Ti Umiso a Panangmatmat Kadagiti Problema

1-2. Ania ti masapul nga aramidentayo tapno maibturantayo dagiti problema? (Kitaen met ti ladawan.)

MAIPASPASANGOKA kadi iti kinaawan hustisia, ibubusor ti pamilia, wenno pannakaidadanes gapu iti pammatim? Adda kadi sakitmo, wenno bumakbaket wenno lumaklakaykan? Wenno naipasangoka iti trahedia, kas koma iti ipapatay ti maysa nga ipatpategmo iti biag? Kas iti adu a kakabsat nga ipatpateg ni Jehova, mabalin a ‘napno’ met ti biagmo iti “riribuk ken ladingit.”—Sal. 90:10.

² Tapno ammotayo no kasano a sanguen dagiti problematayo, masapul nga umiso ti panangmatmattayo kadagita. Apay a napateg dayta? Panunotem daytoy: Imadyinem nga agmanmanehoka. Idi kuan, matantannawagam nga adda kasla nakabalandra iti kalsada. Ania ti aramidem? Agpakannigidka, agpakannawan, agmenor, wenno agsardengka? Tapno ammom ti aramidem, masapul a nalawag a makitam dayta a nakabalandra. Ngem kasano ngay no narugit ti sarming ti luganmo? Sigurado la ketdi a saanmo a makita dayta. Iti umasping a pamay-an, dagiti problematayo ket kas iti nakabalandra iti kalsada. Tapno ammotayo no kasanotayo a sanguen dagita, masapul a kitaentayo ti bambanag a kas iti panangkita ni Jehova. Iti daytoy nga artikulo, pagsasaritaantayo (1) ti umiso a panangmatmat kadagiti problema, (2) no kasano a pagdaksantayo no saan nga umiso ti panangmatmattayo kadagita, ken (3) dagiti aramidentayo tapno mataginayontayo ti umiso a panangmatmat kadagiti problema.

TI UMISO A PANANGMATMAT KADAGITI PROBLEMA

3. Ania ti masapul nga akseptarentayo bayat nga agbibiagtayo iti daytoy dakes a lubong?

³ Saantayo a maliklikan dagiti problema iti daytoy dakes a lubong. Agingga nga imperpektotayo pay laeng ken ni Satanas ti agturturay iti lubong, addanto latta nga adda dagiti problema. Kanayonanna, dandani ngaminen ti panungpalan. Isu nga umad-adu dagiti problema. Dagita ket posible a gapu iti kalamidad wenno iti dakes nga aramid ti tao. (Mat. 24:8; 2 Tim. 3:13) No solbaren ni Jehova ti amin a problema ita, kaslana met laengen tultulongan ni Satanas a mangituray iti daytoy a lubong. Isu nga agingga nga agbibiagtayo pay laeng iti daytoy a sistema, apektadotayo latta kadagiti “kalamidad.”—Ecl. 9:​12, ftn.

4. Ania pay ti maysa a rason a maipaspasango dagiti Kristiano iti rigat?

⁴ Maipasangotayo iti rigat gapu ta agtultulnogtayo ken Jesus. Masansan nga imbaga ni Jesus kadagiti adalanna a maidadanesdanto gapu iti pammatida. (Mat. 24:9; Juan 16:2) No ammotayo daytoy a kinapudno, saan a magunggon ti pammatitayo no maipasangotayo kadagiti rigat. (1 Tes. 3:​3, 4) Ket no agtalinaedtayo a matalek ken Jehova uray kadagiti karirigatan a tiempo, masiguradotayo nga ar-aramidentayo ti umiso ket gunggonaandatayonto da Jehova ken Jesus iti biag nga agnanayon. Kanayonanna, ipakpakitatayo a ni Jehova ti kasayaatan nga agturay. Pampaneknekantayo met nga ulbod ni Satanas. Ibagbaga ngamin ni Satanas nga agserserbi laeng kano dagiti tattao iti Dios gapu kadagiti it-itedna a bendision. Ket tapno mapaneknekan ni Satanas a husto ti ibagbagana, parparigatenna dagiti agdaydayaw ken Jehova. (Job 1:​9-11) Isu a no ibturantayo ti amin a rigat gapu ta ay-ayatentayo ni Jehova, maparagsaktayo ti pusona.—Prov. 27:11.

