“Panagtakder a Sititibker kas Maymaysa nga Arban” Idiay Chad
Kas dagiti padada a Kristiano iti intero a lubong, apresiaren dagiti Saksi ni Jehova idiay Chad dagiti tinawen nga asamblea a maiyur-urnos a maipaay iti naespirituan a pakapabilganda. Adtoy ti salaysay ti maysa a panagdaliasat iti serie dagiti espesial nga aldaw ti asamblea a naangay idiay umabagatan a paset daytoy a pagilian a nasurong, iti makintengnga nga Africa.
Gapu kadagiti rigat iti distansia ken iti panagbiahe, masansan a maang-angay dagiti asamblea idiay Chad kadagiti babassit a grupo, a ti aldaw maikeddeng babaen iti panniempona. Manipud Hunio ingganat’ Setiembre, ti panawen a matutudo pagbalinenna a narigat ti panagbiahe ken iti dadduma a lugar imposible. Dagiti espesial nga aldaw ti asamblea maangayda kalpasan ti panaglabasen dagiti napigsa a tudtudo. Ti ngudo-ti-tawen a piesta opisial kumbinienteda a maipaay kadagiti daddadakkel a kumbension distrito. Ken sakbay a mangrugi manen ti tudtudo iti Hunio, maiparang dagiti dua-aldaw nga asamblea sirkito.
MAYSA idi a napudot ken nakadagdagaang a malem ti Domingo. Ti Kingdom Hall idiay N’Djamena, kabisera ti Chad, napunno kadagiti 184 a tattao. Agpapan pay kinabarana, naipamaysa ti atensionda iti kangrunaan a palawag, “Panagtakder a Sititibker iti Maymaysa nga Espiritu.” Iti dayta nga agsapa maragsakanda a nakaimatang ti tallo a tattao a nangisimbolo ti dedikasionda ken Jehova a Dios babaen iti bautismo ti danum. Daytoy ti umuna kadagiti innem nga espesial nga aldaw ti asamblea a pribilehiok a nagserbian kadua ti maysa a lokal nga agdaldaliasat a manangaywan.
Ti tema ti serie a, “Panagtakder a Sititibker kas Maymaysa nga Arban,” nangnangruna nga inapresiar dagiti 267 a Saksi idiay Chad. Aggigianda ti adayo manipud kadagiti padada a Kristiano iti dadduma a dagdaga. Kaskasdi, ti panangawatda ti isu met laeng a naespirituan a taraon ken ti pannakatartaripatoda iti isu met laeng a pamay-an ti nangparegta kadakuada nga agtultuloy iti trabaho a sangsangkamaysa kadagiti kakabsatda iti intero a lubong. Ti praktikal a balakad iti daytoy a programa pinabilegna ida nga agtakder a sititibker maibusor iti nasikap nga impluensia ti lubong ni Satanas ken kadagiti angin ti pannakaidadanes wenno ibubusor.
Idiay N’Djamena
Ti umuna a kongregasion dagiti Saksi ni Jehova idiay Chad ket nabuangay idiay N’Djamena idi 1964. Itan addaanen ti nasurok a 90 nga agibumbunannag ti Pagarian ti naimbag a damag. Makaparagsak a makita dagiti agdengdengngeg ken makita ti adu nga agserserbin a simamatalek nanipud pay kadagiti immuna nga al-aldaw ti trabaho idiay Chad. Maysa a kabsat addaan tallo nga assawa idi damo a maammuanna ti kinapudno ti Biblia. Di nagbayag nakitana ti pannakasapul a mangitunos ti biagna kadagiti pagannurotan ti Biblia. Inkasarna a legal ti umuna nga asawana ken simminan kadagiti dadduma, nupay nangaramid met ti urnos a panangtaripato kadakuada. Isut’ nabautisaran idi 1973 ken isut’ aktibo iti trabaho nanipud idin.
Maysa a panglakayen a nakipaset iti programa naglasat iti nakaro a suot ti pammati. Idi 1975 ti gobierno impilitna idi ti pannakiraman kadagiti kustombre a naibatay iti panagdayaw kadagiti natay; asinoman a madi nga agtungpal ket mapapatay. Idi nagtakder a sititibker ti kabsat ket saanna nga ikompromiso ti pammatina, isut’ sinapsapulen dagiti agtuturay. Ti laeng panagbalbaliw ti gobierno iti dayta nainget a tiempo ti nakaispal kenkuana.
