No Kasanotayo a Tulongan Dagiti Kapamiliatayo a Saan Pay a Saksi

1-2. Idi nagbalintayon a Saksi, ania ti dadduma a rason a saanen a nasayaat ti relasiontayo kadagiti kapamiliatayo a saan a Saksi?

ADDA idi lalaki a kayatna ti agbalin a pasurot ni Jesus. Ngem kastoy ti imbaga ni Jesus kenkuana: “Agawidkan ken ipadamagmo kadagiti kabagiam ti amin nga inaramid kenka ni Jehova.” (Mar. 5:19) Apay a kasta ti imbagana? Ammo ngamin ni Jesus a no adda naimbag a damag a maammuantayo, kayattayo la ketdi nga ipakaammo dayta kadagiti ay-ayatentayo.

² Ania ti nariknam idi damom a naammuan ti naimbag a damag? Sigurado a nakaragragsakka ken kayatmo nga ipakaammo dayta kadagiti ipatpategmo! Ngem baka dida kayat dayta nga impadamagmo. Wenno baka saan ngamin a nataktika ti panangipadamagmo isu a nasuronda kenka. Ania ngarud ti makatulong tapno agtalinaed wenno maisubli ti nasayaat a relasionmo kadakuada a dimo maikompromiso dagiti pagalagadan ni Jehova?

3. Ania ti pagsasaritaantayo iti daytoy nga artikulo?

³ Iti daytoy nga artikulo, ammuentayo: (1) No kasano a makatulong ti pannakipagrikna tapno itultuloytayo nga ayaten ken anusan dagiti kapamiliatayo uray no dida pay kayat ti agsursuro maipapan ken Jehova; (2) no ania dagiti aramidentayo no adda maibaga wenno maaramidda a makapasakit kadatayo; (3) no kasano a matulongantayo ida no naanustayo ken no saantayo a maawanan iti namnama; ken (4) no kasanotayo a maipakita nga ay-ayatentayo ida.

MAKIPAGRIKNAKA KADAKUADA

4. Ania ti inaramid ni Jesus kadagiti saan pay idi nga interesado iti mensahena?

⁴ Saan a dagus a nauma ni Jesus kadagiti saan pay nga interesado iti mensahena. Inyarigna ketdi ti bagina iti paraaywan iti kaubasan a nangpadas iti adu a pamay-an tapno agbunga ti higos nga awan pay idi ti bungana. (Luc. 13:​6-9) Idi imbaga ni Jesus dayta nga ilustrasion, nasuroken a tallo a tawen a tultulonganna dagiti padana a Judio tapno mamatida kenkuana ken agbalinda a pasurotna. Apay nga inkagumaanna nga aramiden dayta? Ngamin, nakipagrikna ken naasian kadakuada isu nga inan-anusanna ida.

5. Apay a naasian ni Jesus kadagiti padana a Judio?

⁵ Naasian ni Jesus kadagiti padana a Judio gapu ta ammona a saan ida a tultulongan dagiti lider ti relihion a mangammo iti kinapudno maipapan iti Dios. Nakita ni Jesus a “kasda la karnero nga awanan pastor.” (Mar. 6:34) Di nagbayag sakbay la unay ti ipapatayna, sinangitanna pay ketdi ti Jerusalem. Ammona ngamin a matayto ti kaaduan a tattao nga aggigian dita a siudad gapu ta saanda a mamati kenkuana ken iti Amana. (Luc. 19:​41-44) Kas ken Jesus, no laglagipentayo no apay a masapul a maammuan dagiti kapamiliatayo ti kinapudno, bumileg met ti determinasiontayo a mangasaba kadakuada.

6. Apay a masapul nga an-anusantayo dagiti kapamiliatayo a saan pay a Saksi? (Galacia 6:9)

⁶ Basaen ti Galacia 6:9. Uray no saan pay nga interesado dagiti kapamiliatayo, masapul nga an-anusantayo ida ken saantayo a sumuko nga “agaramid iti nasayaat.” Tiempo ngamin ti kasapulan tapno maparut ti maysa a tao dagiti nabayagen nga opinionna ken maaddaan iti pammati ken Jehova. Nalabit adda met idi tiempo a maysaka kadagiti ‘agbibiag iti lubong nga awanan iti namnama ken awanan iti Dios.’ (Efe. 2:12) Ngem sigurado nga adda nangan-anus a timmulong kenka. No an-anusam met dagiti kapamiliam, baka matulongam ida nga agserbinto met ken Jehova.

