Naragsakka Latta Uray no Guraendaka

1. Ania ti imbaga ni Jesus, ken apay a nakaskasdaaw dayta?

ITI Sermon ni Jesus iti Bantay, imbagana: “Naragsakkayo no guraendakayo dagiti tattao.” (Luc. 6:22) Nasdaaw dagiti agdengdengngeg kenkuana idi nangngegda dayta. Siempre, awan kadatayo ti maragsakan no maguratayo. Ngem apay nga imbaga dayta ni Jesus? Nagsayaat no panunotentayo dayta a saludsod. Ngamin, dagiti pasurot ni Jesus ita ket magurgura. Pagsasaritaantayo no apay a magurguratayo ken no apay a posible latta ti agbalin a naragsak uray no magurguratayo.

NO APAY A MAGURGURATAYO

2-3. (a) Ania ti maysa a rason no apay a maidaddadanes dagiti pudno a Kristiano? (Juan 16:​2, 3) (b) Ania ti masapul a panangmatmattayo kadagiti bumusbusor?

² Magurguratayo gapu ta agdaydayawtayo ken Jehova. Imbaga ni Jesus maipapan kadagiti mangidadanes ken mangpapatay pay ketdi kadagiti pasurotna: “Saandak nga am-ammo wenno ti Ama.” (Basaen ti Juan 16:​2, 3.) Asino ngamin ti kangrunaan a mangisungsungsong iti pannakabusor ti ili ti Dios? Ni Satanas, “ti dios daytoy a sistema ti bambanag.” (2 Cor. 4:​3, 4) Bulbulsekenna dagiti tattao tapno dida maammuan ti kinapudno maipapan ken Jehova. Im-impluensiaanna met ida a mangbusor kadagidiay mamati ken mangay-ayat iti Dios. (Juan 8:​42-44) Gapu kadagita, ania ngarud ti masapul a panangmatmattayo kadagiti bumusbusor? Gapu ta ammotayon a ni Satanas ti adda iti likudan dagita, saantayo koma a guraen ida.

³ Kitaentayo ti kapadasan ni Pavel.a Aggigian iti pagilian a maiparparit ti trabahotayo. Gapu ta matalek ken Jehova, naaresto, nakabkabil, ken naibartolina iti adu a bulan. Imbagana: “Nalawag kaniak a ni Satanas ken dagiti demoniona ti makagapu a maidaddadanes dagiti agdaydayaw ken Jehova. Ta ti agpayso, awan met a talaga ti personal a problema wenno gura kadatayo dagiti opisial iti pagbaludan. Ar-aramidenda laeng ti trabahoda.” Adda met brother a taga-Croatia a pinarparigat ken minaltrato dagiti nagannakna gapu ta agserserbi ken Jehova. Imbagana: “Naawatak a ti talaga a kabusorko ket ni Satanas, saan ketdi a dagiti nagannakko.”—Efe. 6:12.

4. Ania ti masursurotayo iti ulidan ni Jesus ken iti adalan a ni Esteban? (Kitaen met ti ladawan.)

⁴ Saantayo a kagura dagiti bumusbusor kadatayo. Ti agpayso, kayattayo ida nga ikararagan. (Mat. 5:44) Maipapan iti daytoy, adda masursurotayo ken Jesus ken iti adalan a ni Esteban. Idi a ni Jesus ket inlansa dagiti Romano a soldado iti kayo a pagtutuokan, inkararagna: “Ama, pakawanem ida.” (Luc. 23:34) Impakaasi ni Jesus a pakawanen ni Jehova dagita a soldado a nabilin a mangpapatay kenkuana. Mabalin met a pampanunotenna idi a dagiti tattao a mangipukpukkaw a mapapatay isuna ket sinugsogan laeng dagiti relihioso a bumusbusor kenkuana. Ammo ni Jesus a saan met a talaga nga ammo dagitoy a tattao ti ar-aramidenda. Kasta met la ti inaramid ti adalan a ni Esteban. Impakaasina a pakawanen ni Jehova dagiti mangpapatay kenkuana. (Ara. 7:​58-60) Sinungbatan kadi ni Jehova ti kararag da Jesus ken Esteban? Wen. Kinapudnona, adu kadagiti nangparparigat ken nangpapatay ken Jesus ti nagbabawi idi agangay. Namatida kenkuana ken nagpabautisarda. (Ara. 2:​36-41) Ni met Saulo ti Tarso a maysa a nangaprobar iti pannakapapatay ni Esteban ket nagbalin a Kristiano. Talaga a pinagbabawyanna ti agkakadakes nga inaramidna gapu ta saanna pay laeng idi nga ammo ti ar-aramidenna.—1 Tim. 1:13.

