Aniat’ Pagimbagan ti Panagsarita Maipanggep iti Relihion?

SIGAGAGAR a segseggaan dagiti nagannak ti damo a panagsao ti maladagada. No mangngegda ti maulit-ulit a balikas, nalabit “Mama” wenno “Dada,” aglaplapusanan iti ragsak ti pusoda. Ipadamagda a dagus daytoy kadagiti gagayyem ken kaarrubada. Pudno a maysa a makaparagsak ken naimbag a damag ti damo a panagsao ti maladaga.

Agtignay ti maladaga no adda mangngeg, makita, ken maangotna. Siempre, nagduduma dagiti reaksion. Ngem no awan ti reaksion ti maysa a maladaga kadagitoy a pakatignayan kalpasan ti sumagmamano a tiempo, nainkalintegan laeng a madanagan dagiti nagannak amangan ta maapektaran ti panagdakkel ti anakda.

Kaay-ayo dagiti maladaga dagiti tattao nga am-ammoda. No ubbaen ti ina, kadawyanna a kasta unay ti isem ti maladaga. Ngem, mabalin nga agsangit no sagiden ti sumarsarungkar a kabagian, a dina pay ketdi kayat ti agpasakruy kenkuana. Saan a sumuko ti kaaduan a kakabagian a makapadas iti kastoy. Bayat a maam-ammo ida a nasaysayaat ti maladaga, maragsakanda no saanen nga agpaidam ti maladaga kadakuada ken umisemen.

Kasta met, adu a nataengan ti bumdeng a makisarita a sipapanayag iti maysa a tao a dida unay am-ammo maipanggep iti narelihiusuan a pammatida. Mabalin a saanda a maawatan no apay a kayat ti maysa a tao a dida am-ammo ti makisarita maipapan iti personal a banag​—ti relihion. Isut’ gapuna a liklikanda dagidiay makisarita maipapan iti Namarsua. Saanda pay ketdi a kayat a pagsaritaan ti naisigud a kababalin ti sangatauan, ti tarigagay nga agdayaw.

Kinapudnona, rumbeng nga interesadotayo a makasursuro maipapan iti Namarsua kadatayo, ket ti pannakisarita kadagiti sabsabali mabalin nga ikkannatay iti gundaway a makasursuro. Pudno dayta gapu ta nabayagen a nainaig ti Dios iti silulukat a komunikasion. Kitaentayo no kasano.

‘Dumngeg ken Agsursurokayo’

Ti immuna a tao a nakisaritaan ti Dios isu ni Adan idiay minuyongan ti Eden. Kaskasdi, idi nagbasol da Adan ken Eva, naglemmengda idi inawagan ida ti Dios, idi kayatna pay ti makisarita kadakuada. (Genesis 3:8-13) Nupay kasta, nailanad iti Biblia dagiti detalye maipapan kadagiti lallaki ken babbai a madadaan a makikomunikar iti Dios.

Nakikomunikar ti Dios ken Noe maipapan iti umas-asideg a pannakadadael ti nadangkes a lubong idi kaaldawanna, ket nagbalin ni Noe “a manangaskasaba iti kinalinteg.” (2 Pedro 2:5) Kas pannakangiwat ti Dios idi tiempona, saan laeng nga impakita ni Noe ti pammatina iti pannakilangen ti Dios iti tao no di pay ket impanayagna iti publiko nga isu ket adda iti dasig ni Jehova. Aniat’ napaliiw ni Noe a reaksion [dagiti tattao]? Nakalkaldaang, ‘di nangikankano [ti kaaduan kadagiti kasadaranna] agingga a ti layus immay ket inyanudna amin ida.’ (Mateo 24:37-39) Ngem makaparagsak para kadatayo, nangipangag ti pito a kameng ti pamilia ni Noe, tinungpalda dagiti bilin ti Dios, ket nakalasatda iti sangalubongan a Layus. Isuda ti nagtaudan dagiti amin a tao a sibibiag itatta.

