Dumngegkayo a Naimbag

1-2. (a) Kasano nga ipapaay ni Jehova dagiti naespirituan a kasapulan dagiti adipenna ita? (Salmo 23:​1, 2, 5) (b) Ania ti pagsasaritaantayo iti daytoy nga artikulo?

ITA, nakaad-adu a naespirituan a taraon ti ipapaay ni Jehova kadatayo. Isu a maibagatayo met ti naibaga ni David: “Ni Jehova ti Pastorko. Saanakto nga agkurang iti aniaman.”—Basaen ti Salmo 23:​1, 2, 5.

² Ti maysa a pamay-an a mangipapaay ni Jehova kadagiti naespirituan a taraon ita ket kadagiti gimong iti kongregasion. Kadagiti gimong, masansan a makangngegtayo kadagiti impormasion a pamiliaren kadatayo. Ngem uray no ‘sititibker a naipasdektayon iti kinapudno,’ kasapulantayo latta dagita a pammalagip. (2 Ped. 1:12) Ngem kasanon no maulit-ulit dagiti maadal iti gimong? Marigatanka kadi no kua nga agpokus? Matulongannaka daytoy nga artikulo. Pagsasaritaantayo no apay a masapul a dumngegtayo a naimbag kadagiti gimong. Ammuentayo met dagiti mabalin nga aramiden dagiti agpalpalawag tapno dumngeg a naimbag ti dadduma. Ken adalentayo no kasanotayo a mas makapagpokus kadagiti gimong. Ngem sakbayna, ammuentayo no asino a talaga ti mangisursuro kadatayo.

LAGLAGIPENTAYO A NI JEHOVA TI MANGISURSURO KADATAYO

3. Ania ti us-usaren ni Jehova a mangisuro kadatayo, ken kasano nga us-usaren a naimbag dayta dagiti adipenna no mangisuroda?

³ Us-usaren ni Jehova ti Saona, ti Biblia, a mangisuro kadatayo. (2 Tim. 3:​16, 17) Ammo dayta ni Jesus, isu nga inusarna a naimbag ti Sao ti Dios nga uray la naibaga dagiti dumdumngeg kenkuana: “Nangal-alaan daytoy a tao iti kasta a kinalaingna iti Kasuratan idinto ta saan met a nagadal kadagiti eskuelaan?” (Juan 7:15) Maragragsakan idi dagiti napakumbaba a tattao no ilawlawag ni Jesus ti Sao ti Dios. Kasta met laeng ti inaramid dagiti Kristiano idi umuna a siglo, kas kada apostol Pablo ken Apolos. Kanayon nga usarenda ti Kasuratan no makirinnasonda. (Ara. 17:​2, 3; 18:​24, 28) Kasta met laeng kadatayo ita. Ammotayo a dagiti artikulo, broadcasting, outline, ken video nga us-usarentayo ket naibatay iti Biblia. Adu a damoda ti makigimong ti agbilbilib ta kanayontayo nga usaren ti Biblia kadagiti gimongtayo. Ngamin, dagidiay adda pasetna iti gimong us-usarenda ti Biblia no mangisuroda. Saanda la nga ibasa ti Biblia. Tulonganda pay dagiti dumdumngeg tapno maawatan ken mayaplikarda dayta.—Luc. 24:32.

4. Ania ti kayat a sawen ti “dumngeg” ken “mangipangag”?

⁴ Masansan a mausar iti Biblia dagiti sasao a “dumngeg” ken “mangipangag” a ti kaipapananna ket panagtulnog. Kadagiti gimong, isursuronatayo ni Jehova babaen ti Biblia. Gapu iti dayta, maammuantayo ti pagayatanna, isu a nalaklakatayo nga agtulnog kenkuana. Makapagtalektayo a maragsakan ni Jehova no dumngegtayo kenkuana kadagiti gimong ken iyaplikartayo dagiti masursurotayo.—Prov. 27:11.

APAY A MASAPUL A DUMNGEGTAYO A NAIMBAG KADAGITI GIMONG?

5. Ania ti aramidentayo gapu ta ay-ayatentayo ni Jehova? (Juan 4:​23, 24; 1 Juan 5:3)

⁵ Gapu ta ay-ayatentayo ni Jehova. (Mat. 22:37) No ad-adu ti maammuantayo maipapan ken Jehova, mas ayatentayo met isuna. Dayta ti mangtignay kadatayo nga agtulnog kenkuana, mangyaplikar iti ibagbagana iti Biblia, ken mangidaydayaw kenkuana iti pamay-an a kayatna.—Basaen ti Juan 4:​23, 24; 1 Juan 5:3.

