Dagiti Bendision iti Ministerio a Panagpayunir
“Ti bendision ni Jehova ti mangpabaknang; ket saanna nga anayan ti ladingit.”—PROVERBIO 10:22.
1, 2. (a) Kasano nga inyebkas ti maysa a payunir ti panagriknana maipapan iti amin-tiempo a ministerio? (b) Apay a dagiti payunir ad-adda a masagrapda a naan-anay ti rag-o iti panangaramid kadagiti adalan?
“ADDA pay kadi sabali a makaiyeg iti dakdakkel a rag-o ngem ti pannakakita iti iyad-adalam nga agbalin nga aktibo a manangidaydayaw ken Jehova? Makaparagsak ken makapabileg-pammati a makita no kasano kabileg ti Sao ti Dios a manggutugot kadagiti tattao a mangbalbaliw iti biagda tapno maay-ayo ni Jehova.” Kasta ti insurat ti maysa a payunir idiay Canada a nasurok a 32 a tawenen nga adda iti amin-tiempo a ministerio. Maipapan iti ministeriona kas payunir, kunana: “Awanen ti sabali a mapanunotko nga aramiden. Awan ti mapanunotko a makaiyeg iti kasta met laeng a rag-o.”
2 Umanamongkay kadi a mangyeg iti dakkel a rag-o ti panangtulong iti maysa a tao a magna iti dalan nga agturong iti biag? Siempre, saan laeng a dagiti payunir ti agsagrap iti kasta a rag-o. Nabilin amin nga adipen ni Jehova a ‘mangaramid kadagiti adalan a tattao,’ ket ikagkagumaanda nga aramiden dayta. (Mateo 28:19) Nupay kasta, tangay adu nga oras ti mabusbos dagiti payunir iti tay-ak ti ministerio, masansan nga isuda ti ad-adda a makananam a naan-anay iti rag-o iti panangaramid kadagiti adalan. Ngem adda dadduma pay a gunggona iti panagpayunir. Makisaritakayo kadagiti payunir, ket ibagada kadakayo a ti panagpayunir ket nagsayaat a pamay-an tapno masagraptayo ‘ti bendision ni Jehova a mangpabaknang.’—Proverbio 10:22.
3. Ania ti mabalin a mangparegta kadatayo bayat ti panagpatpatuloytayo nga agserbi ken Jehova?
3 Iti di pay nabayag, nakiddaw dagiti payunir iti nadumaduma a paset ti lubong a mangisarita kadagiti bendision a nasagrapda iti amin-tiempo a ministerio. Usigentayo no ania ti kinunada. Ngem dikay maupay no limitado ti panagserbiyo gapu iti nakapuy a salun-at, kinalakay, wenno dadduma pay a kasasaad. Laglagipenyo, ti nasken isu ti panagserbi ken Jehova iti amin a kararua, iti aniaman a kasasaad. Nupay kasta, ti pannakangngeg iti komento dagiti dadduma a payunir mabalin a parayrayenna ti interesyo a sumrek iti daytoy makagunggona a trabaho no posible.
Nauneg a Pannakapnek ken Rag-o
4, 5. (a) Apay a makagunggona ti panangiranud iti naimbag a damag kadagiti sabsabali? (b) Kasano ti panagrikna dagiti payunir maipapan iti pannakiraman iti amin-tiempo a ministerio?
4 “Ad-adu ti kinaragsak iti panangted ngem iti panangawat,” kinuna ni Jesus. (Aramid 20:35) Wen, masupapakan ti awanan imut a panangted. (Proverbio 11:25) Pudno daytoy nangruna no maipapan iti panangiranud iti naimbag a damag kadagiti sabsabali. Kinapudnona, adda kadi pay napatpateg a sagut a maitedtayo iti padatayo a tao ngem ti panangtulong kenkuana a gumun-od iti pannakaammo maipapan iti Dios, a mangiturong iti biag nga agnanayon?—Juan 17:3.
