Tuladentayo “ti Dios ti Amin a Liwliwa”

1. Apay a masapul a liwliwaentayo ti sabsabali?

KASAPULANTAYO amin ti liwliwa ken pammaregta. Ngamin, sigun iti 1 Pedro 1:​6, amintayo ket ‘agsagaba iti nagduduma a pakasuotan.’ No adda problematayo ket adda mangliwliwa kadatayo, saan kadi a naragsaktayo? Isu a no adda ammotayo nga agprobproblema, alistotayo met koma a mangliwliwa kenkuana. (Mat. 7:12) Ipakpakita ni Jehova, ti “Dios ti amin a liwliwa,” no kasano a “maliwliwatayo ti sabsabali iti aniaman a pakasuotanda.” Isu a no tuladentayo ti ulidanna, ‘maliwliwatayo’ met dagiti kakabsat. (2 Cor. 1:​3, 4; 1 Tes. 4:18) Ngem apay nga aramidentayo dayta? Saan a gapu ta obligasiontayo, no di ket gapu ta ay-ayatentayo ida. Iti daytoy nga artikulo, pagsasaritaantayo (1) ti kaipapanan ti liwliwa sigun iti Biblia, (2) no kasanotayo a maliwliwa ti sabsabali, ken (3) dagiti aramidentayo no kasapulantayo ti liwliwa.

TI LIWLIWA SIGUN ITI BIBLIA

2. No dakamaten ti Biblia ti “liwliwa,” ania ti kayatna a sawen?

² Iti Biblia, ti Griego a sao a naipatarus kas “liwliwa” ket mabalin a nalawa ti kaipapananna depende iti konteksto. Mabalin a ti kaipapananna ket “panangparegta,” “panangpabileg,” wenno “panangawis.” (Roma 12:8; kitaen ti study note nga “encourages.”) Ti literal a kaipapanan dayta a sao ket “panangawis iti maysa nga umabay.” Isu a maimadyintayo ti maysa a tao nga agdardaras a mapan iti gayyemna nga agprobproblema tapno tulonganna. Mabalin nga agduduma ti pamay-anna a mangtulong iti gayyemna. Ngem adda siguraduenna: maipaayna ti pudpudno a liwliwa. Kayatna a sawen, maparegta ken mabang-aranna ti gayyemna.

3. Ania ti masursurotayo ken Bernabe? (Kitaen met ti ladawan.)

³ Kitaentayo ti maysa nga ulidan iti Biblia. Impakita ti maysa a Kristiano nga agnagan Jose ti naisangsangayan nga abilidadna a mangparegta ken mangliwliwa. Gapu iti dayta, pinanaganan dagiti apostol iti Bernabe, a kaipapananna, “Anak ti Liwliwa.” (Ara. 4:36) Maibagay la unay kenkuana dayta a nagan nga uray la saanen a nadakamat iti Biblia ti dati a naganna a Jose. Iti agduduma a gundaway, pinaneknekan ni Bernabe ti kaipapanan ti naganna ta kanayon a nakasagana a tumulong kadagiti kapammatianna. Kas pagarigan, idi simmangpet iti Jerusalem ti nabiit pay a nagbalin nga adalan a ni Saulo, kayatna a maam-ammo dagiti adalan sadiay. Ngem mabutengda kenkuana gapu ta ammoda nga adu idi ti indadanesna a kakabsat. Nupay kasta, nagtalek ni Bernabe ken Saulo ket inyam-ammona kadagiti apostol.—Ara. 9:​26-28.

NO KASANOTAYO A MALIWLIWA TI SABSABALI

4. Ania ti maysa kadagiti kasayaatan a pamay-an tapno maliwliwatayo ti sabsabali? (Roma 1:​11, 12)

⁴ Bisitaem ida no posible. Us-usaren ni Jehova dagiti agserserbi kenkuana a mangliwliwa iti dadduma. Kas pagarigan, idi malmalmes iti liday ni propeta Elias, nangibaon ni Jehova iti anghel a mangliwliwa kenkuana. (1 Ar. 19:​4-7) Nabigbig met ni apostol Pablo a dakkel ti epekto ti personal a panangbisitana kadagiti kakabsat tapno paregtaenna ida. (Basaen ti Roma 1:​11, 12.) No bisitaem ti maysa, saanka koma nga agdardaras. Mangiwayaka iti umdas a tiempo para kenkuana. (1 Cor. 16:7) Ngem no saanmo a mabisita iti personal, mabalinmo latta a maliwliwa no tawagam, teksam, suratam, wenno ikkam iti kard. Kayatnaka nga usaren ni Jehova a mangliwliwa iti dadduma. Ngem kayatmo kadi ti agpausar kenkuana?