6. Ania ti isursuro ni Jehova kadatayo kadagiti gimong?

⁶ Gapu ta ay-ayatentayo dagiti tattao. (Mat. 22:39) Kadagiti gimongtayo, isursuronatayo ni Jehova no kasanotayo a matulongan dagiti kakabsat ken dagidiay saan pay a makaam-ammo kenkuana. Kas pagarigan, makatulong ti broshur nga Ayatem Dagiti Tattao—Agaramid iti Adalan tapno maipakitatayo dagiti nasayaat a kualidad kadagiti kasarsaritatayo iti ministerio. Marigatanka kadi a mangirugi iti saritaan iti natural a pamay-an? No wen, mayat ngarud no dumngegka a naimbag ken paliiwem no kasano nga ipakita dayta dagiti kakabsat iti paset nga “Agbalin a Mas Epektibo iti Ministerio” iti gimong iti tengnga ti lawas.

7. Apay a masapul nga itultuloytayo ti dumngeg ken Jehova?

⁷ Gapu ta ipatpategtayo ti biag. Kas kadagiti agdaydayaw ken Jehova idi un-unana, masapul nga agtulnogtayo kenkuana tapno naragsaktayo ken agbiagtayo nga agnanayon. (Deut. 32:​44-47) No dumngegtayo kadagiti gimongtayo, maparegtatayo nga agtultuloy nga agibtur bayat nga ur-urayentayo ti baro a lubong. (Roma 8:25) Nakapatpateg nga agtulnogtayo ken Jehova ita. Agbibiagtayo ngaminen iti maudi nga al-aldaw isu a masapul nga agtalinaedtayo a siririing iti naespirituan.—Mat. 24:​42-44; Apoc. 1:3.

NO KASANO A MATULONGANTAYO TI DADDUMA A DUMNGEG A NAIMBAG

8. Apay a masapul nga itultuloy a parang-ayen dagiti agpalpalawag ti panangisuroda?

⁸ Masapul nga itultuloy a parang-ayen dagiti brother ti panangisuroda, nangruna dagiti agpalpalawag. Apay? No isagana a naimbag ti brother ti palawagna ken siguraduenna a naggapu iti Biblia ti isurona, matulonganna dagiti tattao a mangammo iti kinapudno. Matulonganna met dagiti kakabsat nga agtalinaed iti kinapudno. Isu a no adda pasetmo iti gimong, laglagipem a dakkel ti maitulong dayta iti dadduma. Panunotem no kasano a makatulong dagiti pagsasaritaantayo a punto tapno agbalin a nasaysayaat ti panangisurom. Nupay naiturong dagitoy kadagiti agpalpalawag, makatulong met dagitoy iti asinoman a maikkan iti paset.—2 Tim. 4:2; Tito 1:9.

9. Ania dagiti mabalinmo nga aramiden tapno nalaka a maawatan ti palawagmo?

⁹ Urnosem ti panagsasaruno dagiti punto. No agpalpalawagka, kayatmo la ketdi a nalaka a masurotan dagiti agdengdengngeg ti palawagmo. Ngamin, no komplikado wenno adu unay ti puntom, baka saanda a maawatan ti kayatmo nga ilawlawag. Ania ngarud dagiti makatulong kenka tapno naurnos ti palawagmo? Padasem dagitoy: (1) Iti pay laeng rugrugi, ibagamon dagiti kangrunaan a punto iti palawagmo. (2) Saggaysaem nga ilawlawag ti tunggal punto. Ngem adda pay. No nailawlawagmon ti maysa a kangrunaan a punto, agsardengka biit sa ibagam kadagiti agdengdengngeg nga umakarkayon iti sumaruno a punto. (3) Repasuem apagbiit ti tunggal punto iti ngudo ti palawagmo.

10. Apay a napateg a kombinsidoka ken naipapusom ti palawagmo?

¹⁰ Masapul a kombinsidoka ken naipapusom ti palawagmo. No aramidem dayta, sigurado la ketdi a magagaranka nga agpalawag. Mariknanto dayta dagiti agdengdengngeg. (Prov. 2:​4, 5; Ara. 4:20) Ngem ania ti makatulong? Utobem a naimbag dagiti punto ken dagiti teksto iti palawagmo. Malagip pay ti nataenganen a brother a taga-United States ti nangngeganna a palawag idi tin-edyer pay. Imbagana: “Adda idi nagpalawag a nangparegta kadakami a masapul nga utobenmi a naimbag ti Biblia no basbasaenmi dayta. Kombinsido unay iti ibagbagana ken nagsayaat ti panangilawlawagna kadagiti punto. Dayta a palawag ti nangbalbaliw iti biagko. Talaga a mas naipategko ti panagbasa iti Biblia ken nagbalinak a nasingsinged ken Jehova.”