5 Di pakasdaawan, dagidiay makiramraman iti amin-tiempo a ministerio masansan nga iyebkasda ti rag-o ken nauneg a pannakapnek iti ministerioda. “Ammok nga awanen sabali a trabaho a makaiyeg kaniak iti pannakapnek nga agtaud iti panangiranud iti kinapudno kadagiti sabsabali,” kuna ti 64 ti tawenna a payunir idiay Britania. Inlawlawag ti maysa a biuda idiay Zaire no ania ti kaipapanan kenkuana ti panagpayunir: “Pudno a naliwliwaak iti panagserbik kas payunir kalpasan ti ipapatay ti patpatgek nga asawa. Mailiwliwagko ti ipupusayna no kasta a rummuarak a tumulong kadagiti sabsabali. Agtalekak kadagiti kari ni Jehova ket naynay a pampanunotek no kasanok a matulongan dagidiay iyad-adalak a mangbalbaliw iti biagda. Iti ngudo ti kada aldaw, naimas ti turogko, ket napno ti pusok iti rag-o.”
6. Ania a naisangsangayan a rag-o ti sagsagrapen dagiti dadduma a payunir?
6 Dagiti dadduma nga adun a dekada nga agpaypayunir addaanda iti naisangsangayan a rag-o iti panagserbi kadagiti nasulinek a lugar, a nakaipasdekda kadagiti kongregasion, nga idi agangay nagbalin a sirkito. Kas ehemplo, idiay Abashiri, Hokkaido (kaamiananan nga isla ti Japan), adda maysa a kabsat a babai a 33 a tawenen a payunir. Malagipna nga iti asamblea sirkito a damo a tinabunuanna—iti intero a Hokkaido—70 laeng ti timmabuno. Ket ita? Adda 12 a sirkito iti dayta nga isla, a buklen ti nasurok a 12,000 nga agibumbunannag. Agliplippias la ketdi ti pusona iti rag-o no tumabuno kadagiti asamblea ken kombension a kaduana ti nakaad-adu a padana a manangiwaragawag iti Pagarian iti dayta nga isla!
7, 8. Ania a rag-o ti sagsagrapen ti kaaduan kadagiti nabayagen a payunir?
7 Dagiti dadduma a nabayagen a payunir maragsakanda a makakita iti panagpabautisar dagiti iyad-adalanda iti Biblia ken iti panangragpatda kalpasanna kadagiti kanayonan a pribilehio iti serbisio. Idiay Japan, malagip ti maysa a kabsat a babai, a nagpayunir iti siam a nadumaduma a lugar manipud idi 1957, a nakaipaima idi iti magasin nga Agriingkayo! iti maysa a balasang nga agtartrabaho iti bangko. Kalpasan ti siam a bulan, nabautisaran ti balasang. Idi agangay nakiasawa, ket nagbalinda ken lakayna nga special pioneer. Anian a rag-o ti kabsat a payunir idi nga, iti maikatlo a nakaitudinganna, ti kongregasionna ket binisita ti baro a manangaywan ti sirkito ken ti asawana—daydi inyad-adalanna iti Biblia!
8 Di pakasdaawan a dagidiay pinagbalinda a karera ti ministerio a panagpayunir, ibilangda dayta kas “di magatadan a pribilehio a rebbeng nga ipateg,” kas kinuna ti maysa a 22 a tawenen nga agpaypayunir!
Pammaneknek ti Panangaywan ni Jehova
9. Kas Naindaklan a Manangipaay, ania ti inkari ni Jehova kadagiti adipenna, ket ania ti kaipapanan daytoy kadatayo?
9 Inkari ni Jehova, ti Naindaklan a Manangipaay, a saranayenna dagiti adipenna, nga aywananna ida iti naespirituan ken material a pamay-an. Siuumiso a naikuna ni Ari David idi ugma: “Nagubingak, ket ita lakayakon; diak pay nakakita iti sililinteg a nabaybay-an, ken kadagiti putputotna man a makipalpalama iti kanen.” (Salmo 37:25) Siempre, daytoy a garantia ti Dios dinatay ilisi iti obligasion a mangipaay iti material a kasapulan ti pamiliatayo, ket dinatay met ikkan iti wayawaya a manggundaway iti kinamanagparabur dagiti Kristiano a kakabsattayo. (1 Tesalonica 4:11, 12; 1 Timoteo 5:8) Kaskasdi, no madadaantayo nga agsakripisio tapno naan-anay a makapagserbi ken Jehova, pulos a dinatay baybay-an.—Mateo 6:33.
