Panangipudno ti Basbasol​—Adda Kadi Banag a Kamali?

“TI PANANGIPUDNO ket maysa a naespirituan a pannakadalus, maysa a wagas ti panangrugi manen, maysa a wagas ti panangpunas ti rugit tapno dalusan dayta. Kaykayatko ti mapan iti Panangipudno, nga ibagbagak dagiti basolko iti padi, tapno pakawanennak ket sarunuen dayta ti rikna ti pisikal a pannakabang-ar.” Kastat’ kuna ti maysa a napeklan a Katoliko.​—Bless Me, Father, for I Have Sinned.

Sigun ti New Catholic Encyclopedia, “iti laeng padi a ni Kristo intedna wenno impaannongna ti pannakabalin ti pananggalut ken panangwarwar, ti panangpakawan ken panangtaginayon” ti basbasol. Ti isu met laeng a reperensia kunana a ti regular a panangipudno “isublina ti kinasanto iti biag a pinukaw ti nadagsen a basol ken . . . tapno dalusan ti konsiensia ti maysa.” Kaskasdi, ti kasasaad ti moral kadagiti adu a dagdaga ipakitana a ti regular a panangipudno dina tignayen ti kaadduan a mangal-alagad iti dayta tapno “pagpanawan ti dakes, ket aramiden ti imbag.” (Salmo 34:14) Gapuna, adda kadi banag a kamali?

Basta Maysa Laeng a Seremonia?

Ti panangipudno mabalin a mangrugi kas maysa a gagangay a seremonia. Idiay Ireland, ti umuna a panangipudno umay a dagus sakbay ti umuna a Komunion. Ket pagsiddaawan kadi a ti maysa a pito-ti-tawenna nga ubing a babai ad-adda a mapanunotnat’ maipapan ti napintas, bassit a modelo ti bado ti nobia ngem ti maipapan iti ‘panangipasubli ti kinasanto ti biag a pinukaw ti nadagsen a basol’?

“Ti nangnangruna a nangparagsak kaniak isut’ bado, malaksid ti panangdawat kuarta manipud kakabagian,” inamin ni Ramona, a nangaramid ti umuna a panangipudnona idi isut’ pito. “Kadagiti amin a babbai nga am-ammok,” intuloyna, “awanandat’ rikna a naespirituan. Awan kadakami ti nangpanunot iti Dios uray iti dayta a kanito.”

Kinapudnona, ti panangpilit kadagiti ubbing a mangipudno ti basbasol a kankanayon ket mangiturong iti mekanikal a panangulit-ulit. “Basta inaramatko ti isu met laeng a sasao a paulit-ulit,” kuna ni Michael, a nangirugi met ti aramid a panangipudno idi agtawen-pito.

Dagiti komento ti dadduma a Katoliko a nakutar iti libro a Bless Me, Father, for I Have Sinned ipakitada a ti panangipudno ket bassit laeng ti pategna kadakuada iti naespirituan uray pay idi limmakaydan. “Ti panangipudno sursuruannaka nga agulbod, agsipud ta adda dadduma a bambanag a talaga a saanmo maibaga iti padi,” inamin ti maysa a tao. Ti kinakurang ti panagtutunos kadagiti papadi mabalin a magundawayan para ti bassit laeng a panangipudno. Dadduma nagsapulda ti “naimbag” a pagipudnuan tapno maalada ti balakad a kayatda a denggen. “Kalpasan ti panagsapsapulko iti tallo a bulan, nasarakak ti pagipudnuak. Makitak iti tunggal bulan, a rupan-rupa idiay kuarto a pakaikappiaan, ken nagsayaat unay,” kinuna ti maysa nga agtutubo a babai. “No nalaingka, makasarakka ti padi a tuleng ken awanen Ingles a maibagana no di laeng dagiti sasao a ‘tallo nga Ave Maria,’” kinunat’ sabali pay a Katoliko.

Nalawag, ngarud, adda banag a kamali iti panangipudno kas al-alagaden dagiti sumagmamano a tattao. Ngem ti Biblia ipakitana a kasapulan ti pangipudno ti basbasol, ta kunaenna: “Ti mangabbong kadagiti salungasingna dinto rumang-ay, ngem ti mangipudno ken mangbaybay-an kadakuada maragpatnanto ti kaasi.”​—Proverbio 28:13, The New Jerusalem Bible.

Kaipapananna kadi daytoy a ti maysa a Kristiano ipudnona amin dagiti basbasolna? No kasta, iti siasino? Ti sumaganand nga artikulo usigenna dagitoy a saludsod.