11. Apay a nasayaat a mangibagaka kadagiti makatulong ken espesipiko a suhestion iti palawagmo? (1 Timoteo 4:​13-16)

¹¹ Panunotem ti kasapulan dagiti agdengdengngeg ken mangibagaka kadagiti makatulong a suhestion. Usarem ti Biblia a mangipaay kadagiti espesipiko a pammaregta ken suhestion, imbes a basta mangibagaka laeng kadagiti gagangay nga impormasion nga ammon dagiti agdengdengngeg. Kasta idi ti inaramid ni apostol Pablo. Impaayanna ni Timoteo kadagiti espesipiko a suhestion a makatulong kenkuana nga agtalinaed a nabileg iti naespirituan ken tapno maibaklayna dagiti annongenna idiay Efeso. (Basaen ti 1 Timoteo 4:​13-16.) Ania ti masursurotayo? Nasayaat no panunotem ti kasapulan dagiti agdengdengngeg ken usarem ti palawagmo tapno makitada dagiti praktikal a punto a mayaplikarda iti biagda.

12. Apay a masapul a natural ti panagsaom no agpalpalawagka?

¹² Praktisem iti napigsa ti palawagmo tapno makapagsaoka iti natural a pamay-an. No agpalpalawagka, nasayaat no kasla makisarsarita laeng ti panagsaom imbes nga isuratmo sa basaemto dayta sao por sao. Apay? Ngamin, nalaklakanto a maawatan dagiti agdengdengngeg ti palawagmo ken mas malagipda dayta. Kastoy ti ibaga ti broshur nga Agbalin a Nalaing nga Agbasa ken Mangisuro: “Agsao iti natural a pamay-an ken naimpusuan tapno maipakitam no ania ti riknam iti topiko ken kadagiti agdengdengngeg.” No natural ti panagsaom ken naggapu dayta iti puso, mas agatension dagiti agdengdengngeg kenka. Mas aginteresda met iti isursurom isu a nalaklakadanto nga iyaplikar dagita.

13. Apay a masapul nga agpatulongka iti eksperiensiado ken nalaing nga agpalawag? (Kitaen met ti ladawan.)

¹³ Agpatulongka iti eksperiensiado ken nalaing nga agpalawag. Kasano? Makatulong no itedmo a nasaksakbay iti eksperiensiado nga agpalpalawag ti inaramidmo nga outline. No adda suhestionna, mabalinmo nga iraman dayta iti palawagmo. Mabalinmo met a kiddawen kenkuana a denggenna ti panagpraktismo sa mangipaay kadagiti suhestion tapno maparang-aymo ti panagpalawagmo. (Prov. 1:5) Laglagipentayo nga adda amin “pagkapuyantayo” a saantayo a makitkita no datdatayo laeng. Isu a kasapulantayo ti tulong ti dadduma tapno maammuantayo no ania ti parang-ayentayo iti panagpalawagtayo. Siempre, kayattayo amin ti rumang-ay kas ispiker ken mannursuro. No aramidentayo ti amin a kabaelantayo, matulongantayo dagiti agdengdengngeg a makasursuro ken mangyaplikar kadagiti kinapudno iti Sao ti Dios.a

NO KASANOTAYO A MAS MAKAPAGPOKUS KADAGITI GIMONG

14. Apay a masapul a tuladentayo ti nangisurat iti Salmo 119? (Salmo 119:​24, 111, 167)

¹⁴ Mas makapagpokustayo kadagiti gimong no laglagipentayo a nakapatpateg dagiti pammalagip ni Jehova. Kasapulantayo dagiti pammalagip ti Dios tapno makayatayo dagiti problematayo bayat daytoy “delikado ken narigat a tiempo.” (2 Tim. 3:1) No dadduma, baka mariknatayo a kasla namin-adun a nangngegtayo iti gimong ti isu met la nga impormasion. No kasta, masapul nga ikagumaantayo a tuladen ti panangmatmat ti nangisurat iti Salmo 119 kadagiti pammalagip ti Dios.—Basaen ti Salmo 119:​24, 111, 167.