5. Ania ti masursurom iti kapadasan ni César?

⁵ Sungsungbatan ni Jehova dagiti kararagtayo para kadagiti bumusbusor. Kitaentayo ti kapadasan ni César a taga-Venezuela. Kagurgura unay ni tatangna ti kinapudno. Imbaga ni César: “Nagsingpet nga asawa ken ina ni Nanang. Kanayon a ti kapatgan kenkuana ket ti Pagarian. Ngem saanna met a mabaybay-an nga asikasuen ni Tatang. Sinuruannakami nga agkakabsat a masapul a respetuenmi ni Tatang. Insurona met a masapul nga agtulnogkami ken Tatang, malaksid no paritannakamin nga agserbi ken Jehova.” Kalpasan ti sumagmamano a tawen, limmukneng met laengen ti puso ti tatang ni César. Imbaga ni César: “Maysa nga aldaw, idi nalpasak a nagkararag, dinamagko ken Tatang no kayatna nga iyadalak iti Biblia, ket immanamong. Diak pulos mailadawan ti ragsakko iti dayta nga aldaw.” Idi agangay, nagpabautisar ti tatang ni César. Ania ti masursurotayo? Saan met ketdi nga amin a bumusbusor ket agbalbaliw. Ngem mabalin nga adda dagiti agbalbaliw no maobserbaranda ti nadayaw a panagsasao ken ar-aramidtayo. Permi la ketdi ti ragsaktayo no aramidenda dayta! Magagarantayo a makakita no kasano a ni Jehova, ti naasi nga “Ukom ti intero a daga,” iyasidegna dagita a tattao kenkuana.—Gen. 18:25.

6. Sigun iti Marcos 13:​13, ania pay ti sabali a rason a magurguratayo?

⁶ Magurguratayo gapu ta raraementayo ni Jesus. Imbaga ni Jesus a dagiti pudno a Kristiano ket guraen ti amin a tattao ‘gapu iti naganna.’ (Basaen ti Marcos 13:13.) Ania ngamin ti irepresentar ti ‘nagan’ ni Jesus? Irepresentarna ti reputasion ken ti autoridadna kas Ari ti Pagarian ti Dios. Ket dayta ti maysa a rason a gurguraendatayo dagiti tattao. Saantayo ngamin a kas kadakuada nga agtaltalek kadagiti tattao a lider. Ti pagtaltalkantayo ket ni Jesu-Kristo, ti agturay a pinili ni Jehova. Idi 1914, nangrugin nga agturay ni Jesus kas Ari ti Pagarian. Asidegen nga ikkatenna ti amin a dadduma pay a gobierno a saan a mangbigbigbig iti autoridadna.

7-8. Ania pay ti maysa a rason a magurgura ti dadduma nga adipen ni Jehova? (Juan 15:​18-20) (Kitaen met dagiti ladawan.)

