Ti “Sabsabali a Karnero” ken ti Pangrabii ti Apo

“Ni [Jesus] isu ti daton ti kappia gapu kadagiti basbasoltayo, ket saan laeng a gapu kadagiti basbasoltayo no di pay ket gapu iti isuamin a lubong.”​—1 JUAN 2:2.

 1. Ania a positibo a resulta ti napataud iti ‘pannakaikasaba ti naimbag a damag ti pagarian’?

KINUNA ni Jesus: “Daytoy naimbag a damag ti pagarian maikasabanto iti amin a mapagnaedan a daga a maipaay a pammaneknek kadagiti amin a nasnasion; ket iti kasta umayton ti panungpalan.” (Mateo 24:14) Dadduma iti kaputotan iti 1914 ti sibibiag pay laeng a mangpaneknek a dagiti Saksi ni Jehova simamatalek a tinungpalda daytoy a bilin. Kas banagna, ginasgasut a ribo kadagiti nasingpet panagpuspusona a tattao a naupayen kadagiti saan a panagballigi daytoy a lubong, ti sipopositibo a simmungbat iti naimbag a damag. Indedikarda dagiti bagbagida ken Jehova a Dios ket impaayda ti panangsuportarda iti Pagarianna, nga impanayagda daytoy a panangipaay babaen iti bautismo iti danum. Addada 179,421 a nangala iti kasta a kurso iti kinasirib bayat iti 1984. Kasla, ibagbagada kadagiti tattao a napanaganan iti nagan ti Dios: “Dakami kumuyogkaminto kadakayo, ta nangngegmi a ti Dios adda kadakayo.”​—Zacarias 8:23.

 2. Ania a banag ti nangiturong iti tiempo iti panangurnong ni Jesus kadagiti “sabsabali a karnerona”?

² Daytoy nga umad-adu a “dakkel a bunggoy” dagiti managdaydayaw ket paset dagidiay dineskribir ni Jesus a kas dagiti “sabsabali a karnerona.” (Apocalipsis 7:9, 15; Juan 10:16) Addaanda iti naindaklan a namnama nga agbiag nga agnanayon iti maysa a naindagaan a paraiso. (Salmo 37:29) Impadto ni Jesus a pagkaykaysaenna dagitoy a matalek a paspasurotna kalpasan ti umuna a panangipaayna iti di mabingay nga atensionna iti panangipastor iti “bassit nga ipastoran” dagiti mara-karnero isu nga ibabaetna iti baro a tulag. (Lucas 12:32; Hebreo 9:15) Gaput’ pampanunotenna ti pannakaurnong daytoy a dua a klase dagiti mara-karnero a tattao iti “maymaysa nga arban,” maawatantayo no apay a kinuna ni apostol Juan a ni Jesu-Kristo “isu ti daton ti kappia gapu kadagiti basbasoltayo, ket saan laeng a gapu kadagiti basbasoltayo no di pay ket gapu iti isuamin a lubong.”​—1 Juan 2:1, 2.

Panagbalbaliw iti Panangmatmat

 3, 4. (a) Ania a nabalbaliwan a panangmatmat ti napataud kadagiti adu maipapan iti panangselebrar iti Pangrabii ti Apo? (b) Ania ti kayat a sawen ni Pablo iti panangikunana, “Ta no masansan a kanenyo . . . ken uminumkayo”?

³ Adu kadagiti kabbaro a naitipon kadagiti “sabsabali a karnero” ti mangselselebrar idi iti Misa wenno Komunion, a ti kasansan ken pamay-an ti selebrasion ti tengtenglen ti pammati iti partikular a relihion a nakainaiganda. Itan, nupay kasta, dagitoy nabigbigda a ti Pangrabii ti Apo ti masapul a maselebraran iti maminsan iti tinawen. Apay a kastoy. Bueno, ti Judio a Paskua maselebraran iti maminsan laeng iti tinawen, ket ni Jesus inrugina ti Memorial iti dayta met laeng a rabii iti Paskua, Nisan 14. Kalpasanna imbagana kadagiti ad-adalanna: “Aramidenyo daytoy a panglaglagip kaniak.” Innayon pay ni Pablo: “Ta no masansan a kanenyo daytoy a tinapay ket uminumkayo iti kopa, iwaragawagyo ti ipapatay ti Apo, agingga ti iyaayna.” (1 Corinto 11:24-26) Nalawag a kayat a sawen ni Jesus a dagiti ad-adalanna masapul a salimetmetanda ti selebrasion ti ipapatayna iti Aldaw ti Paskua, isu a maaramid iti maminsan iti makatawen. Ngarud, dayta ti maselebraran a “masansan” bayat ti panagbiag ti kongregasion Kristiano. Kinapudnona, ti Memorial naselebraranen iti 1,952 a daras.

