Birokenyo ti Naimbag Kadagiti Isuamin
“Lagipennak, O Diosko, maipaay iti pagimbagan.”—NEHEMIAS 13:31.
1. Kasano a mangipakita ni Jehova iti kinaimbag kadagiti isuamin?
KALPASAN ti napaut a daguyemyem ken nalidem nga al-aldaw, naiduma ti rikna no agbukirad ti init. Nasarsaranta ken naragragsak dagiti tattao. Iti sabali a bangir, kalpasan ti napaut a kalgaw, makapagin-awa ken makapabang-ar no agtudo, uray ibayakabakna pay ketdi. Ni Jehova, ti naayat a Namarsua kadatayo, diniseniona iti atmospera ti daga daytoy nakapimpintas a sagut a paniempo. Intampok ni Jesus ti kinaparabur ti Dios idi insurona: “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo; tapno mapaneknekanyo ti bagbagiyo nga annak ni Amayo nga adda iti langlangit, yantangay pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mateo 5:43-45) Wen, mangipakita ni Jehova iti kinaimbag kadagiti isuamin. Kasta ti nasken nga ikagumaan a tuladen dagiti adipenna babaen ti panangbirokda iti naimbag kadagiti sabsabali.
2. (a) Apay a mangipakpakita ni Jehova iti kinaimbag? (b) Ania ti kitkitaen ni Jehova no palpaliiwenna ti reaksiontayo iti kinaimbagna?
2 Apay a mangipakpakita ni Jehova iti kinaimbag? Sipud idi nagbasol ni Adan, birbiroken latta ni Jehova ti naimbag kadagiti tattao. (Salmo 130:3, 4) Panggepna nga agbiag manen iti Paraiso ti natulnog a sangatauan. (Efeso 1:9, 10) Gapu iti di kaikarian a kinamanangngaasina, naaddaantayo iti namnama a maispal manipud iti basol ken kinaimperpekto babaen ti naikari a Bin-i. (Genesis 3:15; Roma 5:12, 15) Agsublinto iti kinaperpekto dagidiay mangbigbig iti urnos ti subbot. Palpaliiwen ita ni Jehova ti tunggal maysa kadatayo. Ti maysa kadagiti kitkitaenna isu ti reaksiontayo iti kinaparaburna. (1 Juan 3:16) Makitana ti aniaman nga aramidentayo a mangpaneknek iti panangapresiartayo iti kinaimbagna. “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna,” insurat ni apostol Pablo.—Hebreo 6:10.
3. Ania a saludsod ti maikari nga usigentayo?
3 Kasano ngarud a matuladtayo ni Jehova no iti panangbirok iti naimbag kadagiti sabsabali? Usigentayo dagiti sungbat dayta a saludsod iti uppat a benneg ti biag: (1) ti Nakristianuan a ministerio, (2) ti pamilia, (3) ti kongregasion, ken (4) ti relasiontayo kadagiti dadduma.
Iti Panangasaba ken Panagaramid iti Adalan
4. Kasano a ti pannakiraman iti Nakristianuan a ministerio ipakitana a birbirokentayo ti naimbag kadagiti sabsabali?
4 “Ti talon isu ti lubong,” inlawlawag ni Jesus kas sungbat kadagiti adalanna idi inyimtuodda ti kaipapanan ti pangngarig maipapan iti trigo ken dakes a ruot. Kas moderno-aldaw nga adalan ni Kristo, mabigbigtayo daytoy a kinapudno no makiramantayo iti ministerio. (Mateo 13:36-38; 28:19, 20) Ti ministeriotayo iti tay-ak iramanna ti publiko a panangideklaratayo iti pammatitayo. Ti mismo a kinapudno nga agdindinamag ita dagiti Saksi ni Jehova gapu iti panangasabada iti binalaybalay ken kadagiti lansangan paneknekanda ti kinagagettayo a mangbirok kadagiti amin a maikari nga umawat iti mensahe ti Pagarian. Kinapudnona, imbilin ni Jesus: “Iti aniaman a siudad wenno purok a serkanyo, birokenyo no siasino iti dayta ti maikari.”—Mateo 10:11; Aramid 17:17; 20:20.
5, 6. Apay nga itultuloytayo nga ikagumaan a sarungkaran dagiti tattao kadagiti pagtaenganda?
