Naan-anay a Nagserbi ken Jehova iti “Intero a Panagbiagna”

NAKIGTOT la ketdi ni Ari Asa idi nakitana ti nagdakkel nga armada dagiti Etiope a nagkampo idiay Juda ken nakasaganan a makigubat. Namin-adun nga imbaon ni Jehova ti ilina a makigubat. Ngem saanda pay a nakakita iti kasta kaadu a kalaban. Maysa a milion ti bilangda—dandani mamindua iti bilang ti armada ni Asa. Pangalaan ngata ni Asa iti tured a makigubat iti kasta kadakkel nga armada?

Saan a daytoy ti damo a kasapulan nga ipakita ni Asa ti tured. Sangapulo a tawen sakbayna, idi nangrugi nga agturay iti Juda, impakita ni Asa nga isu ket immala unay iti apongna iti dapan a ni Ari David. Kas ken David, kayatna a paragsaken ti Diosna a ni Jehova. Sipapakumbaba nga impangag ni Asa dagiti propeta ni Jehova a da Oded ken ti anak ni Oded a ni Azarias. Nagurnong iti tured ni Asa tapno mailintegna ti dadduma a kinadakes nga ar-aramiden dagiti tattao manipud idi nagapostata ni Ari Solomon. Kas pagarigan, situtured a dinadaelna dagiti didiosen a pagdaydayawan dagiti tattao ken inikkatna dagiti lallaki a balangkantis iti templo idiay Juda.

Inlinteg met ni Asa dagiti dakes nga ar-aramiden ti pamiliana. Nangato ti saad ni apongna a Maaca. Isu ti “ina a reyna” ti Juda. Nagpaaramid ni Maaca iti nakaal-alas nga idolo, mabalin a tapno maimpluensiaanna dagiti tattao nga agaramid iti seksual nga immoralidad. Ngem saan a nagpaimpluensia ni Asa kadagiti kapamiliana. Inikkatna ni apongna iti saadna ken pinuoranna ti naalas nga idolo. Gapu iti inaramid ni Asa, naparagsakna ni Jehova isu a binendisionan ni Jehova ti Juda iti talna iti sangapulo a tawen. Ngem kalpasan dayta, adda dakkel nga armada dagiti Etiope nga immatake iti Juda. Ania ngata ti aramiden ni Jehova para ken Asa?

Idi natannawagan ni Asa ti kapatagan ti Juda ket nakitana ti nagdakkel nga armada ti Etiopia, dagus a nagkararag iti Diosna. Panunotem ti narikna dagiti soldado ni Asa idi nangngegda ti kararagna: “O Jehova, awan nagdumaanna kenka nakapuy man wenno napigsa dagiti tulongam. Tulongannakami, O Jehova a Diosmi, ta agtalekkami kenka, ken makilabankami iti daytoy nga armada babaen ti naganmo. O Jehova, sika ti Diosmi. Saanmo koma nga ipalubos nga abakennaka dagiti tattao.” Sigurado a naragsakan ni Jehova iti dayta a naimpusuan a kararagna. Nakitana a ni Asa ket kas met laeng iti anak ni Ari Saul a ni Jonatan. Agpada nga ammo dagitoy a lallaki a tulongan ida ni Jehova isu a saanda a kasapulan ti dakkel nga armada tapno mangabakda. (1 Sam. 14:6) Ngamin, no ti Kangatuan iti uniberso ti kaduam, kanayon a mangabakka!

Indauluan ni Asa ti armadana a makigubat. Ania ti napasamak? Kastoy ti ibaga ti Biblia maipapan kadagiti rimmaut nga Etiope: “Inabak ida ni Jehova ken ti armadana.” Awan ti uray maysa a nakalasat.

Kalpasan dayta, intultuloy ni Asa a paregtaen dagiti tattao nga agdayaw ken Jehova. Adu kadagiti agnanaed iti sangapulo a tribu a pagarian ti Israel ti immakar idiay Juda tapno makapagserbida manen ken Jehova idiay templo ti Jerusalem. Pinagsapata ni Asa ti amin a taga-Juda nga agmatalekda ken Jehova.

