Dagiti Ministerial nga Ad-adipen—Maysa a Bendision iti Ili ni Jehova
“Ket dagitoy masuotda nga umuna, ket iti kasta tumulongda a kas ministro no awanto ti pakapilawanda.”—1 TIMOTEO 3:10.
1. Asino ti makatulong a mangipasiguro iti ragsak ken panagkaykaysa ti kongregasion?
NI JEHOVA ket “naragsak a Dios,” ket kayatna a dagiti ad-adipenna naragsakda met. (1 Timoteo 1:11) Agpaay iti dayta a panggep, isut’ nangipaay kadagiti panglakayen ken ministerial nga ad-adipen nga agpaay a pakabendisionan ti ilina. Dagitoy responsable a lallaki ti agserserbi iti makagunggona a panggep ken tulong a mangipasiguro iti ragsak, panagkaykaysa, ken iti nalamuyot a panagandar ti kongregasion Kristiano. Anian ti panagyaman dagiti Saksi ni Jehova iti naayat ken natulong a serbisio nga ipapaay dagitoy a nadutokan iti uneg ti teokratiko nga organisasion ti Dios!
2. Ania a kababalin ti rebbeng a maadda kadagiti panglakayen ken ministerial nga ad-adipen, ngem aniat’ rebbeng a dida koma malipatan?
2 Agpapan pay iti nagpateg a tulong dagiti panglakayen ken ministerial nga ad-adipen iti kongregasion, nupay kasta, dida koma padpadakkelen unay ti bukodda a kinapateg. Masapul a laglagipenda ti pammatigmaan ni Jesu-Kristo kadagiti paspasurotna nga agpakumbabada. Naminsan imbagana kadakuada: “Uray siasino nga agemmanto a kas itoy nga ubing daytoy isu ti kadakkelan idiay pagarian ti langit.” (Mateo 18:4) Ket insurat met ni adalan a Santiago: “Agpakumbabakayo iti imatang ni Jehova, ket isu itan-oknakayto.” (Santiago 4:10; Roma 12:3) Ngem ti napakumbaba a kababalin dina kaipapanan a dagitoy a lallaki pabassitenda met ti kinapateg ti trabahoda kas dagiti panglakayen ken ministerial nga ad-adipen. Mabalinda ti agpakumbaba ket kaskasdi mangidaulo iti serbisio. Dida koma pulos liplipatan dagiti makagunggona a panggep a serserbian dagiti ar-aramidda, no di ket laglagipenda koma a kanayon ti obligasionda, agpadpada ken ni Jehova ken kadagiti Kristiano a kakabsatda, nga aramidenda ti inggat’ kabaelanda a mangitungpal kadagiti annongenda.
3. Ti nagkaykaysa a panagtignay dagiti Saksi ni Jehova ti maidilig iti ania, ken kasano a maitag-ay dagiti dedikado a lallaki ti kasta a panagkaykaysa ken ti irarang-ay dagiti intereses ti Pagarian?
3 Ti sangsangkamaysa a panagtrabaho dagiti Saksi ni Jehova itatta ti mabalin nga idilig iti panagkaykaysa ti natauan a bagi. Kinapudnona inyarig ni apostol Pablo ti naespirituan a bagi ni Kristo iti natauan a bagi a buklen dagiti adu a kamkameng. Kaskasdi agpaay a pakagunggonaanda, amin dagiti kamkameng ti bagi agtrabahoda a sangsangkamaysa. (1 Corinto 12:12-31) Ken, nalawag, dagiti nadutokan a panglakayen ken ministerial nga ad-adipen ket bendisionda iti ili ni Jehova, ta dagitoy a lallaki parang-ayenda pay ti nagkaykaysa a panagtignay ti kongregasion Kristiano itatta. (Idiligyo iti Colosas 2:18, 19.) Dagiti dedikado a lallaki a kamkameng ti kongregasion a pagreggetanda a suportaran ti organisasional nga urnos ni Jehova babaen iti “pananggaw-atda iti saad ti maysa a manangaywan” mangar-aramidda ti nasken a tulong iti Nakristianuan a panagkaykaysa ken ti panangparang-ay iti intereses ti Pagarian. (1 Timoteo 3:1) Ngem kasano a makakualipikar ti maysa a lalaki a Kristiano, umuna, tapno agbalin a ministerial nga adipen?
