Ti Kaipapanan ken Kinapateg ti Panagbautisarmo

1. Ania ti mangipakita a ti panagbautisar ket nakapatpateg a pannursuro ti Biblia?

NAKARAGRAGSAKTAYO no adda dagiti baro a mabautisaran! Kasta met laeng a ragsak ti narikna dagiti kaunaan a Kristiano idi nakitada a nakaad-adu a tattao ti nagbautisar idi Pentecostes 33 C.E. Iti dayta a tiempo, inlawlawag ni apostol Pedro a nakapatpateg ti agpabautisar. (Ara. 2:​38, 40, 41) Insurat met ni apostol Pablo a “ti sursuro maipapan kadagiti panangbautisar” ket karaman iti “pagdamdamuan a doktrina maipapan iti Kristo.” (Heb. 6:​1, 2) Nupay kasla simple laeng a topiko ti bautismo, masapul a maawatantayo a naimbag dayta. Apay?

2. Apay a nakapatpateg a maawatantayo ti maipapan iti bautismo?

² Makatulong ti natibker a pundasion tapno saan a marba ti maysa a balay uray no adda dagiti napigsa a bagyo. Makatulong met no maawatantayo a naimbag ti maipapan iti bautismo tapno maaddaantayo iti nabileg a pammati. Agplamplanotayo man nga agpabautisar wenno adun a tawen a nabautisarantayo, masapul a maawatantayo no apay a nakapatpateg ti bautismo. Iti daytoy nga artikulo, pagsasaritaantayo dagitoy a saludsod: Ania ti kaipapanan ti bautismo? Ania ti ramanen ti panagbautisar dagiti Kristiano? Ken apay a mabautisarantayo iti nagan ti Ama, iti nagan ti Anak, ken iti nasantuan nga espiritu?

TI KAIPAPANAN TI BAUTISMOM

3. Ania ti ipakpakitam no agpabautisarka?

³ No agpabautisarka, ipakpakitam iti publiko nga (1) inawatmon ti kinapudno maipapan ken Jehova a Dios ken ni Kristo Jesus, (2) nagbabawyamon dagiti basolmo, (3) binalbaliwamon ti biagmo tapno makapagserbika ken Jehova, (4) naawatamon a ni Jesus ti impaay ti Dios kas ti kakaisuna a dalan ti pannakaisalakan, ken (5) inkararagmon iti Dios nga aramidemon ti pagayatanna a kadua ti organisasionna. No nagkari wenno nagdedikarkan, sa nagpabautisarkan, mangrugikan a magna iti dalan nga agturong iti biag nga agnanayon.

4. Ania ti isimbolo ti naan-anay a pannakaitaneb iti danum? (Kitaen met ti ladawan.)

⁴ No agpabautisarka, naan-anay a maitanebka iti danum. Kalpasanna, mailung-awka manipud iti dayta,a a kas man la natay ken naitabonka sa napagungarka. (Idilig ti Colosas 2:12.) Isimbolo ti bautismom ti nagdakkel a panagbalbaliw nga inaramidmo iti biagmo. Kasano? No naitanebka iti danum, arigna nagpatinggan ti dati a kabibiagmo. No met nailung-awka, mangrugin ti baro a biagmo, ket ti panangaramiden iti pagayatan ti Dios ti kapatgan kenka.

5. Ania ti pagpadaan dagiti ar-aramidem tapno makualipikarka nga agpabautisar ken ti panangaramid ni Noe iti daong? (1 Pedro 3:​18-21)

⁵ Basaen ti 1 Pedro 3:​18-21. Maikomparatayo dagiti ar-aramiden ti maysa tapno makualipikar nga agpabautisar iti panangaramid ni Noe iti daong. No mangrugrugika pay laeng nga agsursuro maipapan ken Jehova, baka mariknam a nakarigrigat dagiti panagbalbaliw nga aramidem a kas man la ti karigat ti panangaramid ni Noe iti nagdakkel a daong. Ngem kasapulan kadi a talaga nga aramidem dagita? Wen. Apay a maibagatayo dayta? Panunotentayo manen ni Noe. Ti Dios a mismo ti nangdisenio iti daong ket masapul idi a suroten a naimbag ni Noe dayta a disenio tapno maisalakan iti layus. Nabileg ti pammati ni Noe iti Dios isu a nagtulnog. Ket iti tulong ni Jehova a Dios, naileppasna ti daong. Kas ken Noe, agballigika met a mangsurot iti “amin nga imbilin ti Dios.”—Gen. 6:22.