⁷ Magurguratayo gapu ta saantayo a tultuladen daytoy a lubong ni Satanas. Inlawlawag ni Jesus a maguranto dagiti pasurotna gapu ta ‘saanda a paset ti lubong.’ (Basaen ti Juan 15:​18-20.) Kas kadagiti immuna a Kristiano, saantayo a tultuladen ti panagpampanunot, ar-aramid, ken panagsasao daytoy a lubong. Gapu iti dayta, adu a kakabsat ti mauy-uyaw iti pagtrabahuan wenno iti eskuelaan. (1 Ped. 4:​3, 4) Ngem anian a ragsaktayo ta adda dagiti dati a bumusbusor a nagbalbaliw ken mangraraemen iti takdertayo.

⁸ Nagsayaat ti kapadasan ni Ignacio a taga-Central America. Idi ages-eskuela pay, masansan a kankantiawan ti titserna gapu ta sursurotenna dagiti nangato nga estandarte ni Jehova iti moral. Ngem idi sakbay nga aggraduar ni Ignacio, dinamag ti titser no kasano a kayana latta a suroten dagiti prinsipio ti Biblia uray no nagadu ti manguy-uyaw kenkuana. Inlawlawag ni Ignacio nga ibilbilangna a proteksionna dagiti linteg ti Dios. Idi kuan, inawisna ti titserna a makigimong. Ket nasdaaw ni Ignacio ta nakigimong ti titserna! Nagustuan ti titser ti ayat nga impakita dagiti kakabsat isu nga intultuloyna ti nakigimong. Idi agangay, gapu ta mayad-adalanen iti Biblia, isuna metten ti naipasango iti ibubusor. Ngem nagtultuloy latta a rimmang-ay agingga a nabautisaran.

9-10. (a) Ania pay ti sabali a rason a naiduma dagiti Kristiano kadagiti adda iti lubong ni Satanas? (b) Ania ti masursurotayo iti ulidan ni apostol Pablo?

⁹ Naidumatayo met kadagiti tattao iti lubong ni Satanas gapu ta neutraltayo no maipapan iti politika ken gubat. (Juan 18:36) Sursurotentayo ti Roma 13:1 nga agbalintayo a managtungpal iti linteg. Ngem kas Kristiano, agtaltalinaedtayo latta a neutral kadagiti isyu iti politika. Saantayo met nga agbotbotos wenno tumartaray iti aniaman a posision iti gobierno. Apay? Ti laeng ngamin supsuportarantayo ket ni Jehova ken ti Pagarianna nga iturturayan ni Kristo. Adu a Saksi ni Jehova ti maibalbalud gapu iti pammatida. Ngem uray no kasta, itultuloyda latta ti mangasaba. Tultuladenda ti ulidan ni apostol Pablo nga adu a tawen a naibalud iti balay ken iti mismo a pagbaludan. (Ara. 24:27; 28:​16, 30) Intultuloyna latta nga inranud ti naimbag a damag kadagiti amin a mayat a dumngeg, agraman kadagiti guardia iti pagbaludan, kadagiti opisial iti korte, kadagiti gobernador, ar-ari, ken posible nga uray pay kadagiti opisial ni Nero nga emperador ti Roma.—Ara. 9:15.

¹⁰ Kasta met la ita. Adu a naibalud a kakabsat ti agtultuloy latta a mangaskasaba kadagiti amin a dumngeg a pakairamanan dagiti hues, opisial ti gobierno, ken guardia. Maysa a brother ti naibalud iti nasurok nga innem a tawen gapu ta nagtalinaed a neutral iti politika. Imbagana a dina ibilang ti pannakaibaludna a kas dusa no di ket asaynment manipud ken Jehova tapno mabirokanna dagiti maikari. Ibilangtayo met a pribilehio no usarennatayo ni Jehova a mangidanon kadagiti tattao iti naimbag a damag! (Col. 4:3) Pagsasaritaantayo itan ti dadduma pay a rason a naragsaktayo latta uray no magurguratayo gapu ta agserserbitayo ken Jehova.

APAY A NARAGSAKTAYO LATTA URAY NO GURAENDATAYO?