5. Apay a narigat no dadduma ti mangliwliwa kadagiti kakabsat?

⁵ Gapu ta agbibiagtayon iti maudi nga al-aldaw, rumigatto pay a rumigat ti kasasaad. Isu a namnamaentayo a mabalin a marigatantayto a mangbisita kadagiti kakabsat tapno liwliwaen ida. Makasursurotayo iti ulidan ni Onesiforo a taga-Efeso. Idi naibalud ni Pablo idiay Roma, kayat ni Onesiforo a liwliwaen. Isu a binirokna ni Pablo uray no nakadeldelikado koma dayta ta mabalin a maibalud wenno mapapatay pay ketdi. (2 Tim. 1:​16-18) Kas ken Onesiforo, liwliwaen dagiti kakabsattayo idiay Russia ti maysa ken maysa no maidadanesda gapu iti pammatida. No mabista ti kaso ti maysa a kabsat, mapanda iti korte tapno ipakitada ti suportada uray no ammoda a mabalin met a maarestoda. Kasanoka a makapagsagana tapno matuladmo ti kinaturedda? Makatulong no adalem no kasano a nagtitinnulong dagiti adipen ti Dios idi ken ita iti tiempo ti pannakaidadanes. Adalem met dagiti inaramidda tapno makapagtalinaedda latta a naragsak.

6. Kasanotayo a matulad ni Jehova bayat a liwliwaentayo ti dadduma? (Kitaen met ti ladawan.)

⁶ Denggem ida. Idi agpegpeggad ti biag ni propeta Elias, imbagana ti amin a marikriknana ken Jehova. Siempre, ammon ni Jehova a mabutbuteng unay ni Elias gapu iti kasasaadna. Ngem dimngeg latta a naimbag kenkuana ti nadungngo a Diostayo. Siaanus pay ketdi a dimngeg ni Jehova uray no ulit-uliten ni Elias ti ibagbagana! (1 Ar. 19:​9, 10, 14) Idi met ibagbaga ni propeta Habakuk ti marikriknana gapu iti kinadakes a makitkitana, dimngeg latta ni Jehova ken saan a nagunget, uray pay no kasla kueskuestionaranen ni Habakuk ti autoridadna. (Hab. 1:​2, 3) Ita, dengdenggen met a naimbag ni Jehova dagiti kararagtayo uray pay no ammonan dagiti kasapulantayo. Kasanotayo a matulad ni Jehova? Raemen ken denggentayo a naimbag dagiti kakabsat no agsasaoda. ‘Alistotayo koma a dumngeg’ ken saantayo a bumallaet bayat nga agsasaoda. Uray no adda ibagada a saantayo a magustuan, saantayo koma a makaunget. Ken uray pay no ulit-ulitenda ti ibagada, anusantayo latta a denggen ida.—Sant. 1:19; Ecl. 7:9.

7. Kasanotayo a maammuan no ania dagiti kasapulan ti maysa?

⁷ Ammuem dagiti kasapulanna. Mabasa ni Jehova ti puso ti tao. Ngem saantayo a kabaelan dayta. Nupay kasta, mabalintayo a maammuan no ania ti mangliwliwa iti maysa no dumngegtayo a naimbag kenkuana. Saanmo koma nga ipapan nga ammomon ti kasapulanna gapu laeng ta napadasamon ti mapaspasaranna. Ngamin, agduduma ti situasiontayo. Isu a mangiwayaka iti tiempo a dumngeg a naimbag kenkuana. Agusarka kadagiti nataktika a saludsod tapno mayaonmo ti talaga a marikriknana.—Prov. 20:5.

8. Ania ti inaramid ni Jesus tapno maliwliwa da Marta ken Maria idi natay ni Lazaro? (Kitaen met dagiti ladawan.)

⁸ Kitaentayo ti inaramid ni Jesus tapno maliwliwana da Marta ken Maria idi natay ti kabsatda a ni Lazaro. Nakaladladingitda iti ipapatay ti kabsatda. Ngem agduma ti pamay-an ni Jesus a nangliwliwa kadakuada. Kalpasan a nakisarita kenkuana ni Marta, imbaga ni Jesus ti maipapan iti panagungar ken tinulonganna a tumibker ti pammatina. Ngem idi immay ni Maria nga agsangsangit, awan ti mabasa iti Biblia a dinakamat ni Jesus ti maipapan iti panagungar. Imbes ketdi, nakipagsangit ken Maria ken dinamagna no sadino ti nakaitaneman ni Lazaro. (Juan 11:​20-35) Ania ti masursurotayo? No liwliwaentayo dagiti agsagsagaba, masapul nga ammuentayo dagiti kasapulanda, imbes a maymaysa a pamay-an ti usarentayo a mangliwliwa kadakuada.

