Agtalekka iti Kangatuan nga Agturay iti Uniberso

1. Ania dagiti nakarigrigat a nakaipasanguan ni Job?

NAPUKAW ni Job ti dandani amin nga adda kenkuana: dagiti annakna, ti nasayaat a salun-atna, ken ti kinabaknangna. Ngem saan la a dayta. Nadadael pay ti reputasionna. Kalaksidanna, makapaupay dagiti imbagbaga kenkuana dagiti “gagayyemna.” Gapu met iti nakaro a liday ti ipatpategna nga asawa, uray la imbagana ken Job: “Ilunodmo ti Dios ket matayka.” (Job 2:9; 15:​4, 5; 19:​1-3) Gapu kadagita, posible a napanunot ni Job a binaybay-anen ti Dios. Baka pinagduaduaanna pay ketdi no talaga met la a protektaran ni Jehova dagiti agserserbi ken mangay-ayat kenkuana.

2-3. No agrigattayo, ania ti mabalin a mapanunottayo, ken ania ti masursurotayo iti libro a Job?

² No dadduma, mabalin a maipasangotayo met kadagiti nakarigrigat a situasion. Dagita ti posible a mangsubok iti panagtalektayo ken Jehova iti kasta unay. Siempre, agbibiagtayo ngaminen kadagiti “delikado ken narigat a tiempo.” (2 Tim. 3:1) No dadduma, saan pay la a nalnalpas ti maysa a problema, adda manen sabali. Isu a malidayan ken mariknatayo a kasla nagrigat ti agibtur. Baka mapanunot pay ketdin ti dadduma a binaybay-an idan ni Jehova.

³ No kasta ti marikriknam, saan koma a kumapuy ti pakinakemmo. Ammom kadi no ania ti nasursuro ni Job ken ni Apo Jehova? Isalakan ni Jehova dagiti napudno kenkuana. Kabaelantayo met ti maaddaan iti kasta a klase ti panagtalek iti nailangitan nga Amatayo. Makatulong ti libro a Job. Makitatayo dita dagitoy dua a nagpapateg a punto: Umuna, ni laeng Jehova ti Kangatuan nga Agturay iti uniberso. Maikadua, kabaelan nga imaniobra ti mannakabalin-amin a Diostayo ti bambanag tapno sigurado a matungpal ti panggepna ken maprotektaran ti ilina iti naespirituan ken pisikal.

SIMREK NI SATANAS ITI TENGNGADA

4. Ania ti napasamak idiay langit idi naguummong da Jehova ken dagiti anghel?

⁴ Maysa nga aldaw, naguummong idiay langit “dagiti annak ti pudno a Dios” iti sanguanan ni Jehova. Ibaga pay ti salaysay: “Simrek met ni Satanas iti tengngada.” (Job 1:6) Dayta ti kaunaan a gundaway nga inusar ti Biblia ti nagan a “Satanas” a tumukoy iti kangrunaan a kabusor ni Jehova. Iti dayta a tiempo, ni Satanas ket saanen a matalek nga anghel ti Dios. Nagbalin met isunan a kabusor dagiti matalek nga anghel ken adipen ni Jehova ditoy daga. Kinapudnona, idi imbaga ni Jehova ti padto iti Genesis 3:​15, saan idin a paset ni Satanas iti nailangitan a pamiliana a buklen dagiti espiritu a parsua. Isu a saan a paset ni Satanas iti “babai” a pagtaudan ti ‘kaputotan.’

5. Ania ti ipakita ti panagsarita da Jehova ken Satanas?

⁵ Impaisurat ni Jehova iti Biblia ti maipapan iti dayta a panaguummong idiay langit. Nalawag nga ipakita dagiti imbaga ni Satanas a talaga a nakadakdakes isuna ken kagurgurana dagiti agserserbi ken Jehova. (Job 1:9; idilig ti Apocalipsis 12:10.) Impaisurat met ni Jehova dayta a pasamak tapno ipasiguradona kadatayo a kanayon nga usarenna ti pannakabalinna iti umiso ken patas a pamay-an. Ipakita met dayta a ni Jehova ti mangikeddeng no ania laeng ti mabalin nga aramiden ken saan a mabalin nga aramiden ti dadduma.

NI JEHOVA KET ADDAAN ITI PANNAKABALIN A MANGIKEDDENG

6. Kasano nga impakita ni Jehova nga isu ti addaan iti kangatuan nga autoridad? (Job 1:​7, 8)

⁶ Basaen ti Job 1:​7, 8. Kontrolado ni Jehova ti taray ti saritaan iti dayta a panaguummong. Insaludsodna ken Satanas: “Napaliiwmo kadi ti adipenko a ni Job?” Nalawag nga ammon ni Jehova a ti puntiria ni Satanas ket ni Job. Kitaentayo no kasano nga inusar ni Jehova ti awan kapadana a pannakabalinna para ken Job.