⁴ Adda pay sabali a napateg a nagdumaan iti panangmatmat nga inapresiar ti klase “sabsabali a karnero.” Imbes a makipasetda iti tinapay ken arak kas ar-aramidenda idi kadagiti dadduma nga iglesia, masarakanda a ti kasasaadda “nabalbaliwanen” a nagbalin a managbuya. Apay a kastoy, ken addaantayo kadi kadagiti Nainkasuratan a pangsuporta a maipaay iti pamay-an a mangipalubos iti kaadda dagiti managbuya agraman dagiti makipaset?​—2 Corinto 13:11; 2 Timoteo 3:16, 17.

 5. (a) Deskribirenyo dagiti kangrunaan nga addang a masapul nga alaen ti maysa a tao tapno magunggonaan manipud iti daton ni Jesus. (b) Apay a ti Dios nangnangruna a nagtignay a maigapu kadagiti 144,000 a paspasurot ni Kristo Jesus?

⁵ Tapno ti siasinoman magunggonaan manipud iti “daton ti kappia” ni Kristo Jesus, addada dadduma nga addang a masapul a maaramid, dayta man addaan iti namnama iti biag idiay langit wenno iti namnama iti biag iti naindagaan a Paraiso. Dagitoy a kangrunaan nga addang isu dagiti sumaganad: (1) pananggun-od iti umiso a pannakaammo iti Sao ti Dios (Roma 10:13-15); (2) panamati (Hebreo 11:6); (3) panagbabawi (Mateo 4:17); (4) pannakakumberte (Aramid 3:19); (5) panangipaay (Lucas 9:23); ken (6) bautismo (Mateo 28:19). Kalpasan laeng a maaramid dagitoy nga addang a ti Dios agtignay iti naisangsangayan a pamay-an iti tao a pilienna nga agbalin a maysa kadagiti 144,000, wenno “bassit nga ipastoran.” Maipaay iti ania a panggep? Tapno ti tao agbalin a naespirituan nga anak ti Dios nga addaan iti namnama nga agbalin a maysa a padi ken maysa nga ari a kadua ni Kristo Jesus. (Apocalipsis 20:4, 6) Adda laeng ti maysa a natda kadagiti kakasta a naespirituan nga annak nga agbibiag ita, ket dagitoy isuda dagiti umiso a makipaset kadagiti emblema. Daytoy, ngarud, ti mangilawlawag a ti kaaduan kadagiti Saksi ni Jehova ti managpaliiw laeng a saan a mannakipaset.

Ti Paskua ken ti Memorial

 6. Apay a dadduma ti mangikuna a ti “sabsabali a karnero” masapul a makipasetda kadagiti emblema, ket ania a saludsod ti patauden daytoy?

⁶ Dadduma ti mangisingasing a ti umad-adu a bilang dagiti “sabsabali a karnero” ti masapul a makipaset kadagiti emblema. Ti panagrasonda ket: Agsipud ta “ti Linteg ket maysa nga anniniwan dagiti naimbag a bambanag nga umayto,” ken agsipud ta maysa kadagiti kasapulan iti Linteg isu ti panangsalimetmet iti Paskua agpada dagiti Israelitas ken dagiti nakugit a ganggannaet, daytoy ipamatmatna a dagiti dua a klase dagiti mara-karnero a tattao nga adda iti “maymaysa nga arban” iti sidong ti “maymaysa a pastor” ti masapul a makipaset kadagiti emblema iti Memorial. (Hebreo 10:1; Juan 10:16; Numeros 9:14) Daytoy ti mangibangon iti napateg a saludsod: Ti kadi Paskua maysa a mangiladawan iti Memorial?

