Ti Kaiyulogan Dagiti Damdamag
Dagiti Homoseksual—Makipadada iti Imatang ti Dios?
Idiay estado ti Australia a Queensland, dagiti ar-aramid a homoseksual—uray iti pribado babaen kadagiti naginnanamong nga agkadua—ket di legal. Iti nabiit pay, maysa a kadakkelan a grupo ti simbaan iti dayta nga estado binusorna a sipipinget dagita a linteg; kayatda a ti homoseksualidad maideklara a saan a kinakriminal.
Sigun iti pagiwarnak a The Courier-Mail, daytoy Joint Church Social Justice Group ket buklen dagiti miembro nga Anglicano, Romano Katoliko, Luterano, Baptist, ken Nagkaykaysa a simsimbaan ken Quakers (Sosiedad dagiti Gagayyem). Iti panagkunada a dagiti agdama a linlinteg kontra kadagiti homoseksual naibatayda iti kinakuneng ken panagil-ilem, kuna ti grupo: “Ti panangsuportarmi iti daytoy a takder ket naibatay iti pammati nga amin a tattao agpapadada iti imatang ti Dios ket rebbeng nga agpapadada met iti imatang ti linteg. Mamatikami a ti tao a homoseksual ket maysa met a tao kas ti heteroseksual a tao.”
Nupay agpayso nga amin a tattao naiyanakda a padapada, aniat’ panangmatmat ti Dios iti homoseksualidad? Iti Biblia, amin a homoseksual nga ar-aramid ket makondenar a di natural ken maikari iti di pananganamong ti Dios, a mangiturong iti ipapatay. Pudno daytoy saan laeng nga iti kadaanan nga Israel no di ket uray kadagiti panawen Kristiano. (Levitico 18:22; Roma 1:26, 27) Ti pannakailunodna ket naglawag ken saannan a kasapulan ti panangipatarus: “Uray dagiti mannakiabig, . . . uray dagiti lallaki a maipapaay kadagiti di natural a panggep, wenno lallaki a makidenna iti padada a lallaki . . . saandanto a tawiden ti pagarian ti Dios.”—1 Corinto 6:9, 10.
Imbes nga idawat a pagbalinen a saan a kinakriminal ti homoseksualidad, igunamgunam dagiti Kristiano kadagidiay naadipen itoy makaibabain iti Dios nga aramid a lumapsutda koma iti dayta babaen iti panagturongda iti Sao ti Dios ti kinapudno.
Dagiti Risgo iti Dara Agtultuloy
Impalgak ti nabiit pay nga imbestigasion a ginasgasut a panagkamali ti inar-aramid ti American Red Cross iti panangtaming kadagiti kontaminado a dara. Ngangngani kagudua kadagiti 12 milion ingganat’ 15 milion a units ti dara a nausar idiay Estados Unidos ti kada tawen ket ipapaay ti American Red Cross. No adda aniaman a units ti dara a mairuar a masukalanda a kontaminado, ti FDA (Food and Drug Administration), maysa nga ahensia ti pederal a gobierno, ket mapakaammuan. Nupay kasta, kuna ti The New York Times a kunaen ti pederal nga inspektor a masansan saan nga ar-aramiden ti Red Cross daytoy. Kunana a ti panangsukimat iti rekordda ipalgakna nga adda 380 a pasamak a ti di umiso a panangtaming ti kontaminado a dara di pulos naipakpakaammo iti gobierno. Mainayon pay, kadagiti 228 a kaso ti AIDS a mabalin a pinartuat dagiti panangiyalison ti dara, nasukalan ti inspektor a ti Red Cross nakaireport laeng ti 4 iti FDA.
Nupay adu ti kaskasdi a mangmatmat iti dayta kas makaispal ti biag, ti naiyalison a dara ket responsable iti ipapatay dagiti rinibribo kada tawen. Ngem, dagiti pudno a managdaydayaw ti Dios, iti panagtulnogda iti linlintegna maipapan iti dara, masalsalaknibanda met manipud kadagiti peggad ti panangiyalison. Imbilin ti Dios: “Dikanto mangan iti dara; ibukbukmonto a kas danum iti daga . . . tapno agbalinka a naimbag ken kadagiti annakmo a sumunonto kenka, no aramidemto ti nalinteg.”—Deuteronomio 12:23-25, New International Version.
Ti Papa iti Serbisio Militar
Iti napan a tawen nakitaripnong ti papa kadagiti nasurok ngem 7,000 a kadete militar idiay garison ti Roma a Cecchignola. Iti dayta a kanito uppat nga agtutubo nga opisial a nangirepresentar ti garison nagsaludsodda iti papa no ti serbisio militar ket maitunos iti Nakristianuan a konsiensia. Iti espesipiko, sigun iti pagiwarnak ti Siudad Vaticana a L’Osservatore Romano, insaludsodda: “Mabalin kadi ti maysa nga agbalin a matalek a Kristiano ken, maigiddato iti dayta, maysa met a matalek a soldado?” Kas sungbat kuna ti papa: “Awan ti dakkel a pakarigatan wenno kina-imposible a pagkaykaysaen ti Nakristianuan a propesion iti serbisio militar. No matmatantayo ti maud-udi a sipopositibo, daytat’ mabalin a makita a nakapimpintas, maikari ken nagsayaat a banag.”
Ngem, ti kadi kasta a panangmatmat, maitunos iti neutralidad a sinalimetmetan dagiti immuna a Kristiano? Iti librona nga An Historian’s Approach to Religion, insitar ni Arnold Toynbee ti kaso ni Maximilianus, maysa a martir idi maikatlo a siglo nga, idi binutbutengda iti ipapatay babaen iti korte a Romano gaput’ panagkitakitna a mailista iti militaria, kunana: “Saanak nga agserbi. Putolenyo man ti ulok, ngem saanak nga agserbi kadagiti pannakabalin Daytoy a Lubong; agserbiak iti Diosko.” Apay, nga uray iti sango ti piho nga ipapatay, nagmadi a makiraman iti serbisio militar? Agsipud ta imbilangna a dagiti pudno a paspasurot ni Jesus “saanda a paset ti lubong” kas ken Jesus saan a paset ti lubong. Mainayon pay, imbilangna a ti pannakidangadang Kristiano ket naespirituan, maitunos iti sasao ni apostol Pablo a: “Ta uray no magmagnakami iti lasag, saankam a makibakal kas iti lasag. Ta dagiti igam ti pannakidangadangmi saanda a naglasag.”—Juan 17:16; 2 Corinto 10:3, 4.