Naimbag a Damag ti Paraiso Idiay Tahiti
TAHITI! Kasla adda ipaspasimudaag daytoy a nagan a karkarna a pangkayaw. Pinaglatak daytoy dagiti artesano ken mannurat kas kada Paul Gauguin, Robert Louis Stevenson, ken Herman Melville, a ti panangiladawanda iti tropikal a pintas ken kinatalinaay iti South Sea Islands kinayawanna ti interes ti adu.
Ti Tahiti ti kadakkelan iti nasurok a 120 nga isla iti French Polynesia, a masarakan iti South Pacific. Nupay kasla paraison iti isip ti kaaduan a tao daytoy nga isla iti South Sea, kaskasdi a kasapulan dagiti tattao idiay Tahiti a mangngegan ti maipapan iti sabali a paraiso nga asidegen a dumteng. (Lucas 23:43) Dagiti Saksi ni Jehova, nga agdagup iti 1,918 idiay Tahiti ita, ti okupado a mangipakpakaammo kadagiti 220,000 a tattao iti naimbag a damag nga asidegen nga iyeg ti Pagarian ti Dios ti pudpudno a naparaisuan a kasasaad saan laeng idiay Tahiti no di pay ket iti intero a daga.—Mateo 24:14; Apocalipsis 21:3, 4.
Iti adu a tawen, ti trabaho a panangasaba idiay Tahiti ket imatmatonan ti sanga nga opisina ti Watch Tower Society idiay Fiji, ag-3,500 a kilometro ti kaadayona. Gapu iti kaadayo [ti Tahiti] nagbalin a narigat dagiti bambanag, ken nabannayat ti irarang-ay. Gapuna, idi Abril 1, 1975, naipasdek ti sanga nga opisina idiay Tahiti, ket dayta ti nangtanda iti dakkel a panagbalbaliw iti trabaho dagiti pudno a Kristiano iti daytoy a teritoria. Ania ti nangiturong iti daytoy nga irarang-ay, ken kasano a narugian ti panangasaba idiay Tahiti?
Bassit a Nangrugian
Damo a nangngegan ti naimbag a damag ti Pagarian idiay Tahiti idi dekada 1930, ket adu a taga-isla, nga addaan nauneg a panagraem iti Biblia, ti nangipakita iti napasnek a panaginteres. Nupay kasta, kas resulta ti panangipawil ti gobierno ken dadduma pay a restriksion, awan pay idi ti Saksi iti isla idi arinunos ti dekada 1950. Kadaydi a tiempo, ni Agnès Schenck, katutubo iti Tahiti nga agnanaed idiay Estados Unidos, inkeddengna ti agsubli idiay Tahiti agraman ni lakayna ken ti barona. Ilawlawagna no kasano a napasamak amin dayta.
“Iti kombension distrito idiay Los Angeles idi 1957, ni Brother Knorr [a presidente idi ti Watch Tower Society] inlawlawagna nga adda dakkel a panagkasapulan kadagiti agibumbunannag iti Pagarian idiay Tahiti. Makatawen idin a nabautisaranak, ket naikunak, ‘No kasta mapantayo idiay Tahiti!’ Naallingagdak ti dua a pamilia, dagiti Neill ken Carano, a nasinged a gagayyemmi. Kinunada a kayatda ti kumuyog kadakami, ngem awan ti kasano a kuartami. Nabayag a nagsakit ni lakayko, ken ubing pay unay ti anakko. Gapuna narigat ti ipapanawmi. Nadamag dagiti gagayyemmi iti kabangibang a kongregasion ti kalatmi, ket pinatulodandakami iti kuarta ken kadagiti masapsapul iti balay. Kalpasanna idi Mayo 1958 naglayagkami a nagturong idiay Tahiti nga awitmi, agraman dadduma pay a banag, ti 36 a kubrekama!
