Mapasayaatmo ti Abilidadmo a Mangisuro iti Ministerio

1. Ania dagiti abilidad a kayattayo a sursuruen, ken apay? (2 Timoteo 4:2) (Kitaen met ti ladawan.)

IMBAGA ni Jesus kadagiti pasurotna: “Pagbalinenyo ida nga adalak . . . , isuroyo a tungpalenda ti amin nga imbilinko kadakayo.” (Mat. 28:​19, 20) Ipakita dayta a bilinna a masapul nga agbalin a mannursuro ti amin a Kristiano. Iyas-asideg ni Jehova kenkuana dagidiay “addaan iti umiso a kababalin.” (Ara. 13:48) Tultulongandatayo met dagiti anghel a mangbirok kadagiti kasta a tattao. (Juan 6:44; Apoc. 14:6) Ngem adda met masapul nga aramidentayo. Kitaentayo ti ulidan da apostol Pablo ken Bernabe. Sigun iti Biblia, idi nangasabada iti sinagoga idiay Iconio, “nagsayaat ti panagsaoda nga uray la adu a Judio ken Griego ti nagbalin a manamati.” (Ara. 14:1) Sigurado a napatanor da Pablo ken Bernabe ti “kinalaing a mangisuro.” (Basaen ti 2 Timoteo 4:2.) Masapul met ngarud a sursuruen ti amin a Kristiano dayta nga abilidad.

2. Apay a mabalin a marikna ti dadduma a Kristiano a saandan a mapasayaat ti abilidadda a mangisuro?

² Mabalin a marikna ti dadduma a saandan a mapasayaat ti abilidadda a mangisuro gapu ta nababa laeng ti naragpatda nga edukasion wenno mariknada a saanda a paglaingan ti mangisuro. Kasta met la idi ti narikna ti dadduma a lallaki a nadakamat iti Biblia. (Ex. 4:10; Jer. 1:6) Mabalin a maupay met ti dadduma gapu ta awan ti iyad-adalanda wenno awan ti nasayaat a kapadasanda iti ministerio a kas iti dadduma. Siempre, saan nga amin a makasarita wenno maam-ammotayo ket aginteres iti kinapudno. Ken saan laeng a nakadepende iti ar-aramidentayo no dumngeg dagiti tattao iti mensahetayo wenno saan. Kas nadakamaten, siguraduen ni Jehova ken dagiti anghel a mabirokantayo dagiti nasingpet a tattao. Ngem kayattayo latta nga ibaga ti naimbag a damag iti kasayaatan a pamay-an agingga a posible. Ania ti makatulong? Pagsasaritaantayo iti daytoy nga artikulo ti tallo a pamay-an tapno mapasayaattayo ti abilidadtayo a mangisuro iti ministerio.

IPATEGMO DAGITI TATTAO

3. Apay a nadanon ni Jesus ti puso dagiti tattao?

³ Ibaga ti Biblia nga ‘ammo ni Jesus ti adda iti puso ti maysa a tao.’ (Juan 2:25) Kaipapananna nga ammo ni Jesus ti panagpampanunot, rikrikna, ken motibo dagiti tattao. Nadanon ni Jesus ti pusoda gapu ta maawatanna dagiti kasapulanda. Makitkitana met idi a saan a maipapaay ti naespirituan a kasapulan dagiti tattao ken maparparigatanda iti nagadu a tradision ken linteg nga inaramid ti tao. (Mat. 9:36; 23:4) Isu a tinulongan ida ni Jesus. Kasano? Insurona ida kadagiti banag a mangpasayaat iti biagda. Mabasatayo dayta iti Sermonna iti Bantay. Nagustuan dagiti tattao ti dumngeg ken Jesus gapu ta dagiti imbagana ket adda epektona iti personal a biagda.

4. Kasanotayo a maipakita nga ipatpategtayo dagiti tattao? (Kitaen met dagiti ladawan.)

⁴ Maipakitatayo nga ipatpategtayo dagiti tattao no ikagumaantayo a tarusan dagiti pakadanaganda. Nakaad-adu ti dakes a mapaspasamak iti lubong ni Satanas, isu a tunggal tao a makasabaantayo ket mabalin nga adda problemana. No laglagipentayo dayta, nalaklakatayo a maawatan ti kasasaad dagiti tattao iti teritoriatayo. Kas pagarigan, adda kadi nabiit pay a damag a mabalin a pakaseknan dagiti tattao? Madanagan kadi dagiti nagannak a baka adda dakes a mapasamak kadagiti annakda idiay eskuelaan? Adu kadi ti marigatan nga agbirok iti trabaho? Padasem a panunoten no kasano ti biag dagita a tattao bayat a sangsanguenda daytoy ‘delikado a tiempo’ a dida man la ammo ti namnama nga ibagbaga ti Biblia.—2 Tim. 3:1; Isa. 65:​13, 14.

