Laglagipenyo ti Naindaklan a Namarsuayo iti Kina-agtutuboyo

“DI KONTENTO nga Agtutubo: Maysa a Kinapudno iti Internasional a Panagbiag.” Kastat’ mabasa a paulo ti maysa nga artikulo idiay The Star sadi Johannesburg, Sud Africa. Ti sasao iti artikulo mabasa: “Gapu iti dakkel a populasion dagiti agtutubo a naipasango itan kadagiti limitado nga oportunidad nga ad-adda manen a pinabassit ti sangalubongan a kinarigat, ti di pannakapnek dagiti agtutubo kadagiti bumbumsog a siudad ket nagbalinen a nakadkadlaw a kinapudno iti internasional a panagbiag. Kadagiti panagderraaw idiay Miami, idiay San Salvador, idiay Managua, idiay Teheran ken idiay Cape Town adda maymaysa a komon nga aspeto​—iti tunggal kaso ti umuna a mangpapatay ken mapapatay isuda dagiti agtutubo.”

Naipablaak dayta agarup sangapulo a tawen ti napalabasen, ket dagiti sirkumstansia ad-adda a dimmakesda nanipud idin. Apay a nagsaknap unay ti kasta a di pannakapnek kadagiti agtutubo? Ti dumakdakkel a kinakapuy daytoy a sistema dagiti bambanag isut’ piho a maysa a makagapu. Ti kinaawan-panggedan nakadanonen ti aglablabes a kinasaknapna. Ken gapu ti napartak a pannakadaddadael ti panagbiag ti pamilia, ania a seguridad ti adda nga agpaay kadagiti agtutubo? Di pakasdaawan a dadduma kadakuada ti mangbatikos iti lubong a didan matngelan. Saan kadi a daytoy ket gapu ta kurangdat’ sigurado a namnama a mabalinda a pangiyangklaan kadagiti biagda?

Mabalin a ti maysa namnamaenna dagiti relihion ti lubong a mangipaay ti kasta a namnama. Kaskasdi, insurat ti maysa nga agtutubo: “Mariribukanak. . . . Adut’ gagayyemko, a naikameng kadagiti adu a nagduduma a relihion, ket kasda la kaniak met laeng. Talaga a mariribukanak unay a diak ammo no asino ti patiek. Pangngaasiyo, maikkandak aya ti pammagbaga?” Ania a pammagbaga ti maipaayyo iti kasta nga agtutubo?

Dagiti agtutubo a nasinged iti Sao ti Dios ken iti pudno a kongregasion Kristiano maispalda kadagita a kinagulo ken sensennaay. Yantangay adu kadagiti agtutubo awanandat’ sigurado a namnama iti masanguanan, dagiti agtutubo a Kristiano agtalekda ken Jehova a Dios ken iti sigurado a Saona a kinapudno. Gapuna, addaandat’ panginanamaan a makalasat iti panungpalan daytoy a sistema dagiti bambanag a namnamaendat’ biag nga agnanayon. Kalpasan dayta, iti daga a nadalusanen iti kinaulpit ken kinadakes, buklendanto ti paset ti pundasion ti “baro a daga” a sadiay ti “pagtaengan ti kinalinteg.” (2 Pedro 3:13; Juan 17:3) Agpaay iti kaitungpalan ti kasta a nadayag a panginanamaan, mabagbagaan dagiti agtutubo a ‘laglagipenda ti Naindaklan a Namarsuada.’ (Eclesiastes 12:1) Ken ti kasayaatan a patigmaan a maited ket agbalinda ken agtalinaedda a nasken a paset ti kongregasion Kristiano. Apay daytoy?

Kaaduan kadakayo nga agtutubo iti kongregasion Kristiano ket addaan manamati a nagannak nga agayat ken maseknan kadakayo. Tunggal kongregasion addaan kadagiti nadutokan a papanglakayenna, nga interesado unay iti naespirituan a pagimbaganyo. Ti kasta a tulong ken panagayat ket saan koma a tagtagibassiten. Ti kinapudno manipud Sao ti Dios, a kakuyognat’ teokratiko a pannakaiwanwan, mangted talged kadakayo, wayawaya manipud pannakapaay, ken ti sigurado a namnama agpaay iti masanguanan. Amin daytoy ti tumulong kadakayo a ‘mangsalimetmet ti pammati ken naimbag a konsiensia’ ken kumpet iti namnama nga arignat’ sinipete a mangatipat’ pannakarba ti maysa a barangay kadagiti nadawel a baybay.​—1 Timoteo 1:18, 19; idiligyo ti Hebreo 6:19.

Umadayokayo kadagiti Nailubongan a Pakagargarian

Agpapan pay kadagiti nagadu a naespirituan a bendision a tagtagiragsakenyo nga agtutubo iti kongregasion Kristiano, ti pagannayasan ti dadduma ket isut’ panangsurot kadagiti ar-aramid ti lubong. Kasla marikriknada nga agkurangda iti maysa a banag nga addaan pateg a masarakan laeng iti lubong iti ruar ti kongregasion Kristiano. Ngem pudno aya a ti lubong addaan aniaman a napateg a maitukon?