“Masuotda nga Umuna”
4. (a) Apay a dagiti mainanama a ministerial nga ad-adipen “masuotda nga umuna”? (b) Dagitoy a lallaki situtulokda koma a mangaramid iti ania?
4 Imbaga ni apostol Pablo ken Timoteo a katrabahuanna no ania dagiti kasapulan sakbay a madutokan dagiti lallaki kas ministerial nga ad-adipen. Nairaman kadagiti dadduma a bambanag, insurat ni Pablo: “Ket dagitoy masuotda nga umuna, ket iti kasta agserbidanto kas ministro, no awanto ti pakapilawanda.” (1 Timoteo 3:10) Lappedan daytoy ti pannakadutok dagiti lallaki a di kualipikado, dagidiay di nakaragpat kadagiti pamunganayan a Nainkasuratan a pagalagadan. Ipalubos met dayta ti panawen a mangikeddeng kadagiti motibo dagiti mainanama nga agbalin a ministerial nga ad-adipen. Siempre, dagitoy a lallaki dida koma matignay iti panagtarigagay a manggun-od iti dayaw, ta daytat’ mangipamatmat iti kinakurang iti kinapakumbaba. Imbes ketdi, iti panangbigbig iti kinapudnona a ti dedikasion ti maysa a Kristiano iti Dios ket awanan kondision ken nalawa ti abrasaenna, ti maysa a kabsat a lalaki ti situtulok koma nga agserbi iti aniaman a kapasidad a makita ni Jehova a bagay a pakausaranna iti organisasionna. Wen, rebbeng a dagiti mainanama a ministerial nga ad-adipen situtulokda koma nga agserbi kas ken matalek nga Isaias idi unana, a nagkuna: “Adtoyak! Ibaonnak.”—Isaias 6:8.
5. (a) Ania dagiti pagalagadan nga agpaay kadagiti ministerial nga ad-adipen a naibalabala iti 1 Timoteo 3:8? (b) Aniat’ kayat a sawen ti panagbalin a “natakneng”? (c) Aniat’ kayat a sawen ni Pablo idi kunana a ti ministerial nga ad-adipen masapul a “saan a dua ti dilada”?
5 “Kasta met dagiti ministerial nga ad-adipen nataknengda, saan a dua ti dilada, saanda a managinum ti adu nga arak, saanda a naagum ti pirak,” inlawlawag ni Pablo. (1 Timoteo 3:8) Nupay dadduma kadagiti ministerial nga ad-adipen ni iyar-arig ti agkabannuagda pay, saandan nga ub-ubbing ket masapul nga agbalinda koma a “natakneng.” Masapul a naadalda koman a matmatan dagiti importante a bambanag a sisiserioso. (Idiligyo ti Proverbio 22:15.) Masapul a mapagtalkanda ken napasnekda, saan a lallaki nga addaan pagannayasan a manglaglag-an kadagiti rebbengenda. Wen, rebbengna a mapagpiaranda, nga aramidenda a sisiserioso dagiti annongenda. Ta, ania kadi pay ti ad-adda a serioso ngem ti sagrado a serbisio ken Jehova? Daytat’ maysa a banag ti biag wenno ipapatay—agpaay kadakuada ken kadagiti dadduma. (Idiligyo ti 1 Timoteo 4:16.) Mainayon pay, iti panangikunana a dagiti ministerial nga ad-adipen “saan a dua ti dilada,” kayat a sawen ni Pablo nga isuda ti direkta ken napudno, saanda a manangidanondanon, managinsisingpet, wenno saan a nasalikawkaw.—Proverbio 3:32.
6. Ania dagiti sumagmamano a pamay-an a maiparangarang dagiti ministerial nga ad-adipen ti kinatimbeng?
6 Ti kinatimbeng ti kasapulan iti personal a panagbiag dagiti lallaki a kualipikado nga agbalin a ministerial nga ad-adipen. Nalawag a ti kayat a sawen ni Pablo masapul a lisianda ti panagbarbartek, kinaagum, ken kinasuitik idi a kinunana a “saanda a managinum ti adu nga arak” wenno “saanda a naagum ti pirak.” Dagitoy a Kristiano a lallaki masapul a lisianda met ti panangted iti aniaman nga impresion iti aglablabes nga interesda iti ragragsak wenno material a bambanag. Pagreggetanda met koma a kanayon nga ipangpangruna dagiti naespirituan a bambanag iti biagda. Daytoy ti mangtulong kadakuada a mangtaginayon iti “nadalus a konsiensia” iti imatang dagiti padada a tattao ken, nangnangruna pay, iti imatang ti Dios.—1 Timoteo 3:8, 9.