10, 11. Manipud iti kapadasan, ania ti ammo dagiti adu a payunir maipapan iti kabaelan ni Jehova a mangipaay?
10 Dagiti payunir iti intero a lubong ammoda manipud iti kapadasan nga ited ni Jehova ti kasapulan dagidiay agpannuray iti naparabur nga imana. Utobenyo ti kasasaad ti agassawa a payunir nga immakar iti bassit nga ili a dakdakkel ti panagkasapulan kadagiti manangaskasaba iti Pagarian. Kalpasan ti sumagmamano a bulan, rimmigat ti agsapul iti panggedan, ket naibusen ti urnongda. Idi kuan nakaawatda iti babayadan a $81 para iti seguro ti kotse. “Awan idi ti pagbayadmi,” kinuna ti kabsat a lalaki. “Sipapasnek a nagkararagkami iti daydi a rabii.” Kabigatanna, nakaawatda iti kard a naggapu iti maysa a pamilia nga awan met ti kasano a kuartada. Nakaawat ti pamilia iti tax refund, kuna ti kard, ket tangay ad-adu dayta ngem ti ninamnamada, kayatda nga iranud ti dadduma iti agassawa a payunir. Nangiragpinda iti tseke nga agpateg iti $81! “Pulos a diak malipatan daydi nga aldaw—simgar dagiti dutdot ti teltelko!” kuna ti kabsat a payunir. “Inapresiarmi unay ti kinamanagparabur daytoy a pamilia.” Apresiaren met ni Jehova ti kasta a kinaimbag, a pagwadan iti espiritu ti kinamanagparabur nga iparparegtana kadagiti adipenna.—Proverbio 19:17; Hebreo 13:16.
11 Adu a payunir ti makaisalaysay iti kakasta met laeng a kapadasan. Agsaludsodkayo kadakuada, ket ibagada kadakayo a saanda a ‘pulos nabaybay-an.’ Iti panangtaliawna iti nasurok a 55 a tawen a kaaddana iti amin-tiempo a ministerio, kastoy ti kuna ti 72 ti tawenna a payunir, “Pulos a dinak pinaay ni Jehova.”—Hebreo 13:5, 6.
“Nagsayaat a Pamay-an Tapno Ad-adda a Sumingedka ken Jehova”
12. Apay a naisangsangayan a pribilehio ti trabaho a panangiwaragawag iti naimbag a damag?
12 Ti panangkiddaw ni Jehova kadatayo a mangiwaragawag iti naimbag a damag ti Pagarianna ket maysa a pribilehio. Ibilangnatayo—nupay imperpektotayo a tattao—kas “katrabahuan[na]” iti daytoy makaispal-biag a trabaho. (1 Corinto 3:9; 1 Timoteo 4:16) Bayat nga ikasabatayo kadagiti sabsabali ti maipapan iti Pagarian ti Dios, bayat nga iwaragawagtayo ti panaggibus ti kinadakes, bayat nga ilawlawagtayo kadagiti tattao ti nakaskasdaaw nga ayatna iti panangipaayna iti subbot, bayat a luktantayo ti nabiag a Saona ken isuro dagiti napateg a linaonna kadagiti nasingpet panagpuspusona a tattao, natural laeng nga ad-adda a sumingedtayo iti Namarsua kadatayo, ni Jehova.—Salmo 145:11; Juan 3:16; Hebreo 4:12.