Kamaudiananna, nakikomunikar ti Dios iti intero a nasion dagiti tattao, ti nagkauna nga Israel. Babaen ken Moises, inikkan ida ti Dios iti Sangapulo a Bilin ken iti agarup 600 a dadduma pay a bilbilin a rebbengda a tungpalen. Ninamnama ni Jehova a tungpalen dagiti Israelita amin dagitoy. Imbilin ni Moises nga iti tunggal pito a tawen, bayat ti tinawen a Piesta dagiti Abong-abong, rumbeng a maibasa a sipipigsa ti Linteg ti Dios. “Ummongemto dagiti tattao,” imbilinna, “dagiti lallaki ken babbai ken dagiti ubbing ken dagiti ganggannaet nga adda iti uneg dagiti ruruanganmo.” Iti ania a panggep? “Tapno mangngeganda ken masursuroda, ken agbutengda ken Jehova a Diosyo ket tungpalenda nga aramiden amin dagiti sasao daytoy a linteg.” Masapul a dumngeg ken agsursuro ti amin. Darepdepenyo ti rag-oda a nagsasarita maipapan iti nangngeganda!​—Deuteronomio 31:10-12.

Nasurok a lima a siglo kalpasanna, inorganisar ti ari ti Juda a ni Josafat dagiti prinsipe ken Levita iti maysa a kampania a panangisubli iti nadalus a panagdaydayaw ken Jehova. Sinursor dagitoy a lallaki dagiti amin a siudad ti Juda nga insursuroda dagiti linteg ni Jehova kadagiti agnaed. Babaen ti panangsalaysayna kadagitoy iti imatang dagiti tattao, imparangarang ti ari ti kinaturedna maipaay iti pudno a panagdaydayaw. No maipanggep kadagiti iturayanna, masapul a dumngeg ken agsursuroda.​—2 Cronicas 17:1-6, 9.

Panangsaksi Babaen ti Pannakisarita

Imbaon ti Dios ti mismo nga Anakna, ni Jesus, ditoy daga tapno agserbi a Pannakangiwatna. (Juan 1:14) Bayat nga im-imatangan dagiti tallo nga adalan ti panagbalbaliw ti langa ni Jesus iti sanguananda, nangngegda ti mismo a timek ti Dios a nagkuna: “Daytoy ti Anakko, ti dungdunguen, isu nga inanamongak; agimdengkayo kenkuana.” (Mateo 17:5) Sidadaanda a nagtungpal.

Kasta met, binilin ni Jesus dagiti apostolna nga iwaragawagda ti pangpanggep ti Dios kadagiti sabsabali. Ngem idi agarup innem a bulan laengen ti natda [a panangitungpalna] iti ministeriona ditoy daga, impakaammo ni Jesus a dakkel unay ti trabaho a panangikaskasaba iti Pagarian ti langlangit ta kasapulan ti ad-adu pay nga adalan. Insurona ti 70 kadakuada no kasanot’ pannakisarita kadagiti ganggannaet maipapan iti Pagarian ti Dios sana imbaon ida a mangisaknap iti dayta a mensahe kadagiti tattao. (Lucas 10:1, 2, 9) Di nagbayag kalpasan ti panagsublina iti Amana idiay langit, indagadag ni Jesus kadagiti pasurotna nga ipakaammoda daytoy a mensahe kadagiti sabsabali, a binilinna pay ida: “Inkayo ngarud ket mangaramidkayo kadagiti adalan a tattao iti isuamin a nasnasion, . . . nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19, 20) Iti intero a lubong, tungtungpalen dagiti pudno a Kristiano ita dayta a bilin babaen ti panangisarsaritada iti naimbag a damag ti Pagarian ti Dios kadagiti kaarrubada. Dagitoy a pannakisarita ikkanna ida iti gundaway a mangsaksi iti kinapudno maipapan iti Namarsua, ni Jehova.​—Mateo 24:14.