 7. Iti ania a pamay-an a ti Paskua “maysa a ladawan dagiti naimbag a bambanag nga umayto”?

⁷ Pudno a dadduma a paspaset iti panangselebrar iti Paskua idiay Egipto ti di pagduaduaan a tinungpal ni Jesus. Ni Pablo impadisna ni Jesus iti kordero ti Paskua, a kunkunana, “Ta naidaton met ti paskuatayo nga isu ni Kristo.” (1 Corinto 5:7) Ti pannakaiwarsi ti dara ti kordero ti Paskua kadagiti baotek ken ngatuen ti ruangan ti mangipanamnama iti pannakaisalakan kadagiti inauna nga annak nga adda iti tunggal pagtaengan nga Israelita. Umasping met iti dayta, babaen met ti pannakaiwarsi ti dara ni Kristo a “ti kongregasion dagiti inauna a nailista kadagiti langlangit” awatendanto met ti pannakaisalakanda, wenno “pannakawayawaya babaen iti subbot.” (Hebreo 12:23, 24; Efeso 1:3, 7) Kasta met, awan ti uray maysa a tulang ti kordero ti Paskua a natupek, ket daytoy met natungpal ken Kristo Jesus. (Exodo 12:46; Salmo 34:20; Juan 19:36) Gapuna, pudno ti panangibaga a ti Paskua, iti dadduma a pamay-an, ket maysa kadagiti adu a paspaset iti Linteg a nangipaay “iti anniniwan dagiti naimbag a bambanag nga umayto.” Amin dagitoy a paspaset ti mangitudo ken Kristo Jesus, “ti Kordero iti Dios.”​—Juan 1:29.

 8-10. (a) Iti ania a napateg a pamay-an maipapan iti dara a ti Paskua naiduma manipud iti Memorial? (b) Kasano a dagiti tulag a mainaig iti Memorial ipaganetgetda ti sabali pay a nakaidumaan? (c) Iti ania a konklusion ti pangiturongan daytoy kadatayo?

⁸ Nupay kasta, ti Paskua saan naan-anay a mangiladawan iti Pangrabii ti Apo. Apay a saan? Idi a nairugi ti Paskua idiay Egipto, ti lasag ti natuno a kordero kinnanda, ngem saanda a kinnan ti dara ti kordero ti Paskua. Maisupadi iti dayta, nupay kasta, idi inrugi ni Jesus ti Memorial iti ipapatayna, espisipiko nga imbilinna kadagidiay nga adda a kanenda ti lasagna ken inumenda ti darana, nga insimbolo ti tinapay ken ti arak. (Exodo 12:7, 8; Mateo 26:27, 28) Iti daytoy a nakapatpateg a paset​—ti dara​—ti Paskua saan a mangiladawan iti Pangrabii ti Apo.

⁹ Adda pay banag a saan koma a liplipatan. Sinarita ni Jesus dagiti dua nga agkanaig a tulag kadagiti ad-adalanna, “ti baro a tulag” ken ‘maysa a tulag a maipaay iti maysa a pagarian.’ (Lucas 22:20, 28-30) Dagitoy dua a tulag adda pakainaiganda iti pannakailinea dagiti makipaset a makiraman kas papadi ken ar-ari a kadua ni Kristo Jesus. Ngem iti Israel awan ti nakugit a ganggannaet a mabalin nga agbalin a padi wenno ari. Iti kastoy met laeng a pamay-an, makitatayo ti nagdumaan ti piesta ti Paskua idiay Israel ken ti Pangrabii ti Apo.

¹⁰ Gapuna iti ania a konklusion ti pangiturongan daytoy kadatayo. Ti kinapudno a ti nakugit a ganggannaet nanganda iti di nalebaduraan a tinapay, napapait a natnateng, ken ti kordero iti Paskua dina ipasdek a dagidiay “sabsabali a karnero” iti Apo ita nga adda iti Memorial masapul a makipasetda iti tinapay ken arak.