6. Kasano a maisalakannaka ti bautismo?

⁶ Iti bersikulo 21, insurat ni apostol Pedro a ti bautismo “ti mangisalakan” kenka. Siempre, saan a gapu ta nabautisarankan ket maisalakankan, wenno napakawanen dagiti basolmo. Ti laeng dara ni Jesus ti mangdalus kenka iti basol. (1 Juan 1:7) Ngem nakapatpateg ti panagpabautisar gapu ta imbilin dayta ni Jehova nga aramidentayo. Ket no agpabautisartayo, kidkiddawentayo nga ikkannatayo iti “nasayaat a konsiensia.” Maragsakanto ni Jehova a mangted iti kidkiddawem. Kaipapanan dayta a ti bautismo ti ‘mangisalakan kenka,’ wenno posiblen nga agbiagkanto iti agnanayon.

TI RAMANEN TI PANAGBAUTISAR DAGITI KRISTIANO

7. Kasano a maaramid ti bautismo, ken ania dagiti masapul nga ikabilangantayo?

⁷ Ibaga kadatayo ti Biblia a masapul a naan-anay a maitaneb ti agpabautisar. Ngem awanen ti itedna nga adu pay a detalye maipapan iti dayta. Kaskasdi a tulongannatayo ti Biblia tapno ammotayo no ania dagiti masapul a maikabilangan no adda agpabautisar. Kas pagarigan, makatulong dagiti prinsipio ti Biblia kadagiti agpabautisar tapno ammoda no ania ti pagbadoda, ken kadagiti agbuya tapno ammoda ti rumbeng a reaksion wenno tigtignayda. (1 Cor. 14:40; 1 Tim. 2:9) Iti kaaldawantayo, gagangay a maysa a panglakayen ti mangitaneb. Ngem saantay koma nga ipaayan isuna iti espesial nga atension wenno pammadayaw.(1 Cor. 1:​14, 15) Saan met a napateg no adu wenno bassit ti agbuya iti bautismo.—Ara. 8:36.

8. Ania dagiti maisaludsod kadagiti agpabautisar ken apay? (Aramid 2:​38-42) (Kitaen met ti ladawan.)

⁸ Ipakita ti Biblia a masapul nga ‘ipakaammotayo iti publiko ti mensahe para iti pannakaisalakan.’ (Roma 10:​9, 10; kitaen ti study note a “publicly declare.”) Aramidentayo dayta, saan laeng a no mangasabatayo, no di ket nangnangruna iti aldaw a panagpabautisartayo. Gapu iti dayta, adda dua a maisaludsod kadagiti agpabautisar. Ti umuna ket, “Nagbabawyam kadin dagiti basolmo, indedikarmon ti bagim ken Jehova, ken inawatmon ti panangisalakanna babaen ken Jesu-Kristo?” Naisentro daytoy a saludsod iti inaramiden ti agpabautisar tapno makualipikar a mabautisaran. Adda pagpadaan dayta iti imbaga ni Pedro kadagiti tattao idi Pentecostes nga agbabawi ken agpabautisarda. Ti maikadua a saludsod ket, “Maawatam kadi a ti panagbautisarmo ipakitana a maysakan a Saksi ni Jehova ken pasetkan ti organisasion ni Jehova?” Ipalagip dayta a saludsod a masapul a tungpalentayo ti inkaritayo idi nagdedikartayo. Kasano? Masapul nga agtulnogtayo iti panangiwanwan ni Jehova babaen ti organisasionna, ken agserbitayo iti Dios a kadua dagiti padatayo a Kristiano kas iti inaramid idi dagiti adalan idi umuna a siglo. (Basaen ti Aramid 2:​38-42.) Dagiti mangsungbat iti wen kadagita a dua a saludsod ket makualipikar nga agpabautisar.