Kalpasan ti panangbusbosna ti nasurok a 40 años iti amin-tiempo a ministerio, kastoy ti panangikuna ti maysa kadagiti ad-adipen ti Dios iti daytoy a banag: “Ti kakaisuna a paset ti biagko a pagbabbabawiak ket isut’ paset a nagbiagak sakbay a naammuak ti kinapudno. Siak idi ti paset ti lubong. Agbibiagak laeng a maipaay iti lubong. Idi nagtengkon ti edad a 18 ket tinalliawko ti panagbiagko, nalasinko a daytat’ ongaong. Awan pulos kalatna, awan panggepna, iti biagko. Dagiti nailubongan a ragragsak a kunak a tagtagiragsakek ket kinapudnona nangyeg laeng ti pannakapaay ken ladingit. Rinugiak a sapulen ti kinapudno. Daytat’ nasarakak ket iti makatawen kamaudiananna rinugiakon ti amin-tiempo a serbisio. Awan kuartak, addaanak laeng ti makatawen a kapadasan iti kinapudno ken pammati a tulongannak ni Jehova. Itan no talliawek ti biagko, a dua a kakatlo ti binusbosko iti amin-tiempo a serbisio, aglaplapusanan ti ragsakko. Diak pulos kayat nga isukat ti nagun-odakon manipud panagserserbik ken Jehova iti aniaman nga ituktukon ti lubong.” Pudno unay, ikalkallangogan daytoy ti rikrikna dagiti rinibo a Saksi ni Jehova.

Gapuna apay nga iliwen dagiti bambanag a tinallikudanen dagiti dadduma a Kristiano? Apay a tarigagayan dagiti bambanag iti lubong nga agturturongen iti pannakadadael? (1 Juan 2:15-17) Kas maysa nga agtutubo, nalabit pagarupenyo a ti panagserbi ken Jehova ket nainget unay ket daytat’ pakaikapisanyo iti ragsak nga ituktukon ti lubong. Ngem nainsiriban kadi a matmatan dagiti dadakkelyo ken dagiti panglakayen kas nainget unay idinto a kayatdakayo a tulongan a mangparagsak ken Jehova ken magun-odan ti biag nga agnanayon?

No ti maysa nga ina a mangibaon ti anakna iti tiendaan palagipanna a sumardeng ken tumalliaw iti agsumbangir sakbay a bumallasiw iti lansangan, isu ayat’ ibilangyo a nainget unay? Imbes ketdi, saan kadi a siaayat a padpadasenna a salakniban ti anakna? Ket no ti anakna laksidenna ti pakdaar ket nadungpar iti kotse ket natay? Kaskasdi kadi a patienyo a ti ina ket nainget unay? Ay ket, mabalin a pagarupenyo a rebbeng koma a nangala ti dakdakkel pay a panagannad a mangsalaknib ti biag ti anakna! Umas-asping, dagiti palagip manipud Sao ti Dios ken ti organisasionna naitedda a siaayat, saan a kas kinainget no di ket agpaay a pakasalaknibantayo.

Ti panagdakkel iti Nakristianuan a pagtaengan ket di umdas a mamagbalin kadakayo a makaitakder kadagiti panangparigat daytoy a lubong. Kasapulanyo met ti makumbinsir a personal iti kinapudno ti Saot’ Dios. Ti kasta a personal a rikna ken ayat iti Namarsua buklenna ti pangibatayan ti panangidedikaryo ti biagyo iti Dios. Daytoy personal a rikna ket nasken met tapno mabalinyo nga idepensa ti pammatiyo iti sanguanan dagiti dadduma. (1 Pedro 3:15) Ti pannakaiwanwanyo iti Sao ti Dios isut’ pakaibatayan ti naballigi a panagbiag. (Josue 1:8; Salmo 119:9) Ngem agpaay iti panagballigi iti biag, kasapulanyo met ti nasayaat a panagsanay.

Panangted ti Espesipiko a Pannakasanay

Pudno unay, dakayo a nagannak a Kristiano maragsakankayo a makakita kadagiti annakyo a mangala ti natibker a takderda iti kinapudno ken makipagkaykaysa a kanayon kadakayo iti pudno a panagdaydayaw. Kangrunaan a responsabilidad ti ama a padakkelen dagiti annakda “iti disiplina ken panangiturong-panunot ni Jehova.” (Efeso 6:4) Ngem makakitakayo kadi kadagiti paset a mabalinyo a pangparang-ayan iti panangsanay kadakuada? Mangbusbusboskay kadi ti nawadwad a panawen a kadua dagiti annakyo? Agar-aramidkayo aya kadagiti bambanag kas maysa a pamilia? Ken tagtagiragsakenyo aya a sangsangkamaysa dagiti makaay-ayo a panaglinglingay?