9. Kasanotayo nga usaren ti Biblia a mangliwliwa? (Roma 15:​4, 5)

⁹ Usarem ti Biblia. No ‘liwliwaem ti maysa manipud iti Kasuratan,’ matulongam tapno bumileg ti namnamana kadagiti kari ni Jehova. (Basaen ti Roma 15:​4, 5.) Dayta a namnama ti ad-addanto a mangliwliwa ken mangpatibker iti pakinakemna. (Isa. 40:31) Kasanoka a makabirok kadagiti teksto a mausarmo a mangliwliwa? Dadduma a kakabsat ti mangar-aramid iti listaan dagiti teksto a mausardanto a mangliwliwa. Makasarakka kadagiti makatulong a teksto iti publikasion a Dagiti Teksto Para iti Panagbiag kas Kristiano iti topiko a “Liwliwa.” Kiddawem ken Jehova a tulongannaka a mangusar iti Saona iti kasayaatan a pamay-an a mangliwliwa. Ipalagipto ti espirituna dagiti usarem a teksto inton kasapulamon dagita.—Juan 14:26.

10. Apay a masapul a nasingpet ti panagsasaotayo no mangliwliwatayo?

¹⁰ Nasingpet koma ti panagsasaom. No dadduma, maliwliwatayo dagiti gagayyemtayo no tulongantayo ida a mangbalbaliw iti panangmatmatda iti problemada. No dayta ti kasapulan nga aramidem, agpanunotka a naimbag sakbayka nga agsao. Iti kasta, masiguradom a dagiti ibagam ket makaagas, saan ketdi a makasugat. (Prov. 12:18) Ni Jehova ti kasayaatan nga ulidan no maipapan iti dayta. Idi impagarup ni Elias nga isuna laengen ti nabati nga agserserbi ken Jehova ken saan a nagballigi kas propeta ti Dios, tinulongan ni Jehova a mangbalbaliw iti panagpampanunotna. Saan met nga imparupa ni Jehova ken Elias dagiti kamalina. (1 Ar. 19:​15-18) Maaramidmo met dayta no nasingpetka ken no panunotem a naimbag dagiti ibagam. Kas pagarigan, no adda pasetmo wenno no agkomentoka kadagiti gimong, kanayon koma a nasingpet ken positibo ti panagsasaom tapno maparegtam dagiti kakabsat.

11. Ania ti masansan a kasapulan dagiti agrigrigat? (1 Juan 3:18)

¹¹ Mangipaayka iti praktikal a tulong. Malaksid kadagiti makaliwliwa a sasao, kasapulan met dagiti marigrigatan ti praktikal a tulong. (Basaen ti 1 Juan 3:18.) Nagsayaat ti inyulidan ni Bernabe idi inlakona ti dadduma a sanikuana, sa indonarna ti naglakuanna tapno matulongan dagiti kabbaro nga adalan nga agkasapulan. (Ara. 4:​36, 37) Adu a kakabsat ita ti mangtultulad iti ulidan ni Bernabe. Mangipapaayda iti praktikal a tulong kadagiti agkasapulan. Kas pagarigan, nadadael ti balay ni Gabriela a taga-Poland gapu iti layus. Imbagana: “Agkakabbalaykami kadagiti nagannakko. Permi ti buteng ken danagmi. Diak ammo no kasanokami a makabangon manen. Imbag laengen ta immay dagiti kakabsat manipud iti nagduduma a kongregasion. Iti laeng maysa nga aldaw, nagadun ti natarimaanda iti balaymi. Napabpabilegak unay. Kombinsidoak nga us-usaren ni Jehova dagiti kakabsat a mangliwliwa kadagiti marigrigatan.”

