Panangabrasa iti ‘Awis a Macedonia’ idiay Japan
KAADUANNA ti kalgaw kaipapananna dagiti panagbibiahe a panagbakasion ken ti panagpasiar ti kaaduan a tattao. Adu kadagiti Saksi ni Jehova, nupay kasta, ti naaddaan iti awan kaaspingna a rag-o iti panangbusbos kadagiti bulbulan iti kalgaw iti maysa a naisalsalumina a trabaho—ti panangsarungkar kadagiti tattao nga agnanaed kadagiti nakaad-adayo ken naiputputong a luglugar tapno iyeg kadakuada ti naimbag a damag ti Pagarian ti Dios.
Iti sumagmamano a tawen itan, ti sanga nga opisina ti Watch Tower Society idiay Japan ti nangipamaysa ti panagreggetda a mangdanon ti uppat a milion a tattao nga agnanaed iti dayta a luglugar iti dayta a pagilian. Idi karrugi ti napan a tawen, maysa nga awis ti naipatulod kadagiti amin a kongregasion dagiti Saksi ni Jehova: “Umayka idiay Macedonia ket tulongannakami!” (Aramid 16:9) Kumuyogkayo iti sumagmamano kadagidiay nangawat iti dayta nga imbitasion ket nanamentayo dagiti adu a karkarit ken panagrag-oda.
Apay a Simmungbatda
Nalawag, ti panagayat iti Dios ken ti kaarrubada ti kangrunaan a nakatignayanda. Ngem makapainteres a maammuan met dagiti rason nga inted dagiti dadduma a maipaay iti pangngeddengda.
Maysa a pagassawaan a nagaplikar nga agserbi iti makabulan iti maysa a bassit a purok kadagiti kabambantayan ti nagkuna iti daytoy: “Adtoy addakamin iti edad media. Awan dagiti dadakkel a parikutmi, awan parparikutmi iti salun-at. Dagiti dua nga annakmi napigsada metten iti pammati, nga isuda a dua agserserbida kas amin-tiempo a trabahador—iti tay-ak ti kinapayunir ken idiay sanga nga opisina ti Sosiedad. Kayatmi nga ipakita ti panangapresiarmi ken ni Jehova kadagiti adu a bembendisionna kadakami. Ken kasta met, kayatmi ti rummuar a dakdakam la a dua, ket nanamenmi ti tulong ken bendision ni Jehova nga adayo manipud kadagiti amin a pagnam-ayanmi.”
Ti ama iti pamilia ti uppat manipud Saitama Prefecture ti nangisalaysay: “Makitak a dagiti annakmi agdakdakkeldan nga agbalin a tin-edyer ken maipasango kadagiti adu a parikut ti eskuelaan. Mangbusbosda ti ad-adu a panawen nga adayo kadakami, ket siak, okupadoak met iti negosiok, limitado met ti panawen a mabusbosko a kaduada. Kayatko ti mangala ti tiempo a kaduada ken mangaramid iti banag a mangparegta kadakuada iti kinapudno ken mangpataud iti espiritu ti panagpayunir.” Impaiyalisna ti trabahona a maipaay iti Agosto a napan iti Setiembre tapno isu ken ti pamiliana makabusbosda ti makabulan kadagiti di naituding a teritoria.
Maysa a balasang kunana maipapan iti panagreggetna: “Nariknak a daytat’ maysa a pamay-an nga agbalinak a nasinged a pudpudno ken ni Jehova ket maipakitak ti naan-anay a panagtalekko kenkuana a mangipaay kadagiti kasapulak.” Dadduma nga agtutubo a Saksi kasta met ti panagriknada. Dua a babbalasang a kalkalpasda iti eskuelaan nagaplikarda nga agserbi iti naiputputong a lugar iti tallo a bulan. Nariknada a babaen iti panangaywanda iti bagbagida, a babaen laeng iti tulong ni Jehova, maisaganada ti bagbagida a maipaay iti amin-tiempo a serbisio iti uray sadino.
Dagiti laeng kadi pamilia wenno agwaywayas ti simmungbat? Nikaanoman. Adu a kongregasion met ti nagaplikar. Maysa a manangaywan ti maysa kadagitoy a grupo ti nagkuna: “Patienmi a daytat’ nagsayaat a pamay-an a mangpabileg kadagiti singgalut ti ayat ken panagkakadua iti kongregasion, agraman ti panangted kadagiti agtutubo ken kadagiti kabbaro ti gundaway a makakita ti kinapateg ti trabaho a panangasaba.” Kadagiti 114 nga agibumbunannag, nasurok a 80 ti nakabael a nakipaset bayat ti innem a lawas a nagserbi ti kongregasion iti di naituding a teritoria.
Panangsaranget kadagiti Karit
Manipud iti pangrugian, ti ‘ipapan idiay Macedonia’ a mangasaba ti addaan kadagiti karit. Agpapada, kuna ti maysa: “Sadino ti pagyanantayo?” Ti pamay-an a pannakasaranget itoy a problema ti nangidemostra a naan-anay ti kinapudno ti pammagbaga ni Jesus: “Itultuloyyo, ngarud, a biruken nga umuna ti pagarian ken ti kinalintegna, ket isuamin dagitoy a bambanag mainayondanto kadakayo.”—Mateo 6:33.