5 Kadagiti di mapakpakadaan a panangsarungkartayo kadagiti tattao, madlawtayo no ania ti reaksionda iti mensahetayo. No dadduma, dumngeg ti maysa a kameng ti pamilia, idinto ta adda maysa a kapamiliada nga agkuna, “Saankami nga interesado,” a mangguped iti saritaan. Anian a makapaladingit ta maapektaran ti tignay ti dadduma gapu iti ibubusor wenno kinaawan interes ti maysa a tao! Ania ngarud ti mabalintayo nga aramiden tapno maitultuloytayo a biroken ti naimbag kadagiti isuamin?
6 Ti sumaruno nga isasarungkar iti dayta a pagtaengan no mangasabatayo iti dayta a lugar ket nalabit mangyeg iti gundaway tapno personal a makasarita ti tao a nangtungday iti damo a panagsasarita. Makatulong iti panagsaganatayo no lagipentayo ti napasamak iti damo a pannakisarita. Mabalin a nasayaat ti motibo ti nagkedked, a patienna a nasken a medmedanna daydiay silulukat ti lapayagna a dumngeg iti mensahe ti Pagarian. Dagiti kapanunotanna ket nalabit naimpluensiaan kadagiti di umiso nga impormasion maipapan kadagiti panggeptayo. Ngem saan a dayta ti manglapped kadatayo a mangikagumaan a mangikasaba iti naimbag a damag ti Pagarian iti dayta a pagtaengan, a siaannad nga aturen dagiti di umiso a pannakaammo. Interesadotayo a tulongan ti isuamin a dumteng iti umiso a pannakaammo iti Dios. Iti kasta, mabalin nga iyadani ni Jehova dayta a tao kenkuana.—Juan 6:44; 1 Timoteo 2:4.
7. Ania ti makatulong kadatayo nga agbalin a positibo no makisaritatayo kadagiti tattao?
7 Idi binilin ni Jesus dagiti adalanna, inramanna ti maipapan iti panangbusor ti pamilia. Saan kadi a kinunana: “Immayak a mangpataud iti pannakabingbingay, ti maysa a lalaki maibusor iti amana, ken ti anak a babai maibusor iti inana, ken ti maysa nga agtutubo nga asawa a babai maibusor iti katuganganna-a-babai”? Innayon ni Jesus: “Dagiti kabusor ti maysa a tao isudanto dagiti tattao iti bukodna a sangakabbalayan.” (Mateo 10:35, 36) Kaskasdi, agbalbaliw dagiti kasasaad ken kababalin. Ti di mapakpakadaan a panagsakit, ipupusay ti maysa a kabagian, dagiti didigra, parikut iti emosion, ken di mabilang a dadduma pay a banag impluensiaanda ti reaksion dagiti tattao iti panangasabatayo. Talaga kadi a birbirokentayo ti naimbag kadakuada no negatibotayo—a pampanunotentayo a didanto pulos mangipangag? Apay a dikay siraragsak a sumarungkar iti pagtaenganda iti sabali a gundaway? Mabalin a sabalinto ti reaksionda. No dadduma, agpannuray dayta saan laeng nga iti ibagatayo no di pay ket no kasanotayo nga ibaga dayta. Ti nasged a kararag ken ni Jehova sakbay a mangasabatayo ket sigurado a tumulong kadatayo nga agbalin a positibo ken mangiparang iti mensahe ti Pagarian iti pamay-an a makaay-ayo iti isuamin.—Colosas 4:6; 1 Tesalonica 5:17.
8. Ania ti mabalin a resulta ti panangbirok dagiti Kristiano iti naimbag kadagiti di manamati a kabagianda?
8 Iti dadduma a kongregasion, adu ti agkakapamilia nga agserserbi ken ni Jehova. Masansan a padayawan ken raemen dagiti ub-ubing ti natataengan a kabagianda no naanep daytoy. Ti nasayaat a relasion ti natataengan iti pamilia ken asawana balbaliwanna ti panangmatmat dagiti ub-ubing. Adu a Kristiano a babbai ti nakaguyugoy iti asawada uray “awan ti sao” gapu ta impangagda ti balakad ni apostol Pedro.—1 Pedro 3:1, 2.
Iti Pamilia
9, 10. Kasano a binirok da Jacob ken Jose ti naimbag iti kapamiliada?
9 Ti kinasinged dagiti kameng ti maysa a pamilia ket mangyeg iti sabali pay a gundaway tapno biroken ti naimbag kadagiti sabsabali. Usigenyo ti maysa a leksion manipud iti panangtrato ni Jacob kadagiti annakna. Iti Genesis kapitulo 37, bersikulo 3 ken 4, ipamatmat ti Biblia a naisangsangayan ti panagayat ni Jacob ken ni Jose. Immapal dagiti kakabsat ni Jose, nga uray la nagkukumplotda tapno papatayenda ti kabsatda. Ngem kitaenyo ti reaksion da Jacob ken Jose idi agangay. Agpadpada a binirokda ti naimbag iti kapamiliada.