DAGITI ARAMIDEM NO ADDA MAKAPASAKIT A MAIBAGA WENNO MAARAMID DAGITI KAPAMILIAM

7. Ania ti makagapu a saan a dagus a namati ken Jesus dagiti kakabsatna iti ina?

⁷ Posible a nadamag met la idi agangay dagiti kakabsat ni Jesus iti ina dagiti milagro nga inaramidna idiay Galilea. (Luc. 4:​14, 22-24) Ngem idi damo, saanda pay la a mamati kenkuana. (Juan 7:5) Apay? Awan ti ibaga ti Biblia. Ngem ilawlawagna ti dua a posible a rason no apay a saan a kayat idi ti dadduma a Judio ti agbalin nga adalan ni Jesus. Mabuteng ngamin ti dadduma, amangan no idadanes ida dagiti kalugaranda no mamatida ken Jesus. (Juan 9:​18-22) Dadduma met ti makaam-ammon ken Jesus sipud kinaubingna. Isu a marigatanda a mangakseptar a ti ordinario a tao a kas kenkuana ket isu ti Anak ti Dios. (Mar. 6:​1-4) Mabalin a kasta met ti narikna dagiti kakabsat ni Jesus iti ina. Mabalin ngata a dagita met la ti rason a saan a patien dagiti kapamiliam ti ikaskasabam?

8. Apay a mabalin a makaibaga wenno makaaramid dagiti kapamiliatayo iti pakasaktantayo?

⁸ Panunotem no apay a makaibaga wenno makaaramidda iti pakasaktantayo. Mabalin a karaman dagiti kakabsat ni Jesus kadagiti kabagianna a nangibaga a “nadadaelen ti panunotna.” (Mar. 3:21) Apay a kasta ti imbagada? Ipakita ti konteksto a gapu ta nakaad-adu ti ar-aramiden ni Jesus, dina payen masango ti mangan. (Mar. 3:20) Pampanunoten ngata dagiti kabagianna a nakapampanatiko ni Jesus? Posible. Mabalin met a kasta ti pampanunoten dagiti kapamiliatayo. Baka ngamin ti ammoda ket kasabatayo la a kasaba ken ti laengen panagdaydayaw iti Dios ti ar-aramidentayo. No kasta ti pagarupda, ipakitatayo ngarud iti sao ken aramidtayo a balanse ti panagbiagtayo.

9. Ania ti mabalin a makatulong tapno mabalbaliwan ti opinion dagiti kapamiliatayo maipapan kadatayo? (1 Pedro 3:​1, 2) (Kitaen met dagiti ladawan.)

⁹ Ipakitam iti aramidmo a saan nga umiso ti pagarupda. No nasingpet ti pannakisaritatayo ken nasayaat ti ipakpakitayo kadagiti kapamiliatayo, baka mabalbaliwan ti opinionda maipapan kadatayo. (Basaen ti 1 Pedro 3:​1, 2.) Kas pagarigan, baka saan nga agserserbi ken Jehova ti asawa ti maysa a sister. No mapan mangasaba wenno makigimong ti sister, baka malidayan ni lakayna wenno makaunget pay ketdi. Siempre, saan a kayat ti sister a kasta ti marikna ni lakayna. Ania ngarud ti mabalin nga aramidenna? Baka baliwanna ti eskediulna a makiraman kadagiti naespirituan nga aktibidad tapno ad-adu ti tiempona para ken lakayna. Baka mapan pay ketdi mangasaba kadagiti oras nga adu ti as-asikasuen ni lakayna wenno no awan iti balayda. No mannakibagay ken rasonable ti sister, mabalin a makatulong dayta tapno agbaliw ti opinion ni lakayna maipapan kadagiti Saksi.

10. No adda negatibo nga ibaga dagiti tattao maipapan kadatayo, kasanotayo a matulad ni Jesus?

¹⁰ Saan a kasapulan a kanayon nga idepensam ti bagim. Idi adda dagiti nangibaga a narawet ken mangnginum kano ni Jesus, saan a nakaunget wenno saanna a pinadas nga idepensa ti bagina. Imbes ketdi, kayatna a dagiti tattao a mismo ti makapaneknek no agpaypayso ti ibagbagada maipapan kenkuana wenno saan. (Mat. 11:19) Impakitana ngarud iti ulidanna a balanse isuna ken ammona a tagiragsaken ti biag. Kas pagarigan, dina imparit ti uminum iti arak. Adda pay ketdi idi tiempo a pinagbalinna nga arak ti danum. (Idilig ti Juan 2:​2, 6-10.) Kas ken Jesus, no adda negatibo nga ibagada maipapan kenka, saan a kasapulan a kanayon nga idepensam ti bagim. Ipakitam ketdi iti aramidmo a balanseka ken ammom met no kasano a tagiragsaken ti biag. Sa bay-am nga isudan ti makaamiris no husto dagiti pagarupda wenno saan. Iti kasta, isudanto a mismo ti makapaneknek a saan met gayam nga agpaypayso dagiti nangngegda a negatibo maipapan kadagiti Saksi ni Jehova.

