ARGOB

[Bingkol ti Daga].

1. Mabalin a maysa kadagiti lallaki a napapatay a kadua ni Ari Pekaias ti Israel idi agarup 778 K.K.P., babaen iti maysa a manangagaw iti turay nga agnagan Peca, a tinulongan ti 50 a Galaadita iti panangibanag iti dayta a krimen.​—2Ar 15:23-25.

2. Maysa a rehion ti Basan a naparmek bayat a ti Israel adda pay laeng iti daya ti Jordan, idi agangay nagbalin a paset ti teritoria ti tribu ni Manases. Agparang a dayta idi ti sentro ti pagarian ni Og ken nadeskribir kas addaan 60 a nasarikedkedan a siudad malaksid iti nakaad-adu nga il-ili iti away. (De 3:4, 5, 13, 14) Daytoy idi ti “daga ti Refaim,” wenno daga dagiti higante.

Masarakan ti Argob iti daya ti Baybay ti Galilea. Nupay nabayagen a maikunkuna a ti Argob ket adda iti ayan ti Al-Ledja, lugar a nagaburan iti lava nga agarup 32 km (20 mi) iti abagatan ti Damasco, ti pannakailadawan ti maysa a lugar iti Deuteronomio kas addaan il-ili iti away ket kasla tumukoy iti nadam-eg a tanap nga adda iti laud ti Al-Ledja a nalabit adda iti rehion a nagtetengngaan ti Nahr al-Ruqad, Nahr al-ʽAlan, ken Nahal Yarmuk. Iti daytoy nalawa a tanap, awanan dagiti siudad iti natural a depensa ket agkasapulanda kadagiti “nangato a pader” a nadakamat iti Kasuratan. Adda rebrebba dagiti kasta a dadakkel a siudad a naipattopattok iti intero a teritoria ti Basan.

Idi tiempo ni Ari Solomon, ti Argob ket paset ti maysa kadagiti 12 a distrito nga inaywanan dagiti diputado a naituding a mangipaay iti taraon iti sangakabbalayan ti ari.​—1Ar 4:7, 13.