Kinapateg ti Panagatender iti Memorial

11. Kadagiti ania a napapateg a rason a masapul nga agatender dagiti “sabsabali a karnero” iti Memorial?

¹¹ Daytoy kadi, nupay kasta, ipamatmatna a saan a napateg kadagidiay klase “sabsabali a karnero” nga addada iti selebrasion iti Memorial? Saan met! Daytoy ket maysa nga okasion a maipaay kadagiti amin a mara-karnero a paspasurot ni Jesus tapno laglagipenda ni Jesus iti naisangsangayan a pamay-an. Dagiti “sabsabali a karnero” iti dayta nga okasion malagipda a nagunggonaanda gapu iti pammatida iti naibuyat a dara ni Kristo agingga iti punto nga itan matmatmatan ida ni Jehova a “linabaandan dagiti pagan-anayda ken pinapudawda ida iti dara ti Kordero.” Daytoy ti makagapu no apay a mabalindan ti mangipaay iti “sagrado a panagserbi iti aldaw ken rabii idiay templo ti [Dios].” (Apocalipsis 7:14, 15) Malagipda met a masapul nga itultuloyda ti ‘panangsapulda ken Jehova, ti kinalinteg, ken kinaemma’ a buyogen iti pananginanama a maispaldanto bayat iti aldaw iti pungtot ni Jehova, ken kalpasanna ti panagrag-odanto a manggun-od iti natauan a kinanaan-anay. Kamaudiananna ideklaranton ida ni Jehova a pudno a nalinteg, a daytanto ti maaramid kalpasan ti panangiyawat ni Jesus iti Pagarian iti Amana.​—Sofonias 2:2, 3; 1 Corinto 15:24; Apocalipsis 20:5.

12. Aniada a gunggona ti agtaud iti panagimdeng iti palawag ti Memorial?

¹² Ti sabali pay a napateg a rason ti kaaddada sadiay isu ti kinapudno a dagiti kinapudno a maisalaysay bayat ti palawag ti Memorial isuda dagidiay a mairaman “kadagiti nauuneg a bambanag iti Dios,” ‘ti natangken a taraon a maipaay kadagiti nataengan a tattao,’ saan laeng a basta gatas dagiti “pamunganayan a sursuro wenno doktrina.” (1 Corinto 2:10; Hebreo 5:13–6:1) Ti Nainkasuratan a palawag paunegennanto ti panangapresiar iti impakita ni Jehova nga ayat iti panangipaayna iti kasta a nagsayaatan nga urnos iti Pagarian a maipaay a pakabendisionan ti natauan a pamilia. Dayta met ti gundaway a ‘panangmatmat a sipapasnek iti Kangrunaan nga Ahente ken Mangan-anay iti pammatitayo, ni Jesu-Kristo.’ Saan koma a pulos a di maikankano ti ayat nga imparangarang ni Jesus a maigapu kadatayo, wenno dagiti panagsagaba a linasatna. (Hebreo 12:2, 3) Kasta met, umanamongtayo nga adu kadagiti napapateg a kapanunotan a sinalaysay ni Jesus kadagiti apostolesna idi nga inrugina ti Memorial​—kapanunotan maipapan iti panagkaykaysa, ayat ken pannakaidayaw iti nagan ni Jehova​—ti mabalin a pakiramanan dagiti “sabsabali a karnero” agraman met dagiti “bassit nga ipastoran.”

Panangipakita iti Naayat a Panangipateg kadagiti Amin

13. Apay a napateg ti panangipasa kadagiti emblema kadagiti amin a nagatender?

¹³ Napateg a tunggal maysa nga adda iti Pangrabii ti Apo ti mapalagipan iti pamay-an nga inrugi ni Jesus. Ti aktual a panangiyawat ti maysa iti tinapay ken ti arak iti sabali makatulong a mangpauneg iti panangapresiar kadagiti sagrado a bambanag a kalkalpas pay laeng a naisalaysay iti dayta a rabii. Dayta ti mangipaay met iti tunggal maysa iti gundaway a mangiparangarang iti namnamana iti biag​—nailangitan wenno naindagaan.a Ti panangsurot iti umiso a pamay-an ti mangiyeg iti kongregasion a maitunos iti maar-aramid iti isuamin a daga iti dayta a rabii.​—1 Corinto 14:40.