Iti Dalan nga Agturong Idiay Pala
Kalpasan ti N’Djamena, nangrugi ti panagbiahe nga agpaabagatan nga agserbi kadagiti natda pay a lima nga asamblea. Masansan a pagpagnaenmi metten dayta a dalan idi ngem iti laeng kalgaw. Itan, iti arinunos ti Setiembre iti panagpatinggan ti panawen a panagtutudona, isuamin ket nakaberberde ken nalasbang. Nakaay-ayat ti panagbiahe iti kasta a panawen. Linabasanmi dagiti agsasaruno a taltalon ti millet. Dagiti dawa kadagiti nangangato a mula a nangtaraigid ti kalsada maluluomdan. Di agbayag maanidanton, maibilag, ket maideposito kadagiti kasla imbudo a daga a sarusar a nataratar kadagiti aw-away. Ti millet isut’ kangrunaan a taraon kadagiti kaaduan a taga Chad. Daytat’ mabayo kadagiti dadakkel a pagtaltagan babaen ti al-o a masansan nataytayag ngem ti tao nga agus-usar iti dayta. Kalpasanna mailaok ti arena iti agburburek a danum ket pagbalinen a bola-bola tapno kanen nga addaan sarsa manipud okra wenno mani a pagisawsawan.
Nakaad-adu ti nakitami a taltalon dagiti kapas bayat panagdaliasatmi nga agpaabagatan. Gapu ta ti daga ket plastado iti daytoy a paset ti pagilian, dagiti agsabsabong a kataltalonan kaslada dumanon agingga iti nagsabatan ti daga ken langit. Din agbayag dagiti intero a pamilia addadanton kadagiti kataltalonan nga agpurpuros kadagiti kapas babaen iti imada. Ti kapas isut’ kadadakkelan a panguartaan nga apit ti Chad, 133,000 toneladas ti naapit idi 1988. Iti mumalemen, lumablabaskamin iti Danaw Léré. Ditoy ti pagilian ket katurturodan ken nagpintas ti buyana, nangnangruna iti daytoy a tiempo ti tawen. Iti kaadda sadiay iti umiso a tiempo, nakagatangkami kadagiti kattiliw a karpa a naiprito idiay mismon igid ti dalan. Daytat’ pannangan a pagpannakkel nga idasar ti asinoman a manangsangaili.
Maysa a banag a mamagbalin a narigat ti panagdaliasat bayat iti daytoy a tiempo a ta no agtudo, mabangenan dagiti kalsada tapno pasardengen ti panaglasat ti luglugan. Apay? Tapno mapreserbar ti kalsada. Gapuna nagkullayaw pay ti puspusomi idi makitami ti langit iti masanguananmi a bigla a simmipnget kas tinta. Talaga a saanmi nga im-imasen ti agkampo iti katudtuduan idiay igid ti dalan. Ngem nangnangruna pay, maladawkamin iti sumaganad nga espesial nga aldaw ti asambleami. Makaparagsak ta, ti kapipigsaan a paset daytoy malemen a tudo nalisianna ti kalsada. Nupay no naguraykami bassit kadagiti sumagmamano a bangen, iti dayta a rabii nakagtengkami met laeng a natalged idiay Pala, maysa nga ili nga agarup 32,000 ti tattaona. Anian a panangabrasa ti agur-uray kadakami! Ti awan bulanna a langit kalpasan ti tudo nangted kadakami ti nakaskasdaaw a buya dagiti bitbituen ken iti Milky Way, ti makapakellaat a buya a di makitkita ti kaaduan kadagiti agnanaed kadagiti siudad. Impalagip dayta kadakami ti rason no apay agtakderkami a sititibker—tapno idayaw ti Naindaklan a Namarsua iti nakaskasdaaw nga uniberso.
Dua a babassit a kongregasion ken maysa a naiputputong a grupo ti nagtataripnong idiay Pala. Tallo nga agtutubo a lallaki a kakabsat nagnagnada ti nasurok 100 kilometros iti daytoy nga asamblea. Yantangay dagiti asamblea iti abagatan babassitda ken sumagmamano laeng dagiti panglakayen, dagiti paset ti programa nairekordda idiay asamblea ti N’Djamena sa naipatokar kadakuada. Ipasiguro daytoy ti nangatot’ kualidadna a programa uray iti bassit a bilang dagiti timmabuno. Maragsakankami a maaddaan maysa a kandidato iti bautismo.
