Dagiti Annak “ket Impatawid ni Jehova”

ANIA ti mapanunotmo no mangngegmo ti sao a “tawid”? Mapanunotmo kadi ti kuarta, daga wenno balay, wenno napateg a banag a nabayagen a kukua ti kapamiliam? Aniaman dayta a tawid, sigurado a nakapatpateg dayta ken kayatmo nga aywanan a naimbag.

Ibaga ti Biblia a dagiti annak “ket impatawid ni Jehova.” (Sal. 127:3) Dagiti nagannak a mangay-ayat ken Jehova ibilbilangda dagiti annakda kas nagpateg a regalo manipud iti nailangitan nga Amada. Gapu iti dayta, ar-aramidenda ti amin a kabaelanda tapno maipaayda ti kasapulan dagiti annakda. Sigsiguraduenda met a nasalun-at ken naragsak dagiti annakda, ken tultulonganda ida a suminged ken Jehova.

Nupay kasta, makapaladingit ta dadduma a nagannak ita dida ibilbilang dagiti annakda kas tawid manipud iti Dios. (Isa. 49:15; 2 Tim. 3:​1-3) Kayat met ti dadduma a nagannak nga ipaay ti kasapulan dagiti annakda, ngem marigatanda gapu iti agduduma a rason. Ania ti dadduma kadagita? Ania ti namnamaen ni Jehova nga aramiden dagiti nagannak para kadagiti annakda? Ken ania ti aramiden dagiti Kristiano a nagannak tapno naragsak ti biag dagiti annakda?

DAGITI RASON

• Impluensia dagiti kapamilia ken kalugaran. Iti dadduma a paset ti lubong, mas resrespetuen dagiti tattao dagiti adu ti annakda. Gapu iti dayta, dagiti agassawa ket baka impluensiaan dagiti kapamilia wenno kaarrubada a maaddaan iti ad-adu nga annak ngem iti kabaelanda nga aywanan.

• Panagdanag maipapan iti masanguanan. Iti dadduma a lugar, adu a maladaga ti matmatay gapu iti malnutrision ken sakit. Manmano met dagiti ospital ken doktor. Isu a kayat ti dadduma nga agassawa ti maaddaan iti adu nga annak tapno uray kaskasano, addanto mabati a sibibiag kadagiti annakda. Mabalin met nga agdesision ti dadduma a maaddaanda iti adu nga annak tapno adda mangaywan kadakuada inton lakay wenno baketdan. Gagangay dagita kadagiti pagilian a saan a mangipapaay ti gobierno iti tulong para kadagiti natataengan.

• Family planning. Iti dadduma a lugar, manmano a contraceptive wenno panglapped iti panagsikog ti magatang ti dadduma nga agassawa. Iti sabali met a lugar, adu dagiti magatang a produkto wenno pills. Ngem mabuteng ti dadduma nga agassawa a mangusar kadagita gapu ta nababa ti kalidadna ken adda dagiti saan a nasayaat nga epektona. Nangina met ti dadduma a produkto isu a saan a makagatang ti dadduma nga agassawa.a

ANIA DAGITI NAMNAMAEN NI JEHOVA KADAGITI NAGANNAK?

Ipaayyo dagiti kasapulan ti annakyo. Intalek ni Jehova kadagiti nagannak ti responsabilidad a mangipaay iti material a kasapulan dagiti menor de edad nga annakda. Namnamaenna nga agtrabahoda a naimbag tapno maipaayda ti makan, pagbado, ken pagtaengan para iti amin nga annakda. Kayat met ni Jehova nga isuro dagiti nagannak dagiti annakda. Isu a saanda a basta pageskuelaen dagiti annakda iti adayo. Imbes ketdi, siguraduenda a kabbalayda dagiti annakda bayat a dumakdakkelda tapno masuruanda ida kadagiti abilidad a makatulongto kadakuada. Mangiwayada met iti oras para iti tunggal anakda. No aramidenda dagita, marikna dagiti annakda a natalged ken maipatpategda. Ngem nainkalintegan ni Jehova. Dina namnamaen a nabaknang dagiti nagannak. Kinapudnona, napanglaw ngem nagaget a nagannak ti pinili ni Jehova a mangpadakkel iti dungdungnguenna nga Anak.—Mat. 13:​55, 56; Luc. 2:24.

Prinsipio ti Biblia: “No saan nga ipaay ti asinoman ti kasapulan dagiti adda iti poderna, nangnangruna dagiti miembro ti pamiliana, tinallikudannan ti pammati ken dakdakes ngem iti tao nga awanan pammati.”—1 Tim. 5:8.

Ammo ni Jehova a mabalin a kasapulan dagiti nagannak ti praktikal a tulong no lakay wenno baketdan. Kinapudnona, maysa a pamay-an a mapadayawan dagiti annak ti nagannakda ket no iyurnosda nga adda mangaywan kadakuada inton kasapulandan. (Ex. 20:12; 1 Tim. 5:4) Ngem maragsakan ni Jehova no ti nangnangruna a panunoten dagiti nagannak ket no kasanoda a maaywanan dagiti annakda, imbes a no kasano a maaywananto ida dagiti annakda.—2 Cor. 12:14.