14. Kasano a dagiti panglakayen ipakitada ti naayat a panangipateg a maipaay iti maysa a napulotan nga agsakit iti rabii iti Memorial?

¹⁴ Kas pangarigan ngay ta maysa kadagiti napulotan iti kongregasion ti agsakit ket saan a makaatender iti Memorial. Ania ngarud ti aramiden? Maaramid koma ti isuamin a panangikagumaan a maysa kadagiti panglakayen ti mangipan iti emblema iti agsakit a Kristiano ket, no kumbiniente, ti panglakayen ti mangaramid iti sumagmamano a mainugot a komento sakbay a maitukon ti emblema ket serraanna dayta iti mainugot a kararag. Anian a pannakaparegta ti mariknanto ti agsakit a tao! Ti kasta nga aramid ti naayat a panangipateg parang-ayenna ti espiritu ti ayat iti uneg ti kongregasion. (Kitaenyo met ti panid 30.)​—Salmo 133:1.

15. Deskribirenyo dagiti dadduma pay a pamay-an isu a pangipakitaan iti panagraem iti Pangrabii ti Apo.

¹⁵ Dadduma pay a makapainteres a salsaludsod ti napataud maipapan iti pamay-an ken ti kita ti emblema a mausar iti Memorial. Dagiti sungbat kadagitoy a salsaludsod ti masarakan iti panid 19 iti sidong ti “Panangipakita iti Panagraem iti Pangrabii ti Apo.” Dagiti mapagtalkan a panglakayen nasayaat koma ti panangsurotda a naimbag iti naibalabala sadiay.

Ti Pannakasapul iti Panangusig iti Bagi

16, 17. (a) Ania a saludsod ti inimtuod dagiti dadduma maipapan iti pannakipaset iti Memorial, ken siasino laeng ti makaipaay iti sungbat? (b) Kasano ti panangipaay ti Dios iti makakumbinsir a pammaneknek a maipaay kadagidiay a napulotan iti espirituna?

¹⁶ Addada sumagmamano a mariribukan babaen iti panagduadua no maikarida a makiraman kadagiti emblema. Daytoy a saludsod ti tumaud no dadduma kadagiti lawlawas kasanguanan ti sabali manen a selebrasion iti Pangrabii ti Apo. Masansan dagiti kakasta a saludsod ti isaludsod dagiti dadduma a nabiit pay a nainaig kadagiti Saksi ni Jehova. Maysakayo kadi kadagidiay addaan mapampanunot a kastoy a panagduadua? Kasano a maikeddengyo ti umiso a dalan a surotenyo?

¹⁷ Inrekomendar ni Pablo maipapan iti Pangrabii ti Apo: “Ngem tunggal maysa sukimatenna ti bagina, iti kasta sa mangan iti tinapay ken uminum ti kopa.” (1 Corinto 11:28, 29) Nadlawyo kadi ti panangikuna ni Pablo a dakayo ti mangaramid iti ‘panangikeddeng kalpasan ti panangsukimat’? Siempre, saan a dakes ti pannakisarita maipapan iti kasta a serioso a banag iti maysa a nataengan a Kristiano, ngem dakayo laeng ti masapul a mangikeddeng iti personal a pannakilangenyo ken Jehova ken iti Anakna. Saan a baybay-an ti Dios a dagiti 144,000 agduaduada. Ta ipanamnamana kadatayo: “Ti espiritu met laeng paneknekanna kadagiti espiritutayo a datayo annaknatayo iti Dios.” Ti espiritu ti Dios a mismo ti mangtignay ti aniaman a miembro iti bagi ni Kristo iti panamati nga isu ket maysa kadagiti naespirituan nga annak ti Dios. Ti napili ammona dagitoy ket saan a masapul nga imtuodenna iti sabali iti kongregasion tapno mapaneknekan.​—Roma 8:15, 16.