10 Idi nagbalin ni Jose kas mamangulo nga administrador ti taraon bayat ti bisin idiay Egipto, inawat ni Jose dagiti kakabsatna. Nupay dina inyam-ammo a dagus ti kinasiasinona, immaniobrana dagiti pasamak tapno masiguradona a nasayaat ti pannakaaywanda ken adda taraon nga iyawidda iti lakayen nga amada. Wen, uray no ni Jose ti nagpuniponan ti pungtotda, ti pagsayaatanda ti pinanunot ni Jose. (Genesis 41:53–42:8; 45:23) Kasta met, idi agngangabiten a matay, nangisawang ni Jacob kadagiti propetiko a bendision kadagiti amin nga annakna. Nupay naikkat ti dadduma a pribilehioda gapu iti di umiso a tignayda, adda amin natawidda iti daga. (Genesis 49:3-28) Anian a nagsayaat nga ebkas ti di agkupas a panagayat ni Jacob!
11, 12. (a) Ania a naimpadtuan a pagarigan ti mangipaganetget iti kinapateg ti panangbirok iti naimbag iti uneg ti pamilia? (b) Ania a leksion ti maadaltayo iti ulidan ti ama iti ilustrasion ni Jesus maipapan iti barayuboy nga anak?
11 Ti mabayag a panagitured ni Jehova mainaig iti awan pammatina a nasion ti Israel ket ad-adda a manglawlawag no kasano a binirokna ti naimbag kadagiti adipenna. Babaen ti panangusarna iti kasasaad ti pamilia ni propeta Oseas, impakita ni Jehova ti di agkupas a panagayat ni Jehova. Namin-ano a nagbasol iti pannakikamalala ni Gomer, ti asawa ni Oseas. Iti laksid dayta, binilin ni Jehova ni Oseas: “Mapanka iti maminsan pay, mangayatka iti babai nga inayat ti maysa a kadua ken makikamkamalala, kas iti daydiay ayat ni Jehova iti annak ti Israel bayat ti ibabaw-ingda kadagiti sabali a didios ken panagayatda kadagiti bibingka a pasas.” (Oseas 3:1) Apay a kasta ti imbilinna? Manipud kadagiti nasion a simmiasi iti danana, ammo ni Jehova nga adda dagiti indibidual nga agtignay iti panagan-anusna. Kinuna ni Oseas: “Kalpasanna agsublinto ti annak ti Israel ket sigurado a sapulenda ni Jehova a Diosda, ken ni David nga arida; ket sigurado nga agtaytayegtegdanto nga umay ken Jehova ken iti kinaimbagna iti kamaudianan a paset dagiti aldaw.” (Oseas 3:5) Nagsayaat la ketdi daytoy a pagwadan a mennamennaen no tumaud dagiti pakarigatan ti pamilia. Nasayaat met a pagwadan ti kinaanus no itultuloyyo a biroken ti naimbag kadagiti kapamilia.
12 Ti pangngarig ni Jesus maipapan iti barayuboy nga anak ket ad-adda a manglawag no kasano a birokentayo ti naimbag mainaig iti pamiliatayo. Nagawid ti ub-ubing nga anak kalpasan nga insardengna ti nabarayuboy a panagbiagna. Kinaasian ti amana. Ania ti reaksion ti ama idi nagreklamo ti inauna nga anak a di pulos nangpanaw iti pamiliada? Kinuna ti ama iti inauna nga anakna: “Anak, addaka a kankanayon kaniak, ket amin a bambanag a kukuak ket kukuam.” Saan dayta a napait a panangtubngar no di ket maysa a pammatalged iti panagayat ti ama. “Masapul nga agragsak ken agrag-otayo,” intuloyna, “agsipud ta daytoy a kabsatmo natay ket nagbiag, ken isu napukaw ket nasarakan.” Umasping iti dayta, maitultuloytayo met a biroken ti naimbag kadagiti sabsabali.—Lucas 15:11-32.
Iti Kongregasion Kristiano
13, 14. Ania ti maysa a pamay-an a maipakita ti natan-ok a linteg ti ayat iti uneg ti kongregasion Kristiano?