“Idi nakagtengkami idiay Tahiti, kaslaak la ganggannaet iti panagriknak gapu ta 20 a tawenen nga awanak iti isla. Rinugianmi ti mangasaba, ngem kinasapulan nga agannadkami gapu ta naparitan ti Nakristianuan a trabahotayo. Kinasapulan nga ilemmengmi dagiti magasin, ket Biblia laeng ti inaramatmi. Idi damo kinasabaanmi laeng dagiti tattao nga addaanen kadagiti suskripsion iti magasin a Pagwanawanan ken Agriingkayo!
“Kinaduaandakami da Clyde Neill ken David Carano, agraman ti pamiliada, kalpasan ti internasional a kombension idiay New York City idi 1958. Nagkukuyogkami a nangasaba ken nangawis kadagiti tao nga umay dumngeg kadagiti palawag a maangay iti pagtaengan dagiti kakabsat. In-inut a naorganisar dagiti bambanag, ket adda idi 15 a tattao a rinugianmi nga inggrupo nga inyadalan iti Biblia. Kalpasan ti tallo a bulan kinasapulan a pumanaw dagiti Neill ken dagiti Carano gapu ta agpason ti visa-da kas turista. Gapuna inkeddeng dagiti kakabsat a sakbay a pumanawda, bautisaranda amin nga interesado a kualipikado. Naaddaanak iti pribilehio a mangipatarus iti damo a palawag para iti bautismo. Iti daytoy a gundaway walo a katutubo a taga-isla ti nangisimbolo iti dedikasionda ken Jehova babaen ti bautismo. Kalpasanna nagsublin dagiti Neill ken dagiti Carano idiay Estados Unidos.
“Nagtultuloy ti panangasaba. Inorganisarmi ti bagbagimi iti babassit a grupo ken sinarungkaranmi dagiti tattao iti sardam. Masansan a nagpaut agingga iti tengnga ti rabii ti panagsasaritami kadagiti interesado. Pasaray makiraman uray dagiti ministro a Protestante iti saritaan. Idi 1959 nabuangay ti umuna a kongregasion. Kalpasanna, idi 1960 opisial a binigbig ti gobierno ti timpuyog dagiti Saksi ni Jehova. Napalalo ti ragsakmi. Napno iti rag-o ken makapagagar a naespirituan nga aktibidades dagidi nga immuna a tawtawen. Pudno a binendisionan ni Jehova ti pangngeddengmi nga umakar iti lugar nga addaan dakdakkel a panagkasapulan.” Ni Sister Schenck ket agtawen itan iti 87, ken simamatalek pay laeng nga agserserbi ken Jehova iti kongregasionna.
Rimmang-ay ti Trabaho
Idi 1969 naidestino idiay Tahiti kas special pioneer ti dua a Saksi a taga Francia, da Jacques ken Paulette Inaudi. Malagip ni Jacques: “Idi dimtengkami idiay Tahiti, adda laeng 124 nga agibumbunannag, maysa a kongregasion idiay Papeete, ken dua nga special pioneer idiay Vairao, iti peninsula.” Naisilpo ti peninsula iti Tahiti babaen ti isthmus. Asideg idin a maangay ti “Talna Ditoy Daga” nga Internasional nga Asamblea. “Dayta ti damo a kapadasak iti panangorganisar iti kombension,” intuloy ni Jacques. “Kinasapulanmi ti agplano iti Ingles a sesion para kadagiti bisita, mangbukel iti orkestra para kadagiti kanta iti Pagarian, ken mangensayo iti dua a drama. Naaramid amin daytoy a trabaho iti kaadda laeng ti 126 nga agibumbunannag. Masiguradok a ni Jehova ti nangaramid iti kadakkelan a pasetna.” Dakkel a ragsak para kadagiti taga-isla ti timmabuno a 488. Para iti adu kadakuada, dayta ti damo a gundaway a maam-ammoda dagiti padada a Saksi a naggapu iti sabsabali a pagilian.