Natanang, Makapabileg a Saritaan

Kasanot’ pannakisarita dagiti adalan ni Jesus kadagiti sabsabali maipapan iti pammatida? Di rumbeng a rurodenda dagiti bumusbusor, wenno makisupiat kadagiti bumusbusor. Imbes ketdi, birokenda dagidiay umawat iti naimbag a damag sada idatag ti Nainkasuratan a pammaneknek a mangpasingked iti dayta. Siempre, palpaliiwen ti Dios ti reaksion dagidiay makasarita dagiti adalan ti Anakna, kas kinuna ni Jesus: “Ti umawat kadakayo awatennak met, ket ti umawat kaniak awatenna met ti nangibaon kaniak.” (Mateo 10:40) Anian a panangilaksid idi di inkankano ti kaaduan a kasadaran ni Jesus ti mensahena!

“Ti adipen ti Apo saan a kasapulan a makiapa,” imbalakad ni Kristiano nga apostol Pablo. Imbes ketdi, “kasapulan nga agbalin a naalumamay kadagiti isuamin, kualipikado a mangisuro, nga itultuloyna a medmedan ti bagina iti sidong ti dakes, nga isursurona a buyogen ti kinaalumamay dagidiay saan a sidadaan nga umannugot; bareng no ti Dios ipaayanna ida iti panagbabawi a mangiturong iti umiso a pannakaammo iti kinapudno.” (2 Timoteo 2:24, 25) Maysa a nasayaat a pagwadan ti pamay-an a panangipakaammo ni Pablo iti naimbag a damag kadagiti tattao idiay Atenas, Grecia. Nakirinnason kadagiti Judio iti sinagogada. Inaldaw nga adda iti tiendaan a makisarsarita “kadagidiay nairanrana nga adda.” Nupay awan duadua a kayat laeng ti dadduma ti dumngeg kadagiti baro a kapanunotan, direkta ken naasi ti panagsao ni Pablo. Impakaammona kadagiti agdengdengngeg kenkuana ti mensahe ti Dios, a nangidagadag iti panagbabawida. Umasping la unay ti reaksionda iti tignay dagiti tattao itatta. “Ti sumagmamano nangrugida a mangrabrabak, bayat a ti dadduma kinunada: ‘Dumngegkaminto kenka maipapan itoy iti sabali pay a tiempo.’” Saan nga impilit ni Pablo a paatiddogen pay ti saritaan. Idi naikaskasabanan ti mensahena, “rimmuar manipud iti tengngada.”​—Aramid 17:16-34.

Iti saan a nabayag, kinuna ni Pablo kadagiti kameng ti kongregasion Kristiano idiay Efeso a ‘dina minedmedan ti panangibaga ti aniaman kadagiti bambanag a makagunggona wenno uray ti panangisuro iti publiko ken iti binalay-balay.’ Mainayon pay, ‘naan-anay a nangipaay iti pangsaksi agpadpada kadagiti Judio ken kadagiti Griego maipapan ti panagbabawi iti Dios ken ti pammati ken Jesu-Kristo.’​—Aramid 20:20, 21.

Ipakita dagitoy Nainkasuratan a pagarigan no kasanot’ pannakisarita dagiti matalek nga adipen ti Dios iti tiempo ti Biblia maipanggep iti relihion. Kasta met itatta, sitatallugod dagiti Saksi ni Jehova a makisarita kadagiti kaarrubada maipapan iti relihion.

Dagiti Nabunga a Saritaan

‘Denggenyo ti Sao ti Dios.’ ‘Ipangagyo dagiti bilinna.’ Anian a masansan nga agparang ti kakasta a balakad iti Biblia! Mabalinyo nga ipangag dagitoy a bilin ti Biblia iti sumaruno a pannakisarita dagiti Saksi ni Jehova kadakayo. Imdenganyo ti mensahe ti Biblia nga idanonda kadakayo. Awan pakainaiganna iti politika daytoy a mensahe no di ket itantandudona ti nailangitan a gobierno ti Dios, ti Pagarianna. Daytoy ti pamay-an ti Dios a mangikkat kadagiti pakaigapuan dagiti susik iti kaaldawantayo. (Daniel 2:44) Kalpasanna, daytoy a turay ti Dios manipud langit pagbalinennanto ti intero a daga a paraiso kas daydi minuyongan ti Eden.