Dua a babbai manipud Tokyo ti naituding a mangtrabaho iti naiputputong a purok kadagiti kabambantayan. Sakbay a nadanon ti tiempo, napanda nagbirok ti kalalainganna a pagdagusan ngem awan met ti panagballigida. Idi naikeddengda nga ipalubos dayta a banag kadagiti im-ima ni Jehova, napanda met laeng idiay lugar a nakaitudinganda. Iti panagpatingga ti umuna nga aldaw a panangaskasabada, saanda pay a nakasarak iti aniaman a permanente a pagdagusan. Ania ngay ti aramidenda?
“Iti maikadua nga aldaw ti serbisio,” maysa kadakuada ti nangisalaysay, “Nakakitaak iti bakante a drive-in a restauran. Ti makinkukua ket maysa a lakay a nangipamatmat iti nasayaat a kababalin. Idi sinaludsodmi no mabalinmi nga abangan dayta a lugar, intukonna dayta kadakami iti 10,000 yen [$45, E.U.] a maipaay iti tallo a bulan nga inyurnosmi a panagserbi sadiay. Daytoy ti nangted iti lugar a mapagtaenganmi ken pakaangayanmi kadagiti panaggigimong. Ti anak a babai daydiay a lakay ken ti lakayna immawatda iti maysa a set dagiti libro. Kamaudiananna iti dayta nga aldaw, nasarakanmi met ti anak a lalaki daydiay a lakay ken ti asawana. Isuda met immawatda kadagiti literatura ket immanamongda a makipagadal ti Biblia kadakami. Nupay kasta, idi naammuanda nga agnanaedkami iti restauran ti amada, nasdaawda. Agingga iti dayta a tiempo, ti ama ti mangipakpakita pay laeng ti ibubusorna kadagiti amin a relihion. Pudno a nariknami ti ima ni Jehova iti daytoy a banag.”
Ti panagil-ilem, panagsuspetsa, ken ti nairamut unay a tradision masansan mangted kadagiti naisangsangayan a karit, ngem ni Jehova ti manglukat ti dalan. Kasta ti napasaran dagidiay agedad-media a pagassawaan a nadakamat a nasapsapa. Idi damo a simmangpetda, isudat’ nakablaawan iti panagsuspetsa babaen iti nangpadagos a baket kadakuada a masisiim ti tunggal panagtignayda. Daytoy ti nangted kadakuada ti idea ti tignay a manamnamada manipud iti teritoria ken no aniat’ aramidenda tapno maparmek dayta a lapped ket madanonda dagiti tattao.
“Naikeddengmi a busbosen ti intero nga agmalem iti panagdalus ken panangisagana iti balay,” kuna ti asawa a lalaki. “Inlukatmi amin nga sliding doors idiay sikigan ti balay tapno dagiti kaarruba maaddaanda ti naan-anay a panangbuya no ania ti mapaspasamak. Makitada dagiti Bibliami ken dagiti literatura ti Biblia a naiparabaw iti lamisaan. Makitkitada no kasano ti panangiyurnosmi kadagiti isuamin a bambanag. Makitkitada no kasano ti panagbiagmi. Iti epektona ibagbagami kadakuada, ‘Umaykayo no kayatyo. Bisitaendakami. Awan ti ilimlimedmi. Talkendakayo.’
“Idi mapankamin mangaskasaba, iyam-ammomi dagiti bagbagimi kas tattao a naggapu iti dakkel a siudad ket dawatenmi no mabalinda nga isuro kadakami bassit maipapan iti pagilianda ken ti ug-ugalida. Pinagbalinmi a punto a kablaawan ti tunggal maysa, uray pay ti mannalon nga agtartrabaho kadagiti taltalon. Mapankami gumatang idiay kooperatiba dagiti lokal a mannalon. Amin daytoy ti nangtulong kadagiti tattao a makakita a sipapasnek ti interesmi kadakuada ket saankami a basta ‘aglaklako ti libro.’ Nakitada a gagangaykam laeng a tattao kas kadakuada ket nagbalinda met a mannakigayyem. Di nagbayag, saanmin nga iyam-ammo dagiti bagbagimi. Saanen a karkarna a makablaawan kadagiti ruruanganda kadagiti sasao a kas itoy: ‘Napudot dita ruar. Apay a dikay umuneg a maipaay iti nalamiis nga inumen?’ Wenno, ‘Kaidasdasarmi laeng ti pangngaldaw. Pangngaasiyo makipangankayo kadakami.’ Ti panagreggetmi nagballigi iti pananglukat ti is-isip ken puspusoda iti mensahe.”