5. Ania ti masursurotayo iti Eclesiastes 7:​13, 14? (Kitaen met dagiti ladawan.)

⁵ Ipalpalubos ni Jehova dagiti problema. Saan a pulos nga agaramid ni Jehova iti dakes. Saannatayo met a suboken iti dakes a bambanag. (Sant. 1:13) Nupay kasta, insurat ni Ari Solomon a ti “aldaw ti rigat” ket “aramid ti pudno a Dios.” (Basaen ti Eclesiastes 7:​13, 14.) Ania ti kayatna a sawen? Saan nga ibagbaga ni Solomon a ni Jehova ti agar-aramid iti dakes. Imbes ketdi, ibagbagana laeng nga ipalpalubos ni Jehova a mapasamak dayta. Isu nga ania ti masursurotayo iti imbaga ni Solomon? Umuna, masapul nga akseptarentayo ti realidad daytoy a lubong ni Satanas. Addanto dagiti aldaw a nasayaat ti amin, ngem addanto met dagiti aldaw nga adda problematayo. Kadagiti aldaw nga awan problematayo, gundawayantayo dagita nga ipakita ti panagyamantayo iti kinaimbag ti Dios ken ibilangtayo dagita nga aldaw kas regalona. Maikadua, ipalagip kadatayo ti imbaga ni Solomon a ‘saantayo a masigurado ti mapasamak iti masanguanan.’ Isu a ditay ammo no addanto problematayo inton bigat wenno awan. Laglagipentayo a dagiti di ninamnama a problema ket agpadpada a mapadasan ti nalinteg ken ti nakillo.

6. Apay nga ipalpalubos ni Jehova a maipasangotayo kadagiti pakasuotan? (Hebreo 12:​7, 11)

⁶ No umiso ti panangmatmattayo kadagiti pakasuotan, maamiristayo nga isursuronatayo ni Jehova nga agpannuray kenkuana imbes nga iti bagitayo. Ammo ni Jehova ti amin a detalye dagiti pakasuotantayo. Maladingitan no marigrigatantayo ken kanayon a nakasagana a tumulong kadatayo. Isu nga uray no ipalubosna a magnatayo iti ‘kasipngetan,’ itultuloynatayo a kibinen tapno iwanwannatayo. Ipasiguradona met nga ay-ayaten ken papigsaennatayo tapno makapagibturtayo. (Sal. 23:4) Makatulong met dagiti problema tapno makitatayo dagiti pagkapuyan a masapul a balbaliwantayo, ket tulongannatayo ti Dios a mangaramid iti dayta. (Basaen ti Hebreo 12:​7, 11.) Kas pagarigan, nakita ni Jehova a kasapulan ni Job ti ad-adda pay nga agpakumbaba. Saan met ketdi a ni Jehova ti makinggapuanan kadagiti rigat ni Job. (Job 42:​1-6) Ngem impalubos ken inusarna dagita tapno isurona ni Job kadagiti agkakapateg a leksion. Aniaman ngarud a rigat ti ipalubos ni Jehova a mapasarantayo, awan kadagita ti permanente a mangdangran kadatayo. Tulongannatayo a makapagmatalek kenkuana tapno ‘mapagballigiantayo amin dagita.’—Roma 8:​35-39.

