Pudno a Gagayyem​—Kasano a Biruken Ida

“TI KAKAISUNA a pamay-an tapno maaddaan iti maysa a gayyem ket isut’ panagbalin a maysa a gayyem,” kuna ni Ralph Waldo Emerson. Ngem, adu, ti nangpili iti panagbukbukod. Imbes a gumaw-atda ken agbalinda a maysa a gayyem, gessatenda ketdi ida. Ti banagna? “Tattao a mangbusbos iti adu a panawen iti bukbukodda a ti pagannayasanda ket agriknada a ‘di matagtagari unay, dida naragsak, kas maipupuera iti lubong,’” inadaw ti maysa a pagiwarnak iti Brazil a kinuna ti maysa a managsirarak. Intuloyna: “No awan sabalin a banag a maaramidan, no awanen ti mabalin a pakisaritaan, sika ti agturongen nga agpauneg. Naglaka unay ti mariribukan a maigamer kadagiti bukodmo a parikut.”

Ngem, saan a kasapulan a madanonyo pay ti kasta a tukad. Ngangngani tunggal maysa mabalinna a maadal ti agbalin a maysa a gayyem ket iti kasta makagun-od kadagiti gagayyem. Ngem kasano ti panangrugi ti maysa a tao? Ti dakkel a banag iti abilidad a panangaramid kadagiti gagayyem ket isu ti bukodtay a personalidad. Ti maysa a kadaanan a proverbio ti sipupudno a kinunana: “Ti pagrayuan ti maysa a tao ket agpannuray iti kinasingpetna.” (Proverbio 19:22, The Jerusalem Bible) Ngarud, ti pudno a pannakigayyem, ket umay kadagidiay mangipakpakita ti kinasingpet. Kas pangarigan, no ipakaammotay kadagiti dadduma nga apresiarentay ida, ad-adda met a maaddaanda ti interes kadatayo.

Ti tao a nasingpet ket agimdeng met kadagiti dadduma. Daydiay mangdominar iti panagpapatang wenno nalabes panagsasaona maipapan iti bagina met laeng ti maaddaan narigat a panawen a mangbirok iti maysa nga agbalin nga interesado kadagiti rikrikna ken tartarigagayna. Ti kinasingpet kaipapananna met ti panangannad no ania ti ibagatayo kadagiti dadduma. “Adda agsao a sidadarasudos a kas kadagiti panagduyok ti kampilan, ngem ti dila ti masirib isu ti salun-at.” (Proverbio 12:18) Kas panangiyilustrar: Mabalin nga adda ti madlawyo a maysa a maladingitan, wenno napalalo ti panagaburidona. Kuna ti maysa a proverbio: “Ti panagdanag ti mangtakaw ragsak kadakayo, ngem dagiti naasi a sasao paragsakennaka.” (Proverbio 12:25, Today’s English Version) Iti dayta nga okasion, ti makapaimbag a dilayo ti manggun-od iti maysa a nasungdo a gayyem nga agpaay kadakayo.

Ti Pateg ti Kinasungdo

Ti mannurat iti Proverbio 18:24 impakitana ti nauneg a pannakaawatna iti natauan a relasion idi nga insuratna: “Dadduma a gagayyem mangyeg iti pakadangrantayo, ngem ti pudno a gayyem ti nasungsungdo ngem ti maysa a kabsat.” (The New American Bible) Wen, asino ti mayat iti maysa a gayyem a nasayaat laeng no nasayaat panniempona? Ngem usigenyo ti ulidan da David ken Jonatan. Nagsakit koma ti nakem ni Jonatan ken David, ta ni Jonatan ket isu ti agtawid iti trono ti Israel ngem ammona a ni David ti aktualmente agbalinto nga ari. Kaskasdi impakita ni Jonatan ti kinasungdo, saan ket a ti imon ken ni David, nga inrisgona pay ti biagna gapu ken ni David.​—1 Samuel 18:1-3; 20:17, 31, 32; 2 Samuel 1:26.