Nupay kasta, adda met dagiti nadagsen a basol ni Asa. Mabasatayo iti Biblia nga idi kayat a rauten ti ari ti Israel ti Juda, saan a nagpatulong ni Asa ken Jehova no di ket pinasuksokanna ti ari ti Siria tapno rautenna ti Israel. Idi nangibaon ni Jehova iti pumaparmata wenno propeta nga agnagan Hanani tapno ilintegna ni Asa, nakapungtot ti ari ket impaibaludna ti propeta. Idi lakayen ni Asa, nagsakit iti nakaro ngem saan a nagpatulong ken Jehova. Napan ketdi iti agduduma a mangngagas. Agparang a saan a naan-anay a nataginayon ni Asa ti nabileg a pammatina.

Ngem ni Jehova ti kaaanusan nga Ama. Kastoy ti ibaga ti Saona maipapan iti 41 a tawen a panagturay ni Asa: “Nupay kasta, naan-anay ti puso ni Asa ken ni Jehova iti intero a panagbiagna.” Ti pakasaritaan ni Asa a naisurat iti Biblia ipalagipna kadatayo nga ay-ayaten ni Jehova dagidiay mangay-ayat Kenkuana. Ngem ibagana met a ditay koma pulos lipaten ti amin nga inaramid ni Jehova para kadatayo. Ket bayat a makitkitatayo no kasanonatayo a tultulongan iti panaglabas dagiti tawen, umad-adu met dagiti rasontayo nga agbalin a natured!

Basaem ti salaysay ti Biblia:

• 1 Ar-ari 15:​8-24

• 2 Cronicas 14:1–16:14

Pagsasaritaan:

Kasano nga impakita ni Asa ti kinatured?

1. 2. Asino ti agparang nga anak ni Hanani a pumaparmata, ken kasano a tinuladna ti kinatured ni amana? (it “Hanani” Num. 2)

   Ti sungbatmo

2. 3. Uray no nakaaramid ni Asa kadagiti basol, ania ti inaramidna a mangipakita a ‘naan-anay ti pusona ken Jehova’? (1 Ar. 15:14; w17.03 19 ¶5-6)

   Ti sungbatmo

3. 4. Saan idi a gagangay a puoran dagiti Israelita dagiti bangkay. Apay ngarud nga ibaga ti Biblia nga adda idi ti “naisangsangayan a pamumpon a panagpuor” para ken Asa? (2 Cron. 16:14; w05 12/1 20 ¶5)

   Ti sungbatmo

Panunotem Dagiti Leksion

• Natignay ni Asa a mangisubli iti nadalus a panagdaydayaw gapu iti panangparegta kenkuana ni propeta Azarias. Kasanom met a maparegta ti sabsabali? B

  Ti sungbatmo

  

• Idi naipasango ni Asa iti dakkel nga armada, nagpatulong ken Jehova. Ngem idi naipasango iti basbassit nga armada, nagpatulong iti tao. Ania ti isuro daytoy kadatayo maipapan iti panagpannuray ken Jehova iti amin nga aramidentayo? (Prov. 3:​5, 6)

  Ti sungbatmo

• Kasanom a matulad ti kinatured ni Asa?

  Ti sungbatmo

Utobem ti Napatpateg a Banag

• Ania ti isuro kaniak daytoy a salaysay maipapan ken Jehova?

  Ti sungbatmo

• Kasano a konektado daytoy a salaysay kadagiti panggep ni Jehova?

  Ti sungbatmo

• Ania ti isaludsodko ken Asa inton mapagungar?

  Ti sungbatmo

Ammuem ti Ad-adu Pay

No agnanaedka iti pagilian a nawayaka nga agdaydayaw ken Jehova, kasanom nga usaren a nainsiriban ti tiempom kas iti inaramid ni Asa bayat ti tiempo ti talna?

“Agtignay a Nainsiriban Bayat ti Tiempo ti Talna” (w20.09 14-19)

Kitaem no ania ti masursurotayo iti ulidan ni Asa no marigrigatantayo nga agtalinaed a matalek.

“Adda Gunggona Maipaay iti Aramidyo” (w12 8/15 8-10)