7. Sigun iti Job 1:​10, 11, ania ti pinagparang ni Satanas a rason nga agserserbi dagiti tattao ken Jehova?

⁷ Basaen ti Job 1:​10, 11. Ni Jehova ti mannakabalin-amin ken Kangatuan nga Agturay iti uniberso. Adda pannakabalinna a mangaramid iti aniaman a kayatna ken kanayon nga ammona ti kasayaatan nga aramidenna iti tunggal situasion. (Jer. 32:17; Dan. 4:35) Ngem pagparparangen ketdin ni Satanas a saan kano nga umiso ti panangusar ni Jehova iti pannakabalinna. Kas man la ibagbagana a paspasuksokan wenno baybayadan kano ti Dios dagiti tattao a kas ken Job tapno laeng agserbida Kenkuana. Inakusaranna pay ketdi dagiti tattao nga agserserbida laeng kano ken Jehova gapu kadagiti bendision nga ipapaayna. Ngem ania ti inaramid ni Jehova?

8-9. Ania ti inkeddeng ni Jehova a mabalin ken saan a mabalin nga aramiden ni Satanas, ken apay? (Job 1:12) (Kitaen met ti ladawan.)

⁸ Basaen ti Job 1:12. Inikkan ni Jehova ni Satanas iti gundaway a mangpaneknek no agpaypayso met laeng ti ibagbagana. Ngem nangikeddeng ni Jehova iti limitasion iti mabalinna nga aramiden ken Job. Nalawag nga imbaga ni Jehova: “Saanmo a dangdangran [ni Job]!” Nangngeg dayta ti amin nga adda iti daydiay a panaguummong. Ket masapul a suroten dayta ni Satanas. Awan ti pannakabalinna a mangaramid iti aniaman ken Job a nalablabes ngem iti inkeddeng ni Jehova. Kasta met laeng agingga ita. Saan a maaramid ni Satanas ti maysa a banag a nalablabes ngem iti ipalubos ni Jehova. Makitatayo ngarud nga inusar ni Jehova ti autoridad ken pannakabalinna a mangprotektar ken Job, ken impakitana nga isu ket naayat ken patas a Dios.

⁹ Permi a napaay ni Satanas iti umuna a panangatakena ken Job. Apay? Ngamin, nagtalinaed a matalek ni Job ken Jehova. (Job 1:22) Ngem ammo ni Jehova a saan pay a nalpas ti kabusor.

10. Apay nga impalubos ni Jehova nga itultuloy ni Satanas a suboken ni Job? (Job 2:​2-6)

¹⁰ Basaen ti Job 2:​2-6. Simmaruno, ad-adda pay a pinakaro ni Satanas ti panangsubokna ken Job. Kayat a paneknekan ni Satanas a no mariknan ni Job nga agpegpeggaden ti biagna, guraennan ni Jehova ken isardengnan ti agserbi kenkuana. Ngem tapno mapaneknekan a kamali ni Satanas, impalubos ni Jehova a subokenna ni Job. Ngem nangikeddeng manen ni Jehova iti limitasion. Imbagana: “Saanmo a pukawen ti biagna!” Masapul manen a suroten dayta ni Satanas. Ania manen ti ipakita dayta? Ipakita dayta a ni Jehova ti kabilgan nga Agturay ta isu ti nangikeddeng iti no ania laeng ti mabalin nga aramiden ni Satanas ken Job.

PINAGPATINGGA NI JEHOVA TI PANAGRIGRIGAT NI JOB

11. Idi pinagpatinggan ni Jehova ti panagrigrigat ni Job, ania dagiti bendision nga impaayna? (Job 42:​10-13)

¹¹ Basaen ti Job 42:​10-13. Napaneknekan a saan a tinallikudan ni Job ni Jehova. Isu a pinagpatinggan ni Jehova ti panangsubsubok ni Satanas ken Job. Dinan impalubos a parigaten pay ni Satanas ti matalek nga adipenna. Impakita manen ni Jehova nga awan ti maaramidan ti kabusor a manglapped iti desisionna. Saan met a napasardeng ni Satanas ni Jehova a mangprotektar ken mangbendision ken Job.