Adda maysa a dati a police detective a masansan idi nga agkedked a dumngeg no makisarita kenkuana dagiti Saksi ni Jehova maipapan iti Biblia. Ngem gaput’ ilalanlan ti krimen a nasken a sanguenna, isut’ naupay kadagiti pasamak iti biag. Isu nga imbagana iti sumaruno a Saksi a simmarungkar a kayatna nga usigen ti pammaneknek iti mensahe ti Biblia. Kanayonen a makisarita. Nupay agkaraális ti polis iti pagyanan, siraragsak a binirok dagiti Saksi iti tunggal baro a pagtaenganna tapno maituloy ti pannakisarsaritada kenkuana. Kamaudiananna, inamin ti opisial: “Adda laeng gayam iti Nasantuan a Kasuratan ti pammaneknek a birbirokek. No saandak nga inan-anusan a kinasarita dagiti Saksi, addaak pay la koma iti ruar a mangpampanunot iti kaipapanan ti biag. Naammuakon ti kinapudno, ket kayatko a busbosen dagiti nabatbati pay nga aldawko iti panangbirok kadagiti sabsabali nga agsapsapul met iti Dios kas kaniak idi.”

Pudpudno a kayat dagiti interesado a managdengngeg ti makasursuro iti ad-adu pay. Siuumiso a mangnamnamada kadagiti rason iti pammati a maidatag. (1 Pedro 3:15) No kasano nga agkarasaludsod ti bassit nga ubing kadagiti dadakkelna ken mangnamnama iti sungbatda, siuumiso a namnamaenyo a sungbatandakayo dagiti Saksi iti kapkapnekanyo. Mainanamayo a maragsakandanto nga agsubli ken makisarita pay kadakayo maipapan iti mensahe ti Biblia.

Nalabit adda bassit ammoyon maipapan iti Biblia. Mabalin a mabigbigyo a namnamaen ti Dios ti panangaramidyo iti sumagmamano a panagbalbaliw iti kabibiagyo. Dikay bumdeng a mangituloy kadagiti bambanag iti amakyo a dakkel a panagsakripisio ti kalikaguman ti Dios kadakayo. Mangyeg laeng dagita iti pudpudno a kinaragsak. Maapresiaryonto daytoy bayat a rumang-aykayo.

Umuna iti amin, usigenyo no siasino ni Jehova, no aniat’ namnamaenna kadakayo, ken no aniat’ ididiayana. Kiddawenyo kadagiti Saksi nga ipakitada kadakayo no aniat’ kuna ti Biblia maipapan itoy. Kitaenyo iti mismo a Bibliayo ti ibagbagada. Iti pannakaammoyo a nainkalintegan dagiti Saksi iti panangidatagda iti kinapudno maipapan iti relihion, awan duadua a kayatyo a maammuan ti adu pay a nasayaat a bambanag a mairanudda kadakayo manipud iti Kasuratan.​—Proverbio 27:17.

Maabrasakayo a mangpaliiw kadagiti Saksi iti lokal a paggigimonganda, ti Kingdom Hall. Mangngeganyo sadiay dagiti makagunggona a panangsalaysay iti Sao ti Dios. Makitayo no kasano a siraragsak a pagsasaritaan dagiti tumabtabuno ti pangpanggep ti Dios. Palubosanyo dagitoy a Saksi a tumulong kadakayo a mangammo iti kinapudno maipapan iti pagayatan ti Dios kadatayo itatta. Ipangagyo ti awis ti Dios a pagsaritaan ti pudno a panagdaydayaw ket awatenyonto ti isem ti anamongna, uray pay ti biag nga agnanayon iti Paraiso.​—Malakias 3:16; Juan 17:3.

[Ladawan iti panid 5]

Sipapanayag a nagsao ni Noe maipapan iti panggep ti Dios

[Dagiti Ladawan iti panid 7]

Kas iti inaramid ni Pablo iti nagkauna nga Atenas, isursuro dagiti Saksi ni Jehova dagiti kinapudno iti Biblia kadagiti sabsabali