11. Apay a ti pannakaidadanes patibkerenna ti pammatitayo? Mangted iti pagarigan.

¹¹ Ammotayo a ti pananggura daytoy a lubong ket kaitungpalan ti padto iti Biblia. Iti kaunaan a padto a nairekord iti Biblia, impakpakauna ni Jehova a ni Satanas ken ti simboliko a kaputotanna, wenno dagiti pasurotna, guraendanto dagiti mangay-ayat ken agserserbi ken Jehova. (Gen. 3:15) Masansan a pinatalgedan ni Jesus dayta a padto kas mabasa kadagiti insurat ti uppat a nangisurat iti Ebanghelio. (Mat. 10:22; Mar. 13:​9-12; Luc. 6:​22, 23; Juan 15:20) Kasta met laeng ti imbaga ti dadduma pay a nangisurat iti Biblia. (2 Tim. 3:12; Sant. 1:2; 1 Ped. 4:​12-14; Jud. 3, 17-19) Isu a no adda pannakaidadanes, saantayo a masdaaw. Imbes ketdi, naragsaktayo ta ammotayo a matungtungpalen dayta a padto ti Biblia. Pammaneknek dayta nga agserserbitayo iti pudno a Dios. Kastoy ti imbaga ti maysa a sister nga aggigian iti maysa a pagilian a maiparparit ti trabahotayo: “Idi indedikarko ti biagko ken Jehova, ammok a maidadanesakto. Isu nga idi addan pannakaidadanes, saanak a nagbuteng wenno nakigtot.” Ti maysa kadagiti adu a bumusbusor kenkuana ket ti mismo nga asawana. Minalmaltratona ken pinuoranna pay ketdi ti Biblia ken dagiti publikasionna. Ngem imbes nga agsanud ti sister gapu iti buteng, bimmileg ketdi ti pammatina. (Heb. 10:39) Imbagana: “Ammok a naipadto nga addanto pannakaidadanes. Namnamaek daytan. Isu nga idi napadasakon dayta, kombinsidoak a daytoy ti pudno a relihion.”

12. Ania ti nakatulong iti maysa a brother idi naidadanes?

¹² Uray no namnamaentayo a maidadanestayo, mabalin a narigatto latta ti agibtur. Imbaga ti maysa a brother ti kapadasanna iti pagbaludan: “No dadduma, madepdepresak, madandanaganak, isu nga isangitko lattan.” Ania ti nakatulong kenkuana? Imbagana: “Kararagak a kararag. No agriingakon iti agsapa, agkararagakon. No met adda maipasango kaniak a problema iti agmalmalem, agkararagak manen. Ken no makapungtotak gapu iti ar-aramiden ti dadduma, mapanak iti CR tapno agkararag.” Pinampanunot met ti brother ti ulidan dagiti agserserbi ken Jehova idi ken ita a nakapagibtur iti pannakaidadanes. Nakatulong dayta kenkuana nga agibtur ken maaddaan iti talna nga inkari ni Jesus kadagiti pasurotna.—Juan 14:27; 16:33.

13. Ania ti makatulong kadatayo a mangparmek iti gura?

¹³ Addaantayo iti ayat a nabilbileg ngem iti gura. Ay-ayaten unay ni Jesus ti Amana iti amin-puso uray idi dandanin mauyos ti biagna. Ay-ayaten met ni Jesus dagiti gagayyemna. (Juan 13:1; 15:13) No addaantayo ti kasta nga ayat para ken Jehova ken para kadagiti kakabsat, nalaklakatayo a maparmek ti gura. Kasano? Pagsasaritaantayo ti ulidan ni apostol Pablo.