18. Ania a historikal a kinapudno maipapan iti sabsabali a karnero ti paginteresantayo?

¹⁸ Ti moderno a historia dagiti Saksi ni Jehova ipakitana a nanipud 1931 ti ad-adda a panangasikaso nangrugi a maipaay kadagiti “sabsabali a karnero” babaen ti mensahe iti Pagarian. Kalpasanna idi Mayo 31, 1935, babaen iti pannakaipalawag ti palawag a “Ti Dakkel nga Umariwekwek,”b ti “dakkel a bunggoy” a nakita ni apostol Juan iti sirmata ti nalawag a nailasin a mairaman iti “sabsabali a karnero.” Ania ti ipamatmat daytoy a kabbaro a panangipaganetget? Sigurado a ti panangurnong iti “bassit nga ipastoran” ti ngangnganin agpatingga ket ti panawen dimtengen a maipaay ken Jesus, babaen ti panangimaton iti “matalek ken naannad nga adipen,” a mangiturong iti atensionna iti panangurnong kadagiti “sabsabali a karnero.”​—Mateo 24:45-47.

19. Ania a personal a panangusig ti mabalin nga aramiden dagidiay a nangakem a maysada kadagiti napulotan?

¹⁹ Babaen iti panangpanunot iti immunan a naibaga, kunaentayo kadagidiay a nabiit pay a nainaig kadagiti tattao ni Jehova ken mabalin a kunkunaenda a maysada kadagiti klase napulotan: Usigenyo a naan-anay ti relasionyo ken Jehova. Imtuodenyo ti bagiyo met laeng, Ti kadi nailangitan a namnama a kunaek nga ik-ikutak maysa laeng a panangakem a nagtaud iti dati a sursuro iti iglesia nga amin dagiti miembro iti iglesia mapanda idiay langit? Ti kadi namnamak iti aniaman a pamay-an mainaig iti inaagum a tarigagay wenno rikrikna? Kinuna ni Pablo: “Saan a mabalin nga agulbod ti Dios.” (Hebreo 6:18) Ket saan met nga agulbod ti nasantuan nga espiritu a nangbigbig kadakuada nga annak. Ngarud, siasinoman a pudpudno a pinulotan ti espiritu ti Dios saan a kankanayon a mariro iti panagduadua no di ket mabalinna a paneknekan a buyogen iti nasayaat a konsiensia nga isu maysa kadagiti annak ti Dios.

Panangselebrar iti 1986

20. Ania ti pateg ti Memorial kadagiti Saksi ni Jehova?

²⁰ Ti Pangrabii ti Apo di pagduaduaan isu ti kadadakkelan a selebrasion iti tawen a maipaay kadagiti amin a pudno a Kristiano. Awanen ti sabali nga okasion a maipada iti dayta no maipapan iti kinapateg, panggep wenno pamay-an. Gapuna, bayat ti panagrikos ti daga a mangpataud iti ilelennek ti init iti isuamin a daga, tunggal kongregasion dagiti Saksi ni Jehova, dadakkel ken babassit ken tunggal naiputputong a grupo agtitiponda kas panagtulnog iti bilin ti Apo.

21. Ania a kababalin ken pananginanama ti patauden koma ti Memorial inton 1986 kadagiti puspuso dagiti tattao ti Dios?

²¹ Amin dagiti mara-karnero nga ad-adalan ngarud maragsakanda unay iti pananginanama a makiraman a sangsangkamaysa iti sabali manen a selebrasion iti Memorial. Sapay koma ta ti okasion iti daytoy a tawen mapaneknekanto a maysa a tiempo iti makapabileg a pammaregta kadagiti amin nga ad-adipen ni Jehova. Sapay koma ta impasagepsepna kadakuada ti isu met laeng nga espiritu ti panagtalek a kas ti adda iti Ulidanda, ni Jesu-Kristo, isu a nagkuna: “Bumilegkayo! Siak pinarmekko ti lubong.”​—Juan 16:33.

[Dagiti Footnote]

Malagipyo Aya​—

◻ Apay a ti Paskua saan a mangiladawan iti Memorial?