Ti Naregta a Grupo Idiay Kélo
Sumaganad, adda ababa a biahe nga agturong Kélo, a sadiay 194 ti dimmar-ay iti programa iti Domingo. Adu a pamilia nga addaan babassit nga annak nagnagnada iti 30 kilometros tapno tumabuno. Dua a kabbaro a nagdedikar a tattao ti nabautisaran. Bayat ti kalgaw, masansan a problema ti bautismo no ti asamblea ket saan a maangay iti asideg ti karayan; gapu itoy, sumagmamano a tattao ti mabautisaran iti bariles. Ngem ti kaaddami sadiay iti ungto ti panagtutudona ti namagbalin kadagiti bambanag a nalaklaka. Nupay kasta, nasken ti panagmaneho iti nasurok a 20 kilometro iti maiyanatup a lugar.
Maysa kadagiti kandidato ti bautismo ket maysa nga agtutubo a babai a nasuot unay ti pammatina. Ti pamiliana ti nangitulagen kenkuana a maiyasawa iti maysa a lalaki a saan nga intersado a makipagadal ti Biblia. Mainayon pay, kaykayatna a mapagkaykaysada babaen iti ugali ti tribo imbes a babaen iti legal a panagasawa. Gapu ta ti lalaki mayat nga agbayad ti dakkel a sab-ong, ti pamiliana ti mangpilpilit unay kenkuana. Kinasapulan pay ti iyaakarna iti sabali a lugar iti apagbiit tapno maliklikanna ti di nainkasuratan a panagasawa a kayat ti pamiliana. Isut’ nagtakder a sititibker kadagitoy amin ket isut’ rimmang-ay. Nanipud iti bautismona, simmardeng met laengen ti ibubusor ti pamilia. Agyamankam ken Jehova nga addaankami kadagiti matalek a tattao iti tengngami.
Dagiti kakabsat ditoy addaanda pay dadduma a rason a pagyamanan ken Jehova. Ti Chad nagsagaba ti nasaem a guerra sibil ket kalpasanna, idi 1984, maysa a nakaro a bisin. Malaglagip pay ti maysa a lokal a panglakayen a naminsan bayat ti bisin, kimmita iti aglawlaw ti Kingdom Hall ket pampanunotenna no addanto asinoman kadagidiay timmabuno ti sibibiagto pay kalpasan ti sumagmamano a bulan. Nupay kasta, ti organisasion ni Jehova nangipaay ti tulong babaen iti taraon, a nangpalag-an ti parikutda. Ti panangipategda iti dayta maipakpakita itan iti naregta a serbisioda. Adda napigsa nga espiritu ti panagpayunir idiay Kélo. Bayat ti Oktubre 1989, nasurok a kakatlo kadagiti agibumbunannag ti Pagarian ti nangiyurnos ti panagbiagda tapno mabalindat’ makiraman iti panangasaba iti amin a tiempo.
Ti kapadasanda iti bisin ti nangisuro kadakuada nga uray isuda masapul a managparaburda met. Idi napan a tawen maysa a panglakayen iti kongregasion ti bigla a nagsakit ket natay. Pinanawanna ti maysa a pamilia a siam ti annakna, a ti buridek sumagmamano laeng a bulanna. Ni baketna naipasango iti panangpilpilit ti pamilia a makiraman iti seremonia a panagladingit a ramanenna ti panagdayaw kadagiti natay. Dagiti kakabsat nangtedda iti kabsat a babai ti kasapulan a tulong, a gapu itoy naparmekna ti nakaro unay a panangpilpilit. Kalpasanna ti kongregasion nagtutunosda a nangibangon ti maysa a balay para kenkuana ken dagiti babassit nga annakna, a kanayonan ti panangtulong kenkuana iti namaterialan iti nadumaduma pay a pamay-an. Daytoy ti nangted nagsayaat a pammaneknek iti ili, a nangidemostra ti naragsak a resulta iti Kinakristiano nga addaan aramid.—Aramid 20:35.