7. (a) Apay a maikuna a ti rebbengen dagiti ministerial nga ad-adipen saan a nairanta para kadagiti ub-ubbing? (b) Ti kinapudnona a ti maysa a ministerial nga adipen ti agwaywayas pay laeng ipamatmatna ti ania maipapan kenkuana?
7 Ti nadagsen a rebbengen a naipabaklay kadagiti ministerial nga ad-adipen saanda a nairanta para kadagiti ub-ubbing. Dagitoy a lallaki ti masasao iti Kasuratan kas adda iti edaden a mabalindan ti mangasawa ken maaddaan iti pamilia. Iti sidong dagidiay a kasasaad, rebbengna nga “urnosenda a naimbag dagiti annak ken balbalayda.” (1 Timoteo 3:12) Kaipapananna kadi a daytoy ket ti agtutubo a lalaki saan a maikari nga agbalin a ministerial nga adipen agingga nga isu ti umuna pay a mangasawa ken agpamilia? Saan, nikaanoman. Kinapudnona, ti panagkitakitna nga aggarasugas iti panagasawa nga awan ti umdas a panagsagana wenno sakbay a makasapul iti maibagay a nabautisaranen a Nakristianuan a kaduana ipamatmatna ti rukod ti kinanataengan a kasapulan a mangaywan kadagiti personal a bambanag ken ti ad-adda pay a serioso a rebbengen iti kongregasion.
8. Maipapan iti 1 Timoteo 3:13 ken Mateo 24:14, ania a rebbengen ti naipabaklay kadagiti ministerial nga ad-adipen?
8 Kinuna pay ni Pablo a “dagiti nagserbi a naimbag iti saad a ministro makagun-odda ti maysa a naimbag a kasasaad a maipaay kadakuada ken iti dakkel a wayawaya ti panagsao iti pammati ken Kristo Jesus.” (1 Timoteo 3:13) Ti maysa a pamay-an a pannakaipakitada iti kasapulan a “dakkel a wayawaya iti panagsao” isut’ babaen iti aktibo a pannakipasetda iti panangikaskasaba iti “daytoy naimbag a damag ti pagarian.” (Mateo 24:14) Rebbeng a bigbigenda a makiramanda a kadua dagiti panglakayen iti rebbengen a panangidaulo iti panangaskasaba manipud balaybalay ken makipaset kadagiti dadduma pay a langa ti ministerio. (Aramid 5:42; 20:20, 21) Bayat a pumarpartaken nga umadanin iti panungpalan daytoy dakes a sistema ni Satanas, ti trabaho a panangaskasaba ti gumanat met a gumanat. Ngarud, rebbengna a dagiti ministerial nga ad-adipen, salimetmetanda met a sigaganat ti trabaho a panangikaskasaba iti Pagarian iti imatang ti kongregasion babaen ti panangipakitada iti nagsayaatan a personal a pagulidanan iti tay-ak ti ministerio.
Natulongan babaen ti Amin-Tiempo a Ministerio
9. Gapu iti kinaganat dagiti panawentayo, ania a serbisio ti innala dagiti adu a Kristiano?
9 Gapu iti kinaganat dagiti panawentayo a napeggad, adu a Kristiano a lallaki ken babbai ti nangala iti amin-tiempo a ministerio. Adu, a maaw-awagan dagiti payunir, ti inaldaw a mangbusbos iti promedio a dua aginggat’ lima nga oras iti trabaho a panangaskasaba, dadduma kadakuada kas misionero iti ganggannaet a daga. Dadduma agserserbida iti amin-tiempo idiay hedkuarter ti Watch Tower Society wenno kadagiti sangsanga nga opisinana iti intero a daga. Ti serbisioda ket gubuayan ti rag-o ken pannakapnek kadakuada ken kadagidiay pagserserbianda. Ken iti adu a kaso ti kapadasanda iti amin-tiempo a serbisio ti nangtulong kadagiti lallaki a nangpatanor kadagiti kualipikasion a kasapulan nga agserbi iti kongregasion iti makagunggona a pamay-an kas ministerial nga ad-adipen.