AGTALINAED A NAANUS KEN SAAN A MAAWANAN ITI NAMNAMA

11. Kasano ti panangtrato ni Jesus kadagiti saan pay idi a manamati a kakabsatna?

¹¹ Ipakita ti salaysay ti Ebanghelio a kanayon nga inan-anusan ni Jesus dagiti kakabsatna. Kas pagarigan, nalawag nga addada met idi idiay Cana idi inaramid ni Jesus ti umuna a milagrona. (Juan 2:​11, 12) Kas nadakamat itay, saan pay la idi a mamati ken Jesus dagiti kakabsatna. Ngem intultuloyna latta ida nga inayat. Ipakita ti Biblia a kalpasan ti agarup tallo a tawen sipud idi inaramidna ti immuna a milagrona idiay Cana, nasingpet latta ti pannakisaritana kadagiti kakabsatna.—Juan 7:​5-8.

12. Ania ti makatulong tapno saantayo a maawanan iti namnama nga agserbinto met laeng ken Jehova ti dadduma a kapamiliatayo?

¹² Naammuantayo a nakaas-asi ni Jehova. Dayta ti makatulong tapno saantayo a maawanan iti namnama nga agserbinto met laeng ken Jehova ti dadduma a kapamiliatayo. Kalpasan a mangrugi ti dakkel a rigat, addanto pay tsansa dagiti tattao nga agserbi ken Jehova. Inton madadael ti ulbod a relihion, baka malagipto dagiti kapamiliatayo nga imbagatayo idin kadakuada ti maipapan iti dayta a pasamak. Isu a baka agdesisiondanto pay ketdin a makikadua kadatayo iti nadalus a panagdaydayaw.a (Apoc. 17:16) No met maipaspasango dagiti kapamiliatayo iti narigat a situasion, aramidentayo ti amin a kabaelantayo a tumulong kadakuada. No makitada a talaga nga ay-ayatentayo ida, baka kayatdanton nga ammuen ti ad-adu pay maipapan kadagiti isursuro ti Biblia.

IPAKITAM NGA AY-AYATEM IDA

13. Uray no nakaad-adu ti ar-aramidentayo para ken Jehova, ania ti ditay kayat a marikna dagiti kapamiliatayo?

¹³ Uray no nakaad-adu ti ar-aramidentayo para ken Jehova, ditay kayat a marikna dagiti kapamiliatayo nga awanen ti tiempotayo para kadakuada wenno saantayo idan nga ay-ayaten. (Mat. 7:12) Kasanotayo a maipakita nga ipatpategtayo ida? Kitaentayo ti sumagmamano a pamay-an.

14-15. Ania ti maysa a pamay-an a maipakitatayo nga ay-ayatentayo dagiti kapamiliatayo a saan pay a Saksi? Mangted iti pagarigan.

¹⁴ Regular a makisaritaka kadakuada ken ibagam nga ay-ayatem ida. Ipakpakitatayo nga ay-ayatentayo dagiti kapamiliatayo no regular a komustaentayo ida. Kas pagarigan, mabalintayo ida nga iteks ken mangi-send kadagiti piktiur no nagbakasiontayo, nagpasiartayo, wenno adda gathering a kadua dagiti gagayyemtayo. Mabalintayo met ida a suratan wenno ikkan iti simple a regalo. Makatulong dayta tapno nasingedtayo latta kadakuada. No aramidentayo dayta, ipakpakitatayo nga ay-ayatentayo ida.

¹⁵ Kitaentayo ti kapadasan ti sister a ni Anna a taga-Armenia. Kanayon nga agkakaduada nga agkakapamilia lalo no adda birthday wenno dadduma pay nga okasion. Idi nagbalinen a Saksi ni Jehova ni Anna, madanagan dagiti kapamiliana baka agbaliwen ti panangtratona kadakuada. Madanaganda met baka rumigatton ti biagna. Ania ti inaramid ni Anna? Imbagana: “No paspasiarek dagiti kapamiliak, iyes-estoriak dagiti mapaspasamak iti biagko. Aw-awisek met no kua ida iti paggigianak sa iyam-ammok ida kadagiti gagayyemko. Gapu iti dayta, am-ammon ti kaaduan a kapamiliak no siasino dagiti gagayyemko ken nalag-an ti riknada kadakuada.” Innayonna, “Ibagbaga ti adu a kapamiliak a nakaragragsak gayam ti biagko isu a saandan a madanagan.”

16. Kasano nga impakita ni Jesus nga interesado iti kasasaad ti biag ni Santiago a kabsatna iti ina? (Kitaen met ti footnote.)

