Naballigi a Panangasaba a Kampania Idiay Grecia
NABAYAGEN a naipasango dagiti Saksi ni Jehova iti ibubusor idiay Grecia. Indadanes ti dadduma nga opisial ti polisia, korte, ken ti gobierno dagiti Saksi, masansan gapu iti panangsugsog dagiti klero ti Greek Orthodox. No dadduma pagpambarda ti linteg ti Grecia maibusor iti proselitismo, no dadduma ti naibatay-Biblia a panagkedked dagiti Saksi a makigubat wenno agpayalison ti dara.—Isaias 2:2-5; Aramid 15:28, 29.
Iti panangikagumaanda a mangitandudo iti ad-adda pay a panagkikinnaawatan kadagiti nasingpet panagpuspusona nga agtuturay idiay Grecia, agarup 200 a Saksi a bigbigbigen ti gobierno a Griego kas narelihiosuan a ministro, kasta met kadagiti sumagmamano nga abogado, ti nabiit pay a nakiraman iti maysa a kampania iti intero a pagilian. Intukonda ti naisangsangayan pannakadiseniona a broshur, a napauluan iti Jehovah’s Witnesses in Greece, kasta met ti libro a Dagiti Saksi ni Jehova—Manangiwaragawag iti Pagarian ti Dios. Nangipaayda met iti pakete dagiti dokumento a mangipakita nga awan umiso a legal a pakaibatayan ti pannakaidadanes dagiti Saksi ni Jehova. Sinarungkaran dagiti Saksi dagiti hepe ti polisia, mayor, piskal, ken dadduma pay nga opisial.
Ti sungbat? Ginasut a nasasayaat a kapadasan. Usigenyo ti sumagmamano a pagarigan.
Inabrasa ti komandante ti maysa nga estasion dagiti polis idiay Akinlaud a Macedonia dagiti kakabsat sa kinunana: “Nabayagen nga am-ammokayo a tattao, . . . ket dayawek ti kinaurnosyo. . . . Diak umanamong iti linteg ti proselitismo, ket no siak ti masurot, ikkatek dayta.”
Kastoy ti komento dagiti komandante ti nadumaduma nga estasion dagiti polis iti adu a siudad: “Dayawek ti panagserbiyo iti kagimongan.” “Ti komunidadyo pulos a di mamagparikut kadagiti polis; agtartrabahokayo maipaay iti kagimongan.” “Talaga nga awan parikutmi kadakayo. Raemen ken dayawendakayo.”
Idiay Piraeus, kinuna ti maysa a nangato nga opisial ti polisia kadagiti kakabsat, buyogen iti lulua kadagiti matana, nga ammona ti agkararag iti nagan ni Jehova a Dios baeten ken Jesu-Kristo. Ad-adda pay a pinagsiddaawna dagiti Saksi idi imbagana kadakuada nga ammona nga inanamaenda ti pannakaidadanes sakbay ti Armagedon, ket ninamnamana nga isut’ aramaten ti Dios a tumulong kadakuada iti dayta a tiempo! Inawatna ti awis dagiti kakabsat a maaddaan iti kanayonan pay a panagsasarita.
Mangipangag Dagiti Opisial ti Gobierno
Kinuna ti maysa a mayor idiay Thessaly maipanggep iti libro a Manangiwaragawag: “Maiparbeng ti pannakaipanna iti libraria ti ili—iti prominente a lugar!” Inikkatna ngarud dagiti libro iti maysa nga estante ket impanna sadiay ti libro a Manangiwaragawag tapno makita ti akkubna.
Idiay akin-amianan a Grecia, sibabara nga inabrasa ti maysa a mayor dagiti kakabsat sa kinunana: “Dakayo ti kasasayaatan a tattao a tarigagayak nga agnaed iti ilik.” Kinuna ti maysa a naasi a mayor idiay amianan nga Euboea kadagiti kakabsat: “Maysaak a dati nga opisial ti soldado. Ngem dakayo—dayawenkayo unay.” Sigagagar nga immanamong kadagiti punto nga indatag dagiti Saksi. Idi impakitada ti adu a libro nga impablaak ti Watch Tower Society, kinunana: “No ikarik a basaek amin ida, itedyo kadi kaniak?” Simmungbatda: “Siempre—kukuayon dagita!” Naragsakan ket gistay dinan kayat a pumanaw dagiti kakabsat.
Iti kabangibang nga ili idiay Attica, siraragsak nga inawat ti maysa a mayor ti literatura nga intukon dagiti kakabsat ket kiniddawna kadakuada nga itultuloyda nga ikkan kadagiti publikasion ti Sosiedad. Idi pumampanawdan, kinunana kadakuada: “Maupay unay dagiti tattao kadagiti politiko ket agbirbirokda iti napaypayso a kinapudno iti uray sadinoman. Masiguradok a manipud ita makumikomkayo unay gapu ta adda kadakayo ti kinapudno.”