12. Kasanom a maliwliwa dagiti padam a Kristiano no simamatalek nga ibturam dagiti pakasuotam?

¹² Ibturam dagiti pakasuotam. Imbaga ni Pablo kadagiti taga-Tesalonica a naliwliwa ken napabileg ta nagtalinaedda latta a matalek uray no maidaddadanesda. Ammona a saan a sayang ti panagbannogna para kadakuada. (1 Tes. 3:​5-8) Isu nga ammo ni Pablo a no agtalinaed a matalek ken Jehova iti laksid dagiti pakasuotan, maliwliwana met dagiti kakabsat, uray dagiti saanna pay a personal a nakita. (Col. 2:​1, 2) Kasta met laeng kadatayo. No makita dagiti kapammatiantayo no kasano a tultulongannatayo ni Jehova nga agibtur kadagiti pakasuotan, maliwliwatayo met ida.

13. Ania ti masapul nga itultuloytayo nga aramiden bayat a liwliwaentayo ti dadduma?

¹³ Agan-anuska. Mabalin a saan a dagus a sumayaat ti rikna dagiti kakabsat a maup-upay uray no ikagkagumaantayo a liwliwaen ida. Ngem ibaga kadatayo ti Kasuratan nga ‘itultuloytayo ti agpipinnaregta.’ Kaipapanan dayta a saan la a mammaminsan nga aramidentayo dayta. (1 Tes. 5:11) Isu nga an-anusantayo ngarud koma a liwliwaen dagiti maup-upay. (1 Tes. 5:14) Siempre, kasapulantayo amin no dadduma ti liwliwa. Ania met ngay ti aramidentayo?

NO KASAPULAM TI LIWLIWA

14-15. Ania ti masapul nga aramidentayo no malidliday wenno madandanagantayo?

¹⁴ Agkararagka ken Jehova. Ipakaasim ken Jehova a tulongannaka no malidlidayan wenno madandanaganka. (Sal. 94:19) Espesipiko koma dagiti kararagmo ken ibagam ti agpaypayso a marikriknam. (Sal. 62:8) Siempre, ammon ni Jehova ti talaga a marikriknam sakbay pay nga agkararagka. Ngem apay nga aramidem latta dayta? Ngamin, ipakpakitam nga agtaltalekka nga ay-ayatennaka ken dengdenggenna dagiti kararagmo. Uray no saan a sungbatan ni Jehova dagiti kararagmo iti pamay-an a kayatmo, namnamaem nga adda nga adda ti aramidenna para kenka. (Mar. 11:24) Ibaga kadatayo ti Filipos 4:​6, 7: “Ipakaammoyo koma iti Dios ti amin a kiddawyo; ket ti talna ti Dios a mangartap iti amin a pannakaawat salaknibannanto ti puso ken isipyo.”

¹⁵ Agpatulongka. Ibagam ti marikriknam iti maysa a gayyemmo a nataengan iti naespirituan wenno iti mapagtalkam a panglakayen. Matulongandaka dagiti kakabsat tapno sumayaat ti riknam ken maipaay ti kasapulam. Ngem baka saanda nga ammo ti marikriknam no saanmo nga ibaga dayta kadakuada. (Prov. 14:10) Mabalinmo pay ketdi a kiddawen a denggendaka a naimbag bayat nga ibagbagam ti kaririknam. Mabalinmo met a damagen dagiti teksto wenno artikulo a nakatulongen kadakuada.

16. Ania ti posible a mapasamak bayat nga ikagkagumaandaka a liwliwaen dagiti kakabsat, ngem ania ti masapul a laglagipem?

¹⁶ Agan-anus ken manangpakawanka koma. Mabalin nga agkamali dagiti kakabsat no ikagkagumaandaka a liwliwaen. Kas pagarigan, baka adda maibaga wenno maaramidda a lallalo pay a mangpakaro iti kaririknam imbes a mangpasayaat. No mapasamak dayta, an-anusam ida. (1 Cor. 13:​4, 7) Laglagipem met ti nadakamat iti Santiago 3:2: “No adda asinoman a saan a maitibkol iti sao, perpekto dayta a tao.” Agpokuska ngarud iti nasayaat a motibo dagiti kakabsat. Ti laeng met kayatda ket matulongandaka. Tantandaanam a “magagaran ti espiritu, ngem nakapuy ti lasag.”—Mat. 26:41.

17. Ania koma ti ikagumaantayo nga aramiden?

¹⁷ Kasapulantayo amin ti liwliwa ken pammaregta ta agbibiagtayon iti maudi nga al-aldaw. Namnamaentayo met nga ad-adda pay a guraendatayo dagiti bumusbusor iti Dios. Ania ngarud ti aramidentayo? Determinadotayo koma a mangaramid iti amin a kabaelantayo a mangliwliwa iti maysa ken maysa.