a salaysay ti Biblia? (g04 4/8 5 ¶2–6 ¶1) A
Christine Osborne Pictures/Alamy Stock Photo
Ladawan A: Maus-usar pay laeng ita dagiti papiro a pagaramid iti bangka
3. Ania ti ammotayo maipapan kadagiti Hebreo a partera ken kasano a nabendisionanda? (w03 11/1 8 ¶3-4; it “Mammaltot”) B
Ladawan B
4. Kasano nga impakita ni Miriam ti naisangsangayan a pammati uray idi baketen? (ijwia artikulo 7 ¶14-18)
Panunotem Dagiti Leksion
Ania ti masursuro dagiti nagannak kada Amram ken Jocabed?
Ania ti masursuro dagiti agkakabsat iti balasitang a ni Miriam? C
Ladawan C
Kasano a matuladmo ti kinatured da Sifra ken Pua?
Utobem ti Napatpateg a Banag
Ania ti isuro kaniak daytoy a salaysay maipapan ken Jehova?
Kasano a konektado daytoy a salaysay kadagiti panggep ni Jehova?
Ania ti isaludsodko kadagiti karakter iti daytoy a salaysay ti Biblia inton mapagungarda?
Ammuem ti Ad-adu Pay
Kitaem no kasano a makatulong kadatayo ti ulidan dagiti babbai a nangsukir iti bilin ni Faraon.
“Babbai a Nangparagsak iti Puso ni Jehova” (w03 11/1 8-9 ¶3-5)
Agtultuloy kadi nga aywanan ni Jehova dagiti situtured nga agtulnog kenkuana kas agturay imbes a kadagiti tattao?