5. Kas mannursuro, kasano a naiduma ni Jesus kadagiti Fariseo? (Mateo 11:​28-30)

⁵ Ipatpateg ni Jesus dagiti tattao, ken nariknada dayta iti pamay-an ti panangtratona kadakuada. Nababa idi ti panagkitkita dagiti Fariseo kadagiti ordinario a tattao ken imbilangda pay ketdi ida a nailunod! (Mat. 23:13; Juan 7:49) Ngem naiduma unay ni Jesus. Naimbag ken nadayaw kadagiti tattao. ‘Naalumamay ken napakumbaba’ met. Dayta ti nakatulong tapno agbalin a nasayaat a mannursuro. (Basaen ti Mateo 11:​28-30.) Masapul met ngarud a naimbag ken nadayawtayo kadagiti kaskasabaantayo.

6. Kasanotayo a maipakita ti kinaimbag ken respeto kadagidiay saan nga umawat wenno manggura pay ketdi iti mensahetayo?

⁶ No saan nga awaten wenno guraen pay ketdi ti dadduma ti mensahetayo, ania koma ti reaksiontayo? Kas imbilin ni Jesus, saantayo a bumales. Ngem adda masapul nga aramidentayo. Imbagana: ‘Aramidenyo ti nasayaat kadagidiay manggurgura kadakayo, bendisionanyo dagidiay mangilunlunod kadakayo, ken ikararaganyo dagidiay mangin-insulto kadakayo.’ (Luc. 6:​27, 28) Nalaklakatayo nga aramiden dagita no laglagipentayo a baka adda la ngamin ti rason isu a dida kayat ti dumngeg. Agpayso nga adda dagidiay saanda a talaga a kayat ti umawat wenno guraendatayo pay ketdi. Ngem saan met a kanayon a kasta. Adda ti saan nga umawat ta baka nairana nga adda problemana wenno pagdandanaganna idi nakasaritatayo. Wenno baka nairana laeng a madi ti aldawna. Aniaman ti situasion, laglagipentayo ti Colosas 4:6: “Kanayon koma a makaay-ayo ti sasaoyo, ken natemplaan iti asin, tapno ammoyo no kasano ti rumbeng a panangsungbatyo iti tunggal tao.” No kaasiantayo dagiti tattao ken ikagumaantayo a tarusan dagiti kasapulanda, saantayo a nalaka a masaktan. Mapasayaattayo pay ketdi ti abilidadtayo a mangisuro ta ikagumaantayo ti agbirok iti topiko a makatulong kadakuada.

USAREM TI SAO TI DIOS

7. Ania ti inusar ni Jesus a nangisuro kadagiti tattao? (Juan 7:​14-16)

⁷ Saan nga inusar ni Jesus ti bukodna a sirib no di ket ti Sao ti Dios. Simple laeng ti panangisurona ta nalaka a maawatan ken matandaanan dagiti insurona. Ibaga ti Biblia a nangisuro ni Jesus “kas iti maysa nga addaan iti autoridad, saan a kas kadagiti eskriba.” Gapu iti dayta, “nasdaaw” dagiti tattao. (Mar. 1:22; kitaen ti study note a “not as the scribes.”) Idi kaaldawan ni Jesus, inusar dagiti eskriba ti imbaga dagiti nalatak a mannursuro iti relihion a mangisuro kadagiti tattao. Ngem naiduma ni Jesus ta inusarna ti Kasuratan. Gapu ta ni Jesus ti Anak ti Dios ken nagbiag idi idiay langit, nakaad-adu ti pannakaammona. Ngem saanna nga inusar dayta tapno pagbiliben dagiti dumdumngeg wenno iparikna nga awan ammoda. Imbes ketdi, kanayon nga inusarna ti Sao ti Dios a mangisuro kadagiti tattao tapno maammuanda ti pagayatan ti Dios. (Basaen ti Juan 7:​14-16.) Nagsayaat nga ulidan ni Jesus para iti amin a Kristiano.

8. Kasano a tinulad ni apostol Pedro ni Jesus?

⁸ Inusar met dagiti pasurot ni Jesus ti Sao ti Dios idi nangisuroda. Kas pagarigan, inusar ni Pedro ti Sao ti Dios idi nagpalawag idi Pentecostes 33 C.E. Nababa ti adal ni apostol Pedro. Ngem nadanonna ti puso dagiti dumdumngeg kenkuana. Ngamin, inusarna ti Sao ti Dios a mangilawlawag no kasano a natungpal dagiti padto maipapan ken Jesus. (Ara. 2:​14-37) Ania ti resultana? “Nabautisaran dagidiay siraragsak a nangawat iti imbagana, ket agarup 3,000 a tattao ti nainayon iti dayta nga aldaw.”—Ara. 2:41.