Ni Ruth ti maysa pay a nasungdo a gayyem. Imbes a pinanawanna ni katuganganna a Noemi, isut’ nagtalinaed a kaduana. Kinaagpaysona, umisot’ panagkuna dagiti managpaliiw a ni Ruth ket ‘naim-imbag ngem kadagiti pito nga annak a lallaki’ ken ni Noemi.​—Ruth 1:16, 17; 4:15.

Mangipakpakitakay met aya ti kasta a kinasungdo? Kas pangarigan, no makapaliiwkay kadagiti pagkapuyan kadagiti kaam-ammoyo, awan annad aya nga ipampanayagyo kadagiti dadduma?

Ngem kasanon no ti maysa a nadekket kadakayo addaan iti nadagsen a biddut a kasapulan a maiyeg nga insigida iti atensionna? Ti nasungdo a gayyem ket saan nga agkedked a mangibaga iti pudno gaput’ butengna iti panagrikna ti dadduma a tattao. “Natalek dagiti panangdanar ti gayyem,” kuna ti Biblia. (Proverbio 27:6) Daytoy, siempre, dina kayat a sawen nga agbalinkayo a nagubsang wenno di nataktika. Dagiti Kristiano idiay kadaanan a Galacia naminsan kasapulanda iti napigsa a panangtubngar. Ngem kitaenyo no kasanot’ kinalaing ti panangtaming ni apostol Pablo iti kasasaad ket sana insaludsod: “Nagbalinak aya a kabusoryo gapu iti panangibagak kadakayo iti pudno?” (Galacia 4:16) Ti pudno a gayyem ti mangayat kadakayo gapu iti ‘panangibagayo ti pudno,’ uray pay no daytat’ maysa a balakad a panangtubngar.​—Proverbio 9:8.

Ragsak iti Pannangted

Ti agpaypayso, napaut a pannakigayyem adda met pategna. Dagiti tattao a pagregreggetanda ti maaddaan iti maysa a banag nga awan met ti ipapaayda a panangsupapak ket nikaanoman dida maammuan ti ragsak a sasawen ni Jesus idi a kinunana, “Naragragsak a banag ti mangted ngem ti umawat.” (Aramid 20:35; Lucas 6:31, 38) Gapuna, adalenyo a matmatan dagiti tattao manipud iti kasasaad a mabalin a maaramidanyo kadakuada, imbes a ti magun-odanyo kadakuada.

Iparegta ti Biblia kadagiti Kristiano nga agbalinda a “managparabur,” “managparanudda, nalakada a makipagrikna.” (Proverbio 11:25; 1 Timoteo 6:18) Mabalin a limitado unay dagiti material a kinabaknangyo, ngem ti met ngay panawenyo? Addaankay aya iti ugali a kanayon nga agap-apura? Ti pannakigayyem kasapulanna ti panawen, ket malaksid no ti maysa a tao situtulok a mangipaay iti panawen nga agpaay kadagiti dadduma, ti pannakirelasion ti saanto a rumang-ay. Kas pangarigan, mabalin nga us-usarenyo ti marunrunoten a panangkablaaw a “Komostakayo?” Ngem managparaburkay met laeng aya iti tiempoyo tapno agsardengkayo ken sisasaganakayo a dumngeg iti sungbat iti daytoy a saludsod? Laglagipenyo nga uray no ni Jesu-Kristo ti okupado, isut’ addaan a kanayon iti panawen a mangtaming kadagidiay nga agsapsapul kenkuana.​—Marcos 6:31-34.