Di nagbayag kalpasanna, natudingan ni Jacques Inaudi kas agdaldaliasat a manangaywan. Kabayatan ti panangbisbisitana kadagiti nadumaduma nga isla, nakitana nga adu ti interesado ngem bassit ti agibumbunannag iti Pagarian a mangsukay iti interesda. “Gapuna pinaregtak ti adu a pamilia nga umakar kadagitoy nga isla tapno agserbi iti lugar nga addaan dakdakkel a pakasapulan,” inlawlawag ni Jacques. “Gapuna in-inut a nagsaknap ti naimbag a damag kadagidiay nga isla.” Nagserbi ni Brother Inaudi kas agdaldaliasat a manangaywan manipud 1969 agingga iti 1974, ket ita panglakayen iti maysa kadagiti kongregasion idiay Tahiti.
Ti maysa kadagiti nangipangag iti pammaregta ni Brother Inaudi isu ni Auguste Temanaha, maysa kadagiti walo a tattao a nabautisaran idi 1958. Insalaysayna ti napasamak. “Idi 1972 ti manangaywan iti sirkito, ni Jacques Inaudi, pinaregtanakami nga umakar ken agserbi idiay Huahine, maysa kadagiti Leeward Island iti grupo ti Society. Bimdengak gapu ta panagbasa iti Biblia laeng ti maipapaay kaniak iti kongregasion ket iti panagriknak saanak a kualipikado iti kasta a responsabilidad. Nupay kasta, sangkaibaga kaniak ni Brother Inaudi, ‘Dika agdanag, kabaelam dayta!’ Di nagbayag nakaikeddengkami. Iti kasta, idi 1973 inlakomi ti amin ket immakarkami, agraman ti tallo a babassit nga annakmi, idiay Huahine.
“Apagsangpetmi, natakuatak a kasapulan a rugiak ti amin—ti Panagadal iti Pagwanawanan, Teokratiko nga Eskuelaan iti Panagministro, ken dadduma pay. Saan a nalaka dayta, ngem sinalakniban ken tinulongannakami ni Jehova. Addada gundaway a tinulongannakami nga agsapul iti lugar a paggianan. Kalpasanna, idi a pinadas ti maysa a grupo dagiti bumusbusor a papanawen dagiti Saksi iti isla, timmakder ti maysa a lokal a politiko a nangdepensa kadakami. Wen, pudno a binantayannakami ni Jehova kabayatan amin dayta a panawen.” Ita, addan dua a kongregasion idiay Huahine—maysa a Pranses a kongregasion nga addaan 23 nga agibumbunannag ken maysa a Tahitiano nga addaan 55 nga agibumbunannag.
Idi 1969, naibaon ni Hélène Mapu kas special pioneer tapno agserbi idiay peninsula. “Adu ti interesado idiay peninsula, ket iti apagbiit la a panawen, nakairugiak iti adu a panangyadal iti Biblia,” kuna ni Hélène. Di nagbayag nabukel ti bassit a kongregasion idiay Vairao, ngem kasapulan dagiti panglakayen. Idi agangay, timmulong ni Colson Deane, a 35 kilometro ti kaadayo ti pagtaenganna idiay Papara. “Kasapulan nga agbalinkami nga organisado tapno makapagserbi idiay Vairao,” insalaysay ni Brother Deane. “Agtartrabahoak idi idiay Faaa, 70 kilometro manipud Vairao iti sabali a bangir ti isla. Kalpasan ti trabaho, agdardarasak nga agawid, a dagasek ti pamiliak, sa mapan idiay Vairao. Idi agangay kasapulan nga umakarkami idiay Faaa maigapu iti trabahok. Masuportaranmi pay ngata ti kongregasion idiay Vairao? Talaga a kayatmi a tulongan dagiti kakabsat sadiay, gapuna inkeddengmi nga itultuloy. Kadagiti gimong iti rabii manmanokami a makaawid sakbay nga agtengnga ti rabii gapu ta kasapulan nga itulodmi dagidiay awanan iti lugan. Inaramidmi daytoy iti las-ud ti lima a tawen. Makaparagsak unay ita a makita ti uppat a kongregasion iti daytoy a paset ti isla, ket addaankami kadagiti nasasayaat a lagip kadagidi nga aldaw.”