Isuroyo kadagiti annakyo ti maipapan ken Jehova. Responsabilidad met dagiti Kristiano a nagannak a sanayen dagiti annakda a mangayat ken mangidaydayaw ken Jehova. Para ken Jehova, dayta ti kapatgan a maisuro dagiti nagannak kadagiti annakda.—Deut. 6:​6, 7.

Prinsipio ti Biblia: ‘Itultuloyyo a padakkelen dagiti annakyo iti disiplina ken pammagbaga ni Jehova.’—Efe. 6:4.

KAYATNAKAYO A TULONGAN NI JEHOVA

Agplanokayo a naimbag. No planoyo ti maaddaan iti annak, panunotenyo a naimbag ti kasasaadyo. Kas pagarigan, no adu ti annakyo, kabaelanyonto kadi ida a pakanen, ipaayan iti pagbado, isuro, ken pageskuelaen? No saan, pagsaritaanyo nga agassawa no mano laeng nga annak ti kabaelanyo. No aramidenyo dayta, laglagipenyo a masapul nga aywananyonto ti tunggal anakyo iti pamay-an a namnamaen kadakayo ni Jehova. Siempre, ammo ni Jehova a saan nga amin ket mapasamak a kas iti implanoyo. (Ecl. 9:11) Ngem sigurado a bendisionanna dagiti naimpusuan a panagreggetyo nga agbalin a nasayaat a nagannak.

Prinsipio ti Biblia: “Sigurado nga agballigi dagiti plano ti nagaget, ngem sigurado a pumanglaw ti amin a nadarasudos.”—Prov. 21:5.

“Asino kadakayo ti mayat a mangbangon iti torre ti saan nga agtugaw nga umuna ket kuentaenna ti magastos tapno makitana no adda umanay a pangleppasna?”—Luc. 14:28.

Iyun-unayo ni Jehova iti pamiliayo. Pagbalinenyo a prioridad ti pamiliayo ti panagdaydayaw ken Jehova. No addan annakyo, ikagumaanyo nga isuro ti tunggal maysa kadakuada a mangayat ken Jehova. Tulonganyo ida a dumngeg a naimbag ken agsursuro kadagiti gimong. Siguraduenyo a linawas nga ag-Family Worship-kayo. Sanayenyo dagiti annakyo no kasano ti mangasaba. Saanyo nga ipabaklay kadagiti in-inauna nga annakyo wenno kadagiti kabagianyo dagiti responsabilidadyo kas nagannak. Tiempo ken panagregget ti kasapulan tapno matulonganyo dagiti annakyo a mangayat ken Jehova. Ngem nakaragragsakkayo la ketdi inton makitayo ida a naragsak nga agserserbi ken Jehova.

Prinsipio ti Biblia: “Awanen ti sabali a makaited kaniak iti dakdakkel pay a ragsak no di daytoy: a madamagko nga agtultuloy dagiti annakko a magna iti dalan ti kinapudno.”—3 Juan 4.b

Agtalekkayo ken Jehova. No planoyo ti maaddaan iti annak wenno no addan annakyo, agtalekkayo a napatpateg dagiti pagalagadan ni Jehova ngem iti kultura wenno kaugalian dagiti tattao iti lugaryo.

No agdesisionkayo a limitaran ti bilang dagiti agbalin nga annakyo, masiguradoyo a dinakayto pulos baybay-an ni Jehova inton nataengankayon. Saanyo koma nga ibilang dagiti annakyo nga isudanto ti “mangted iti sustento wenno pensionyo” inton lakay wenno baketkayon. Dikay madanagan amangan no awanto ti mangaywan kadakayo. Inkari ni Jehova nga aywanannakayo ket kanayon a tungpalenna dagiti karina.—Jos. 23:14.

Prinsipio ti Biblia: “Agtalekka ken Jehova iti amin a pusom, ket dika agtalek iti bukodmo a pannakaawat. Ikabilangam iti amin a dalanmo, ket palintegennanto dagiti danam.”—Prov. 3:​5, 6.

“Sipud idi ubingak agingga ita a lakayakon, diak pay nakakita iti asinoman a nalinteg a nabaybay-an, wenno uray dagiti annakna nga agsapsapul iti tinapay.”—Sal. 37:25.

“Itultuloyyo ngarud a sapulen nga umuna ti Pagarian ken ti kinalinteg ti Dios, ket amin dagitoy a banag mainayonto kadakayo.”—Mat. 6:33.

Dagiti annak ket nakapatpateg a sagut nga intalek ni Jehova kadagiti nagannak. Nakaragragsak la ketdi ni Jehova no aywanan a naimbag dagiti Kristiano a nagannak dagiti annakda iti pamay-an a kayatna. Siaayat nga ipaayda ti pisikal, emosional, ken naespirituan a kasapulan dagiti annakda. Planuenda a naimbag no mano ti agbalin nga anakda. Simamatalek a surotenda dagiti estandarte ni Jehova, saan a ti kultura wenno kaugalian dagiti tattao iti lugarda. No aramiden dayta dagiti Kristiano a nagannak, ipakpakitada a dagiti annakda ket nagpateg a regalo—wenno “impatawid ni Jehova.”