¹⁶ Ipakitam nga interesadoka iti biagda. Kalpasan a napagungar ni Jesus, impakitana a talaga nga interesado iti kabsatna a ni Santiago. Kasano? Nagparang a mismo kenkuana. (1 Cor. 15:7) Permi la ketdi ti ragsak ni Santiago ta nabigbigna a saan a nauma kenkuana ni Jesus. Posible met nga iti dayta a panagkitada nga agkabsat a kombinsidon ni Santiago a talaga a ni Jesus ti Mesias. Kalpasan dayta, posible a tinulongan ni Santiago ti dadduma pay a kapamiliana tapno mamatida met iti kinasiasino ni Jesus.b—Ara. 1:14.

17. Kasanotayo a mayaplikar ti prinsipio ti Roma 12:15? (Kitaen met ti ladawan.)

¹⁷ Basaen ti Roma 12:15. Posible nga addanto latta dagiti makaparagsak ken makapaliday a mapasamak iti biag dagiti kapamiliatayo. No ipakitatayo nga ipatpategtayo ida lalo no kasapulanda unay ti tulongtayo, baka mabalbaliwan ti panangmatmatda iti relihiontayo.c Kas pagarigan, no aganak ti maysa a kapamiliatayo, mabalintayo a regaluan tapno mariknana a makipagragsaktayo kenkuana. No met matayanda, liwliwaentayo ida, ikkantayo ida iti condolence card, wenno mangpanunottayo iti dadduma pay a pamay-an a matulongantayo ida. Ken siempre, ditay met koma liplipatan a regular nga iteks, tawagan, wenno bisitaen ida lalo no addada kadagiti narigat a situasion.

18. Kasanotayo a matulad ti adalan a ni Andres?

¹⁸ Iyam-ammom ida kadagiti kapammatiam. Naammuan ti adalan a ni Andres a ni Jesus ti Mesias. Gapu iti dayta, binirokna ti kabsatna a ni Pedro sa sigagagar nga inyam-ammona ken Jesus. (Juan 1:​40-42) Mabalin met nga aramidentayo dayta. Kas pagarigan, mabalintayo kadi a sagpaminsan nga awisen dagiti kapamiliatayo a makigimong wenno makipangan a kadua dagiti gagayyemtayo? No iyam-ammotayo ida kadagiti kapammatiantayo, makitadanto a normal, desente, ken nasingpet met gayam a tattao dagiti Saksi.

19. No saan unay a maawatan dagiti kapamiliatayo ti dadduma a patpatientayo, kasano koma ti panangtratotayo kadakuada? (1 Pedro 3:15)

¹⁹ Basaen ti 1 Pedro 3:15. Baka saan unay a maawatan dagiti kapamiliatayo no apay a saantayo nga ar-aramiden ti dadduma a banag. Ngem no kanayon a respetuentayo ida ken nasayaat ti panangtratotayo kadakuada, didanto malipatan dayta. Uray no ditay makikaduan kadakuada kadagiti selebrasion ken kaugalian a saan a naibatay iti Biblia, maragsakanda la ketdi no mangyurnostayo iti sabali a gundaway tapno makaduatayo ida. Kas pagarigan, mabalintayo a bisitaen ida, agkakaduatayo a mangan, wenno regaluan ida iti sabali pay a tiempo.

DIKA MAAWANAN ITI NAMNAMA KADAGITI KAPAMILIAM

20. Apay a makaparegta ti ulidan ni Santiago?

²⁰ Bayat ti ministerio ni Jesus ditoy daga, saan a nagbalin a pasurotna ti kabsatna a ni Santiago. Ngem idi agangay, nagbalin met laeng nga adalanna. (Gal. 1:​18, 19; 2:9) Impapusona met ti adu nga insuro ni Jesus. Kas pagarigan, iti inaramidna a surat para kadagiti Kristiano, adda dinakamatna a kapada dagiti insuro ni Jesus iti Sermonna iti Bantay.d

21. Apay a saantayo koma maum-uma a tumulong kadagiti kapamiliatayo a saan pay a Saksi?

²¹ Uray no ar-aramidentayo ti amin, baka saanto latta nga aginteres dagiti kapamiliatayo a saan pay Saksi wenno saanto latta a nasayaat ti panangtratoda kadatayo. Ngem apay a masapul a ditay latta koma maum-uma kadakuada? Ngamin, kada ipakitatayo nga ay-ayatentayo ida, tultuladentayo ti naasi a Diostayo a ni Jehova ken ti Anakna a ni Jesus. (Luc. 6:​33, 36) No itultuloytayo nga ipakitaan dagiti kapamiliatayo iti ayat, baka agbaliwto met laeng ti panangmatmatda kadatayo. Baka malagipdanto pay ketdi dagiti imbagatayo maipapan ken Jehova ken kadagiti karina. No ditay mauma kadakuada, baka agdesisiondanto met laeng nga agserbi ken Jehova. Nakaragragsaktayto la ketdi!