SALSALUDSOD DAGITI AGBASBASA

Ania a dua a tulag ti tuktukoyen ni apostol Pablo iti Galacia 4:24?

Kalpasan nga imbaga ni apostol Pablo ti relasion ni Abraham kada Sara ken Hagar, imbagana: “Maibilang dagitoy a bambanag kas simboliko a drama; ta dagitoy a babbai kaipapananna ti dua a tulag.” (Gal. 4:​22-24) Ti pannakaawattayo idi ket dagitoy a dua a tulag ket ti Linteg ti tulag ken ti baro a tulag. Ngem kalpasan a naadal manen a naimbag dagitoy a bersikulo, patientayo a masapul a mabalbaliwan ti pannakaawattayo. Agparang a ti tuktukoyen ni Pablo ket ti Abrahamiko a tulag, saan a ti baro a tulag. Kasano a kasta? Kitaentayo ti dadduma a rason.a

Inlawlawag ni Pablo a ni Hagar a maysa nga adipen a babai ket konektado iti Bantay Sinai. (Gal. 4:25) Ni Hagar kaipapananna ti Linteg ti tulag a naited idiay Bantay Sinai idi 1513 B.C.E. (Ex. 19:​5, 6) Imperpekto dagiti Judio. Saanda a naan-anay a masurot ti Linteg, isu a dayta koma ti nangipalagip kadakuada nga adipen ida ti basol. Makatulong met dayta a tulag iti nasion ti Israel tapno maammuanda no asino ti Mesias. Ngamin, isuna laeng ti tao a naan-anay a makasurot iti Linteg. Idi naisakripision ti Mesias ti perpekto a biagna, nawayawayaanen dagiti imperpekto a tattao iti basol ken ipapatay. (Gal. 3:​19, 24, 25) Idi naitungpalen ni Jesus ti panggep ti Dios, nagpatinggan ti Linteg.—Roma 10:4.

Pinagduma ni Pablo ni Hagar ken ni Sara, “ti siwayawaya a babai” a nagpasngay “babaen ti kari.” (Gal. 4:23) Dayta a kari ket ti Abrahamiko a tulag. (Gal. 3:29; 4:​28, 30) Mabasa dayta iti Genesis 22:18: “Babaen ti kaputotam [kaputotan ni Abraham], mabendisionanto ti amin a nasion iti daga gapu ta tinungpalmo ti bilinko.”

Dayta a tulag a naikari ken Abraham ket mangted iti ad-adu pay nga impormasion maipapan iti kari ni Jehova idiay Eden. (Gen. 3:15) Ipakitana a ti naipadto a “kaputotan” ket aggapu iti kaputotan ni Abraham. Inlawlawag ni Pablo a daytoy a “kaputotan” ket kangrunaanna a tumukoy ken Jesu-Kristo. Ngem karaman met iti daytoy a piguratibo a kaputotan dagiti ‘kukua ni Kristo,’ ti 144,000 a makipagturayto kenkuana iti Pagarianna. (Gal. 3:​16, 29; Apoc. 14:​1-3) Kas kaitungpalan ti kari ti Dios ken Abraham, makaawatto iti adu a bendision dagidiay mamati ken agtulnog ken Jesus.

Apay nga inusar ni Pablo daytoy a “simboliko a drama”? Impakitana a no itultuloy dagiti Judio idi panawenna a suroten ti Linteg, agtultuloy nga agbalinda nga adipen a kas ken Hagar. Ngem no awatenda ti kangrunaan a “kaputotan” ni Abraham a ni Jesu-Kristo, mawayawayaanda a kas ken Sara. Kayatna a sawen, mawayawayaanda manipud iti basol ken ipapatay. (Juan 8:​32-34) No saanda nga awaten ni Jesus, kaipapananna a saanda a naawatan ti kangrunaan a panggep ti Linteg ti tulag. Ania dayta? Tapno maiturongda iti Kristo.

Idi sinuratan ni Pablo dagiti Kristiano idiay Galacia, adu kadakuada ti saan a Judio ken saanda a pulos sinurot ti Linteg. Ipappapilit ti dadduma a mangsursurot iti Judaismo a masapul a suroten dagiti Gentil a Kristiano ti Linteg, a pakairamanan ti panagpakugit. Ngem inkalintegan ni Pablo nga awan serserbina no ‘agpaadipenda’ manen iti Linteg ta ‘nawayawayaandan’ idi inawatda ti Kristo.—Gal. 5:​1, 10-14.