Nagbalin ti Tahiti a Sanga
Idi 1974 ti bilang dagiti agibumbunannag iti Pagarian idiay Tahiti ket nakagteng iti 199. Iti simmaganad a tawen, idi a da N. H. Knorr ken ni F. W. Franz, presidente ken bise presidente idi ti Watch Tower Society, simmarungkarda iti French Polynesia, nakitada nga ad-adda a praktikal a maimatonan ti trabaho a panangasaba idiay French Polynesia, saan a manipud iti Fiji a nasurok a 3,500 kilometro ti kaadayona, no di ket manipud iti Tahiti. Gapuna, idi Abril 1, 1975, naipasdek ti sanga idiay Tahiti, ket ti manangaywan iti sirkito, ni Alain Jamet, ti natudingan a manangaywan iti sanga.
Sumagmamano a tawenen ti napalabas, insarsarita ni Brother Jamet dagiti nakaskasdaaw a bendision manipud ken Jehova. “Sipud idi 1975 dakkel a panagregget ti naaramid tapno maidanon ti naimbag a damag iti amin nga isla ken puro iti teritoriami, a mangsaklaw iti lugar a kas kadakkel ti Makinlaud a Europa. Makaparagsak dagiti resulta. Idi 1983 ti bilang dagiti agibumbunannag ket nakagteng iti 538. Iti dayta a tawen naipasdek idiay Paea ti patakder para iti sanga nga opisina ken Pagtaengan a Bethel. Ita, adda agarup 1,900 nga agibumbunannag a naiwaras iti 30 a kongregasion iti Society Islands, maysa a kongregasion ken maysa a naiputputong a grupo iti Austral Islands, maysa a kongregasion ken dua a naiputputong a grupo iti Marquesas, ken sumagmamano a naiputputong a grupo iti Tuamotu ken iti Gambier Islands. Adu a baro a Kingdom Hall ti maipatpatakder—tallo iti Marquesas ken pito idiay Tahiti—tapno maasikaso dagiti umad-adu a kabbaro a tumabtabuno kadagiti gimong. Iti napalabas a 20 a tawen, pudno a binendisionan ni Jehova ti panagreggetmi a mangsukay iti tay-ak iti Tahiti.”
Adu Pay ti Aramiden
Nagsayaat ti pangnamnamaan para iti irarang-ay idiay French Polynesia. Idi Marso 23, 1997, ag-5,376 a tattao ti nagtataripnong a kadua dagiti Saksi ni Jehova iti intero a French Polynesia maipaay iti Pananglaglagip iti ipapatay ni Jesu-Kristo. Tapno maipaay ti naespirituan a kasapulan dagitoy interesado a tattao, naipablaak dagiti naespirituan a publikasiontayo iti Biblia iti adu a lokal a pagsasao. Malaksid iti Tahitiano, naisagana ti literatura iti pagsasao a Paumotu, a maus-usar iti Puro ti Tuamotu ken iti Amianan ken Abagatan a Marquesa.
Ti agtultuloy nga irarang-ay ken dagiti nasasayaat a kapadasan tinulonganna dagiti agibumbunannag iti Pagarian idiay Tahiti a mangapresiar nga ad-adda a naan-anay iti ayat ken kinaanus ni Jehova, “a ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno,” uray kadagiti adayo nga isla iti South Sea. (1 Timoteo 2:4) Dagiti Saksi ni Jehova idiay Tahiti ken iti sabsabali pay nga isla iti French Polynesia sibubukel ti pammatida iti kari ni Jehova a: “Dagiti purpuro urayendakto, ken agtalekdanto kadagiti takiagko.”—Isaias 51:5.
[Mapa iti panid 26]
(Para iti aktual a pannakaurnosna, kitaem ti publikasion)
As-asikasuen ti sanga idiay Tahiti dagiti kasapulan ti French Polynesia
AUSTRALIA
[Ladawan iti panid 25]
Manipud kannigid nga agpakannawan: Alain Jamet, Mary-Ann Jamet, Agnès Schenck, Paulette Inaudi ken Jacques Inaudi
[Ladawan iti panid 27]
Sanga nga opisina idiay Tahiti