10, 11. Kas ipamatmat dagiti personal nga ebkas a naisitar ditoy, kasano a magunggonaan dagiti lallaki nga agtarigagay kas ministerial nga ad-adipen babaen iti amin tiempo a serbisio?
10 Maysa a dati a ministerial nga adipen, nga itan maysan a panglakayen iti maysa a kongregasion, idiay Berlin, Alemania, kunana maipapan iti trabaho a panagpayunir nga innalana adu a tawtawen ti napalabasen kas maysa nga agtutubo a lalaki: “Maikunak a daytat’ maysa nga addang a diak pulos nagbabawian. Binendisionannak ni Jehova. Ti pannakirelasionko kenkuana ti ad-adda a nasingsinged.” Wen, kas kadagiti renibribo pay a dadduma, nadiskubre daytoy a kabsat a lalaki a ti amin-tiempo a ministerio ti mangpauneg ti relasion ti maysa a tao ken ni Jehova ken papartakenna ti irarang-ay nga agturong iti Nakristianuan a kinanataengan.
11 Maysa pay a nabayagen a payunir inlawlawagna no kasano a nakatulong kenkuana ti amin-tiempo a serbisio. “Nagbalinak a naul-ulimek ken natimtimbeng maipapan iti panagaramid kadagiti darasudos a pangngeddeng,” kinunana. “Naragragsakak nga ad-adda ken ad-adda a nalaklakaak a makibagay iti pannakilangen kadagiti nadumaduma a kita dagiti tattao.” Saan kadi a dagitoy ti nairaman kadagiti kualidad a kasapulan kadagiti tattao nga agtarigagay nga agserbi kas ministerial nga ad-adipen?
12. (a) Ania dagiti gundaway a pannakipaset iti amin-tiempo a ministerio? (b) Ti pannakipaset iti amin-tiempo a ministerio kasapulanna dagiti ania nga abilidad a makatulong iti ministerial nga adipen a mangitungpal kadagiti annongenna?
12 Ti pannakiraman iti amin-tiempo a ministerio, no ipalubos dagiti Nainkasuratan a rebbengen, ti makapagserbi kas nakaskasdaaw a gundaway kadagiti Kristiano a lallaki tapno “masuotda nga umuna.” Dadduma mabalinda nga alaen ti kasta a ministerio iti permanente a pamay-an, dadduma iti sagpaminsan. Dagiti agtutubo mabalinda nga aramiden dayta bayat dagiti bakasionda manipud eskuelaan, ket dagiti natataengan bayat iti panagbakasionda wenno dadduma pay a maiyanatop a tiempo iti intero a tawen. Siempre, ti pannakiraman ti amin-tiempo a serbisio sapulenna ti kinatimbeng ken nasayaat a panagplano. Dagitoy nga abilidad kasapulan iti maysa a ministerial nga adipen ket mangtulong kenkuana a mangitungpal kadagiti annongenna. Ania nga annongen?
Dagiti Annongen ti Ministerial nga Ad-adipen
13. Ti Aramid 6:1-6 isingasingna ti ania maipapan iti tipo ti trabaho a maituding kadagiti ministerial nga ad-adipen?
13 Numan pay ti Aramid 6:1-6 ket saan a direkta nga agaplikar iti panangdutok kadagiti ministerial nga ad-adipen, ti naikuna sadiay isingasingna ti tipo ti trabaho wenno ti kasasaad dagiti annongen a gagangay a maituding kadagiti ministerial nga ad-adipen. Saan a babaen iti panangisuro kadagiti kapammatianda no di ket babaen ti panangiwaras kadagiti taraon, dagiti “pito a lallaki a naimbag ti damagda” a napili idi ti nangwayawaya kadagiti apostoles tapno ‘sanguen a kankanayon ti panagkararag ken ti panangikaskasaba iti sao.’ Babaen iti panangaywan kadagiti umas-asping nga annongen itatta, dagiti ministerial nga ad-adipen maipaayda kadagiti panglakayen iti adu a tiempo a panangipastor ken panangisuro “ti arban ti Dios.”—1 Pedro 5:2, 3.