9. Ania dagiti masapul nga aramiden ti amin tapno maparagsakda ti Dios?

⁹ Sakbay pay a naammuam ti kinapudno, mabalin a nasingpetka ken saanka a pulos a nakaaramid iti aniaman a nadagsen a basol. Wenno baka pinadakkeldaka dagiti Saksi a nagannakmo a timmulong kenka a mangayat ken Jehova. Masapul pay la kadi nga agbabawika ken agpabautisarka tapno maparagsakmo ti Dios? Wen. Aniaman ti kasasaadtayo, natawidtayo amin ti basol. Isu a saan a kanayon a maaramidtayo ti pagayatan ti Dios. (Sal. 51:5) Ngem bayat nga umad-adu ti pannakaammotayo maipapan ken Jehova, agdesisiontayon nga iyun-una ti pagayatanna, saanen a ti pagayatantayo. Pagbabawyantayon ti aniaman a naaramidtayo a saan a kayat ni Jehova, isardengtayon dagita, ken aramidentayon dagiti mangparagsak iti nailangitan nga Amatayo. Iti kasta, mabalintayon ti agpabautisar.—Ara. 3:19.

10. Ania ti masapul nga aramidem no nabuniagan wenno nabautisaranka idi iti sabali a relihion?

¹⁰ No nabuniagan wenno nabautisaranka idi iti sabali a relihion, masapul latta nga agpabautisarka kas maysa kadagiti Saksi ni Jehova. Apay? Saan pay la ngamin idi nga umdas ti pannakaawatmo iti kinapudno maipapan kada Jehova a Dios ken ni Jesus. Ken no uray no indedikarmon ti biagmo iti Dios babaen ti kararag, ti inkarim ket saan a naibatay iti umiso a pannakaawat iti pagayatanna. Adda dagiti naam-ammo ni apostol Pablo idiay Efeso a nabautisaranen. Ngem saanda a naawatan ti kinapudno maipapan ken Jesus. Gapu iti dayta, inyurnos ni Pablo a mabautisaranda manen.b (Ara. 19:​1-5) Kasta met la ita. Anamongan laeng ni Jehova ti pannakabautisar ti maysa a tao no naibatay dayta iti umiso a pannakaammo maipapan iti pagayatanna.

“ITI NAGAN TI AMA KEN ITI NAGAN TI ANAK KEN ITI NAGAN TI NASANTUAN NGA ESPIRITU”

11. Ania ti kayat a sawen ti mabautisaran “iti nagan ti Ama ken iti nagan ti Anak ken iti nagan ti nasantuan nga espiritu”? (Mateo 28:​18-20)

¹¹ Imbilin ni Jesus a dagiti baro nga adalan ket mabautisaran “iti nagan ti Ama ken iti nagan ti Anak ken iti nagan ti nasantuan nga espiritu.” (Basaen ti Mateo 28:​18-20.) Ania ti kayatna a sawen? Iti Biblia, ti sao para iti “nagan” masansan a tukoyenna ti reputasion ti maysa. Mabalin met a tumukoy dayta iti saad ken iti autoridad nga irepresentar dayta a nagan. Isu a no adda aramidentayo “iti nagan ti” maysa a persona wenno banag, bigbigbigentayo ti autoridad dayta a nagan. (Idilig ti Mateo 10:41; kitaen ti study note a “because he is a prophet.”) Kitaentayo ita no kasano a mapagdumam ti saad ken ti autoridad ti Ama ken ti Anak agraman ti papel ti nasantuan nga espiritu ti Dios.