12. Mangted iti pagarigan no kasano nga inusar ni Jehova ti pannakabalinna a mangisalakan kadagiti agtaltalek kenkuana.

¹² Bayat ti maudi nga al-aldaw, us-usaren latta ni Jehova ti pannakabalinna a mangisalakan kadagiti matalek kenkuana. Kas pagarigan, idi 1945, dagiti nakabalud iti maysa a kampo konsentrasion idiay Germany ket pinilit dagiti Nazi a soldado a magna iti nakaad-adayo agingga iti baybay tapno idiayda a mapapatay. Karaman kadakuada ti 230 a Saksi ni Jehova, ngem nakalasatda. Imbagada iti suratda nga insalakan ida ni Jehova kas iti panangisalakanna iti tallo a Hebreo manipud iti umap-apuy nga urno. Idi rimmuarda, saanda man la nga agat-asuk. Kasta met laeng ti napadasan dagiti kakabsat a nakalasat manipud iti nakarigrigat a napadasanda. Ad-adda a bimmileg ti pammatida gapu ta insalakan ida ni Jehova. Nariknada met ti narikna ni Daniel idi naisalakan iti rukib dagiti leon. Sipud idin, determinadodan nga agserbi ken Jehova iti agnanayon. Kinapudnona, imbagada a no adda banag a saan koma a maawan kadakuada, isu dayta ti pribilehioda a makapagserbi ken Jehova iti agnanayon.—Idilig ti Daniel 3:27; 6:22.

13. Ania ti masiguradotayo no adda nakarigrigat a mapadasantayo? (Kitaen met dagiti ladawan.)

¹³ Adda met dagiti tiempo a mariknatayo a kaslatay la adda iti rukib dagiti leon. (1 Ped. 5:​8-10) No dadduma, baka mariknatayo nga awan a pulos ti maaramidantayo ken pampanunotentayo no agpatingganto pay dagiti pakarigatantayo. No mariknatayo dayta, laglagipentayo ti napadasan ni Job. Naan-anay a makapagtalektayo nga adda pannakabalin ni Jehova a mangpasardeng iti panagrigrigattayo. Aramidenna dayta ita wenno iti asidegen a baro a lubong. Adda inkeddengen ni Jehova nga aldaw a pagpatinggaenna daytoy nakadakdakes a lubong. Dina ipalubos a maladaw dayta uray maysa la nga aldaw!

AY-AYATEN NI JEHOVA DAGITI NAPUDNO NGA ADIPENNA

14-15. Ania ti kayat nga aramiden ni Jehova para kadagiti napudno nga agserserbi kenkuana? (Job 14:15) (Kitaen met ti ladawan.)

¹⁴ Basaen ti Job 14:15. Ay-ayaten unay ti nailangitan nga Amatayo dagiti napudno kenkuana. Ipatpategna unay ida. Uray no matayda, pagungarennanto ida. Sukatannanton iti ragsak ti amin a saem nga inyeg ni patay.—Isa. 65:17.

¹⁵ Uray idi nagpatinggan ti panagrigrigat ni Job, nagtultuloy latta a nagbiag iti nagdakes a lubong ni Satanas. Ngem ibaga ti Biblia a binendisionan ni Jehova ni Job iti kasta unay. Pinaimbagna ken inikkanna iti ad-adu pay no ikompara iti dati nga adda kenkuana. Dagita a bendision ket arigna pangramanan laeng iti ad-adu pay nga aramiden ni Jehova para ken Job iti masanguanan. Impakita ni Jehova a kayatna nga agbalin a pudpudno a naragsak dagiti napudno kenkuana. Ti agpayso, ipaayan ni Jehova ti amin a matalek kenkuana iti gundaway a mangtagiragsak iti perpekto a biag iti Paraiso a daga. (Apoc. 21:​3, 4) Kas ti Kangatuan nga Agturay iti uniberso, kayatna nga aramiden dayta. Anian a makaliwliwa a panunoten dayta no marigrigatantayo!

16. Ania pay ti rason a makapagtalektayo ken Jehova kas ti Kangatuan nga Agturay?

¹⁶ Uray no binendisionan ni Jehova ni Job iti atiddog a biag, natay met laeng idi agangay. Ngem adda pannakabalin ni Jehova a mangpagungar ken Job ta isu ti Mannakabalin-amin ken ti Kangatuan nga Agturay. (Deut. 32:39) Inyeskediulna pay ketdin ti tiempo a pagungarenna dagiti ay-ayatenna. Ket awan a pulos ti makapasardeng kenkuana a mangaramid iti dayta.—Roma 8:​38, 39.