7. Apay a posible nga agbalinka latta a naragsak uray no maidaddadaneska gapu iti pammatim?

⁷ Naragsaktayo latta uray no maidaddadanestayo. No maidaddadaneska gapu iti pammatim, dimo koma panunoten a saanmon a maparparagsak ni Jehova. Imbes ketdi, ipakita dayta nga adda kenka ti paborna. (Mat. 5:​10-12) No umiso ti panangmatmatmo iti problema, naragsakka latta. Ibilangmo pay ketdi a pakaidayawan ti pannakaidadanesmo kas maysa a Kristiano, kas iti narikna idi dagiti apostol. (Ara. 5:​40-42) Kanayonanna, mabalin pay ketdi a matulongam ti sabsabali a mangammo iti kinapudno ken ‘mangidaydayaw iti Dios.’ (1 Ped. 2:12) Kas ken Jose, makapagballigika uray madama pay laeng a maipaspasangoka kadagiti problema, saan laeng nga inton nalpasen dagita.—Gen. 39:​3, 23.

8. Ania pay ti makatulong kadatayo nga agibtur?

⁸ Agpatingganto dagiti rigattayo. Ipalagip kadatayo ti kapadasan ni Job nga adda patingga dagiti rigat. Ti agpayso, “ad-adu a bendision ti inted ni Jehova iti maudi a paset ti biag ni Job ngem idi damo.” (Job 42:12) Kasta met laeng kenka. Ikarkari ni Jehova a bendisionannanto ti “maudi a paset” ti biagmo, kayatna a sawen, ti tiempo inton agbiagka iti agnanayon. Ti biagtayto iti baro a lubong ket adayo a nasaysayaat ngem iti nakaab-ababa a biagtayo ita a napno iti rigat. Anian a nagsayaat dayta nga inspirasion ti tunggal maysa kadatayo tapno makapagibturtayo agingga iti panungpalan!—Mat. 24:13.

NO KASANO A PAGDAKSANTAYO TI SAAN NGA UMISO A PANANGMATMAT

9. Kasano a pagdaksantayo no saan nga umiso ti panangmatmattayo kadagiti problema?

⁹ Aniaman a problema ti maipaspasango kadatayo, masapul nga umiso ti panangmatmattayo kadagita tapno saan a kumaro ti situasion. Kas pagarigan, baka pampanunotentayo no dadduma a ni Jehova ti makinggapuanan kadagiti problematayo. Adda idi tiempo a kasta ti narikna ni Job. Impagarupna a ni Jehova ti makinggapuanan kadagiti problemana. Ket gapu iti dayta, ‘inkalinteganna nga isu ti husto imbes a ti Dios.’ (Job 32:2) Kasta met laeng ni Noemi. Idi damo, imbagana a ni Jehova ti makinggapuanan iti rigatna. (Ruth 1:​13, 20, 21) No saan koma a binalbaliwan da Job ken Noemi dagita a di umiso a panangmatmatda, mabalin koma a napukawda ti nasinged a relasionda ken Jehova. (Prov. 19:3) Ngem tinulongan ida ni Jehova a maaddaan iti umiso a panangmatmat kadagiti problemada. Ket kas resultana, binendisionanna ida gapu iti kinamatalekda.

10. No maipasangotayo iti rigat, ania ti mabalin a mapanunottayo?

¹⁰ Uray no siguradotayo a saan a ni Jehova ti makinggapuanan kadagiti rigattayo, baka mangrugin a mapanunottayo no dadduma no talaga met laeng nga ipatpategnatayo. No kasta ti panunotentayo, maibus laeng ti pigsatayo. (Prov. 24:10) Idi naipasango da Ari David ken ni propeta Habakuk iti problema, adda dagiti gundaway a pinagduaduaanda no dengdenggen met laeng ni Jehova ti panagpatulongda. (Sal. 10:1; Hab. 1:2) Ngem saanda a nagsardeng a nagkarkararag ken Jehova. Impasigurado ni Jehova kadagita a matalek a lallaki a tulonganna ida. Kasta met ti aramidenna kenka.—Sal. 10:17.

