Maysa a Misterio​—Sino ti Balangkantis a Babilonia a Dakkel?

MAYSA a babai, maysa a nagdakes a balangkantis, a nangimpluensia iti biag dagiti binilbilion a tattao, ti napapatay, nadadael. Ngem daytoy saan a maysa laeng a gagangay a panangpapatay. Ania ti mangiduma iti dayta? Ti manangpapatay ket maysa nga animal, maysa nga atap nga animal a manglamolamo kenkuana, mangkaan iti lasagna, ket puoranna dagiti teddana. Sino daytoy dakkel ti impluensiana a babai? Apay nga isut’ atakaren ti atap nga animal? Ania ti inaramidna a maitutop itoy naranggas a panungpalan?a​—Apocalipsis 17:16, 17.

Daytoy mabalin a pakaibatayan iti mamagpanunot a misterio nga estoria​—ngem saan a paspasamak dayta a maipaay iti maysa a nobela. Dayta ket maysa a historikal a kinapudno nga agdama a matungtungpalen. Ket napateg dayta kadakayo agsipud ta daytoy a nagdakes a balangkantis mabalin nga im-impluensiaannan ti panagbiagyo. Kasta met, makikaduakayo man kenkuana wenno umadayokayo kenkuana kaipapanannanto ti pagdumaan ti biag ken patay. Gapuna isut’ siasino?

Ti Misterio dagiti Kliente ti Babai

Daytoy a femme fatale, daytoy a nakababain a mananggargari, ket dineskribir ni Juan iti naimpadtuan a libro iti Biblia nga Apocalipsis, a sadiay mabasa: “Ket [ti anghel] impannak babaen iti espiritu iti maysa a let-ang. Ket nakitak idiay ti maysa a babai a nagsakay iti maysa nga animal a nalabaga, a napno kadagiti nagnagan a tabbaaw, nga addaan pito nga ulo ken sangapulo a sara. Ket daydi babai nagkawes iti purpura ken eskarlata, ket naarkosan kadagiti balitok ken batbato a napateg ken perperlas nga adda idi imana ti maysa a kopa a balitok a napno kadagiti makarimon, dagiti met laeng kinarugit ti pannakikamalalana. Ket idi mugingna naisurat ti maysa a nagan, palimed: ‘Ti Babilonia a Dakkel, ina dagiti balangkantis ken dagiti nakarimrimon ditoy daga.’”​—Apocalipsis 17:3-5.

Ita daytoy a “Babilonia a Dakkel” ket maysan a narigat a parmeken a babai, ta kunaen ti salaysay iti Apo 17 bersikulo 1 nga isut’ “nagtugaw iti rabaw dagiti adu a dandanum.” Ania ti kaipapanan daytoy? Inlawlawag ti anghel ti Dios ken ni Juan: “Dagiti dandanum a nakitam, idiay a nagtugawan ti balangkantis, isuda dagiti il-ili ken umariwekwek ken pagpagarian ken pagsasao.” (Apocalipsis 17:15) Awan duadua daytoy ket maysa a balangkantis a sangalubongan ti impluensiana. Ngem isut’ saan a gagangay a balangkantis. Isu “ti ina dagiti balangkantis,” ti pangulo iti institusion. No maipapan iti pannakiabig, isut’ agbilin. Ngem isut’ addaan met kadagiti naisangsangayan a kliente.

Impalgak ti anghel no sino dagitoy a kliente ti dakkel a balangkantis. Kasano ti panangilasinna kadakuada? Kunaenna a ti Babilonia a Dakkel ket isu daydiay “nakikamalalaan dagiti ar-ari ti daga, ket dagiti agnaed iti daga nabartekda iti arak ti pannakikamalalana.” (Apocalipsis 17:2) Daytoy ngarud ket makaawis a balangkantis a nasayaat ti pannakikaduana tapno maawisna dagiti napolitikaan nga agtuturay iti lubong, dagiti “ar-ari iti daga”! Gapuna isut’ siasino?

Kunaen ti anghel a ti naganna, maysa a palimed a nagan, “Babilonia a Dakkel.” Itan adtoy ti dua a pakabigbigan iti kinaisuna​—maysa isu dagiti an-anamonganna a kliente ket ti sabali isu ti naganna, Babilonia a Dakkel. Iti ania a konklusion ti pangiturongan dagidiay a pakabigbigan?

[Dagiti Footnote]