9. Apay nga usarentayo ti Sao ti Dios no mangisurotayo?

⁹ Awanen ti nasaysayaat nga usarentayo a mangdanon iti puso dagiti dumdumngeg kadatayo no di ti Sao ti Dios. (Heb. 4:12) Masapul ngarud a kanayon nga usarentayo ti Biblia no mangisurotayo. Kayattayo nga ‘ikasaba ti sao,’ saan a ti bukodtayo a kapanunotan. (2 Tim. 4:2) Kuna ti Proverbio 2:6: “Ni Jehova a mismo ti mangted iti sirib; rummuar iti ngiwatna ti pannakaammo ken pannakatarus.” Isu a no usarentayo ti Biblia a mangisuro kadagiti tattao, kas man la palpalubosantayo a ni Jehova a mismo ti agsao kadakuada. (Mal. 2:7) Kayattayo a tulongan ida tapno maammuanda a ti sirib a linaon ti Biblia ket adayo a nasaysayaat ngem iti sirib ti tao. Impaisurat dayta ti Dios. Maammuantayo iti dayta ti pannakaammo a kasapulantayo tapno maparagsaktayo ti Namarsua ken maaddaantayo iti naragsak ken makapnek a biag.—2 Tim. 3:​16, 17.

10. Kasanotayo a matulongan ti iyad-adalantayo a mangbigbig a naggapu iti Biblia ti isursurotayo?

¹⁰ Bayat nga agsagsaganaka a mangyadal, mangbirokka kadagiti pamay-an tapno mabigbig ti iyad-adalam a naggapu iti Biblia ti isursurom. Agpayso a makatulong dagiti piktiur ken video iti panangisurom. Ngem ti koma kangrunaan nga ipaganetgetmo ket ti ibagbaga ti Biblia. Kasano? No mangyad-adalka, ibasam dagiti teksto a makatulong tapno maawatanna ti kangrunaan a punto ken no kasanona a mayaplikar dagita. No met pagsaritaanyo dagiti ladawan ken video, siguraduem a maawatanna dagiti kangrunaan a prinsipio ti Biblia. Saan a masapul nga adu ti ibagam wenno gabsuonam iti adu a teksto. Ikkam ketdi ti iyad-adalam iti umdas a tiempo tapno maipapusona ti tunggal bersikulo a mabasana. No dadduma, nasayaat no basaenyo manen dagiti teksto. Iti kasta, mabigbigna a ti isursurom ket saan a naggapu iti libro, ladawan, wenno video, no di ket manipud a mismo iti Biblia.—1 Cor. 2:13.

11-12. (a) Kasanotayo a maipakita ti kinaanus kadagiti iyad-adalantayo? (Aramid 17:​1-4) (Kitaen met ti ladawan.) (b) Ania ti saan nga ammo ti dadduma maipapan iti Biblia, ken kasanotayo ida a matulongan?

¹¹ No marigatan ti iyad-adalam a mangtarus iti maysa a pannursuro, laglagipem nga ‘ikasaba ti sao buyogen ti kinaanus.’ Agduduma ti kapartak ti panagrang-ay dagiti mayad-adalan. Adda dagiti pannursuro a naglakatayo la a maawatan. Ngem para iti dadduma a mayad-adalan, baka kasapulan pay ti ad-adu a tiempo tapno matarusanda dagita. Kasta met laeng idi dagiti Judio idiay Tesalonica. Saanda met a dagus a natarusan dagiti insuro ni Pablo. Isu a namin-adu a kinasabaan ken inlawlawagna kadakuada ti Kasuratan sakbay a naawatanda dagita.—Basaen ti Aramid 17:​1-4.

¹² Adda pay sabali a pamay-an a maipakitatayo ti kinaanus iti iyad-adalantayo. No saludsodantayo ida, urayentayo ti sungbatda. Saan koma a datayo ti makaadu nga agsao. Dumngegtayo a naimbag ken ikagumaantayo a tarusan no apay a kasdiay ti kapanunotanda. Kalpasanna, basaen ken pagsaritaantayo dagiti teksto tapno maawatanda ti pampanunot ti Dios iti dayta a banag. Laglagipem met: Dadduma ti saan pay a pulos nakakitkita iti Biblia isu a saanda nga ammo ti linaonna. Kasanom a matulongan ida? Mangipakitaka iti nayimprenta a Biblia. Ipakitam ti “Introduksion iti Sao ti Dios” nga adda iti umuna a paset ti Baro a Lubong a Patarus tapno makitada a nakaad-adu gayam ti masursuroda iti Biblia. Tapno maisurom nga adda maitulong ti Biblia iti personal a biagda, mayat no ilawlawagmo ti maysa wenno dua a teksto iti saludsod 15 tapno maawatanda a makatulong ti Biblia kadatayo nga agbalin a naragsak. Ti punto? Mas epektiboka a mannursuro no ipakitam nga adu ti maitulong ti Biblia iti biag dagiti mayad-adalan.