11. Ania ti posible a mapasamak no saan nga umiso ti panangmatmattayo kadagiti rigat?

¹¹ No saan nga umiso ti panangmatmattayo kadagiti pakarigatan, posible a makigtottayo. Baka ngamin pampanunotentayo a dinto pulos mapasamak dagita kadatayo. (1 Ped. 4:12) Adda masursurotayo iti napasamak kadagiti adalan ni Jesus. Saanda idi a maawatan no apay a masapul a maidadanes iti nakaro ni Jesus. (Luc. 18:​33, 34) Kas pagarigan, uray no inlawlawag metten ni Jesus ken Pedro ti mapasamak kenkuana, imbagana ketdin a saanto nga ipalubos ti Dios nga agrigat. Ammo ni Jesus a no kasta met ti panunotenna, baka saannanto a maaramid ti pagayatan ni Jehova, isu a tinubngarna ni Pedro. (Mar. 8:​31-33) Ket uray idi natayen ni Jesus, narigatan latta dagiti adalanna a mangtarus no apay a napapatay. Ngem inan-anusan latta ida ni Jesus. Idi napagungar, kinasaritana ida. Tinulonganna ida a maaddaan iti umiso a panangmatmat no apay a napasaranna dagita a rigat. Kasano? “Inlawlawagna a naimbag [kadakuada] dagiti Kasuratan.” (Luc. 24:​25-27, 32, 44-48) Idi inutob dagiti adalan dagiti insuro ni Jesus, nakatulong dayta tapno masaganaanda dagiti ibubusor a dandanida idin mapadasan. No usigentayo met dagiti kinapudno iti Biblia, masaganaantayo dagiti rigat.

12. Ania ti mabalin a mariknatayo no saan nga umiso ti panangmatmattayo iti situasiontayo?

¹² No saan nga umiso ti panangmatmattayo iti situasiontayo, baka mariknatayo a kasla narigrigat ti situasiontayo ngem iti aktual a mapaspasamak. Impakita ni Jesus iti ilustrasionna maipapan kadagiti trabahador iti kaubasan a posible a mapasamak dayta. Nagreklamo ti dadduma a trabahador ta impagarupda a saan a patas ti pannakatangdanda. Ngem imbaga ti amo iti maysa kadakuada: “Gayyem, awan ti dakes nga inaramidko kenka.” (Mat. 20:​10-13) Ania ngata ti problema no apay a nagreklamoda? Saan a gapu ta adda mapaspasamak a kinaawan hustisia. Saan la ngamin a husto ti pagarupda. Kasta met laeng ti marikrikna ti dadduma a kakabsat ita. Kas pagarigan, baka marikriknada a kasla mapapaidamanda no saanda a maala ti tartarigagayanda a pribilehio, wenno no kasapulan nga ibbatanda ti dadduma a pribilehioda. Ania ngarud ti makatulong kadatayo tapno maaddaantayo iti umiso a panangmatmat no addatayo iti narigat a situasion?

DAGITI ARAMIDENTAYO NO ADDA PROBLEMA

13. Ania ti mabalin a mapasamak no adda problema?

¹³ Mabalin a pamiliarka kadagiti ibagbaga ti Biblia maipapan kadagiti problema. Baka inranranudmo pay ketdin dagita iti dadduma tapno makayada met dagiti problemada. Ngem no sikan a mismo ti agproblema, posible a marigatankan a maaddaan iti umiso a panangmatmat. Kas pagarigan, baka ipagarupmo a dusdusaennaka ni Jehova wenno saannan a dengdenggen dagiti kararagmo. No mangrugin a mapanunotmo ti kasta, ania dagiti makatulong tapno maaddaanka iti umiso a panangmatmat iti bambanag?

14. Ania ti mabalintayo nga ikararag no agrigrigattayo? (Filipos 4:13)

¹⁴ Agpatulongka ken Jehova. Ibagam ken Jehova ti narigat a situasionmo ken ti talaga a marikriknam. Mabalinmo nga espesipiko nga ikararag kenkuana ti pamay-an a kayatmo a panangtulongna kenka. Mabalinmo met a kiddawen ti nasantuan nga espirituna tapno ikkannaka iti sirib ken bileg nga agibtur. Ngem laglagipem a mabalin a saan a sungbatan ni Jehova ti kararagmo iti pamay-an nga ekspektarem. (Efe. 3:20) Posible met nga usarenna dagiti anghel wenno dagiti kakabsat a tumulong kenka. (Sal. 34:7) Isu nga awatem koma ti aniaman a tulong nga ipapaay ni Jehova. Masiguradom nga ipaayna ti kasapulam a nasantuan nga espirituna tapno makayam ti aniaman a narigat a situasion.—Basaen ti Filipos 4:13.