Panangsalimetmet a Sibibiag iti Pannakigayyemtayo

Apaman a naipasdeken ti pannakigayyem, maaramid koma ti tunggal panagregget tapno daytat’ agtalinaed a sibibiag. Pudno, bayat nga agam-ammokayo iti maysa ken maysa, mabalin a rumsua met dagiti pagkapuyan ken pagbiddutan. Kaskasdi nasaysayaat ti panangbigbigyo ken panangawatyo kadagiti babassit a pagkapuyan. Ket no agduaduakayo, ti banag a natakneng nga aramiden isu ti panangted iti gayyemyo iti gunggona iti panagduadua, babaen iti panangliklikyo iti napalalo a panagil-ilem. ‘Agiinnanuskayo iti ayat,’ imbalakad ni Pablo. Ket innayon pay ni Pedro: “Ket nangnangruna ngem amin, adda koma kadakayo met laeng ti nasged nga ayat, ta ti ayat abbonganna dagiti adu unay a basbasol.”​—Efeso 4:2; 1 Pedro 4:8.

Ken, kasta met, anian a nainsiriban ti dikay koma pananglaglag-an kadagiti gagayyem! Uray pay ti kasingedan kadagiti gagayyem kasapulanna met ti panagbukbukodda. Ti nakapapaut, masansan, wenno di naintiempuan a panagsarungkar ti mabalin agtanoy makaumanto ken di pagragsakan. Ti kinamannakaawat ken panagraem isingasingna ti panangaramid iti urnos a nasapsapa no posible ken mabalin dayta. Ibalakad ti Proverbio 25:17: “Ta sakam mammano koma ti kaaddana iti balay ti kaarrubam, di la ket ta mauma kenka ket guraennaka.”

Maysa met a kurso ti kinasirib ti panangliklik ti panagbalin a nalabes ti panagpalpalutpotna, agbalin a personal, wenno naimut. Ti kinaemma ti mangtignay kadatayo nga agbalin a dogmatiko. Pudno unay, ti pannakigayyem dina itden kadatayo ti kalintegan a mangipapilit kadagiti kapanunotan wenno personal a panagrikriknatayo iti maysa. Pudno unay, no iturturayannatayo “ti kinasirib nga aggaput’ ngato,” agbalintayo a rasonable.​—Santiago 3:17.

Agbalinkay a manangsuporta koma kadagiti gagayyemyo, a surotenyo ti pammagbaga ni Pablo idiay Roma 12:15: “Makipagrag-okayo kadagiti agrag-o; makipagsangitkayo kadagiti agsangit.” Wen, situtulokkay koma a makiranud kadagiti pagladingitan, pakaup-upayan, dagiti pagrag-oan, ken panagballigi ti gagayyemyo. Ipakitayo met ti rikna a makipagkatawa, a situtulokkayo a mangkatawa kadagiti mismo a biddutyo, saan laeng a kadagiti biddut dagiti dadduma. Dagiti naimbag a sasao mabalin pay nga agserbi a mangpalukay iti aniaman a kinairteng iti di makaay-ayo a kanito. Wen, ti pannakigayyem ket maysa a trabaho. Ngem saan kadi a maikari amin dayta a panagregget?

Panangbirok kadagiti Pudno a Gagayyem

Sadino, ngarud, ti pakasarakan ti maysa kadagiti pudno a gagayyem? Ti nagsayaat a lugar a pangrugian isu ti lokal a kongregasion dagiti Saksi ni Jehova. Dagitoy a pudno a Kristiano tagtagiragsakenda ti kasta a naimbag a relasion a masansan tuktukoyenda ti maysa ken maysa a kas “ti gagayyem,” kas kadagiti kapammatianda idi umuna a siglo. (3 Juan 14) Dagita inwaksidan ti nasionalismo ken kinatangsit iti rasa, bambanag nga isut’ mamagsisina kadagiti tattao. Pagregreggetanda a kawesan ti bagbagida iti kuna ti Biblia a “ti baro a personalidad.” Kaipapanan daytoy ti panangsukay kadagiti makaay-ayo a kualidad kas “ti maysa a puso a naasi, ti kinaimbag ti nakem, ti kinapakumbaba, ti kinaemma, ken ti mabayag a panagitured.” (Colosas 3:10-12) Sigurado a makasapulkayto kadagiti makaay-ayo a gagayyem kadagiti tattao nga agar-aramid iti daytoy!