15. Kasanotayo a maitultuloy a maipateg dagiti naespirituan a taraon a maaw-awattayo kadagiti gimong?

¹⁵ Masapul nga itultuloytayo nga ipateg dagiti naespirituan a taraon a maaw-awattayo kadagiti gimong. Makasursurotayo iti napasamak kadagiti Israelita idiay let-ang idi inikkan ida ni Jehova iti manna. (Ex. 16:​15, 31) Idi damo, sigurado a naap-apresiar dagiti Israelita ti manna. Naggapu ngamin dayta ken Jehova, naimas, ken dayta ti nangbibiag kadakuada. Ngem idi agangay, dadduma ti nauman a mangmangan iti manna iti inaldaw. (Num. 21:5) Ania ti masursurotayo? Ita, dadduma kadagiti mangmangngegantayo kadagiti gimong ket posible a namin-adun a nangngegtayo. Ngem ditay koma pulos ipalubos a bumaba ti apresasiontayo kadagiti naespirituan a taraon. Masapul a bigbigentayo nga aggapgapu amin dagita ken Jehova. Ken daytoy pay. Laglagipentayo nga aniaman a maisursuro kadatayo kadagiti gimong ket isagsagana a naimbag ti matalek nga adipen. Makatulong dagita tapno makaaramidtayo kadagiti nainsiriban a desision ken tapno agbiagtayto iti agnanayon.—Prov. 3:​13, 16-18; Juan 17:3.

16. Ania ti nakatulong iti dadduma a nabayagen nga agserserbi ken Jehova tapno makapagpokusda kadagiti gimong? (Kitaen met ti kahon a “No Kasano ti Dumngeg a Naimbag.”)

¹⁶ Mas makapagpokustayo kadagiti gimong no iyaplikartayo dagiti praktikal a suhestion. Kitaentayo ti nakatulong iti dadduma a nabayagen nga agserserbi ken Jehova tapno mas makapagpokusda kadagiti gimong. Imbaga ni Ashley a nasurok a 30 a tawenen nga agserserbi ken Jehova: “Makatulong kaniak ti panagsagana tapno makapagpokusak iti gimong. No saanak ngamin a nakasagana, marigatanak a sumungbat ken agay-ay-ayam no kua ti panunotko.” Imbaga met ni József a 52 a tawenen nga agserserbi ken Jehova: “Magusgustuak no maulit-ulit a mangngegko ti maysa a topiko iti gimong. Ngamin, kada adda mangngegko a palawag wenno komento maipapan iti isu met la a topiko, adda nga adda ti baro a masursurok.” Innayonna pay: “No kas pagarigan ta saan met a kasdiay kalaing ti agpalawag, ibagbagak no kua iti bagik, ‘Naggapu dayta ken Jehova.’ Isu a mas makapagpokusak no kuan iti ibagbagana imbes nga iti panagpalawagna.”

17. Ania dagiti mabalinmo pay nga aramiden tapno mas makapagpokuska kadagiti gimong? (Kitaen met ti ladawan.)

¹⁷ Dagitoy ti mabalinmo pay nga aramiden tapno mas makapagpokuska iti gimong. (1) Saanmo koma a kaaduen ti mangan sakbay ti gimong tapno saankanto a makaturturog. (2) Sapsapaem ti mapan ken nakabirokka koman iti pagtugawam sakbay a mangrugi ti gimong. (3) I-silent-mo dagiti gadyetmo ken saanmo nga ipalubos a dagita ti mangistorbo kenka bayat ti gimong. (4) Padaanam dagiti maipalawag. (5) Agpokuska iti ispiker. (6) Ag-take note-ka, wenno mabalinmo met ti mangaramid kadagiti simple a drowing para kadagiti kangrunaan a punto. (7) Panunotem a naimbag dagiti teksto ken ti koneksion dagita iti palawag. (8) Isaludsodmo iti bagim, ‘Kasanok ngata a mausar daytoy tapno matulongak ti maysa iti kongregasionmi wenno iti teritoriami?’ (9) Kadagiti asamblea ken kombension, kitaemon ti tema ti tunggal aldaw, dagiti tema ti palawag, ken dagiti nakaibatayan a teksto ti tunggal palawag. (10) Isaganam ti pusom. Agulimekka ken agimdengka a naimbag kadagiti maipatokar a musika ken maipabuya a video presentation sakbay ti programa.

ITULTULOYMO TI DUMNGEG KEN JEHOVA

18. Apay a masapul nga itultuloytayo ti dumngeg kadagiti gimong?

¹⁸ Masapul nga itultuloytayo ti dumngeg kadagiti gimong. No aramidentayo dayta, ipalpalubostayo a ni Jehova ti mangiturong kadatayo “kadagiti dalan ti kinalinteg.” (Sal. 23:3; 31:3) Kasapulantayo unay ti panangiwanwan ni Jehova tapno saantayo a mayaw-awan a kas iti bangka nga iyallo-allon ti nadawel a baybay. Ania ngarud ti masapul nga aramidentayo? ‘Dumngegtayo a naimbag’ ken iyaplikartayo dagiti masursurotayo kadagiti gimong. (Luc. 8:18) Laglagipentayo nga asinoman a dumngeg ken Jehova ket agbalin a naragsak itan ken maaddaanto iti biag nga agnanayon iti masanguanan!—Sal. 119:​2, 14.