15. Ania ti makatulong kenka a mangibtur kadagiti problema? (Kitaen met ti ladawan.)

¹⁵ Itultuloymo dagiti naespirituan a rutinam. Aramidem ti amin a kabaelam uray no saanen a kas iti dati ti maar-aramidam. Masapul a punnuem ti panunotmo iti panagpampanunot ti Dios, nangruna kadagiti tiempo ti ‘ladingit ken rigat.’ (Sal. 119:143) Inaldaw a basaem, adalem, ken utobem ti Biblia. Makiramanka met iti ministerio agingga a kabaelam. Atenderam ti amin a gimong ken makipartisiparka. Makilangenka kadagiti kakabsat ken dimo isinsina ti bagim.—Prov. 18:1.

16. Ania dagiti mabalin a pagduaduaantayo no maipasangotayo iti problema, ken kasanotayo a malabanan dagita? (2 Corinto 10:​4, 5)

¹⁶ Labanam ti panagduaduam. No adda problemam, baka masapul nga ibalintuagmo dagiti “natibker ti pannakapaderna” a kapanunotam, agraman ti aniaman a panagduaduam maipapan iti bagim wenno maipapan ken Jehova. (Basaen ti 2 Corinto 10:​4, 5.) Malabanam dagita a panagduadua no usarem ti “pannakaammo iti Dios” a masarakan iti Biblia ken kadagiti publikasion nga ipapaay ti organisasionna. Kas pagarigan, pagduaduaam kadi no maparparagsakmo pay laeng ti Dios? Adalem ti maipapan ken apostol Pablo. Bayat ti ministeriona, naipasango kadagiti nakarigrigat a problema. Ngem dagita ti ad-adda pay a nangpatalged kenkuana a maparparagsakna ni Jehova ken ni Jesus. (2 Cor. 11:​23-27) Pagduaduaam kadi no napakawanen ni Jehova dagiti basol a naaramidam iti napalabas? No wen, ilistam ti amin a teksto a mangipakita a talaga a manangpakawan ni Jehova. (Isa. 43:25) Kalpasanna, basaem ken utobem dagita a teksto. (Sal. 119:97) Adda kadi napasamak kenka a mabalin a pinagduaduaam ti kari ti Dios a protektaranna dagiti matalek nga adipenna? I-research-mo dagiti topiko a mangilawlawag no apay nga ipalpalubos ti Dios ti panagrigrigat ken no kasanonatayo a protprotektaran iti naespirituan aniaman ti mapasamak. (Sal. 91:​9-12) Makatulong met no basaem ti kapadasan dagiti kakabsat a naragsak latta nga agserserbi ken Jehova uray naipasangoda kadagiti nakarigrigat a situasion.a

17. Ania ti masapul nga aramidentayo no adda problema?

¹⁷ Awan kadi ti nadagsen a problemam ita nga aldaw? Agyamanka ken Jehova ken gundawayam a tuladen ti kinaimbagna. (Ecl. 7:14) Ngem no kas pagarigan ta addanto problemam inton bigat, sapay koma ta umisonto latta ti panangmatmatmo iti dayta. Kanayonka nga agtalek a tulongannaka ni Jehova. No aramidem dayta, ‘mangisagana iti dalan a pagruaran tapno maibturam dayta.’ (1 Cor. 10:13) Ngem komusta ngay dagiti kakabsattayo? Kasanotayo ida a matulongan no maipasangoda kadagiti problema? Dayta ti pagsasaritaantayo iti sumaruno nga artikulo.