14. Ania a nadumaduma nga annongen ti mabalin a maituding kadagiti ministerial nga ad-adipen?
14 Maipapan kadagiti annongen ti ministerial nga ad-adipen, ti libro nga Organisado a Mangitungpal iti Ministeriotayo kunana: “Mabalin a maysa a ministerial nga adipen ti maituding a mangaywan kadagiti literatura ti kongregasion, a pagbalinenna a kumbeniente para kadatayo amin a makagun-od iti literatura a kasapulantayo a personal ken para iti tay-ak ti serbisio. Ti sabali ti mangaywan kadagiti magasin ti kongregasion. Matudingan met dagiti dadduma nga agaywan ti rekord maipapan kadagiti kuenta ti kongregasion wenno ti panangituding ti teritoria, wenno mausarda a mangasikaso kadagiti mikropono, agpaandar ti sound equipment, mangasikaso iti plataporma wenno nalabit tumulong kadagiti panglakayen iti nadumaduma pay a pamay-an. Nagadut’ trabaho a pangmentenar iti Kingdom Hall ken ti panangsalimetmet iti kinadalusna, gapuna masansan maaw-awagan dagiti ministerial nga ad-adipen a bumadang a mangaywan kadagita a rebbengen. Matudtudingan met dagiti ministerial nga ad-adipen nga agserbi kas attendants, a mangabrasa kadagiti kabbaro ken tumulong a mangsalimetmet iti kinaurnos kadagiti gimgimong ti kongregasion.”—Pinanid 57-8.
15. (a) Tapno makapagserbi nga epektibo kas ministerial nga adipen, aniat’ kasapulan malaksid iti praktikal nga abilidad? (b) Numan pay dagiti ministerial nga ad-adipen ti mangaywan kadagiti nadumaduma a bambanag, aniat’ kangrunaan a pakaseknanda koma?
15 Ti kadi basta asinoman a kabsat a lalaki nga addaan praktikal nga abilidad ti makaaramid iti kasta a trabaho? Saan, ta dagiti “lallaki a naimbag ti damagda” a napili idi umuna a siglo idiay Jerusalem “napnoda iti espiritu ken sirib,” wenno “agpadpada a praktikal ken naespirituan panagpampanunotda.” (Aramid 6:3, Phillips) Uray pay no isudat’ panglakayenen iti ili ni Jehova, matudinganda pay iti trabaho nga umas-asping iti daydiay ar-aramiden itan dagiti ministerial nga ad-adipen. Gapuna tapno maitungpal dagiti agdama a ministerial nga ad-adipen dagiti annongenda a siepektibo, masapul nga “agpadpada a praktikal ken naespirituan panagpampanunotda.” Nupay okupadoda kadagiti organisasional a detalye, ti kangrunaan nga interesda rebbeng nga isut’ panagserbida kadagiti tattao iti makagunggona a naespirituan a pamay-an.
16. No awan ti umdas a panglakayen iti kongregasion, dagiti ministerial nga ad-adipen ti mabalin a matudingan kadagiti ania nga annongen?
16 Yantangay dagiti ministerial nga ad-adipen ti masapul a naespirituan panagpampanunotda, no maminsan mausarda met kadagiti trabaho a gagangay nga aramiden dagiti panglakayen. Ti Organisado a Mangitungpal ti Ministeriotayo (pinanid 58-9) ilawlawagna: “No awan umdas a panglakayen a mangikondukta kadagiti Panagadal ti Libro ti Kongregasion, dadduma kadagiti kualipikado a ministerial nga ad-adipen ti mabalin a mausar kas konduktor ti panagadal a mangaywan kadagiti naituding a grupo. Mabalin a madutokanda met a mangtaming kadagiti paset ti Gimong ti Serbisio ken iti Teokratiko nga Eskuelaan ti Panagministro ken mangted met kadagiti palawag publiko iti lokal a kongregasion. Mabalin a maited met ti dadduma pay a pribilehio iti dadduma kadagiti ministerial nga ad-adipen no adda partikular a kasapulan ken no maragpatda dagiti pagannurotan iti dayta a trabaho.—Idiligyo iti 1 Pedro 4:10.”