14. Ania ti nakatulong ken Pablo nga agmatalek ken Jehova agingga ken patay?

¹⁴ Sakbay la unay a mapapatay ni Pablo, insuratna iti ipatpategna a gayyem a ni Timoteo: “Ti espiritu nga inted ti Dios kadatayo saannatayo a pagbalinen a takrot, no di ket ikkannatayo iti pannakabalin, [ken] ayat.” (2 Tim. 1:7) Ania ti kayat a sawen ni Pablo? Imbagana a no nabileg ti panagayat ti maysa a Kristiano para ken Jehova, situtulok a mangibtur uray kadagiti nakarigrigat a situasion. (2 Tim. 1:8) Isu nga uray ammo ni Pablo a mabalin a mapapatay gapu iti pudno a panagdaydayaw, ti nabileg nga ayatna ken Jehova ti nangpatured kenkuana nga agtalinaed a matalek.—Ara. 20:​22-24.

15. Kasano nga ipakpakita ita dagiti kakabsat ti di managimbubukodan nga ayat? (Kitaen met ti ladawan.)

¹⁵ Ay-ayatentayo la unay dagiti kapammatiantayo nga agtaltalinaed a matalek uray no maidaddadanesda. Adu a kakabsat ti mangipakpakita iti kasta unay a panagayatda kadagiti kapammatianda uray no mabalin a maidadanesda met, kas iti inaramid da Aquila ken Priscila idi inrisgoda ti biagda para ken Pablo. (Roma 16:​3, 4) Kas pagarigan, adu a kakabsat idiay Russia ti mapmapan iti korte tapno paregtaenda dagiti naaresto a kakabsat. Idi nakita ti maysa a naaresto a sister ti nakaad-adu a kakabsat a napan iti korte, naliwliwa unay nga uray la dina payen ammo ti ibagana. Dayta a di managimbubukodan nga ayat dagiti kakabsat ti nangpabileg kenkuana iti tiempo a kasapulanna unay. Naragsaktayo ta addaantayo iti ayat a nabilbileg ngem iti gura!

16. Apay nga imbaga ni apostol Pedro a naragsak dagidiay maidaddadanes gapu iti panagserbida iti Dios? (1 Pedro 4:14)

¹⁶ Ammotayo a maparparagsaktayo ti Dios no ibturantayo ti pananggurada kadatayo. (Basaen ti 1 Pedro 4:14.) Imbaga ni apostol Pedro a naragsak dagidiay agib-ibtur iti pannakaidadanes gapu iti panagserbida iti Dios. Kasano? Ti kasta a pannakaidadanes ket ebidensia nga ‘adda kadatayo ti espiritu ti Dios.’ Ammo ni Pedro ti rikna no ti maysa ket maparparagsakna ti Dios ken ti rikna ti agibtur iti pannakaidadanes. Kalpasan la unay ti Pentecostes 33 C.E., dagiti Judio a polis iti templo inarestoda ni Pedro ken dagiti padana nga apostol gapu iti panangasabada. Ngem situtured nga indepensa ni Pedro ti pammatida. (Ara. 5:​24-29) Isu nga uray no kalpasan a nasapsaplit da Pedro ken dagiti padana nga apostol, saanda a nagsardeng a nangasaba. Naragsakda ketdi ta “naibilangda a maikari a maibabain maigapu iti nagan” ni Jesus. Naragsaktayo met no agib-ibturtayo iti pannakaidadanes.—Ara. 5:​40-42.

17. Ania ti imbaga ni Jesus kadagiti adalanna iti rabii sakbay ti ipapatayna?

¹⁷ Iti rabii sakbay ti ipapatay ni Jesus, imbagana kadagiti adalanna: “Ti mangay-ayat kaniak ayatento ti Amak, ken ayatekto met.” (Juan 14:21) Nagragsakto la ketdin ti agbiag inton awanen ti gura. Agiinnayatton ti amin, ta amintayo ket agserserbin ken Jehova! (2 Tes. 1:​6-8) Bayat nga ur-urayentayo dayta a tiempo, determinadotayo koma a mangpampanunot kadagiti rason no apay a naragsaktayo latta uray no magurguratayo.