13. Ania ti kuna ti dadduma maipapan iti epekto ti ministerioda a panagpayunir iti relasionda ken Jehova?
13 Adu a tiempo ti mabusbos dagiti payunir kada bulan iti panagadal ken panangisuro iti maipapan ken Jehova. Ania ti mariknada nga epekto daytoy iti relasionda iti Dios? “Ti panagpayunir ket nagsayaat a pamay-an tapno ad-adda a sumingedka ken Jehova,” kuna ti maysa a panglakayen idiay Francia a nasuroken a 10 a tawen a payunir. Kuna ti maysa pay a payunir iti dayta a pagilian, a 18 a tawenen nga adda iti amin-tiempo a ministerio: “Ti panagserbi kas payunir ikkannatay iti gundaway a ‘mangnanam ken mangkita a ni Jehova naimbag,’ nga inaldaw a patibkerenna ti relasiontayo iti Namarsua kadatayo.” (Salmo 34:8) Kasta met laeng ti panagrikna ti maysa a kabsat a babai idiay Britania a 30 a tawenen a payunir. “Ti panagpaidalan iti espiritu ni Jehova iti ministeriok ad-adda a pasingedennak kenkuana,” kunana. “Pudno a nariknak nga iti adu a gundaway, inturongnak ti espiritu ni Jehova iti partikular a pagtaengan iti maitutop a tiempo.”—Idiligyo ti Aramid 16:6-10.
14. Kasano a magunggonaan dagiti payunir iti inaldaw a panangusarda iti Biblia ken kadagiti naibatay-Biblia a publikasion iti panangisuro kadagiti sabsabali?
14 Natakuatan ti adu a payunir a ti inaldaw a panangusar iti Biblia ken kadagiti naibatay-Bibia a publikasion a mangilawlawag ken mangisuro kadagiti Nainkasuratan a kinapudno ket makatulong kadakuada a rumang-ay iti pannakaammo iti Sao ti Dios. Kastoy ti kuna ti maysa a 85 ti tawenna a kabsat a lakay idiay España a 31 a tawenen a payunir: “Natulongannak ti panagpayunir a gumun-od iti nauneg a pannakaammo iti Biblia, pannakaammo nga us-usarek a tumulong iti adu a tattao a mangammo ken Jehova ken kadagiti panggepna.” Kuna ti maysa a kabsat a babai idiay Britania a 23 a tawenen nga agpaypayunir: “Natulongannak ti amin-tiempo a ministerio a mangparayray iti ganasko iti naespirituan a taraon.” Ti panangilawlawag kadagiti sabsabali iti “rason maipaay iti namnama nga adda kadakayo” mapatibkerna ti pammatiyo kadagiti napateg a patpatienyo. (1 Pedro 3:15) Kuna ti maysa a payunir idiay Australia: “Ti panagpayunir parabuyenna ti pammatik bayat ti pannakisarsaritak kadagiti sabsabali.”
15. Ania ti madadaan nga aramiden dagiti adu tapno makastrekda iti ministerio a panagpayunir ken makapagtalinaedda iti dayta, ken apay?
15 Nalawag, kombinsido dagitoy a payunir a ministro a pinilida ti maysa a kita ti panagserbi a mangyeg iti adu a bendision nga aggapu ken Jehova. Di pakasdaawan nga adu ti madadaan a nangaramid iti panagbalbaliw iti biagda, nga insakripisioda pay ketdi ti sekular a karera ken ti material a kinabaknangda, tapno makastrekda iti ministerio a panagpayunir ken makapagtalinaedda iti dayta!—Proverbio 28:20.
Tarigagayanyo Kadi ti Agaramid iti Ad-adu Pay?
16, 17. (a) No pampanunotenyo no posible kadakayo ti panagpayunir, ania ti mabalinyo nga aramiden? (b) Kasano ti panagrikna ti dadduma no saanda a makapagpayunir?
16 Kalpasan ti panangusigtayo iti ibagbaga dagiti payunir maipapan kadagiti bendision iti ministerio a panagpayunir, nalabit pampanunotenyo no praktikal kadakayo ti panagpayunir. No kasta, apay a dikay makisarita iti maysa a payunir a naballigi iti amin-tiempo a ministerio? Mabalin a makatulong met kadakayo ti pannakisarita iti maysa kadagiti panglakayen iti kongregasion, a makaam-ammo kadakayo—iti salun-at, limitasion, ken dagiti rebbengenyo iti pamilia. (Proverbio 15:22) Ti realistiko a komento dagiti dadduma mabalin a tulongannakayo a mangtingiting a naimbag no posible kadakayo ti panagpayunir. (Idiligyo ti Lucas 14:28.) No makapagpayunirkayo, sigurado nga adunto a bendision ti masagrapyo.—Malakias 3:10.
