Turay ti Dios—Ti Kasasayaatan a Pamay-an
TI HISTORIA dagiti gobierno pagbalinenna a nabatad a di umisot’ panangwatwat ti imperpekto a tattao ti pannakabalin kadagiti dadduma a tattao. Kas kinuna ni Lord Acton ti Inglatera: “Ti pannakabalin adda tendensiana a mangpakillo ket ti naan-anay a pannakabalin isut’ naan-anay a mamagkillo.” Gapuna, kuna ti Biblia: “Ti maysa a tao addaan pannakabalin iti sabali a maipaay iti pagdaksanna.”—Eclesiastes 8:9.
Idi punganay, inikkan ni Jehova a Dios ti tao ti panangituray kadagiti an-animal ngem saan a kadagiti dadduma a tattao. Ti Dios kinunana iti umuna nga Anakna a pinarsuana kadagiti langlangit: “Aramidentayo koma ti tao iti ladawantayo, kas kaaspingtayo, ket iturayanda koma dagiti ik-ikan ti taaw ken dagiti tumatayab kadagiti langit ken dagiti an-animal ken ti amin a daga ken dagiti amin nga agkarkarayam nga aguy-uyas iti rabaw ti daga.” (Genesis 1:26) Ti Namarsua ti tao isut’ Agturayna. Ngarud, kasano a nagbalbaliw dayta?
Idi immalsa ti tao idiay minuyongan ti Eden, linaksidna ti Dios kas Agturayna ket intultuloyna nga inaramid dayta nanipud idin. (Genesis, kapitulo 3) Nagbatad daytoy iti kadaanan nga Israel, maysa a nasion a pinili ti Dios kas kukuana. Idi dimmawat dagiti Israelita ti natauan nga ari, imbaga ni Jehova ken mammadtona a Samuel: “Isuda didaka inumsi, no di ket siak ti inumsida tapno saanak koma nga agari kadakuada.”—1 Samuel 8:7.
Ti panagturay ti Dios kadagiti Israelita ket naasi. Babaen ken Moises a pannakabagina, inikkan ni Jehova ida kadagiti kodigo ti linlinteg a nangipakitat’ naasi a konsiderasion iti pagimbaganda. Daytat’ nangsalaknib kadakuada manipud adu a saksakit ken nangipakitat’ asi kadagiti natataenganen, dagiti balo a babbai, ken ul-ulila. Kinalikaguman ti Linteg ti panagraem iti sansanikua ti dadduma ken kinamapagpiaran iti panagnegosio. Kinondenar dayta ti panangidumduma, ulbod a panagsaksi, ken panangpasuksok. Talaga a ti panagturay ti Dios ket addaan hustisia ken nalinteg.
Inkari ni Jehova ti panangiturayna saan laeng nga iti Israel no di ket iti intero a sangatauan. Ipanawnanto manipud kadagiti managbasol a tattao ti pannakabalin nga agturay kadagiti dadduma tattao ket itednanto dayta iti Anakna a bugbugtong. Iti panangipadtona iti daytoy, kuna ti Dios idiay padto ni Ezequiel: “Daytoy awanto metten agingga iti umay daydiay legal nga akinrebbeng ket isu ti pangtedakto.”—Ezequiel 21:27.
Ken Jesu-Kristo ti nangtedan ti Dios ti legal a karbengan a mangituray ti sangatauan kas pannakabagi iti kinasoberano ni Jehova. Gapu ta ti Pagarian ti Dios baeten ken Kristo ket isut’ kasayaatan a pamay-an a pangituray iti intero a sangatauan, insuro ni Jesus dagiti agdengdengngeg kenkuana nga ikararag dayta: “Dakayo, ngarud, agkararagkayo a kastoy,” kuna ni Kristo: “Amami nga addaka sadi langit, madaydayaw koma ti naganmo. Umay koma ti pagariam. Maaramid koma ti pagayatam kas sadi langit, kasta met ditoy daga.”—Mateo 6:9, 10.