Koumra, Doba, ken Bongor
Ti sumaganad a pagsardenganmi ket Koumra. Ti kalsada a graba ti namagbalin iti 300 kilometros a biahe a nalaklaka. Idiay dalan, limmabaskami iti siudad ti Moundou, maysa a sentro ti industria iti nasurok a sangagasut a ribo a tattao. Pitopulo ket maysa ti timmabuno idiay Koumra. Maysa nga agtutubo a kabsat a lalaki a di pulos nages-eskuela ti nagpalwag manipud plataporma. Inlawlawagna no kasano a ti programa ti panagadal nga agbasa ken agsurat idiay Kingdom Hall ti nakatulong kenkuana ken nangted kenkuana ti kasapulan a kompiansa. Itan isut’ mangidadaulon kadagiti panagadal ti Biblia kadagiti uppat a nagduduma a tattao.
Kalpasan ti espesial nga aldaw ti asamblea idiay Koumra, agsublikamin idiay N’Djamena, a ti sumaganad a pagsardenganmi ket idiay Doba a para iti maikalima nga asamblea iti serie. Dadduma kadagidiay tumabuno ti naabutan ti naladaw a tudo ket masapul a palabsenda ti rabii iti igid ti kalsada. Kaskasdi, tunggal maysa ti nakagteng iti umiso nga oras iti panangrugi ti programa idiay Doba. Limapulo ket maysa ti adda, ket maysa met a tao ti nangipresentar ti bagina iti bautismo.
Ti maudi a pagsardengan ket idiay Bongor. Isu daytoy ti lugar a pagmulmulaanda ti pagay, ket nagsiddaawkami iti kinapatag unay iti daga. Ti timmabuno idiay Bongor inyegna ti dagup amin dagiti nakangngeg ti programa idiay Chad iti 630. Ket agraman ti dua pay a nabautisaran, ti dagup a bilang dagiti tattao a nabautisaran ket siam.
Iti panagsublimin idiay N’Djamena kinumpletona ti biahe a ngangngani 2,000 kilometros. Maysa a ragsak ti nakilangen kadagiti ad-adipen ti Dios a nagtakder a sititibker iti adu a tawtawen, agraman pannakasarak kadagiti adu a kabbaro pay a rumangrang-ay metten. Ti regtada iti ministerio pudno a makaparegta. Bayat ti Oktubre 1989, adda baro a kangatuan a bilang a 267 nga agibumbunannag idiay Chad, maysa a 20-porsiento a panagrang-ay iti napalabas a tawen.
Nagkaykaysa Agpapan Pay Agaadddayo
Babaen iti panagdaliasat iti pagilian naapresiarmi nga anian a karit iti panangisakanp ti naimbag a damag iti daga a sadiay nasurok a 200 a pagsasao ti maus-usar. Nupay Pranses ken Arabiko dagiti opisial a pagsasao ti Chad, iti tunggal maysa kadagiti espesial nga aldaw ti asamblea, ti programa masapul a maipatarus manipud Pranses iti sabali a pagsasao. Uray no kasta, adu kadagidiay immay iti pagasambleaan saanda nga agsasao iti lenguahe dayta a rehion, gapuna kaskasdi a problema ti panangtulong kadakuada a mangtarus iti programa.
Kadagiti amin a luglugar a nabisita, dagiti kakabsattayo a lallaki ken babbai pinadagusdakami a sisasayaat. Dagiti taraon kaaduanna ket millet wenno bola-bola nga arina ti bagas ken pagsawsawan a sarsa kas nasaon nga immuna. No maminsan maysa a balasitang ti mangiyeg iti taraon iti bandehado a naabbongan ti naranga ti marisna a lupot. Susuonenna ti bandehado a sititimbeng iti ulona, ket dayawem ti lamuyotna.
Ti populasion ti umamianan a Chad ket kangrunaanna a Muslim; dagiti tattao iti abagatan kangrunaanna a Katoliko, Protestante, wenno animista. Salsalimetmetan ti gobierno ti linteg ti wayawaya ti relihion, ket maragsakankami a makapagtataripnong a siwayawaya.
Ti programa iti espesial nga aldaw ti asamblea natulonganna ti bassit a bunggoy dagiti Saksi idiay Chad a mangapresiar a numan pay adayoda sigun iti geograpia manipud kakabsatda manipud dadduma a paset ti lubong, isudat’ pudpudno a naikaykaysa kadakuada kas maysa nga arban. Daytat’ nangtulong kadakuada a ‘makapagtakder a sititibker iti maymaysa nga espiritu’ agpapan pay kadagiti rigat ken ibubusor a laklak-amenda.—Filipos 1:27.