17 Ngem komusta dagiti adu a matalek nga agibumbunannag iti Pagarian a di makapagpayunir, nupay kayatda nga ad-adu pay koma ti maaramidanda iti ministerio? Usigenyo, kas ehemplo, ti rikna ti maysa a Kristiano a kabsat a babai nga agmaymaysa a mangikarkarigatan a mangpadakkel iti uppat nga annakna. “Maladingitanak,” kunana, “agsipud ta maysaak idi a regular pioneer, ngem ita, gapu iti kasasaadko, diak makaruar iti tay-ak ti serbisio a masansan a kas iti sigud.” Ipatpateg unay daytoy a kabsat dagiti annakna ket kayatna nga ipaay ti kasapulanda. Maigiddato iti dayta, tarigagayanna nga ad-adu pay koma ti maaramidanna iti trabaho a panangasaba. “Napateg kaniak ti ministerio,” kunana. Kasta met laeng ti karirikna dagiti dadduma a napasnek a Kristiano a ti ayatda iti Dios tignayenna ida nga agserbi ken Jehova ‘iti amin a pusoda.’—Salmo 86:12.
18. (a) Ania ti namnamaen ni Jehova kadatayo? (b) Apay a ditay koma maupay no limitado ti maaramidantayo gapu iti kasasaadtayo?
18 Laglagipenyo a ti amin-kararua a panagserbi ti namnamaen ni Jehova kadatayo. Saan a parepareho ti maaramidantayo. Kabaelan dagiti dadduma nga ipamuspusan ti panagserbida kas regular pioneer. Adu dagiti agpalpalista kas auxiliary pioneer, sagpaminsan man wenno agtultuloy, a mangbusbusbosda iti 60 nga oras kada bulan iti ministerio. Nupay kasta, amin-kararua a makiramraman ti kaaduan iti ili ni Jehova iti trabaho a panangasaba ken panangisuro kas agibumbunannag iti kongregasion. Isu a no pudno a limitado ti maaramidanyo gapu iti nakapuy a salun-at, kinalakay, rebbengen iti pamilia, wenno dadduma pay a kasasaad, dikay maupay. No la ket ar-aramidenyo ti amin a kabaelanyo, napateg iti imatang ti Dios ti panagserbiyo, kas iti panagserbi dagidiay adda iti amin-tiempo a ministerio!
Maiparangarangtay Amin ti Espiritu ti Panagpayunir
19. Ania ti espiritu ti panagpayunir?
19 Uray no saankayo a makapagpayunir, maiparangarangyo ti espiritu ti panagpayunir. Ania ti espiritu ti panagpayunir? Kastoy ti kinuna ti Hulio 1988 a ruar ti Ministeriotayo iti Pagarian: “Madepinar daytoy kas pannakaadda iti positibo a panangmatmat iti bilin a mangasaba ken mangaramid kadagiti adalan, naan-anay a naikumit iti panangipakita iti ayat ken pannakaseknan kadagiti tattao, panagsakripisio, panagrag-o iti panangsurot a naimbag iti Apo, ken panagtarigagay kadagiti naespirituan, saan a material, a bambanag.” Kasanoyo a maipakita ti espiritu ti panagpayunir?
20. Kasano a maiparangarang dagiti nagannak ti espiritu ti panagpayunir?
20 No maysakayo nga ama wenno ina nga addaan kadagiti ubbing, mabalinyo a naimpusuan nga irekomenda kadakuada a pagbalinenda a karera ti panagpayunir. Ti positibo a panangmatmatyo iti ministerio mabalin nga ipasagepsepna kadakuada ti kinapateg ti panangipangruna iti panagserbi ken Jehova iti biagda. Mabalinyo nga awisen dagiti payunir ken agdaldaliasat a manangaywan ken ti assawada iti pagtaenganyo tapno magunggonaan dagiti ubbingyo iti ulidan dagidiay nakasarak iti rag-o iti amin-tiempo a ministerio. (Idiligyo ti Hebreo 13:7.) Uray iti pamilia a saan nga agkakapammatian dagiti kamengna, dagiti manamati a nagannak, babaen ti sao ken aramid, matulonganda dagiti annakda a mamagbalin a kalatda iti biag ti amin-tiempo a ministerio.—2 Timoteo 1:5; 3:15.