Babaen ti wagas a panangtrato ni Jesus kadagiti tattao, impakitana no ania a kita ti agturay ti pagbalinannanto. Pudno a ni Kristo ket mannakipagrikna, ta “idi nakitana dagiti adu unay a tattao simnek ti asina kadakuada, gapu ta nalidayda ken nawarawarada a kasda la karkarnero nga awan ti pastorda.” (Mateo 9:36) Impakita ni Jesus ti kinauneg ti ayatna kadagiti paspasurotna idi a kinunana: “Maysa a bilin a baro ti itdek kadakayo, tapno agayan-ayatkayo iti maysa ken maysa; kas iti panagayatko kadakayo, kasta met agayan-ayatkayo koma iti maysa ken maysa.” (Juan 13:34) Nawadwad ti panagayatna kadagiti tattao ta impaayna pay ti biagna kas subbot. Dayta a daton pinagbalinna a posible para kadagidiay mangawat iti dayta a mawayawayaan manipud iti basol, sakit, ken uray pay ken patay.—1 Juan 2:1, 2; Apocalipsis 21:1-4.
Iti panangipadtona no kasanot’ panagturay ti Dios baeten ken Jesu-Kristo babaen iti kinahustisia, kinalinteg, ken kinatalna, napaltiingan ni mammadto Isaias a mangisurat: “Ta nayanak ti maysa nga ubing kadatayo, maysa nga anak a lalaki ti naited kadatayo; ket ti panangituray maiparabawto iti abagana. Ket ti naganna magaladanto iti Nakaskasdaaw a Mamagbaga, Mannakabalin a Dios, Agnanayon nga Ama, Prinsipe ti Kappia. Ti idadakkel ti panangiturayna ken ti kappia awanto ti inggana, iti trono ni David ken iti pagarianna tapno bangonenna ken salimetmetanna babaen iti kinahustisia ken kinalinteg manipud ita ken iti panawen a di nakedngan. Ti regta ni Jehova dagiti buybuyot ti mangaramidto iti daytoy.”—Isaias 9:6, 7.
Dagiti naindagaan a pannakabagi ti turay ti Dios arigto dagiti lallaki a mangisarsarming itan kadagiti naayat a kualidad ni Jesus kas dagiti manangaywan iti pudno a kongregasion Kristiano. Saan a kas kadagiti nauyong a klero, dagitoy a lallaki ti mangipakpakita ti naayat a pannakaseknan iti arban, kas inaramid ni Jesu-Kristo. Maipapan kadagita a nadiosan a lallaki, insurat ni mammadto nga Isaias: “Adtoy! Maysa nga ari agarinto iti kinalinteg; ken dagiti prinsipe, agturayda kas prinsipe iti kinahustisia.” (Isaias 32:1) Dagita a pannakabagi ti kinaturay ti Dios serbiandanto met dagiti nadiosan nga intereses idiay baro a lubong.—Salmo 45:16.
Ti Dakkel a Panagbalbaliw Asidegen!
Sakbay a sublaten ti Pagarian ti Dios ti din masuppiat a panangituray iti sangatauan, masapul pay a maaramid ti dakkel a panagbalbaliw. Daytoy a panagbalbaliw ti mangyeg ti panagpatinggan dagiti nasional a pagbeddengan. Imbes a dagiti nagadu nga aglalaban a natauan a gobierno, addanto maymaysa a nalinteg a nailangitan a gobierno a mamagkaykaysa ti sangatauan kas maymaysa nga ili nga agnaed iti kinatalna. Iti panangipadtona iti daytoy, insurat ni mammadto Daniel: “Ket kadagiti al-aldaw dagita nga ar-ari ti Dios ti langit mamangonto iti maysa a pagarian a kaanoman dinto madadael. Ket ti panagturayna dinto maited iti sabali nga ili. Ngem burakennanto ken ibusennanto amin dagitoy a pagpagarian [dagiti natauan a gobierno], ket isu agtalinaedto iti agnanayon.”—Daniel 2:44.
Ti turay ti Dios ti kakaisuna a sungbat kadagiti problema ti gobierno a naipasango iti sangatauan itatta. Ti kasasaad a nakasarakan dagiti tattao ti bagbagida itatta ti mamagpeggad ti mismo a biagda! Ket awan ti natauan a solusion nga epektibo. Ngarud, nainsiriban, no agimdeng iti solusion ti Dios ket kumita a sitatalek iti tiempo a din mabayag inton dagiti nalinteg panagpuspusona a tattao agrag-odanto iti sidong ti di makariten ken bendito a panagturay ti Dios.
[Ladawan iti panid 6]
“Maysa nga ari agarinto iti kinalinteg”