Dikay liplipatan a ti panangipakitayo ti umiso nga ulidan ket napigsat’ epektona kadagiti annakyo. No kayatyo nga alaenda ti kinapudno a siseserioso, no kasta dayta met koma ti rebbeng a panangmatmatyo iti dayta. (3 Juan 2-4) Ken no kayatyo a mapatanorda ti nauneg a panangraem iti organisasion ni Jehova ken kadagiti panglakayen, no kasta rebbeng nga addaankay met a kanayon ti kasta a nasalun-at a kababalin.

Nupay ti panangsanay ti ubing isut’ kangrunaan nga annongen dagiti nagannak, adda met responsabilidad dagiti panglakayen kadagiti agtutubo nga adda iti kongregasion. Iti panangaywan ti arban ti Dios, kasapulan met dagiti manangaywan nga ipastoran dagiti kordero. (1 Pedro 5:1-3) Anian a nagsayaat nga ulidan ni Jehova iti nadungngo a panangaywan uray kadagiti babassit! (Isaias 40:11) Iti panangsurot ti ulidanna, dagiti katulongan a papastor a Kristiano tarigagayanda nga ipakita met ti nabara, naayat nga interes kadagiti agtutubo ket ipariknada nga isudat’ paset met ti kongregasion. Dadduma kadagiti agtutubo inyebkasdat’ tarigagayda a dagiti panglakayen ti makisao koma kadakuada nga ad-adda pay ken tulonganda ida iti tay-ak ti ministerio.

Ti panangsanay iti agtutubo ket kayatna a sawen ti panangted kenkuana ti ad-adda pay ngem basta pannakaammo ti Kasuratan. Manipud pusona, masapul a guraenna ti kagura ti Dios ken ayatenna ti ayaten met ti Dios. (Amos 5:14, 15) No kayatna a laglagipenna ti Namarsuana iti kina-agtutubona, kasapulan nga isut’ madisiplina a Nainkasuratan iti pannagnana iti dalan ni Jehova iti kinalinteg. (Proverbio 22:6; 2 Timoteo 3:16) Saan koma nga ikedked dagiti nagannak ti kasapulan a disiplina. Dadduma a nagannak a kayatda a taginayonen ti pannakigayyem dagiti annakda uray aniat’ mapaspasamak agannayasda a di mangikankano kadagiti basbasolda, a tagibassitenda ti kinaseriosona. Maim-impluensiaanda iti kinalukay ti lubong. Ngem ti maysa a naayat a naganak ket atentibo kadagiti report a ti anakna adda kinapiliona ket mangted ti umiso a disiplina kas kasapulan. (Proverbio 13:24) Pudno unay, asino a Kristiano a nagannak ti mangayat a mangsalimetmet iti pannakigayyem a naibatay iti kinalulok ngem mapukawna met ti anakna gaput’ kinakurang ti maitutop a disiplina?​—Proverbio 22:15.

Maaddaan iti Panggep ti Biag

Inaramidnatay ni Jehova a Dios tapno magun-odantayo ti kadadakkelan a rag-o ken pannakapnek manipud panagserbi kenkuana. Panunotenyo laengen ti nagdakkelan a tay-ak a mabalin a sukayan dagiti agtutubo. Agarup kagudua ti populasion ti lubong ket 20 años iti edad ken ub-ubing pay. Dagitoy nga agtutubo agkalkallautangda iti baybay ti sangatauan. Idinto ta awan namnamada, dakayo a Kristiano nga agtutubo ti addaan sigurado a namnama ken banag a napateg a mabalinyo nga iranud kadakuada. Babaen iti nasayaat a Nakristianuan a kababalin ken regtayo iti serbisio ni Jehova, mabalin a maatrakaryo ida iti kinapudno. Iti kasta matulonganyo ida iti dalan ti biag.

Ania pay a napatpateg a kalat ti maadda kadakayo ngem iti daydiay panangipaay ti biagyo nga agserbi ken Jehova a Dios? Napampanunotyon aya nga alaen ti makaispal-biag a trabaho a panangaskasaba iti amin-tempo? Nalabit mabalinyo ti makiraman iti panangisaknap ti naimbag a damag kas payunir, wenno mabalinyo ti agserbi iti maysa kadagiti sanga nga opisina ti Watch Tower Society a sadiay ti pakaar-aramidan dagiti literatura ti Biblia. Uray no dikay maaramidan dayta, dikay aya rebbeng a pagbalinen ti panagdayaw ken Jehova a pinakasentro ti biagyo, iti kasta malaglagipyo ti Naindaklan a Namarsuayo? Addaankay ti napateg a trabaho nga aramiden. Ngarud, agingga iti panungpalan daytoy a sistema dagiti bambanag, determinadokay koma a ‘maaddaan ti aduan nga aramid iti Apo.’​—1 Corinto 15:58.

Gapuna umadalentarkayo a Kristiano nga agtutubo. Laglagipenyo ti Naindaklan a Namarsuayo itan, ket ispalennakayto inton iyegnan ti panungpalan daytoy nadangkes a lubong. Wen, salaknibannakayto ni Jehova iti dayta a panawen ken bendisionannakayto iti awan inggana, a nadayag a masanguanan.