◻ Aniada dagiti innem nga addang a masapul nga alaen sakbay a magunggonaan iti daton ni Jesus?

◻ Apay a ti panagatenderyo iti Memorial nasken unay?

◻ Apay a makagunggona ti panangusigyo iti bagiyo met laeng sakbay ti Memorial?

[Kahon iti panid 19]

Panangipakita iti Panagraem iti Pangrabii ti Apo

Dagiti Emblema a Mausar

Di Nalebaduraan a Tinapay: Tinapay, kas ti awan lebadurana a matzoth dagiti Judio, a naaramid laeng iti arina ti trigo ken danum ti mabalin a mausar. Dikay mangusar iti matzoth a nalaokan iti asin, asukar, malt, itlog wenno sibuyas. Mabalinyo ti mangaramid ti bukodyo a di nalebaduraan a tinapay babaen iti panangusaryo iti sumaganad: Manggamaykayo iti maysa ket kagudua a tasa nga arina ti trigo (no saan a magun-odan, mangusarkayo iti tapong a bagas, mais wenno dadduma pay nga arina iti bukbukel) babaen iti maysa a tasa a danum, a mangaramid iti nabasa a masa. Kalpasanna aramidenyo ti masa a kas kapuskol ti wafer. Ikabilyo iti pagurnuan ket tudokenyo dayta iti tinidor tapno maaddaan kadagiti babassit nga abut. Iyurnoyo dayta iti napudot nga urno agingga a namaga ken nasarangsang.

Arak: Mangusarkayo iti awan lalaokna a nalabaga nga arak ti ubas kas ti Chianti, Burgundy, wenno claret. Liklikanyo dagiti nasam-it nga arak a napaingel wenno nalaokan iti brandy, kas iti sherry, port, wenno muscatel. Dikay mangusar iti arak nga addaan rekado wenno nainayon nga yerba kadakuada, kas ti Dubonnet ken dagiti dadduma pay a pangpagana ti pannangan nga arak. Ti naaramid iti pagtaengan a nalabaga nga arak ti mabalin met nga usaren no dayta saan a nalaokan iti asukar, rekado wenno pangpaingel.

Panangisagana iti Kingdom Hall

Lamisaan dagiti emblema: Abbonganyo ti lamisaan babaen iti nadalus nga abbong ti lamisaan ken mangisagana ti umdas a plato ken baso ti arak a maipaay iti nasayaat a panangidiaya. Ti tinapay ti mabalin a mapisipisi ket ti arak maibukbok sakbay ti gimong. Ni Jesus saan a nangipasdek iti aniaman a ritual maipapan iti daytoy a banag. No kalikaguman ti kasasaad, abbonganyo dagiti emblema iti nadalus a lupot tapno salakniban ida manipud kadagiti insekto.

Dagiti mangidiaya: Bilinenyo ida nga umuna maipapan iti pamay-an a masurot tapno maliklikan ti aniaman a pannakataktak wenno riribuk iti panangidiaya kadagiti emblema kadagiti amin nga immatender, agraman ti nagpalawag ken dagiti mangidiaya.

Dagiti attendant: Dagiti umdas nga attendant ti masapul nga adda sadiay sakbay a mangrugi ti gimong tapno amin ti maawat apaman a sumangpetda ken maipaayan iti tugaw.

Sabsabong a dekorasion: Daytoy mabalin a maipaay ngem masapul a simple ken makaay-ayo.

Pamay-an ti Gimong

Oras ti selebrasion: Nupay no ti palawag ti mabalin a mangrugi a nasaksakbay, dagiti emblema saanda koma a maidiaya agingga a kalpasan ti ilelennek ti init. Masapul a maikeddeng iti lokal no kaano ti ilelennek ti init inton aldaw ti Memorial iti lugaryo.

Palawag iti Memorial: Ti agpalawag masapul nga agsagana a naimbag tapno maiparangna ti material iti naikeddeng a tiempo. Masapul a nalawag ti pannakaiparangna ken makapabileg kadagiti amin nga adda.

[Ladawan iti panid 17]

Ti Memorial paunegenna ti panagayattayo ken Jehova ken iti Anakna