Idiay ti intero a kongregasion nakiramanda, immad-adu met dagiti karit. Maitunos iti naisingasing a pammagbaga ni Jesus a ‘kuentaen ti magastos,’ naaramidan ti adu a nasapa a panagplano maipapan iti pagdagusan, panagdalus, pagluganan, panagserbi iti tay-ak, ken dadduma pay. (Lucas 14:28) Maysa a kongregasion ti nagreport: “Nupay implanomi ti agserbi manipud agtapos ti Hulio agingga iti umuna a lawas ti Setiembre, napankamin nagbirbirok ti mapagdagusan iti Mayo. Napankami idiay opisina ti siudad ket imbagami kadakuada dagiti kasapulanmi. Inlawlawagmi a grupokami dagiti pampamilia ken agtutubo nga interesado a mangisuro iti Biblia iti dayta a lugar. Mannakitunosda ket nangisingasingda kadagiti sumagmamano a posibilidad.
“Idi nakakitakami met laengen ti kalalainganna a lugar, nangibaonkami ti agdalus maysa a lawas a nasapsapa tapno maisagana dayta. Naisagana met dagiti mapa ti teritoria, naaramid met dagiti posters a mangipabpablaak ti panaggigimongmi, ken naiyemprenta dagiti imbitasion. Agsipud ta napalubosankami a mangusar iti maysa a baro a sentro a paglinglingayan maipaay iti panaggigimongmi, naaddaankam iti nasayaat a pablaak ket nakaibati ti nasayaat a pakalaglagipan.
“Ammomi a ti kanayon a trabaho ket awan ti ay-ayam saan a nasayaat no adda dagiti adu nga agtutubo a kaduami. Gapuna kalpasan ti tunggal aldaw a panagtrabahomi a panangaskasaba, wenno iti aldaw a panaginana iti lawas no amin nakalpasdan kadagiti naituding nga obrada, mapankami nga agpagnapagna, aglugan ti bilog, wenno agbanniit ket mabang-arankami kadagiti napipintas a mabuya ken makapasalun-at nga angin iti kabambantayan.”
Maikari Aya Amin Dayta?
Ti pamilia dagiti uppat manipud Saitama Prefecture ti nangted iti daytoy a sungbat: “Bayat ti makabulan a kaaddami iti teritoria nakaipaimakami iti 920 a magasin, 240 a libro, naaddaan ti 13 nga interesado a tattao iti miting publiko nga inyurnosmi, ken nakairugikami iti 4 a panagadal ti Biblia a nagtultuloy kalpasan ti ipapanawmi. Dagitoy a resulta ti namagbalin a maikari amin dagiti panagregget, ngem adu pay. Naadal dagiti annakmi ti ragsak ti ministerio ket nakapatanorda ti pudpudno nga espiritu ti kinapayunir. Kas maysa a pamilia, rimmang-ay ti panagkaykaysami bayat a nagririnnanudkami kadagiti trabaho ken kapadasan iti tay-ak. Agar-aramidkami manen kadagiti piho a plano a mapan manen iti sumaganad a tawen.”
Ti agedad-media a pagassawaan a nagreggetanda a gayyemen dagiti tattao ti nangipatulod iti daytoy a report: “Kalpasan ti panangwanasmi a naminsan iti teritoria, binusbosmi dagiti tunggal malemmi a nagaramid iti panagsarungkar. Nakigayyemkami kadagiti lokal nga umili ket dadduma kadakuada ti agluada pay idi pumanawkamin iti dayta a lugar. Inawatdakami ken ti naimbag a damag ket imbatiandakami kadagiti nagsayaat a pakalaglagipan. Malaksid no mapasaram a mismo dayta, dikanto pulos maammuan no kasano ti kapintas dayta. Nabigbigmi a maaramidanmi ti aniaman babaen iti tulong ni Jehova.”
Maysa a Saksi nga aktibon iti nasurok a 20 a tawtawen kunana iti reportna: “Siak ken ti 82 años a kaduak dikam pay pulos narikrikna nga ad-adda a nasingsingedkami ken Jehova ngem ita kalpasan ti panagserbimi iti uray dua laeng a lawas iti naiputputong a teritoria. Dagiti pusomi napunnoda agingga nga agliplipyas.”
Maysa a Naisalsalumina Pribilehio
Dagidiay a simmungbat iti ‘awis ti Macedonia’ idiay Japan ti nangapresiar a naan-anay kadagiti sasao ni Jesus: “Pudno a ti anien adu, ngem bassit dagiti agani. Dawatenyo ngarud iti Apo ti anien tapno mangibaon koma kadagiti agani iti paganianna.”—Mateo 9:37, 38.
Dagiti nakaragragsak a kapadasan dagidiay simmungbat iti awis impakitada a “ti Apo,” a ni Jehova a Dios, ket sinungbatanna dayta a kararag. Dagiti agtutubo ken nataengan agpadpada imbilangda a naisalsalumina a pribilehio ti makipaset iti panagurnong. (Exodo 23:16) Ar-aramidenyo met laeng aya ti kabaelanyo iti daytoy ingrande a trabaho?
[Ladawan iti panid 30]
Dagiti manangibunannag ti pagarian sirarag-o nga inranudda ti naimbag a damag kadagiti dadduma idiay Japan