17. Ania a kita ti lalaki ni Esteban, ket ania a salsaludsod ti patauden daytoy maipapan kadagiti ministerial nga ad-adipen?
17 Maysa kadagiti “pito a lallaki a naimbag ti damagda” idi panawen ti Biblia isu ni “Esteban, lalaki a napno iti pammati ken ti nasantuan nga espiritu.” (Aramid 6:5) Sakbay ti ipapatayna kas matalek a martir, ni Esteban nangted iti makatignay a palawag iti sanguanan ti Sanhedrin a Judio. Basaenyo ti salaysay, ket makumbinsirkayo nga isut’ naespirituan ti panagpampanunotna, maysa a naisangsangayan a saksi nga immawat ti panangiwanwan ti nasantuan nga espiritu ket situtulok a mangipaay iti biagna iti serbisio ni Jehova. (Aramid 6:8–7:60) No maysakay a ministerial nga adipen, ar-aramidenyo met laeng aya dagiti annongenyo iti kongregasion ken iti tay-ak ti ministerio kas sitatakneng a panangaramid ni Esteban iti rebbengenna ken ti pribilehiona a mangisao iti kinapudno?
Kasanot’ Pannakari Dagitoy?
18. Aniat’ maikuna maipapan ti trabaho dagiti adu a ministerial nga ad-adipen, ket aniat’ maipasiguro kadakuada?
18 Adu kadagiti ministerial nga ad-adipen ti mangipakpakita ti nasayaat nga ulidan iti Nakristianuan a panagbiag, nga ay-aywananda a naimbag dagiti rebbengenda iti kongregasion, ken mangipakpakitada iti nasayaat a a panangidaulo iti tay-ak ti ministerio. Ti trabahoda apresiaren unay dagiti padada a managdaydayaw ket saanto a di magunggonaan babaen ken Jehova, kas naipasiguro kadagiti Hebreo a Kristiano: “Ta saan a nakillo ti Dios tapno lipatenna ti aramidyo ken ti ayat nga impakitayo iti naganna, gapu iti panangtulongyo kadagiti sasanto ken iti panangtulongyo pay ita kadakuada.”—Hebreo 6:10.
19. (a) Ania a salsaludsod ti mabalin nga iyimtuod ti ministerial nga adipen iti bagina met laeng? (b) Apay a makagunggona a pagsasaritaan dagiti parikut a laklak-amen ti sumagmamano a ministerial nga ad-adipen?
19 Nupay kasta, nasayaat no tunggal maysa a ministerial nga adipen saludsodenna ti bagina: Kasanot’ pannakaikarik kadagiti Nainkasuratan a pagannurotan? Makatultulongak met laeng aya iti panagkaykaysa ti kongregasion? Ay-aywanak met laeng aya dagiti naituding nga annongek iti umiso ken nagaget a pamay-an? Mangipakpakitaak met laeng aya ti nasayaat nga ulidan iti tay-ak ti ministerio? Dadduma kadagiti ministerial nga ad-adipen ti addaan iti parikut a mangsabet kadagiti makalikaguman kadakuada. Gapuna pagsasaritaantayo ti sumagmamano kadagitoy a parikut. Ti panangaramid iti dayta ti makatulong iti tunggal maysa a ministerial nga adipen a “suoten ti tunggal maysa ti aramidna met laeng.” (Galacia 6:4) Dayta met ti rebbeng a mangparang-ay ti panangipateg dagiti dadduma iti ar-aramid ti ayat nga ipapaay dagitoy a lallaki nga agserserbi iti makagunggona a panggep kadagiti Saksi ni Jehova ken pudno a bendision iti ili ti Dios.
Mailawlawagyo Aya?
◻ Kasano a dagiti ministerial nga ad-adipen bendisionda iti ili ni Jehova?
◻ Kasano a ti amin-tiempo a ministerio makatulong kadagiti kakabsat a lallaki nga agtarigagay kas ministerial nga ad-adipen?
◻ Apay a dagiti ministerial nga ad-adipen masapul “agpadpada a praktikal ken naespirituan panagpampanunotda”?
◻ Kasano a ni matalek nga Esteban nasayaat nga ulidan para kadagiti ministerial nga ad-adipen itatta?