Naibutaktak ti Dakkel a Balangkantis

TI AGDAMA a sistema ti lubong iti sidong ti panangtengngel ni Satanas addaan kadagiti tallo a kangrunaan nga elemento nga iturturong “ti dios daytoy a lubong.” Dagitoy isu ti napolitikaan a panangituray, ti panangtengngel ken impluensia dagiti dadakkel a negosio, ken ti relihion. Bayat dagiti milenio iti historia, dagitoy tallo a banag ti kankanayon a pakabigbigan iti tunggal agturay a sistema. Asino kadagitoy a nabibileg a puersa ti isimbolo “ti ina dagiti balangkantis”?​—2 Corinto 4:3, 4, The Jerusalem Bible; Apocalipsis 12:9; 17:5.

Sigun iti sirmata ni Juan nga adda iti sidong daytoy a pagsasaritaan, dagiti agtuturay, “dagiti ar-ari iti daga,” situtulokda a nakikamalala kenkuana. (Apocalipsis 18:3) (Dagiti historikal a pammaneknek iti daytoy ket maiparangto kadagiti sumaganad a panid.) Gapuna, ti Babilonia a Dakkel saanna a mabalin nga isimbolo ti napolitikaan a panangituray iti sistema ti lubong.

Ti met ngay dadakkel a negosio a nakapatpateg ti pasetna iti ar-aramid ti tao itatta? Pudno a dayta ket maysa a nakabilbileg nga impluensia kadagiti adu a nasnasion ket, kaiyariganna, ikedkeddengna no sinonto ti nabaknang ken sinonto ti napanglaw. Mabalin kadi a daytoy ti Babilonia a Dakkel? Maysa nga anghel ti nangited iti napateg a pakabigbigan a mangsungbat itoy a saludsod ken Juan. Inyanunsiona ti makapasiddaaw a pasamak​—ti pannakarba ti dayaw ti Babilonia! Napukawna dagiti klientena ken dagiti kaayan-ayatna, a kellaat a nakasarak kenkuana a nakaap-aprang. Siasino pay, malaksid “kadagiti ar-ari iti daga,” ti nairaman kadagiti kankanayon a bisitana? Kuna ti anghel: “Ta gapu iti arak ti pungtot ti pannakikamalalana, narba dagiti isuamin a pagpagarian, ket dagiti ar-ari ti daga nakikamalalada kenkuana, ket dagiti agtagtagilako ditoy daga bimmaknangda gapu iti kinabuslon dagiti ragragsakna.” Wen, dagiti agtagtagilako iti lubong nagunggonaanda babaen ti panagtagilako ken pannakikuykuyog kenkuana ket bimmaknang iti “nabuslon a ragragsakna.” Gapuna dina mabalin nga isimbolo dagiti dadakkel a negosio iti sangalubongan.​—Apocalipsis 18:3.

Ngarud, babaen iti panangipuera, ti napolitikaan a panangituray ken ti panangtengngel ken impluensia dagiti dadakkel a negosio ket saandan a mapagpilian. Ania ti mabati kadatayo? Dayta ti masapul a paset iti pannakabalin a maitutop iti darum, “ta babaen iti espiritistiko nga ar-aramidmo maallilaw dagiti amin a nasnasion.” Dayta ti nabileg idi ngem agpukpukawen nga elemento a nangimpluensia iti kasta unay iti pampanunot ken tigtignay dagiti nasnasion nanipud pay idi kaaldawan ti kadaanan a Babilonia. Isu daydiay addaan ti “maysa a pagarian a mangituray kadagiti amin nga ar-ari iti daga”​—kayatna a sawen, ti ulbod a relihion!​—Apocalipsis 17:18; 18:23.

Wen, nupay no kasla makapakellaat kadagiti dadduma a napasnek iti relihion a tattao, ti Babilonia a Dakkel, ti ina dagiti balangkantis, ket maysa a simbolo iti sangalubongan nga imperio ti ulbod a relihion ni Satanas. Isut’ simbolo dagiti relihion iti lubong nga iti maysa a pamay-an wenno iti sabali nangikompromiso iti bagida kadagiti elemento ti napolitikaan ken pinansial a panangituray iti intero a historia.

Babilonia a Mananggargari iti Gubat

Maitunos iti naimpadtuan a sirmata, ti Babilonia a Dakkel ket maysa a dakkel a balangkantis a nangidaulo kadagiti nasnasion, il-ili, ken dagiti tribo kadagiti nadara a gubgubat, dagiti krusada, ken dagiti panangibales, a bendisionanna ida kadagiti sermon, nasantuan a danum, karkararag, ken dagiti napinget a patriotiko a palpalawag.a​—Apocalipsis 18:24.

Dagiti klerona, nangnangruna dagiti tsaplinna, ket situtulokda nga agbalin nga alikamen dagiti agtuturay iti panangukkon kadagiti adu a tattao kas soldado iti panangpapatay kadagiti dua a sangalubongan a gubgubat ken dagiti dadduma pay a kangrunaan a panagdadangadang. Dagiti Katoliko pinapatayda dagiti Katoliko, ken dagiti Protestante situtulokda a nangpapatay kadagiti Protestante, nga agarup 50 agingga iti 60 milion a biag ti napukaw kadagiti dua laeng a gubgubat.

Iti daytoy nalawlawagan a maika-20 a siglo, ti tawid ti relihion agtultuloy a pataudenna ti pungtot ken ipapatay​—saan laeng nga iti pagturayan iti Kakristianuan babaen iti Katoliko kontra iti Protestante a panaglalaban no di ket kasta met iti saan a Kristiano a lubong babaen kadagiti Islam kontra iti Judaismo, Hinduismo kontra Islam, Buddhismo kontra Hinduismo, Sikhismo kontra Hinduismo a panaglalaban, ken dadduma pay.

Kasta met, kankanayon a tarigagayan ti relihion ti mangipaay iti nabileg nga impluensia “kadagiti ar-ari iti daga,” iti panangikagumaanna a mangikeddeng kadagiti pagtungpalanda ken dagiti kasunoda. Usigentayo iti apagbiit ti sumagmamano a pangarigan.

[Dagiti Footnote]

[Ladawan iti panid 4]

Ania kadagitoy​—ti politika, dadakkel a negosio, wenno relihion​—ti inrepresentar ti “Babilonia a Dakkel”?