Babaen ti pannakitimtimpuyog kadagiti Saksi ni Jehova, maadalyo met no kasano ti pannakigayyem kada Jehova a Dios ken ti Anakna a ni Jesu-Kristo. Kuna ni Jesus: “Dakayo ti gagayyemko no aramidenyo dagiti ibilinko kadakayo.” (Juan 15:14) Ket ni Abraham idi ugma ti naawagan “gayyem ni Jehova.” Nagun-odan ni Abraham dayta matarigagayan unay a pannakirelasion gapu iti pammatina ken nalinteg nga ar-aramidna, ket mabalinyo met nga aramiden ti kasta.​—Santiago 2:23.

Gapuna numan pay naimbag ti panagregget a mangsukay kadagiti naindagaan a gagayyem, agbalinkay koma a desidido a mangipasdek ti naingayyeman a relasion iti nailangitan a Gayyemtayo a ni Jehova a Dios. Isunto ti mangisubli ti Paraiso itoy a daga, a mamalubos kadagiti amin a naindagaan nga ad-adipenna nga agbiag iti talna ken talged. Wen, dagiti agtataeng iti daga malikmutdanto kadagiti minilmilion nga agnanayon a mapaneknekanto kas pudno a gagayyem.​—Lucas 23:43; Apocalipsis 21:3, 4; Salmo 37:10, 11.

[Kahon iti panid 7]

Ti Pannakipagayam a Mamagkaykaysa

Dagiti Saksi ni Jehova saanda laeng nga agkakabsat a lallaki ken babbai no di ket aggagayyem met. Ket yantangay daytoy a pannakipagayam naibatay iti agpadpada a panagtulnog iti bilbilin ni Jesu-Kristo, daytat’ saan a kinedngan dagiti nasional a pagbeddengan. (Juan 15:14) Daytoy a pannakipagayam ti umawat ti pammendision ti Dios, nga isut’ mangsalimetmet iti panagkaykaysada ken kinatalgedda kas arban dagiti karnero iti kulonganda.​—Mikias 2:12.

Masansan ti pannakipagayam ken panagkaykaysa di makita kadagiti lugar a pagtartrabahuan. Kaskasdi, no agtataripnong dagiti Saksi ni Jehova a mangibangon kadagiti “insigida a maibangon” a Kingdom Hall, ti maysa a nasalun-at nga espiritu ti panagtutunos ken panaggagayyem ti makita. Kas pangarigan, dagiti Saksi manipud Estados Unidos, Inglatera, ken Wales ti nagtitinnulongda ken inranudda dagiti pamay-anda iti panagbangon iti patakder. Ti banagna?

“Diak pay pulos nakakitkita ti kastoy a banag iti amin a panagbiagko,” kuna ni Roger, maysa a kantero manipud Inglatera. “Diak laeng makitkita dagiti karpentero a makipagtartrabaho a kadua dagiti kantero agsipud ta pulos a di mapaspasamak dayta iti lubong. Ngem iti lugar a pakaibangonan ti Kingdom Hall makitayo dagiti kakabsat a mangtartrabaho iti bubong, bayat a dagiti karpentero ken kantero agtartrabahoda iti sirokna a kadua dagiti pintor ken dagiti manangikabil ti alpombra. Amin agtrabahoda a sangsangkamaysa. Nakaskasdaaw dayta!”

Ni Mike, nga ama ti dua, manipud Wales ti nagkuna a “tunggal maysa mabalinda ti makiranud iti dayta a panaggagayyem.” Ket ti gayyemna a ni Malcolm napaliiwna no apay, a nagkomento: “No amin dagiti kakabsat agtrabahoda a sangsangkamaysa, iti nagan ti Dios, iti kasta bendisionanna dayta a proyekto babaen iti espirituna.”

[Ladawan iti panid 5]

Ti pudno a pannakigayyem awan kednganna nga edad

[Ladawan iti panid 6]

Makagun-odtayo kadagiti pudno a gagayyem babaen iti panagbalintayo a managparanud, nalaka a makipagrikna