NAAN-ANAY NGA AGTALEKKA KEN JEHOVA

17. Ania ti mangipakita nga awan a pulos ti naaramidan ni Satanas a mangdadael iti ili ni Jehova?

¹⁷ Nalawag a paneknekan ti salaysay maipapan ken Job a naan-anay a makapagtalektayo ken Jehova. Anian a yamantayo ta saan nga impalubos ni Jehova a dadaelen ni Satanas ti ilina! Ita, addan nasurok a siam a milion a matalek nga agdaydayaw ken Jehova. Nabileg a pammaneknek dayta iti pannakabalin ti pudpudno a Kangatuan nga Agturay. Maulit-ulit a nakitatayo nga awan a pulos ti nagballigi nga armas maibusor iti ili ni Jehova. (Isa. 54:17) Iti tulong ni Jehova, awan a pulos ti aniaman a nabileg a nasion wenno relihion a nakadadael kadagiti adipenna uray no kasla awan gawgawayda. Awan ti makapasardeng kadatayo a mangipakaammo iti kinapudno maipapan ken Jehova ken mangibutaktak a ni Satanas ket ulbod ken mammapatay. Saannatayo met a mapasardeng uray ni patay ta pagungarento ni Jehova ti amin a matalek kenkuana.—Os. 13:14.

18. Apay a saantayo a rumbeng a pagbutngan dagiti mapasamak iti masanguanan?

¹⁸ No utobentayo dagiti napasaran ni Job, bumileg ti pammatitayo nga awan ti rumbeng a pagbutngantayo kadagiti mapasamak iti masanguanan. Bayat ti dakkel a rigat, ipagarupto ni Satanas ken dagiti pasurotna a nalakadanto la nga ibusen dagiti agserserbi ken Jehova. Ngem kas idi kaaldawan ni Job, imaniobranto ni Jehova ti bambanag ken dina ipalubos a permanente a dadaelen ni Satanas ti ilina. Nakaas-asidegen ti tiempo a pagpatinggaen ni Jehova ti amin a panagrigrigat a pinataud ni Satanas. Maitapuakton ti Diablo ken dagiti demoniona iti nakaun-uneg nga abut iti 1,000 a tawen. (Luc. 8:31; Apoc. 20:​1-3) Inton agangay, naan-anayton a madadael ni Satanas ken ti amin a dumasig kenkuana. (Apoc. 20:10) Matungpalton ti impakpakauna ni Jehova a marumek ti ulo ni Satanas ken mamimpinsanton a madadael.—Gen. 3:15; Roma 16:20.

19. Ania ti agur-uray kadagidiay naan-anay nga agtaltalek ken Jehova? (Kitaen met ti ladawan.)

¹⁹ Padpadaananen dagiti pudno nga agdaydayaw ti pannakaisubli ti perpekto ken naragsak a biag iti asidegen a baro a lubong. Nakaragragsak ken nakapimpintaston ti biag. Ikarkari ni Jehova: “Kitaem! Pabpabaruek ti amin a bambanag.” (Apoc. 21:5) Ania ti kayatna a sawen? Iti kaunaan a gundaway kalpasan ti rinibu a tawen, dagiti tattao ket saanton a madangran ni Satanas ken dagiti demoniona. Saandanto met idan a maimpluensiaan nga agaramid iti dakes. Naidumdumanto a rikna dayta! Awanton dagiti rabii a saanka a makaturturog gapu iti kinaadu ti problemam. Nakaad-adunto a milagro ti makita dagiti makalasat iti Armagedon. Makitadanto nga umimbag dagiti masakit. Maimatangandanto metten ti pannakapagungar dagiti ay-ayatenda iti biag. Mapadasantayto met laengen ti biag a nabayagen a kayat ni Jehova para kadatayo!

20. Ania ti determinasionmo?

²⁰ Bayat kadagitoy maudi nga al-aldaw, adunto pay a rigat ti pakaipasanguantayo. Masapul ngarud nga agbalintayo a natured tapno makapagmatalektayo. Determinadotayo koma a naan-anay nga agtalek ken Jehova ken suportaran ti pamay-an ti panangiturayna. Aramidentayo ti amin a kabaelantayo a mangipakita nga ay-ayatentayo la unay ti nailangitan nga Amatayo ken paneknekan nga ulbod ni Satanas. Masiguradotayo a no agtalinaedtayo a matalek ken Jehova, ti Kangatuan nga Agturay, nakasaysayaatto ti masakbayantayo. Apay? Gapu ta kayat la unayen ni Jehova a gunggonaan dagiti matalek nga agserserbi kenkuana!