13 Kas Kristiano, ikagumaantayo nga iyaplikar ti natan-ok a linteg ti ayat. (Santiago 2:1-9) Pudno, mabalin a kalangentayo dagiti kakongregasiontayo a naiduma unay ti kasasaadna kadatayo. Ngem adda pay la kadi kadatayo ti “panangidumduma” maibatay iti puli, kultura, wenno uray pay iti narelihiosuan a nalikudan? No adda pay laeng, kasanotayo a maipangag ti balakad ni Santiago?
14 Ti panangabrasa kadagiti amin a tumabuno kadagiti Nakristianuan a gimong ket pammaneknek ti kinaimbagtayo. No datayo ti umun-una a makisarita kadagiti kabbaro a tumabuno iti Kingdom Hall, mabalin a maikkat ti pannakariknada iti nerbios ken bain. Kinapudnona, dadduma kadagiti damo a timmabuno iti Nakristianuan a gimong ti nagkuna: “Mannakigayyemda amin. Kasla am-ammodak amin. Komportable ti panagriknak.”
15. Kasano a matulongan dagiti agtutubo iti kongregasion tapno maipakitada ti pannakaseknan kadagiti nataengan?
15 Iti dadduma a kongregasion, sumagmamano nga agtutubo ti nalabit aguummong iti uneg wenno ruar ti Kingdom Hall kalpasan ti gimong, a liklikanda ti makilangen kadagiti nataengan. Ania a positibo a banag ti mabalin nga aramiden tapno maikkat daytoy nga ugali? Siempre, ti damo nga addang isu ti panangsanay dagiti nagannak kadagiti annakda iti pagtaengan, nga isaganada ida kadagiti gimong. (Proverbio 22:6) Mabalin nga italek kadakuada ti panangisagana kadagiti nadumaduma a publikasion tapno adda usaren ti tunggal maysa no mapanda makigimong. Dagiti met nagannak ti kasayaatan a mangparegta kadagiti annakda a mangiranud iti kapanunotanda kadagiti nataengan ken addaan iti an-annayen no addada iti Kingdom Hall. Makarikna iti pannakapnek dagiti annak no adda napateg a banag a mayallatiwda kadagiti kasta a kakabsat.
16, 17. Kasano a dagiti natataengan birokenda ti naimbag kadagiti agtutubo iti kongregasion?
16 Mangipakita koma iti pannakaseknan dagiti natataengan a kakabsat kadagiti agtutubo iti kongregasion. (Filipos 2:4) Mabalin nga isuda ti mangyun-una a makisarita kadagiti agtutubo iti makapabileg a pamay-an. Kaaduanna a maitampok dagiti nagsasayaat a punto kabayatan ti gimong. Mabalin nga imtuoden kadagiti agtutubo no nagustuanda ti gimong ken no adda ti aniaman a punto a nangnangruna nga apresiarenda ken mabalin a mayaplikar. Kas napateg a kameng ti kongregasion, maapresiar koma ti kinaatentibo dagiti agtutubo ken makomendaran ti aniaman a komentoda kabayatan ti gimong wenno aniaman ti nakipasetanda iti programa. Ti pamay-an ti pannakilangen dagiti agtutubo kadagiti nataengan iti kongregasion ken ti panangitungpalda kadagiti simple nga obrada iti pagtaengan ti mangipakita a kabaelanda nga ibaklay dagiti nadagdagsen nga annongen inton agangay.—Lucas 16:10.
17 Babaen ti panangakseptarda kadagiti responsabilidad, dadduma nga agtutubo ti rimmang-ay agingga a nakaawatda kadagiti nadagdagsen nga annongen gapu kadagiti naespirituan a kualipikasionda. No okupado ti maysa, makatulong met dayta a mangparmek iti minamaag a kababalin. (2 Timoteo 2:22) Dagita nga annongen ti mabalin a ‘mangsubok no maikari’ met laeng dagiti kakabsat a mangragragpat iti pribilehio kas ministerial nga adipen. (1 Timoteo 3:10) Ti sisasagana a pannakiramanda kadagiti gimong ken ti kinaregtada iti ministerio, agraman ti pannakaseknanda kadagiti isuamin iti kongregasion, ti tumulong kadagiti panglakayen a mangusig no maikarida met laeng iti kanayonan nga annongen.