12. Kasanotayo a mabautisaran iti nagan ti Ama? (Apocalipsis 4:11) (Kitaen met ti ladawan.)

¹² Iti nagan ti Ama. Bigbigentayo a ni Jehova ti nailangitan nga Amatayo, wenno nangted iti biagtayo. Isu ti mannakabalin-amin a Dios, ti Namarsua iti amin a banag. (Basaen ti Apocalipsis 4:11.) Bigbigentayo met isuna kas ti Managdengngeg iti kararag. Addaan panagraem nga us-usarentayo ti personal a naganna no agkarkararagtayo kenkuana ken no ikaskasabatayo ti maipapan kenkuana. (Sal. 65:2) Ngem saan la a dayta ti karaman iti panagpabautisar iti nagan ti Ama. Ammo idin dagiti dumdumngeg ken Pedro idi Pentecostes ti maipapan ken Jehova. Ngem masapul a bigbigenda isuna kas ti naayat a Manangipaay iti agnanayon a biag babaen laeng ken Jesu-Kristo.—Roma 5:8.

13. Kasanotayo a mabautisaran iti nagan ti Anak? (Kitaen met ti ladawan.)

¹³ Iti nagan ti Anak. Bigbigentayo a ni Jesus ti bugbugtong nga Anak ti Dios. Ni Jesus ti kakaisuna a “dalan” tapno maaddaantayo iti nasinged a relasion ken Jehova. (Juan 14:6) Ni Jesus met ti Mannubbottayo a natay tapno maaddaantayo iti biag. Gapu iti dayta, kayattayo a tuladen ti ulidanna iti tunggal aldaw ti biagtayo, saan laeng nga iti aldaw a nagpabautisartayo. (1 Juan 2:6) Naregtatayo ngarud a mangasaba a kas iti inaramidna idi ken ditay ipalubos nga adda aniaman a makalapped kadatayo a mangaramid iti dayta. (Luc. 4:43) Nakasaganatayo pay ketdi a mangibtur iti pannakaidadanes gapu iti matalek a panagserbitayo iti Dios. (2 Tim. 3:12) Raraementayo ni Jesus kas ti “ulo ti kongregasion.” Gapu iti dayta, maragsakantayo nga agpasakup kadagiti pagtaltalkanna a mangidaulo ken mangaywan kadagiti pasurotna.—Efe. 4:​8, 11, 12; 5:23.

14. (a) Kasanotayo a mabautisaran iti nagan ti nasantuan nga espiritu? (Kitaen met ti ladawan.) (b) Ania ti dadduma pay a bautismo para kadagiti Kristiano a dinutokan ti espiritu? (Kitaen ti kahon a “Dagiti Bautismo Para Kadagiti Kristiano a Dinutokan ti Espiritu.”)

¹⁴ Iti nagan ti nasantuan nga espiritu. Patientayo ti kinapudno maipapan iti nasantuan nga espiritu. Saan a persona dayta wenno paset ti Trinidad, no di ket ti aktibo a puersa ti Dios. Ammotayo a ti nasantuan nga espiritu ti nangiwanwan kadagiti propeta ken kadagiti nangisurat iti Biblia. Gapu iti dayta, inaldaw a basbasaentayo ti Biblia ken sursurotentayo dagiti pannursurona. (2 Ped. 1:​20, 21) Agporporsegitayo met tapno ditay makaaramid kadagiti nadagsen a basol. Ta no kasta ti aramidentayo, laplapdantayo ti panagayus ti espiritu ti Dios kadatayo, ken uray iti kongregasion.—Efe. 4:30.

15. Ania ti masapul a determinasiontayo?

¹⁵ No maysakan a bautisado a Kristiano, determinadoka koma a mangtarus iti amin nga aspeto “ti sursuro maipapan kadagiti panangbautisar”c ken mangtungpal iti inkarim ken Jehova idi nagdedikar ken nagpabautisarka. Ngem kasano ngay no saanka pay a nabautisaran? Adda kadi manglaplapped kenka? Ilawlawag ti sumaruno nga artikulo dagiti aramidem tapno saanmon nga itantan ti agpabautisar.