LEVI

[Panangannurot; Timmipon].

1. Maikatlo nga anak ni Jacob iti asawana a ni Lea, naipasngay idiay Padan-aram. (Ge 35:23, 26) Idi nayanak kinuna ni Lea: “Ita iti daytoy a gundaway tumiponto kaniak ni asawak, gapu ta impasngayak iti tallo nga annak.” Gapuna, ti ubing napanaganan iti Levi, a ti kaipapanan daytoy a nagan ket nalawag a nainaig iti pananginanama ni Lea a mapabaro ti panangdungngo kenkuana ni Jacob. (Ge 29:34) Ni Levi ti ama da Gerson (Gersom), Cohat, ken Merari, dagiti nagtaudan ti tallo a kangrunaan a grupo dagiti Levita.​—Ge 46:11; 1Cr 6:1, 16.

Ni Levi ken ti kabsatna a ni Simeon ket nagtignay a sidadarasudos maibusor kadagiti nangtulaw iti kabsatda a ni Dina. (Ge 34:25, 26, 31) Inlunod ni Jacob daytoy a panangranggasda gapu iti pungtotda, nga impadtona a maiwarawaranto iti Israel dagiti kaputotan ni Levi, maysa a padto a natungpal idi a dagiti Levita ket pudno a naiwarawara iti amin nga 48 a siudad dagiti Levita kadagiti teritoria ti nadumaduma a tribu ti Israel idiay daga ti Canaan. (Ge 49:7; Jos 21:41) Kimmuyog ni Levi ken Jacob a simrek iti Egipto ket natay sadiay idi agtawen iti 137.​—Ex 1:1, 2; 6:16; kitaenyo ti LEVITA.

2. Inapo ni Jesu-Kristo a natukoy kas “anak ni Simeon” iti listaan ti kapuonan ni Jesus nga inlanad ni Lucas. Isu ket nailanad iti linia iti nagbaetan da David ken Zorobabel.​—Lu 3:27-31.

3. Ti “anak ni Melqui,” a maikadua a tao sakbay ni Heli (ama ni Maria) iti listaan ti kapuonan ni Jesus nga inlanad ni Lucas.​—Lu 3:23, 24.

4. Maysa nga agsingsingir iti buis (Mr 2:14; Lu 5:27, 29) a nagbalin nga apostol ni Jesu-Kristo ken pagaammo met kas Mateo.​—Mt 9:9; 10:2-4; kitaenyo ti MATEO.