Dagiti Iket a Pagkalap idi Tiempo ti Biblia

Mangngalap idi ti dadduma a pasurot ni Jesus. (Mar. 1:​16-20) Agus-usarda iti iket no agkalapda iti Baybay ti Galilea.

Tapno makaaramid ti maysa iti iket, agusar iti lubid wenno lino a linas (linen thread) sa lagaenna dayta. No kayatna a babassit ti makalapna, manglaga iti iket a babassit laeng ti abutna. No met dadakkel ti kayatna a kalapen, manglaga iti iket a dadakkel ti abutna. Dagiti babassit nga iket ket gagangay a nagtimbukel. Maikkan dagita iti padagsen a buli wenno bato tapno lumned. Iti kasta, mapupok ken makalap dagiti ikan. Dagiti met dadakkel nga iket ket maiguyod manipud iti lansad ti danum. Maikkan dagita kadagiti padagsen iti baba ken patapaw a kayo iti ngato.

Nangina idi dagiti pagkalap nga iket. Mabalin a mapigis wenno mapisang dagita no maisalat kadagiti dadakkel a bato iti lansad ti baybay wenno no nakaad-adu nga ikan ti makalap. (Luc. 5:6) Dakamaten ti Biblia ti maipapan kada Santiago ken Juan a “mangtartarimaan iti iketda.” Posible a nagusarda iti dakkel a dagum ken linen thread. (Mat. 4:21) Posible a tarimaanen dagiti mangngalap dagiti iketda kada malpasda nga usaren. Dinakamat met ni Lucas a ‘daldalusan dagiti mangngalap dagiti iketda’ tapno maikkat dagiti naisalat a rugit. (Luc. 5:2) Kalpasanna, ibitinda dagiti iketda tapno mamagaan ken posible a tapno saan a nalaka a marunot wenno maperdi.—Ezek. 47:10.

Inawis ni Jesus dagiti nalaing nga agusar kadagiti iket nga agbalin a “mangngalap iti tattao.”