Mangipangag Dagiti Piskal
Malaglagip dagiti kakabsat a bimmisita iti maysa a piskal idiay akin-amianan a Grecia: “Nasdaaw kadagiti publikasiontayo ken iti presentasion, kasta met iti panagreggettayo a mangipasigurado a saan a nakaay-ay-ay dagiti kakaduatayo no maipasangoda kadagiti nakaro nga isyu ti panangyalison ti dara. Kamaudiananna, nagyaman kadakami ken sibabara a kinomendarannakami gapu iti disnudo nga ibibisita ken pannakisaritami kenkuana. Kalpasanna, naammuanmi nga uppat a tawenen ti napalabas idi pinaayabanna dagiti polis ken pinaarestona ti dua a kakabsat a makiramraman iti tay-ak ti serbisio.”
Nasdaaw ti dua nga abogado a Saksi a bimmisita kadagiti opisina dagiti piskal idiay Atenas idi immasideg kadakuada ti maysa a nalatak ken mararaem unay a nabayagen a piskal. Imputongna ida ket kinunana kadakuada nga awan nakaibatayan ti linteg maibusor iti proselitismo ken pakaigapuan ti pannakariribuk iti sistema ti pangukoman a Griego. Nagyaman kadakuada buyogen ti nabara a panangalamano.
Idiay akin-amianan a Grecia, mannakigayyem unay ti maysa a piskal ket inawatna ti literatura. Bayat a linukibna dagiti pinanid ti libro a Dagiti Saludsod nga Iyimtuod Dagiti Agtutubo—Dagiti Sungbat nga Epektibo, nasdaaw kadagiti nadumaduma a kapitulo a linaonna. Kinunana: “Diak pay nakita iti intero nga Ortodoksia ti idatdatag daytoy a libro.”
Binigbig ti maysa a piskal idiay Boeotia nga, iti napalabas, inruarna dagiti pammilin a mayalisonan ti dara dagiti Saksi nupay dida kayat. Ngem kalpasan a nakirinnason kenkuana dagiti kakabsat maipapan iti dayta a banag, kinunana: “Pulos a diakton mangiruar iti kasta a bilin iti masanguanan!” Inkeddengna a masapul a makonsulta ti lokal a Hospital Liaison Committee dagiti Saksi ni Jehova tapno masukisok amin a sandi ti dara. Siraragsak nga inawatna ti libro nga Iyimtuod Dagiti Agtutubo.
Mangipangag Dagiti Manangaywan iti Libraria
Naidatag met ti material kadagiti adu a manangaywan ti libraria. Iti maysa a libraria idiay Atenas, inawat ti maysa a managraem a manangaywan ti libraria ti literatura sa nagkomento: “Nasayaat unay ta inyegyo dagiti libroyo gapu ta kaaduan a libro iti librariami ti maibusor kadakayo. . . . Makarurod unay ti maysa a padi a makakita kadagiti libroyo iti libraria. . . . Saanen a napateg dayta. Masapul a mangngegan amin a kapanunotan.”
Maysa nga opisial ti kagimongan iti maysa a libraria iti ili idiay Creta, a nakaam-ammo kadagiti Saksi ni Jehova iti maysa a kampo ti militar, kinunana kadagiti kakabsat a nasdaaw iti panagkedked dagiti Saksi a makipaset iti gubat. Masansan a mapampanunotna, ‘Apay a kasapulan nga agsagaba dagitoy a tattao?’ Inawatna ti literatura manipud kadagiti kakabsat sa kinunana maipapan iti agdama a kampaniada: “Nakaaramidkayo iti nagsayaat unay a trabaho ket idi pay koma nga inaramidyo daytoy. . . . Nakaro ti panangidumduma ditoy Grecia.” Kiniddawna kadagiti kakabsat a bisitaendanto manen iti kabiitan a panawen.
Kabayatan daytoy naisangsangayan a kampania, nakaipaima dagiti kakabsat iti nasurok a 1,000 a libro a Manangiwaragawag, 1,600 a broshur a Jehovah’s Witnesses in Greece, kasta met kadagiti ginasut a libro ken magasin. Nasaysayaat pay, nakasaritada a mismo dagiti ginasut a Griego nga opisial. Manginanama itan dagiti matalek nga adipen ni Jehova idiay Grecia ken iti aglikmut ti lubong a maaddaanto dagiti nasingpet panagpuspusona nga agtuturay idiay Grecia iti ad-adda pay a natimbeng a panangmatmat kadagiti Saksi ni Jehova.