AGPOKUSKA KEN JEHOVA

13. No mangyad-adaltayo, asino koma ti kangrunaan a maipokus iti saritaantayo? Mangted iti pagarigan.

¹³ Kayattayo a tulongan dagiti iyad-adalantayo tapno maam-ammoda ni Jehova ken agbalinda a nasinged kenkuana. (Sant. 4:8) Maikomparatayo dayta iti trabaho ti lighting technician wenno parakontrol iti spotlight iti teatro. Kabayatan ti pabuya, saanna nga iturong ti spotlight iti bagina. Imbes ketdi, iturongna dayta kadagiti bida tapno masiguradona nga isuda ti kangrunaan a makita wenno mabuya. Kasta met laeng no mangisursurotayo. Masapul a ni Jehova ti pangipokusantayo iti atension, saan nga iti bagitayo.

14. Kasanotayo a matulongan ti iyad-adalantayo a mangayat ken Jehova?

¹⁴ No mangyad-adalka, tulongam ti iyad-adalam tapno in-inut a masursurona nga ayaten ni Jehova. Daytanto ti mangtignay kenkuana a mangparagsak ken Jehova. (Prov. 27:11) Saanmo laeng nga isuro ti iyad-adalam tapno maammuanna ti umiso ken di umiso tapno makualipikar kas maysa a Saksi ni Jehova. Imbes ketdi, kayattayo a tulongan ti iyad-adalantayo a mangaramid kadagiti panagbalbaliw tapno maparagsakna ni Jehova. Kas pagarigan, adda bisiona ket marigatan a mangisardeng iti dayta. Mabalinmo nga isaludsod kenkuana: “Panagkunam, apay ngata a kagura ni Jehova dayta? Apay ngata a kayatna nga isardengmo dayta a bisio uray no kaykayatmo? Kasano nga ipakita dayta nga ay-ayatennaka ni Jehova?” No ad-adda a tulongam nga agpokus ken Jehova, ad-addanto met a makitana a nakaim-imbag ken nakaay-ayat ti nailangitan nga Amatayo. Ket posible a daytanto met ti mangtignay kenkuana a mangayat ken mangparagsak ken Jehova.

ITULTULOYMO A PASAYAATEN TI ABILIDADMO A MANGISURO

15. Ania ti aramidem tapno maitultuloymo a mapasayaat ti abilidadmo a mangisuro?

¹⁵ Mabalinmo nga ikararag ken Jehova a tulongannaka a mangkita no kasanom pay a mapasayaat ti abilidadmo a mangisuro. (1 Juan 5:14) Ngem saanka la koma a basta agkararag. Masapul met nga itrabahom ti inkararagmo. Dumngegka a naimbag kadagiti paset ti gimong a pakasansanayantayo a mangisuro. No mangyadalka, awisem ti kakabsat nga adun ti kapadasanda iti panangisuro, sa damagem no ania pay ti masapul a parang-ayem. Laglagipem met koma nga uray no kabesadom ti topiko nga adalenyo, baka ita la a maammuanna dayta. Isu nga ikagumaam nga ikabil ti bagim iti situasionna. Bayat ti panagadalyo, tulongam a mangkita a ti ad-adalenna ket talaga a naimbag a damag ken pagsayaatanna dayta. Daytanto ti tumulong kenkuana nga agbalin a nasinged ken Jehova ken maaddaan iti pudpudno a ragsak.—Sal. 1:​1-3.

16. Apay a pagsayaatantayo no itultuloytayo a pasayaaten ti abilidadtayo a mangisuro?

¹⁶ Ti maysa kadagiti mangparparagsak unay kadatayo ita ket ti panangisuro iti dadduma iti maipapan ken Jehova. Idiay baro a lubong, ad-adunto pay ti suruantayo. Itultuloytayo ngarud nga ipateg dagiti tattao, usaren ti Sao ti Dios, ken agpokus ken Jehova bayat nga ikaskasabatayo ti naimbag a damag. No aramidentayo dagita, mapasayaattayo ti abilidadtayo a mangisuro iti ministerio.