21. (a) Kasanotay a masuportaran dagidiay agpaypayunir? (b) Ania ti mabalin nga aramiden dagiti panglakayen tapno maparegta dagiti payunir?
21 Iti kongregasion, makaipaaytay amin iti naimpusuan a suporta kadagidiay makapagpayunir. Kas pagarigan, maikagumaanyo kadi ti makipagtrabaho iti maysa a payunir iti ministerio, nangruna kadagiti tiempo a nalabit agmaymaysa a mangasaba ti payunir? Mabalin a ‘makapagpinnaregtakayo.’ (Roma 1:11, 12) No maysakayo a panglakayen, ad-adu ti maaramidanyo a mangparegta kadagiti payunir. No agmimiting dagiti panglakayen, kanayon nga iramanda koma a pagsasaritaan ti kasapulan dagiti payunir. No maup-upay wenno marigrigatan ti maysa a payunir, diyo koma irekomenda a dagus nga isardengnan ti agpayunir. Nupay mabalin a kasapulan nga irekomenda dayta iti dadduma a kasasaad, diyo liplipatan a ti panagpayunir ket napateg a pribilehio a mabalin nga ilalaen unay ti amin-tiempo nga adipen. Mabalin a ti kasapulan laeng ket bassit a pammaregta ken praktikal a balakad wenno tulong. Insurat ti sanga nga opisina ti Sosiedad idiay España: “No iparegta dagiti panglakayen ti panagpayunir, suportaranda dagiti payunir iti tay-ak ti ministerio, ken regular nga ipastoranda ida, rumayray ti rag-o dagiti payunir, mariknada nga adda serbida, ken kayatda ti agtultuloy iti laksid dagiti tubeng a mabalin a rumsua.”
22. Iti daytoy napeggad a panawen iti pakasaritaan ti tao, ania koma ti determinado nga aramidentayo?
22 Agbibiagtayo iti napeggad a panawen iti pakasaritaan ti tao. Inikkannatayo ni Jehova iti makaispal-biag a trabaho a nasken nga itungpal. (Roma 10:13, 14) Mabalinantay man wenno saan ti makiraman iti daytoy amin-tiempo a trabaho kas payunir, ipakitatayo ti espiritu ti panagpayunir. Makariknatay koma iti kinaganat ken maaddaan iti espiritu ti panagsakripisio. Determinadotay koma a mangipaay ken Jehova iti dawdawatenna kadatayo—ti amin-kararua a panagserbi. Ket laglagipentayo a no itedtayo ti amin a kabaelantay nga ited, umasping man dayta iti babassit a sinsilio ti balo wenno iti nangina a lana ni Maria, amin-kararua ti panagserbitayo, ket napateg ken Jehova ti amin-kararua a panagserbitayo!
Malagipyo Kadi?
◻ Apay a mangyeg iti pannakapnek ken rag-o ti amin-tiempo a ministerio?
◻ Manipud iti kapadasan, ania ti ammo ti adu a payunir maipapan iti kabaelan ni Jehova a mangaywan kadagiti adipenna?
◻ Ania ti marikna dagiti payunir nga epekto ti ministerioda iti relasionda ken Jehova?
◻ Kasanoyo a maipakita ti espiritu ti panagpayunir?
[Ladawan iti panid 23]
Dakkel a rag-o ti sagsagrapen dagiti payunir iti panangaramid kadagiti adalan
[Ladawan iti panid 23]
Magunggonaan dagiti annakyo iti pannakilangenda kadagiti amin-tiempo a manangiwaragawag iti Pagarian
[Ladawan iti panid 23]
Dagiti panglakayen maparegtada dagiti payunir iti tay-ak ti ministerio