Panangbirok iti Naimbag Kadagiti Isuamin
18. Ania a silo ti nasken a liklikan no mangar-aramid iti pangngeddeng, ken apay?
18 “Ti panangipakita iti panangidumduma iti panangukom saan a nasayaat,” kuna ti Proverbio 24:23. Ti nailangitan a sirib kalikagumanna a liklikan dagiti panglakayen ti panangidumduma no mangngeddengda mainaig kadagiti bambanag iti kongregasion. Kinuna ni Santiago: “Ti sirib manipud ngato umuna iti amin nadalus, kalpasanna natalna, nainkalintegan, sisasagana nga agtulnog, napno iti asi ken naimbag a bungbunga, saan a mangpataud kadagiti panangidumduma, saan a managinsisingpet.” (Santiago 3:17) Nalawag a no biroken ti naimbag kadagiti dadduma, masapul a siguraduen dagiti panglakayen a saan a naimpluensiaan ti pangngeddengda kadagiti personal a relasion wenno emosion. “Ti Dios agsaad iti gimong Daydiay Nadibinuan,” insurat ni salmista Asaf. “Iti tengnga ti didios [wenno mabalin a kunaen “dagidiay arig didiosen,” a tumukoy kadagiti natauan nga ukom] isu mangukom: ‘Kasanonto kabayag a manguk-ukomkayo buyogen ti di kinahustisia ken mangipakpakita iti panangidumduma kadagiti met laeng nadangkes?’” (Salmo 82:1, 2) Maitunos iti dayta, nasken a liklikan dagiti Kristiano a panglakayen ti aniaman a mangipasimudaag iti paboritismo mainaig kadagiti bambanag a nakairamanan ti maysa a gayyem wenno kabagian. Iti kasta, mataginayonda ti panagkaykaysa ti kongregasion ken agtultuloy ti panagayus ti espiritu ni Jehova.—1 Tesalonica 5:23.
19. Kadagiti ania a pamay-an a birokentayo ti naimbag kadagiti sabsabali?
19 Iti panangbiroktayo iti naimbag kadagiti kakabsattayo, iyanninawtayo ti kababalin ni Pablo idi kasarsaritana ti kongregasion ti Tesalonica. Kinuna: “Mainayon pay, adda panagtalekmi iti Apo maipapan kadakayo, nga ar-aramidenyo ken itultuloyyonto nga aramiden ti bambanag nga ibilinmi.” (2 Tesalonica 3:4) Ad-adda a matignaytayo a mangpalabas kadagiti pagkurangan dagiti dadduma no birokentayo ti naimbag kadakuada. Kitaentayo dagiti benneg a mabalintayo a pangkomendaran kadagiti kakabsattayo, ket sigurado a maliklikantayo ti agbalin a kritiko. “Ti sapsapulen kadagiti mayordomo,” insurat ni Pablo, “ket ti maysa a tao masarakan a matalek.” (1 Corinto 4:2) Ti kinamatalek dagidiay mangay-aywan iti kongregasion ken dagiti amin a Kristiano a kakabsattayo tignayennatayo a mangipateg kadakuada. Iti kasta, ad-adda a sumingedtayo kadakuada, a mangpalagda iti singgalut ti Nakristianuan a panaggagayyem. Matuladtayo ti panangmatmat ni Pablo kadagiti kakabsat idi kaaldawanna. ‘Katrabahuan ida maipaay iti pagarian ti Dios,’ ken ‘makapabilegda a tulong’ kadatayo. (Colosas 4:11) Iti kasta, maiparangarangtayo ti kababalin ni Jehova.
20. Aniada a bendision ti agur-uray kadagidiay mangbirok iti naimbag kadagiti isuamin?
20 Ikararagtayo la ketdi ti kararag ni Nehemias: “Lagipennak, O Diosko, maipaay iti pagimbagan.” (Nehemias 13:31) Anian a ragsaktayo ta biroken ni Jehova ti naimbag kadagiti tattao! (1 Ar-ari 14:13) Kasta met koma ti panangtratotayo kadagiti dadduma. No aramidentayo dayta, adda namnamatayo a maispal ken mangtagiragsak iti biag nga agnanayon iti baro a lubong a nakaas-asidegen.—Salmo 130:3-8.
Ania ti Sungbatyo?
• Apay a mangipakpakita ni Jehova iti kinaimbag kadagiti isuamin?
• Kasanotayo a biroken ti naimbag kadagiti sabsabali
• iti ministeriotayo?
• iti pamiliatayo?
• iti kongregasiontayo?
• iti amin a pannakirelasiontayo?
[Ladawan iti panid 18]
Nupay ginura idi dagiti kakabsatna, binirok ni Jose ti naimbag kadakuada
[Ladawan iti panid 19]
Ti ibubusor dina lapdan ti panangikagumaantayo a tumulong kadagiti isuamin
[Ladawan iti panid 20]
Iti laksid ti inaramidda, binendisionan ni Jacob ti amin nga annakna
[Ladawan iti panid 21]
Abrasaenyo ti amin kadagiti Nakristianuan a gimong